(vovworld) - ໃນ 6 ເດືອນຕົ້ນປີນີ້, ຕຳຫຼວດນະຄອນໂຮ່ຈີມິນ ໄດ້ສ້າງວິລະກຳອັນໃຫຍ່ຫຼວງເມື່ອມ້າງທຳລາຍຄະດີຢາເສບຕິດກ່ວາ 800 ກໍລະນີ, ຈັບຕົວການເກືອບ 1.600 ຄົນ, ຢືດ heroin 6,4 ກິໂລກຼາມ, ຢາເສບຕິດ 30 ກິໂລກຼາມ ສຳເລັດຜົນ, ຜ່ານນັ້ນໄດ້ປະກອບສ່ວນຍູ້ໄພຢາເສບຕິດໃຫ້ຖອຍໄປ, ປະກອບສ່ວນຮັກສາຄວາມສະຫງົບຂອງນະຄອນ. ເພື່ອບັນລຸໄດ້ຜົນງານດັ່ງກ່າວ, ແມ່ນມີການປະກອບສ່ວນຢ່າງຕັ້ງໜ້າຂອງກອງບັນຊາການຕຳຫຼວດສືບສວນອາດສະຍາກຳຢາເສບຕິດ (PC 47), ເຊິ່ງພົ້ນເດັ່ນແມ່ນພັນໂທ Nguyen Hoang Thang, ຫົວໜ້າ PC 47, ຕຳຫຼວດນະຄອນ ໂຮ່ຈີມິນ.
ພັນໂທ Nguyen Hoang Thang, ຫົວໜ້າ PC 47, ຕຳຫຼວດນະຄອນໂຮ່ຈີມິນ ໄດ້ຮັບການກຳເນີດໃນຄອບຄົວທີ່ມີມູນເຊື້ອປະຕິວັດ, ຍາມໃດອ້າຍກໍ່ມີສະຕິຫຼໍ່ຫຼອມຕົນເອງເພື່ອຕໍ່ສູ້ຕ້ານສິ່ງທີ່ບໍ່ດີ, ໂດຍແມ່ນຜູ້ທີ່ມີຄຸນນະທາດ, ມານະຈິດຂ້າມຜ່ານຄວາມຫຍຸ້ງຍາກ, ສິ່ງກີດຂວາງ ແລະ ເມົາມົວກັບວຽກງານ, ໃນ 24 ປີ ທີ່ເຮັດວຽກໃນຂະແໜງຕຳຫຼວດ, ພັນໂທ Nguyen Hoang Thang ໄດ້ມ້າງທຳລາຍຄະດີໃຫຍ່ທີ່ມີລັກສະນະສັບສົນນັບຮ້ອຍຄະດີ, ເພື່ອປະກອບສ່ວນນຳມາເຊິ່ງຄວາມສະຫງົບໃຫ້ທົ່ວສັງຄົມ. ເມື່ອໂອ້ລົມກັບພວກເຮົາ, ອ້າຍເມົວມົວເລົ່າເລື່ອງກ່ຽວກັບຊຸມເດືອນປີແຫ່ງການມ້າງທຳລາຍຄະດີທີ່ຫຍຸ້ງຍາກລຳບາກ, ດ້ວຍອະນຸສອນທີ່ບໍ່ອາດລືມໄດ້. ອ້າຍໄດ້ເວົ້າຄວາມໃນໃຈສູ່ຟັງວ່າ, ເມື່ອມ້າງທຳລາຍຄະດີແມ່ນຕ້ອງສຸມຈິດສຸມໃຈຈົນບໍ່ຮູ້ສຶກເຫງົານອນອີກ, ຍາມໃດກໍ່ພ້ອມແລ້ວທີ່ຈະເຄື່ອນຍ້າຍໄປສະຖານທີ່ໃໝ່; ຕ້ອງແກ້ໄຂສະຖານະການຢ່າງວ່ອງໄວ, ຖືກກັບເປົ້າໝາຍ ເພື່ອຫຼຸດຜ່ອນຄວາມລົ້ມຫາຍຕາຍຈາກ ແລະ ບໍ່ສົ່ງຜົນສະທ້ອນເຖິງປະຊາຊົນ.
