ຂະບວນລົດໄຟທ່ອງທ່ຽວເຊື່ອມຕໍ່ລະຫວ່າງແຂວງ ເທື່ອທຽນເຫວ໊ ກັບນະຄອນດ່າໜັງ ໃຊ້ເວລາປະມານ 3 ຊົ່ວໂມງ

    ແຕ່ລະວັນບໍລິສັດໃຫຍ່ທາງລົດໄຟ ຫວຽດນາມ ໄດ້ມີສອງຂະບວນລົດໄຟໝາຍເລກ HD1/2 ແລະ HD3/4 ລະຫວ່າງ ເຫວ໊ - ດ່າໜັງ. ໃນເບື່ອງຕົ້ນຂະບວນລົດໄຟທ່ອງທ່ຽວລວມມີ 5 ຕູ້ລົດໄຟທີ່ປະກອບເຄື່ອງປັບອາກາດ ແລະ ໜຶ່ງຕູ້ຮັບໃຊ້ແຂກທ່ອງທ່ຽວດ້ວຍບັນດາເຍື່ອງອາຫານຂອງເຫວ໊, ດ່າໜັງ ແລະ ມີລາຍການສະແດງຂັບກາເຫວ໊. ນາງ ຮວ່າງຮວ່າບິ່ງ ແຂກທ່ອງທ່ຽວທີ່ໄດ້ຂີ່ລົດໄຟດັ່ງກ່າວໃຫ້ຮູ້ວ່າ:

 “ເມື່ອຂີ່ລົດໄຟ ຂ້າພະເຈົ້າກໍ່ຮູ້ສຶກມີຄວາມສະບາຍໃຈ ໄດ້ໂອ້ລົມກັບທຸກໆຄົນ. ເມື່ອໄປຮອດລັງໂກ ຂ້າພະເຈົ້າ ແລະ ທຸກໆຄົນໄດ້ລົງຖ່າຍຮູບເປັນທີ່ລະນຶກ. ເມື່ອເດີນຜ່ານກິ່ວຫ໋າຍເວິນ ທີ່ງົດງາມ ກໍ່ເຮັດໃຫ້ທຸກໆຄົນຮູ້ສຶກປະທັບໃຈເມື່ອຂີ່ລົດໄຟ”.

ດ້ວຍເວລາຂີ່ລົດໄຟປະມານ 3 ຊົ່ວໂມງ, ຂະບວນລົດໄຟຈະນຳແຂກທ່ອງທ່ຽວເດີນຜ່ານກິ່ວຫ໋າຍເວິນ. ແຂກທ່ອງທ່ຽວຈະໄດ້ຕ້ອນຮັບແສງອາລຸນໃໝ່ ເມື່ອດວຕາເວັນຂຶ້ນຢ້ຽມຊົມທິວທັດຍາມດວງຕາເວັນຕົກຢູ່ ອ່າວລັງໂກ ເຊິ່ງແມ່ນອ່າວທະເລງາມທີ່ສຸດໃນໂລກ. ນາງ ໂຮ່ທິເກິ໋ມຫ່ຽນ ແຂກທ່ອງທ່ຽວຂີ່ລົດໄຟດັ່ງກ່າວ ເປີດເຜີຍວ່າ:

 “ຂ້າພະເຈົ້າຮູ້ສຶກມີຄວາມປະທັບໃຈທີ່ສຸດ ເມື່ອໄດ້ຢ້ຽມຊົມທິວທັດຢູ່ລັງໂກ ແລະ ກິ່ວຫ໋າຍເວິນ. ພາຍຫຼັງການເດີນທາງທ່ອທ່ຽວນີ້ ຂ້າພະເຈົ້າຈະກັບເມືອເຮັດກຣິບວີດີໂອສັ້ນ ຫຼື ຈະມີບົດຂຽນເພື່ອໂຄສະນາທາງເຟດບຸກ ຫຼື ຕິກຕ໊ອກ ຂອງຕົນ”.

