(vovworld)- “ຈຸດນັດພົບອັນດັບໜຶ່ງ“ “ເພື່ອນຕ້ອງມາຢ້ຽມຊົມຫໍພິພິທະພັນແຫ່ງນີ້“ “ສ້າງຄວາມຈັບອົກຈັບໃຈໃຫ້ທັງຜູ້ຊາຍອີກ“……ແມ່ນຂໍ້ສັງເກດຂອງແຂກທ່ອງທ່ຽວຕ່າງປະເທດເມື່ອເວົ້າເຖິງຫໍພິພິທະພັນ ແມ່ຍິງຫວຽດນາມ. ແຂກທ່ອງທ່ຽວຖືວ່າ: ຫໍພິພິທະພັນແມ່ຍິງຫວຽດນາມ ໄດ້ຊ່ວຍໃຫ້ເຂົາເຈົ້າມີຄວາມເຂົ້າໃຈ ກ່ວາກ່ຽວກັບແມ່ຍິງຫວຽດນາມ ດ້ວຍບັນດາເລື່ອງລາວທີ່ສ້າງຄວາມຕື້ນຕັນໃຈ. ເຊີນທ່ານພ້ອມກັນ “ຄົ້ນຫາຫໍພິພິທະພັນແມ່ຍິງ ຫວຽດນາມ“ ຜ່ານບົດຂຽນຂອງນັກຂ່າວເລເຟືອງ.
(ພາບ: hanoimoi.com.vn)
ຫໍພິພິທະພັນແມ່ຍິງຫວຽດນາມ ຕັ້ງຢູ່ຖະໜົນລີເທື່ອງກຽດ, ຫ່າງຈາກໜອງຮ່ວານກຽມ ແລະ ຄຸ້ມຖະໜົນເກົ່າຮ່າໂນ້ຍ ປະມານ 500 ແມັດ. ຫໍພິພິທະພັນໄດ້ຮັບການສ້າງຕັ້ງຂຶ້ນເມື່ອປີ 1987 ແລະ ຂຶ້ນກັບສະຫະພັນ ແມ່ຍິງຫວຽດນາມ ດ້ວຍພາລະໜ້າທີ່ຄົ້ນຄ້ວາ, ເກັບຮັກສາ, ວາງສະແດງບັນດາມໍລະດົກທີ່ມີຮູບຮ່າງ ແລະ ບໍ່ມີຮູບຮ່າງກ່ຽວກັບປະຫວັດສາດ, ວັດທະນະທຳຂອງແມ່ຍິງຫວຽດນາມ ກໍ່ຄືສະຫະພັນແມ່ຍິງຫວຽດນາມ. ຫໍພິພິທະພັນແມ່ຍິງຫວຽດນາມ ແມ່ນຕຶກອາຄານ 4 ຊັ້ນ, ຖືກຈັດວາງປຽບເໝືອນປຶ້ມປະຫວັດສາດຫົວໜຶ່ງຊື່ງແຂກມາຊົມສາມາດອ່ານແຕ່ພາກນີ້ຮອດພາກອື່ນດ້ວຍຫຼາຍຫົວເລື່ອງ. ເອື້ອຍເຈິ່ນທິຮ່ວຽນ, ຜູ້ແນະນຳຂອງຫໍພິພິທະພັນແມ່ຍິງຫວຽດນາມ ເວົ້າວ່າ:
“ແຕ່ລະຊັ້ນຂອງອາຄານຄືດັ່ງພາກໜຶ່ງໃນປຶ້ມປະຫວັດສາດດ້ວຍບັນດາຮູບພາບທີ່ຜູ້ຊົມສາມາດເຫັນປະຈັກຕາ, ດ້ວຍເນື້ອໃນອຸດົມສົມບູນ, ຫຼາຍຮູບຫຼາຍສີກ່ຽວກັບແມ່ຍິງຫວຽດນາມ “
(ພາບ: giadinh.net.vn)
