(vovworld) - ຖ້ຳເຊີນດ່ອງ, ຂຶ້ນກັບເຂດມໍລະດົກທຳມະຊາດໂລກ ປ່າສະຫງວນຟອງຍາ - ແກບ່າງ, ແຂວງກວາງບິ່ງ ໄດ້ຮັບການຄົ້ນພົບ ແລະຕີລາຄາຈາກສະຫະສະມາຄົມພະຈົນໄພຖ້ຳລາຊະອານາຈັກອັງກິດວ່າ ແມ່ນໜຶ່ງໃນບັນດາຖ້ຳທີ່ຊ້ອນແຝງຫຼາຍຄູນຄ່າດ້ານທຳມະຊາດ, ແມ່ນຮູບແຕ້ມ ”ມະຫັດສະຈັນ, ສວຍງາມ ແລະແປກປະຫຼາດ”, ດ້ວຍຫີນນົມຜາທີ່ມີຮູບຊົງແປກປະຫຼາດຫຼາຍຮູບ. ໃນຖ້ຳມີປ່າ, ມີເນື້ອທີ່ອັນກວ້າງໃຫຍ່ເພື່ອສາມາດບັນຈຸອາຄານຫຼັງໜຶ່ງທີ່ສູງສຸດຢູ່ ນິວຢອກ ໄດ້. ນັ້ນແມ່ນການຕີລາຄາກ່ຽວກັບຖ້ຳເຊີນດ່ອງ ທີ່ລົງພິມໃນວາລະສານທີ່ມີຊື່ສຽງ National Geographic.
ຖ້ຳເຊີນດ່ອງຢູ່ແຂວງກວາງບິ່ງ - ຖ້ຳໃຫຍ່ກວ່າໝູ່ຢູ່ໃນໂລກ
(ພາບ: google.com.vn)
|
ຖ້ຳເຊີນດ່ອງ ແມ່ນໜຶ່ງໃນຈຳນວນຖ້ຳ 300 ແຫ່ງ ທີ່ນອນໃນເຂດ ມໍລະດົກທຳມະຊາດໂລກ ປ່າສະຫງວນ ຟອງບາ - ແກບ່າງ ຢູ່ແຂວງ ກວາງບິ່ງ, ໂດຍຊາວທ້ອງຖີ່ນຄົ້ນພົບເມື່ອປີ 1990. ໂລກໄດ້ຮູ້ຈັກເຖິງຖ້ຳແຫ່ງນີ້ ພາຍຫຼັງທີ່ສະຫະສະມາຄົມພະຈົນໄພຖ້ຳ ລາຊະອານາຈັກອັງກິດມາພະຈົນໄພເມື່ອປີ 2009. ທ່ານໂຮ່ແຄງ, ຢູ່ໝູ່ບ້ານ 1 ຟອງຍາ, ຕາແສງເຊີນແຈ້ງ, ເມືອງໂບ໋ແຈກ, ແຂວງກວາງບິ່ງ, ແມ່ນຜູ້ທຳອິດທີ່ໄດ້ຄົ້ນພົບຖ້ຳເຊີນດ່ອງ, ໃຫ້ຮູ້ວ່າ:
”ຂ້າພະເຈົ້າຄົ້ນພົບຖ້ຳເຊີນດ່ອງເມື່ອປີ 1990, ເຖິງປີ 2009 ຂ້າພະເຈົ້າໄດ້ພາທ່ານ Howat Limbir ແລະ ສະຫະສະມາຄົມພະຈົນໄພຖ້ຳ ລາຊະອານາຈັກອັງກິດ ໄປສຳຫຼວດຖ້ຳແຫ່ງນີ້. ປະຈຸບັນ, ຖ້ຳເຊີນດ່ອງໄດ້ກາຍເປັນຖ້ຳບັນລຸມາດຕະຖານສາກົນແລ້ວ, ຂ້າພະເຈົ້າຫວັງວ່າ, ໃນຕໍ່ໜ້າ, ຖ້າອົງການໃດເຂົ້າມາລົງທຶນຂຸດຄົ້ນການທ່ອງທ່ຽວ ຄວນຮັກສາທັດສະນີຍະພາບທຳມະຊາດທີ່ສວຍງາມຢູ່ແຫ່ງນີ້ໄວ້”