ນັບແຕ່ປີ 2010, ໃນຖານະແມ່ນຫົວໜ້າກອງບັນຊາການຕຳຫຼວດສືບສວນອາດສະຍາກຳຢາເສບຕິດ, ອ້າຍໄດ້ບັນຊາພະນັກງານ, ນັກຮົບນັບຮ້ອຍຄົນປະຕິບັດສຳເລັດໜ້າທີ່, ໃນນັ້ນໄດ້ສ້າງຜົນງານທີ່ດີເດັ່ນຫຼາຍຢ່າງຄືຄະດີ 107 E ສາມາດຈັບອາດສະຍາກອນໄດ້ 4 ຄົນ, ຢາບ້າ 27.000 ເມັດ, ເກຕາມິນ (ketamine) 4,7 ກິໂລກຼາມ, ນີ້ແມ່ນການມ້າງທຳລາຍຄະດີຢາບ້າໃຫຍ່ກວ່າໝູ່ໃນທົ່ວປະເທດເມື່ອປີ 2011. ເພື່ອປະຕິບັດສິ່ງດັ່ງກ່າວໃຫ້ໄດ້, ພັນໂທ Nguyen Hoang Thang ໄດ້ເອົາໃຈໃສ່ທີ່ສຸດເຖິງວຽກງານກໍ່ສ້າງກຳລັງ
”ຂ້າພະເຈົ້າແມ່ນຫົວໜ້າກົມກອງ, ຮັບຜິດຊອບໜ້າທີ່ຕໍ່ຕຳຫຼວດນະຄອນ. ຍາມໃດຂ້າພະເຈົ້າກໍ່ຕິດພັນກັບອ້າຍນ້ອງໃນກົມກອງ, ຮ່ວມກິນ, ຮ່ວມຢູ່, ຮ່ວມດຳລົງຊີວິດ, ຮ່ວມເຮັດວຽກ ແລະ ສ້າງຜົນງານຮ່ວມກັນ, ຖືກົມກອງເປັນຄອບຄົວຂອງຕົນ. ຕ້ອງເຮັດແນວໃດທັງປະຕິບັດສຳເລັດບົດບາດແມ່ນຫົວໜ້າກົມກອງ, ທັງສະແດງໃຫ້ເຫັນຄວາມຮັບຜິດຊອບຕໍ່ພັກ, ຕໍ່ຂະແໜງການ ແລະປະຊາຊົນ”.
ອ້າຍຄິດວ່າວຽກງານນີ້ບໍ່ພຽງແຕ່ແມ່ນໜ້າທີ່, ແມ່ນພັນທະຂອງນັກຮົບຕຳຫຼວດປະຊາຊົນແຕ່ລະຄົນ, ຫາກຍັງແມ່ນການປະກອບສ່ວນເຂົ້າໃນການຍູ້ຢາເສບຕິດໃຫ້ຖອຍໄປອີກດ້ວຍ. ພາຍຫຼັງວາງແຜນການມ້າງທຳລາຍຄະດີແຕ່ລະຄັ້ງ, ອ້າຍລ້ວນແຕ່ໄດ້ຮັບການຊ່ວຍເຫຼືອຢ່າງສຸດຈິດສຸດໃຈ, ກໍ່ຄືໄດ້ຮັບຄວາມໄວ້ເນື້ອເຊື່ອໃຈຈາກຜູ້ຮ່ວມງານເປັນຈຳນວນຫຼວງຫຼາຍ. ພັນໂທ Bui Van Ngan, ຮອງຫົວໜ້າກອງບັນຊາການຕຳຫຼວດປາບປາມຢາເສບຕິດ. ຕຳຫຼວດຕະຄອນໂຮ່ຈີມິນ ໃຫ້ຂໍ້ສັງເກດວ່າ:
”ພັນໂທ Nguyen Hoang Thang ແມ່ນຜູ້ທີ່ມີຄວາມສາມາດບົ່ມຊ້ອນ, ມີຄວາມສຸດຈິດສຸດໃຈກັບວຽກງານສືບສວນ ແລະ ຮູ້ບືນຕົວຂຶ້ນເພື່ອຜ່ານຜ່າຄວາມຫຍຸ້ງຍາກ. ໃນວຽກງານວິຊາການ, ອ້າຍ Thang ແມ່ນຄົນແນ່ວແນ່, ແກ້ໄຂວຽກງານຢ່າງສົມເຫດສົມຜົນ, ດັ່ງນັ້ນຈຶ່ງສ້າງເງື່ອນໄຂ ມ້າງທຳລາຍຄະດີຕ່າງໆສຳເລັດຜົນ”
ບໍ່ພຽງແຕ່ແມ່ນຜູ້ເມົາມົວກັບວຽກງານເທົ່ານັ້ນ, ພັນໂທ Thang ຍັງເປັນອ້າຍ, ເປັນເພື່ອນຮ່ວມກົມກອງຜູ້ສະໜິດສະໜົມກັບອ້າຍນ້ອງໃນກົມກອງອີກດ້ວຍ. ພັນຕີ Son Ngoc Lanh , ຫົວໜ້າກອງເສນາທິການສັງລວມ, ກອງບັນຊາການຕຳຫຼວດສືບສວນອາດສະຍາກຳເວົ້າວ່າ:
”ໃນວິຊາການ, ຫົວໜ້າກອງບັນຊາການ Nguyen Hoang Thang ແມ່ນຄົນເຄັ່ງຂຶມ ແຕ່ໃນຊີວິດປະຈຳວັນ, ອ້າຍ Thang ພັດແມ່ນຜູ້ທີ່ມີຄວາມໄກ້ສິດສະໜິດສະໜົມກັບອ້າຍນ້ອງທີ່ສຸດ. ໃນໂອກາດບຸນປີໃໝ່ຫຼືວັນພັກການ, ອ້າຍເຄີຍໄປຢ້ຽມຢາມຖາມຂ່າວ, ລະດົມກຳລັງໃຈບັນດາຄອບຄົວນັກຮົບ, ພິເສດແມ່ນຄອບຄົວທີ່ປະສົບກັບຄວາມຫຍຸ້ງຍາກເພື່ອຊອກຫາວິທີແກ້ໄຂ... ຈາກນັ້ນສ້າງຄວາມອຸ່ນອ່ຽນໃຈໃຫ້ພະນັກງານນັກຮົບ ປະຕິບັດງານ”.
ເຖິງວ່າໄດ້ຮັບວິລະກຳຫຼາຍຢ່າງກໍ່ຕາມ, ແຕ່ເມື່ອເຕື້ອງເຖິງຜົນງານຂອງຕົນ, ຍາມໃດພັນໂທ Nguyen Hoang Thang ກໍຖືວ່ານັ້ນແມ່ນຜົນງານລວມຂອງໝູ່ຄະນະພະນັກງານນັກຮົບ PC 47, ຫາກບໍ່ແມ່ນຂອງຕົວລາວເອງ. ພັນໂທ Nguyen Hoang Thang ໄດ້ຮັບໃບຍ້ອງຍໍຂອງນາຍົກລັດຖະມົນຕີ 3 ໃບ ແລະໃບຍ້ອງຍໍຂອງກະຊວງຕຳຫຼວດ, ຄະນະກຳມະການປະຊາຊົນນະຄອນ ໂຮ່ຈີມິນຫຼາຍໃບ...
ດ້ວຍບັນດາຜົນງານທີ່ດີເດັ່ນຂອງຕົນ. ຫວ່າງແລ້ວນີ້, ພົນໂທ Nguyen Hoang Thang ໄດ້ຮັບເລືອກເປັນໜຶ່ງໃນຈຳນວນຜູ້ແທນສອງຄົນຂອງນະຄອນເຂົ້າຮ່ວມກອງປະຊຸມໃຫຍ່ແບບຢ່າງທີ່ດີເດັ່ນທົ່ວປະເທດ ເນື່ອງໃນໂອກາດສະເຫຼີມສະຫຼອງ 50 ປີ ແຫ່ງວັນສ້າງຕັ້ງກຳລັງຕຳຫຼວດປະຊາຊົນ.