ຢູ່ຫ້ອງໂຖງໃນຊັ້ນໜຶ່ງຂອງຫໍພິພິທະພັນ, ມີຮູບປັ້ນທີ່ມີຊື່ວ່າ “ແມ່ຫວຽດນາມ“ ຊື່ງໄດ້ສ້າງຄວາມປະທັບໃຈທີ່ສຸດໃຫ້ແກ່ແຂກມາຊົມ. ນີ້ແມ່ນຮູບປັ້ນໄດ້ຮັບລາງວັນທີ 1 ໃນງານປະກວດປັ້ນຮູບໂດຍຫໍພິພິທະພັນແມ່ຍິງຫວຽດນາມ ສົມທົບກັບສະມາຄົມວິຈິດສິນນະຄອນໂຮ່ຈິມິນ ຈັດຂຶ້ນເມື່ອປີ 1995. ແຕ່ຊັ້ນ 2 ຂຶ້ນໄປແມ່ນເຂດວາງສະແດງດ້ວຍບັນດາຫົວເລື່ອງ: ແມ່ຍິງໃນຄອບຄົວ, ແມ່ຍິງໃນປະຫວັດສາດ, ຊຸດອາພອນຂອງແມ່ຍິງ…ເອື້ອຍເຈິ່ນທິຮ່ວຽນ ແນະນຳວ່າ:
“ໃນເຂດວາງສະແດງແມ່ນຫົວເລື່ອງແມ່ຍິງໃນຄອບຄົວ. ບັນດາວັດຖຸພັນທີ່ນຳມາວາງສະແດງຢູ່ທີ່ນີ້ຖືກຈັດວາງຕາມການເລົ່າເລື່ອງກ່ຽວກັບແມ່ຍິງຫວຽດນາມ ຜູ້ໜຶ່ງນັບແຕ່ເມື່ອເຕີບໃຫ່ຍ, ສ້າງຄອບຄົວ ແລະ ກາຍເປັນຜູ້ເປັນເມຍ, ເປັນແມ່. ດ້ວຍ 3 ເນື້ອໃນຕົ້ນຕໍຄື ການສົມລົດ, ການເກີດລູກ ແລະ ຊີວິດໃນຄອບຄົວ“.
(ພາບ: dantri.com.vn)
ຈຸດສຸມໃນຊັ້ນ 3 ແມ່ນບັນດາຮູບພາບ, ເລື່ອງລາວກ່ຽວກັບແມ່ຍິງຜູ້ມີຄຸນງາມຄວາມດີຕໍ່ປະເທດຊາດໃນປະຫວັດສາດ. ຢູ່ທີ່ນີ້ໄດ້ວາງສະແດງບັນດາວັດຖຸພັນສະແດງໃຫ້ເຫັນຊີວິດທີ່ສະຫງົບສຸກຂອງແມ່ຍິງ ແລະ ບັນດາວັດຖຸພັນໃນໄລຍະສົງຄາມ. ບັນດາຮູບພາບແມ່ຍິງຖືກສັດຕູກັກຂັງ, ສືບສວນ ເຮັດໃຫ້ຜູ້ຊົມສາມາດເຫັນໄດ້ນ້ຳໃຈພິລາດອາດຫານຂອງແມ່ຍິງຫວຽດນາມ. ນອກຈາກນັ້ນຍັງມີບັນດາວັດຖຸພັນຄື: ຈັກພິມດິດເກົ່າ, ຫີບໄມ້ເກົ່າ, ໝວກ ແລະ ເກີບເຮັດດ້ວຍຕິນລົດຂອງເອື້ອຍນ້ອງແມ່ຍິງໃນສະໄໝສົງຄາມ. ເອື້ອຍເຈິ່ນທິຮ່ວຽນ, ຜູ້ແນະນຳຂອງຫໍພິພິທະພັນແມ່ຍິງຫວຽດນາມ ໃຫ້ຮູ້ວ່າ:
“ນີ້ແມ່ນຫ້ອງວາງສະແດງໄດ້ຮັບຄວາມນິຍົມທີ່ສຸດຈາກແຂກຫຼາຍຄົນ, ໂດຍສະເພາະແມ່ນແຂກຕ່າງປະເທດຍ້ອນຄຸນຄ່າມູນເຊື້ອອັນໃຫ່ຍຫຼວງດ້ວຍຮ່ອງຮອຍແຫ່ງໄລຍະປະຫວັດສາດຂອງວັດຖຸພັນ. ຄຽງຄູ່ກັນນັ້ນ, ເຂົາເຈົ້າຍັງມັກເອກະສານບັນທຶກໄວ້, ວັດຖຸພັນຂອງສະຫະພັນແມ່ຍິງຫວຽດນາມ ໃນຕະຫຼອດ 81 ປີແຫ່ງການເຄື່ອນໄຫວ, ບັນດາຂອງຂວັນຂອງແມ່ຍິງປະເທດຕ່າງໆໃນໂລກຝາກມາໃຫ້ ເພື່ອສະໜັບສະໜູນການເຄື່ອນໄຫວຂອງສະຫະພັນແມ່ຍິງຫວຽດນາມ“.