ພາຍຫຼັງສິ້ນສຸດແຕ່ລະໄລຍະທາງຂອງຂະບວນລົດໄຟ, ຢູ່ຕາມສະຖານີລົດໄຟ ບັນດາທ້ອງຖິ່ນກໍ່ໄດ້ຈັດແຈງລະບົບລົດຖີບໃຫ້ເຊົ່າໂດຍອັດຕະໂນມັດ ດ້ວຍຮູບການກວດລະຫັດ QR ເພື່ອຮັບໃຊ້ແຂກທ່ອງທ່ຽວໄປຢ້ຽມຊົມທັດຊະນີຍະພາບ. ພິເສດແຂວງ ເທື່ອທຽນເຫວ໊ ຍັງນຳໃຊ້ນະໂນບາຍໜູນຊ່ວຍຫຼຸດຜ່ອນລາຄາໃຫ້ແກ່ບັນດາອົງການ ສ່ວນບຸກຄົນ ເມື່ອຢ້ຽມຊົມສະຖານທີ່ຕ່າງໆຢູ່ ເຫວ໊. ທ່ານ ຫງວຽນວັນຟຸກ ຫົວໜ້າພະແນກທ່ອງທ່ຽວແຂວງ ເທື່ອທຽນເຫວ໊ ໃຫ້ຮູ້ວ່າ:

 “ຂະບວນລົດໄຟທ່ອງທ່ຽວສາມາດຕອບສະໜອງຄວາມຕ້ອງການໄປມາຂອງປະຊາຊົນ ແຂກທ່ອງທ່ຽວສ່ວນຫຼາຍຂອງສອງທ້ອງຖິ່ນ ເຫວ໊ ແລະ ດ່າໜັງ. ໃນໄລຍະທີ່ຈະມາເຖິງຂະແໜງທ່ອງທ່ຽວຂອງສອງທ້ອງຖິ່ນຈະເຮັດວຽກກັບວິສາຫະກິດທ້ອງທ່ຽວເພື່ອສ້າງບັນດາຜະລິດຕະພັນທ່ອງທ່ຽວທີ່ກ່ຽວຂ້ອງເຖິງຂະບວນລົດໄຟດັ່ງກ່າວ”.

ປັດຈຸບັນບໍລິສັດໃຫຍ່ທາງລົດໄຟ ຫວຽດນາມ ພວມສົມທົບກັບບັນດາທ້ອງຖິ່ນມຸ່ງໄປສູ່ການພັດທະນາຂະບວນລົດໄຟທ່ອງທ່ຽວລະດັບຫຼູຫຼາ ເຊື່ອມຕໍ່ລະຫວ່າງຫຼາຍທ້ອງຖິ່ນເຂດແຄວ້ນ. ທ່ານ ດັ້ງສີແມັ້ງ ປະທານສະພາສະມາຊິກບໍລິສັດໃຫຍ່ທາງລົດໄຟ ຫວຽດນາມ ໃຫ້ຮູ້ວ່າ:

 “ພວກຂ້າພະເຈົ້າຫວັງວ່າ ນີ້ຈະແມ່ນກິດຈະກຳສົມທົບລະຫວ່າງການຂົນສົ່ງ ແລະ ພິເສດແມ່ນການທ່ອງທ່ຽວຄົ້ນຫາທິວທັດທຳມະຊາດໃນລະບົບການເດີນທາງຂອງແຂກທ່ອງທ່ຽວ. ລົດໄຟກໍ່ມີຄວາມສາມາດບົ່ມຊ້ອນດ້ານທ່ອງທ່ຽວຫຼາຍຢ່າງ. ບັນດາສະຖານີລົດໄຟ ກໍ່ແມ່ນກິດຈະກຳສະຖາປັດຕະຍະກຳ ແລະ ມໍລະດົກ”.