ຖ້ຳເຊີນດ່ອງຢູ່ແຂວງກວາງບິ່ງ - ຖ້ຳໃຫຍ່ກວ່າໝູ່ຢູ່ໃນໂລກ
(ພາບ: google.com.vn)
|
ໝາກຜົນແຫ່ງການສຳຫຼວດຂອງສະຫະສະມາຄົມພະຈົນໄພຖ້ຳ ລາຊະອານາຈັກອັງກິດ ໄດ້ສະແດງໃຫ້ເຫັນວ່າ, ຖ້ຳເຊີນດ່ອງ ເລີ່ມມີມາກ່ອນນີ້ແຕ່ 2 - 5 ລ້ານປີ. ຖ້ຳກວ້າງ 200 ມ, ສູງ 150 ກວ່າແມດ, ໃນນັ້ນທີ່ບາງບ່ອນສູງກວ່າ 250 ມ, ຄວາມຍາວຂອງຖ້ຳແມ່ນປະມານ 6,5 ກມ. ຖ້ຳເຊີນດ່ອງ ມີລະບົບຫີນນົມຜາ ດ້ວຍຮູບຊົງທີແປກປະຫຼາດຫຼາຍຮູບ, ລະບົບສັດສາວາສິ່ງ, ພືກສາຊາດອຸດົມສົມບຸນ ແລະ ຫຼາຍຮູບຫຼາຍແບບ. ໃນນັ້ນຍັງມີປ່າດົງດິບເຂດຮ້ອນອີກດ້ວຍ. ດ້ວຍຂະໜາດ ແລະ ລັກສະນະອຸດົມສົມບຸນ, ຫຼາຍຮູບຫຼາຍແບບນີ້, ຖ້ຳເຊີນດ່ອງໄດ້ລື່ນກາຍຖ້ຳ Deer ຢູ່ປ່າສະຫງວນ Gunung Mulu ຂອງມາເລເຊຍ, ກາຍເປັນຖ້ຳທຳມະຊາດໃຫຍ່ກວ່າໝູ່ຢູ່ໃນໂລກ. ທ່ານ Howat Limbir, ສະຫະສະມາຄົມພະຈົນໄພຖ້ຳ ລາຊະອານາຈັກອັງກິດ, ຕີລາຄາວ່າ:
”ຄວາມຮູ້ສຶກຂອງຂ້າພະເຈົ້າ ແມ່ນຄົ້ນພົບຖ້ຳເຊີນດ່ອງ ເຊິ່ງແມ່ນໜຶ່ງໃນບັນດາຖ້ຳໃຫຍ່ກວ່າໝູ່ຢູ່ໂລກ ທີ່ເຊື່ອມຕໍ່ຈາກແຂວງກວາງບິ່ງຂອງຫວຽດນາມ ກັບປະເທດລາວ. ນີ້ແມ່ນຖ້ຳທີ່ຍັງມີຄວາມເລິກລັບຫຼາຍຢ່າງຄວນສືບຕໍ່ໄດ້ຮັບການຄົ້ນພົບ ແລະ ຄົ້ນຄ້ວາ. ພວກຂ້າພະເຈົ້າຫວັງວ່າ ຈະສືບຕໍ່ຊອກເຫັນຫຼາຍສິ່ງມະຫັດສະຈັນກວ່າຢູ່ຖ້ຳເຊີນດ່ອງນີ້”
ຖ້ຳເຊີນດ່ອງຢູ່ແຂວງກວາງບິ່ງ - ຖ້ຳໃຫຍ່ກວ່າໝູ່ຢູ່ໃນໂລກ