ຢູ່ຊັ້ນ 4, ແຂກບໍ່ພຽງແຕ່ໄດ້ເຫັນປະຈັກຕາບັນດາຊຸດອາພອນປະຈຳເຜົ່າທີ່ເປັນເອກະລັກສະເພາະ ແລະ ຫຼາຍຮູບຫຼາຍແບບຂອງແມ່ຍິງຫວຽດນາມ ເທົ່ານັ້ນ, ຫາກຍັງຮັບຮູ້ໄດ້ຄວາມງາມຂອງແມ່ຍິງຫວຽດນາມ ນຸ່ງຊຸດອາພອນເຫຼົ່ານັ້ນອີກດ້ວຍ. ອ້າຍ Tom Watts ແຂກທ່ອງທ່ຽວມາຈາກໂອຕາລິດ ເວົ້າວ່າ:
“ຊຸດອາພອນຂອງແມ່ຍິງຫວຽດນາມ ໃນສະໄໝກ່ອນແມ່ນຕ່າງກັບປະຈຸບັນຫຼາຍ. ຂ້າພະເຈົ້າບໍ່ຄິດໄດ້ວ່າຫວຽດນາມ ມີຊຸດເສື້ອຍາວທີ່ສວຍງາມຫຼາຍແບບເຊັ່ນນັ້ນ. ເມື່ອເຫັນປະຈັກຕາຊຸດອາພອນງາມຄືແນວນີ້ແມ່ນດີຫຼາຍ“.
ເວັບໄຊທ່ອງທ່ຽວໃຫ່ຍກ່ວາໝູ່ໃນໂລກ TripAdvisor ໄດ້ມອບໃບຢັ້ງຢືນ “ຈຸດນັດພົບທີ່ດູດດື່ມໃຈທີ່ສຸດ“ ໃຫ້ແກ່ຫໍພິພິທະພັນແມ່ຍິງຫວຽດນາມ ໃນປີ 2012 ແລະ 2013. ຫໍພິພິທະພັນແຫ່ງນີ້ຖືກຈັດອັນດັບ 1 ໃນຈຳນວນສະຖານທີ່ທ່ອງທ່ຽວດູດດື່ມໃຈ 80 ແຫ່ງຢູ່ຮ່າໂນ້ຍ. ຫໍພິພິທະພັນແມ່ຍິງຫວຽດນາມ ດ້ວຍການອອກແບບທັນສະໄໝ, ການວາງສະແດງທີ່ຈັບອົກຈັບໃຈ, ມີເນື້ອໃນອຸດົມສົມບຸນນັ້ນໄດ້ນຳມາເຊິ່ງ “ວິໄສທັດທີ່ຊື່ຕົງທີ່ສຸດກ່ຽວກັບແມ່ຍິງຫວຽດນາມ“ ໃຫ້ແກ່ແຂກມາຢ້ຽມຊົມ./.