(vovworld) – ໄປລຽບຕາມຄວາມຍາວຂອງປະເທດກໍ່ເຫັນວ່າ ຢູ່ບ່ອນໃດກໍ່ມີທັດສະນີຍະພາບທີ່ສວຍງາມ. ພູຜາປ່າໄມ້, ແມ່ນ້ຳລຳເຊ, ຕາດນ້ຳ, ຫາດຊາຍທະເລ ຫຼືໝູ່ບ້ານສັນຕິສຸກ… ແຕ່ລະແຫ່ງລ້ວນແຕ່ມີຄວາມງາມສະເພາະ, ທັງໝົດເຫຼົ່ານັ້ນໄດ້ສ້າງເປັນຄວາມງາມຂອງປະເທດຫວຽດນາມ. ໃນລາຍການປະເທດຊາດ ແລະ ຊາວຫວຽດນາມ ພາກນີ້, ເຊີນທ່ານມາຢ້ຽມຢາມລູກນາມ, ເຊິ່ງແມ່ນແຫ່ງທີ່ມີເຂດທ່ອງທ່ຽວຫ້ວຍເມິ້ (Suoi Mo) ທີ່ມີຊື່ສຽງ, ຜ່ານບົດຂຽນຂອງນັກຂ່າວ ໂຕຕ໋ວນ ທີ່ມີຊື່ວ່າ “ຄົ້ນພົບຄວາມງາມຢູ່ລູກນາມ ແຂວງບັກຢາງ“.
ຫ້ວຍເມິ້ຢູ່ລູກນາມ ບັກຢາ
(ພາບ: ອິນເຕີແນດ)
ລູກນາມ ຕັ້ງຢູ່ລະຫວ່າງກາງສາຍພູໃຫຍ່ສອງໜ່ວຍຢູ່ພາກເໜືອຫວຽດນາມ ນັ້ນແມ່ນບັກເຊີນ ແລະ ດົງຈ່ຽວ. ພູສອງໜ໋ວຍນີ້ໄດ້ສ້າງເປັນເຂດລຸ່ມແມ່ນ້ຳລູກນາມ. ນັບແຕ່ດົນນານມາແລ້ວ, ຜູ້ຄົນທັງຫຼາຍໄດ້ຮູ້ຈັກເຖິງຄຳສັບທີ່ວ່າແມ່ນ້ຳລູກ- ພູຮ່ວຽນ. ແມ່ນ້ຳລູກໝາຍເຖິງແມ່ນ້ຳລູກນາມ ແມ່ນແມ່ນ້ຳທີ່ສວຍງາມດັ່ງໃນຝັນ, ທັງເປັນແຫຼ່ງສະໜອງນ້ຳຫົດໃຫ້ທົ່ງນາຢູ່ເຂດລຸ່ມແມ່ນ້ຳ. ສ່ວນພູຮ່ວຽນ ໝາຍເຖິງພູຮ່ວຽນດິງ, ທີ່ຂຶ້ນກັບສາຍພູອຽນຕື, ໃນບໍລິເວນເມືອງລູກນາມ, ແມ່ນແຫ່ງຕິດພັນກັບບັນດາເລື່ອງລາວມະຫັດສະຈັນ. ນັບແຕ່ສະໄໝລາດຊະວົງ ຮຸ່ງ, ລາຊະທິດາ ເກວ໋ມິເນືອງ (Que My Nuong) ໄດ້ມາແຫ່ງນີ້ເພື່ອບຸກເບີກທີ່ດິນ ຕັ້ງບ່ອນຢູ່ອາໄສ, ຂຸດຫ້ວຍນ້ຳເຢັນ, ສອນວິທີປູກມັນດາງ, ເຮັດນາໃຫ້ປະຊາຊົນ. ເພື່ອຈາລຶກບຸນຄູນຂອງລາຊະທິດາ, ປະຊາຊົນໃນເຂດໄດ້ສ້າງວິຫານບູຊາ ແລະ ຕັ້ງຊື່ໃຫ້ຫ້ວຍດັ່ງກ່າວແມ່ນ “ຫ້ວຍເມິ້“. ປະຈຸບັນ, ຢູ່ລຽບຕາມຫ້ວຍເມິ້ ຍັງມີວິຫານ 3 