(ພາບ: google.com.vn)
|
ໃນການພະຈົນໄພ, ສຳຫຼວດຫວ່າງແລ້ວນີ້ ເມື່ອທ້າຍເດືອນ 2/2012, ທ່ານ Howat Limbir, ໄດ້ຄົ້ຍພົບຖ້ຳໃຫຍ່ແຫ່ງໜຶ່ງແມ່ນຖ້ຳແອ໋ນ ແລະ ຊອກເຫັນສາຍນ້ຳໃຕ້ດິນຢູ່ໃນຖ້ຳເຊີນດ່ອງ. ນີ້ແມ່ນການສຳຫຼວດທີ່ສຳຄັນ ເປັນພື້ນຖານດ້ານວິທະຍາສາດ ເພື່ອຊ່ວຍໃຫ້ແຂວງກວາງບິ່ງ ກຳນົດບັນດາທີ່ຕັ້ງສຳຄັນ ເພື່ອຮຽກຮ້ອງການລົງທຶນຈາກພາຍໃນແລະ ຕ່າງປະເທດ ເພື່ອຂຸດຄົ້ນທັດສະນີຍະພາບໃໝ່ນີ້ໃນອະນາຄົດ. ຜ່ານນັ້ນປະກອບສ່ວນໂຄສະນາພາບພົດຂອງຖ້ຳເຊີນດ່ອງ ເວົ້າສະເພາະ ແລະ ຂະແໜງການທ່ອງທ່ຽວກວາງບິ່ງ ເວົ້າລວມ ເຖິງນັກທ່ອງທ່ຽວພາຍໃນ ແລະ ຕ່າງປະເທດ. ທ່ານ ຫງວຽນວັນຮວຽນ, ຮອງຜູ້ອຳນວຍການປ່າສະຫງວນຟອງຍາ - ແກບ່າງ, ໃຫ້ຮູ້ວ່າ:
”ເພື່ອເຮັດໃຫ້ຖ້ຳເຊີນດ່ອງ ກາຍເປັນຖ້ຳໃຫຍ່ກວ່າໝູ່ຢູ່ໂລກ ພວກເຮົາຕ້ອງສືບຕໍ່ຄົ້ນພົບ, ຄົ້ນຄ້ວາ ເພື່ອຮຽກຮ້ອງການລົງທຶນ. ກ່ອນອື່ນໝົດ, ພວກຂ້າພະເຈົ້າຈະເພີ່ມທະວີວຽກງານຄຸ້ມຄອງ, ສົບທົບກັບບັນດານັກວິທະຍາສາດ ສືບຕໍ່ຄົ້ນພົບ, ຄົ້ນຄ້ວາ ແລະ ຊອກຫາມາດຕະການດີທີ່ສຸດ ແນໃສ່ຄຸ້ມຄອງ, ປົກປັກຮັກສາ ແລະ ຂຸດຄົ້ນຖ້ຳເຊີນດ່ອງນີ້”
ປະຈຸບັນ, ສະຫະສະມາຄົມພະຈົນໄພຖ້ຳ ລາຊະອານາຈັກອັງກິດ ພວມສືບຕໍ່ພະຈົນໄພລະບົບແມ່ນ້ຳໃຕ້ດິນ ແລະ ລະບົບຊີວະນາໆພັນຂອງຖ້ຳເຊີນດ່ອງ. ຫວັງວ່າ, ຜ່ານການພະຈົນໄພຄັ້ງນີ້, ຈະສືບຕໍ່ຄົ້ນພົບສິ່ງມະຫັດສະຈັນ ແລະ ສວຍງາມຂອງຖ້ຳເຊີນດ່ອງ ຕື່ມອີກ, ອັນຈະເປັນພື້ນຖານເພື່ອຢັ້ງຢືນອີກເທື່ອໜຶ່ງວ່າ ເຊີນດ່ອງ ແມ່ນຖ້ຳທຳມະຊາດໃຫຍ່ກວ່າໝູ່ຢູ່ໃນໂລກ.