ແຫ່ງຄື: ວິຫານຫ້າ, ວິຫານຈູງ ແລະ ວິຫານເທື້ອງ ເຊິ່ງໄດ້ຮັບການກໍ່ສ້າງເທິງພູ ໂຮ່ບັກ ນັບແຕ່ສະໄໝລາດຊະວົງ ເລ (ແຕ່ສະຕະວັດທີ 15 – 16). ງານບຸນ ຫ້ວຍເມິ້ ແມ່ນໜຶ່ງໃນບັນດາງານບຸນທີ່ເປັນເອກະລັກສະເພາະຂອງເຂດລູກນາມ ແລະ ແຂວງບັກຢາງ. ແຕ່ລະປີ, ນັບແຕ່ວັນທີ 30/3 ເຖິງວັນທີ 2/4 ໄລ່ຕາມຈັນທະປະຕິທິນ, ນັກທ່ອງທ່ຽວທີ່ມາຈາກທຸກສາລະທິດໄດ້ພາກັນໄປນະມັດສະການຢູ່ຕາແສງເຫງັຍເຟືອງ, ເມືອງລູກນາມ ເພື່ອເຂົ້າຮ່ວມງານບຸນຫ້ວຍເມິ້. ຄວາມສັກສິດ ແລະ ຊື່ສຽງຂອງວິຫານເຫຼົ່ານັ້ນໄດ້ດຶງດູດນັກທ່ອງທ່ຽວນັບໝື່ນຄົນມາຖະຫວາຍທູບທຽນ ແລະ ຢ້ຽມຊົມທັດສະນີຍະພາບ. ເອື້ອຍ ກາວທິເວີນ, ຜູ້ນຳທ່ຽວແຂວງບັກຢາງ, ໃຫ້ຮູ້ວ່າ:
“ຢູ່ເບື້ອງຫຼັງວິຫານ, ຫ້ວຍເມິ້ຖືກແບ່ງອອກເປັນ 2 ສາຍ, ສ່ວນຢູ່ເບື້ອງໜ້າວິຫານ, ທັງ 2 ສາຍນີ້ພັດເຕົ້າໂຮມກັນເປັນສາຍດຽວ. ດັ່ງນັ້ນ, ເມື່ອສັງເກດຈາກທາງໄກ ກໍ່ເຫັນວ່າວິຫານຄືດັ່ງຖືກຕັ້ງຢູ່ເທິງເກາະ ແລະ ທັດສະນີຍະພາບຢູ່ວິຫານນີ້ກໍ່ແຕກຕ່າງກັບວິຫານແຫ່ງອື່ນໆ, ມັນພຽງແຕ່ມີສຽງນຳ້ຫ້ວຍໄຫຼ, ສຽງນົກຮ້ອງ ແລະ ສີຂຽວຂອງຕົ້ນໄມ້ໃບຫຍ້າເທົ່ານັ້ນ“
ງານບຸນຫ້ວຍເມິ້
(ພາບ: ອິນເຕີແນດ)
ປະຈຸບັນ, ຖ້າມາຢ້ຽມຢາມ ”ແມ່ນ້ຳລູກ - ພູຮ່ວຽນ” ນັກທ່ອງທ່ຽວມັກລ່ອງເຮືອໄປທ່ຽວຊົມທັດສະນີຍະພາບຢູ່ແມ່ນ້ຳລູກນາມ ກໍ່ຄືໄປຢ້ຽມຢາມທຳມະຊາດທີ່ສວຍງາມແບບມະຫັດສະຈັນຂອງຫ້ວຍເມິ້. ຫ້ວຍເລີ່ມມາຈາກພູອຽນຕື ດ້ວຍ 5 ຕາດໃຫຍ່ທີ່ໄຫຼລົງໜອງນ້ຳ ສ້າງເປັນແຫ່ງອາບນ້ຳທີ່ເຢັນສະບາຍ ແລະ ເປັນບ່ອນພັກຜ່ອນດີທີ່ສຸດ. ມາຢ້ຽມຢາມເຂດທ່ອງທ່ຽວຫ້ວຍເມີ້, ບໍ່ພຽງແຕ່ຕອບສະໜອງຄວາມຕ້ອງການດ້ານວີນຍານຂອງນັກທ່ອງທ່ຽວໄດ້ເທົ່ານັ້ນ, ຫາກຍັງໄດ້ທ່ຽວຊົມທີວທັດທຳມະຊາດທີ່ສວຍງາມ, ໄດ້ສູບອາກາດທີ່ປອດໂປ່ງ ແລະ ເຢັນສະບາຍຂອງເຂດພູຜາປ່າໄມ້. ປ້າ ຫງວຽນທິເຫົ້າ, ນັກທ່ອງທ່ຽວຜູ້ໜຶ່ງ, ໃຫ້ຮູ້ວ່າ:
“ມາແຫ່ງນີ້, ຂ້າພະເຈົ້າຮູ້ສຶກວ່າໄດ້ກັບມາແຫ່ງຈີດວີນຍານ. ພວກຂ້າພະເຈົ້າເຫັນວ່າອາກາດຢູ່ທີ່ນີ້ເຢັນສະບາຍ ແລະ ຮູ້ສຶກວ່າສຸຂະພາບກໍ່ແຂງແຮງກວ່າ ເມື່ອກັບເມືອຜູ້ໃດກໍ່ພາກພູມໃຈ ແລະ ຮູ້ສຶກສະຫວາດສະເຫວີຍທີ່ສຸດ”.
ຫ້ວຍເມິ້ຢູ່ລູກນາມ ບັກຢາ
(ພາບ: ອິນເຕີແນດ)
ພ້ອມກັບບັນດາປູຊະນີຍະສະຖານປະຫວັດສາດ, ຢູ່ເຂດລູກນາມ ຍັງມີບັນດາງານບຸນວັດທະນະທຳ, ງານບຸນແຫ່ງຈິດວີນຍານທີ່ເປັນເອກະລັກສະເພາະຄື: ງານບຸນໝູ່ບ້ານເຟືອງລ້ານ, ງານບຸນຕ່ອງເລັ້ນ (Tong Lenh) ງານບຸນຫ້ວຍເມິ້… ນັ້ນແມ່ນບັນດາປັດໃຈສະດວກ ທີ່ຢັ້ງຢືນໃຫ້ເຫັນທ່າແຮງໃນການພັດທະນາການທ່ອງທ່ຽວ. ທ່ານ ເຢືອງວັນຫອກ, ຫົວໜ້າຄະນະຄຸ້ມຄອງເຂດທ່ອງທ່ຽວ ຫ້ວຍມິ້, ໃຫ້ຮູ້ວ່າ:
“ຫ້ວຍເມິ້ ແມ່ນໜຶ່ງໃນບັນດາເຂດທ່ອງທ່ຽວທີ່ມີຄວາມສາມາດບົ່ມຊ້ອນຫຼາຍຢ່າງຂອງແຂວງບັກຢາງ. ໃນຊຸມປີຜ່ານມາ, ຈຳນວນນັກທ່ອງທ່ຽວມາຢ້ຽມຢາມແຫ່ງນີ້ນັບມື້ນັບຫຼາຍ. ເພື່ອເພີ່ມທະວີວຽກງານໂຄສະນາ, ພວກຂ້າພະເຈົ້າຈະສືບຕໍ່ປັບປຸງພື້ນຖານໂຄງລ່າງ, ໂຄສະນາເຜີຍແຜ່ ແລະ ຮຽກຮ້ອງການລົງທຶນ”.
ດ້ວຍສີຂຽວອຸ່ມທູ່ມຂອງພູຜາປ່າໄມ້, ຄວາມງາມຂອງແມ່ນ້ຳລຳເຊ, ຫ້ວຍນ້ຳ…ຂອງລູກນາມ ເວົ້າສະເພາະ ແລະ ແຂວງບັກຢາງ ເວົ້າລວມ ໄດ້ສ້າງເປັນພາບແຕ້ມທີ່ງາມດັ່ງໃນຝັນ. ຄຸນຄ່າທັງໝົດກ່ຽວກັບທີວທັດທຳມະຊາດ ແລະ ການທ່ອງທ່ຽວ ພວມໄດ້ຮັບການເສີມຂະຫຍາຍຢູ່ບັກຢາງ ໃນປະຈຸບັນ.