(vovworld) – ເຈື່ອງຊາ - ແມ່ນເມືອງເກາະດ່ານໜ້າຂອງຫວຽດນາມ, ຢູ່ຫ່າງຈາກດິນຕໍ່ແຜ່ນປະມານ 400 ກມ. ເຖິງວ່າໄກຈາກດິນຕໍ່ແຜ່ນ, ຊີວິດທາງດ້ານວັດຖຸ ແລະ ຈິດໃຈຍັງຂາດເຂີນ, ຫຍຸ້ງຍາກກໍ່ຕາມ, ແຕ່ປະຊາຊົນ, ພະນັກງານນັກຮົບຢູ່ເກາະແຫ່ງນີ້ ຍັງຄົງພະຍາຍາມປົກປັກຮັກສາ ແລະ ກໍ່ສ້າງເມືອງເກາະໃຫ້ນັບມື້ນັບພັດທະນາ. ໃນລາຍການຄົ້ນຫາຫວຽດນາມ ມື້ນີ້, ງອກຟອງ, ນັກຂ່າວວິທະຍຸກະຈາຍສຽງຫວຽດນາມ ຂໍພາທ່ານໄປຢ້ຽມຢາມເມືອງເກາະເຈື່ອງຊາຜ່ານບົດຂຽນ “ມາຢາມເຈື່ອງຊາ”.
ໝູ່ເກາະເຈື່ອງຊາ ຕັ້ງຢູ່ກາງທະເລຕາເວັນອອກ, ທາງທິດຕາເວັນອອກສ່ຽງໃຕ້ຂອງຫວຽດນາມ, ຢູ່ທິດເໜືອແມ່ນໝູ່ເກາະຮ່ວາງຊາ, ທິດໃຕ້ຕິດກັບທະເລມຽນມາ, ບຮູໃນ ແລະ ອິນໂດເນເຊຍ. ໝູ່ເກາະເຈື່ອງຊາ ລວມມີເກາະນ້ອຍໃຫຍ່ ແລະ ຫາດຫີນປະກາລັງນັບ 100 ແຫ່ງ, ດ້ວຍເຂດທະເລທີ່ມີເນື້ອທີ່ປະມານ 410.000 ຕາລາງກິໂລແມດ.
ໝູ່ເກາະເຈື່ອງຊາ
(ພາບ: thanhnien.com.vn)
ພາຍຫຼັງເດີນທາງຂ້າມທະເລໃນເວລາ 2 ວັນ ແລະ ຄືນ, ພວກຂ້າພະເຈົ້າໄດ້ມາຮອດເຈື່ອງຊາ… ຄິດວ່າເຈື່ອງຊາ ມີພຽງຂີ້ຊາຍ, ຫີນປະກາລັງ ພ້ອມກັບແດດກ້າ, ລົມພັດທີ່ຮ້າຍແຮງເທົ່ານັ້ນ, ແຕ່ກົງກັນຂ້າມ, ເຈື່ອງຊາ ເຕັມໄປດ້ວຍສີຂຽວອຸ່ມທູ່ມຂອງຕົ້ນໄມ້ຫຼາຍປະເພດຄືຢູ່ເຂດດິນຕໍ່ແຜ່ນເຊັ່ນ: ຕົ້ນກ້ວຍ, ຕົ້ນໝາກຮຸ່ງ ພ້ອມກັບໄກ່, ເປັດ, ງົວເປັນຝູງ ແລະ ເຮືອນມຸງດິນຂໍຫຼາຍຫຼັງ, ອັນໄດ້ເຮັດໃຫ້ພວກຂ້າພະເຈົ້າຮູ້ສຶກມີຄວາມໃກ້ຊິດ, ສະໜິດສະໜົມ. ບໍ່ພຽງແຕ່ຄືແນວນັ້ນ, ບັນດາວັດວາອາຮາມຢູ່ຕາແສງຕ່າງໆຄື: ເຈື່ອງຊາໃຫຍ່, ຊອງຕື, ຊິງໂຕ່ນ… ກໍ່ໄດ້ຮັບການບຸລະນະ ເພື່ອຮັບໃຊ້ຊີວິດທາງດ້ານຈິດວີນຍານຂອງຊາວປະມົງ. ຢູ່ເກາະຍັງມີອະນຸສະຖານປະທານ ໂຮ່ຈີມິນ, ພ້ອມກັບບັນດາກິດຈະກຳຄື: ຫໍວັດທະນະທຳ, ເຮືອນພັກຖູໂດ… ອີກ. ທັງໝົດເຫຼົ່ານັ້ນໄດ້ສ້າງເປັນຮູບພາບໝູ່ບ້ານສັນຕິສຸກຄືຢູ່ເຂດດິນຕໍ່ແຜ່ນ.
ໃນຍາມແລງ, ໃຕ້ຮົ່ມໄມ້ຂຽວເຢັນສະບາຍຂອງຕົ້ນຫູກວາງ, ພວກເດັກນ້ອຍພ້ອມກັນລະຫຼິ້ນ ແລະ ອ່ານສຸພາສິດຢ່າງເບີກບານມ່ວນຊື່ນ.
“ທະເລກວ້າງໃຫຍ່, ເຈື່ອງຊາ, ຮ່ວາງຊາ, ໝູ່ເກາະແສນຮັກ ຂອງຊາວຫວຽດນາມ”.
ພວກເດັກນ້ອຍພ້ອມກັນລະຫຼິ້ນໃຕ້ຮົ່ມໄມ້ຂຽວເຢັນສະບາຍຂອງຕົ້ນຫູກວາງ
(ພາບ: thanhnien.com.vn)
ປະຈຸບັນ, ຢູ່ໝູ່ເກາະເຈື່ອງຊາ ໄດ້ປະກົດມີກິດຈະກຳໄຟຟ້າ, ທາງຄົມມະນາຄົມ, ໂຮງຮຽນ, ສຸກສາລາ. ກໍ່ເຊັ່ນດຽວກັບເກາະເຈື່ອງຊາໃຫຍ່, ຢູ່ບັນດາຕາແສງຄືອານບາງ, ເຈື່ອງຊາ ຕາເວັນອອກ, ຟານວິງ, ນາມອຽດ, ເຊີນກາ ລ້ວນແຕ່ເຕັມໄປດ້ວຍສີຂຽວຂອງຕົ້ນໄມ້, ສວນຜັກຫຼາຍປະເພດຄື: ຜັກບົ້ງ, ຜັກກາດ, ຜັກບວບ, ຜັກປັງ… ຢູ່ບັນດາເກາະຈົມນ້ຳຄືເກາະດ໋າລາດ, ທ່ວຽນຈ່າຍ, ດ໋າໄຕ, ຕຽນໜື ຕົກຕານ ເຖິງວ່າເນື້ອທີ່ປູກຝັງຖືກຈຳກັດກໍ່ຕາມ ແຕ່ພະນັກງານນັກຮົບຢູ່ທີ່ນີ້ໄດ້ໝູນໃຊ້ເນື້ອທີ່ນ້ອຍໆເພື່ອເຮັດສວນ ແລະ ໃຊ້ກະຖາງເປັນບ່ອນປູກຜັກ. ຍ້ອນເຫດນັ້ນ, ບໍ່ພຽງແຕ່ຢູ່ເຈື່ອງຊາໃຫຍ່ ເທົ່ານັ້ນ, ຫາກໃນທົ່ວເມືອງເກາະເຈື່ອງຊາ, ນັບທັງຜັກ, ຊີ້ນ, ປາທະເລລ້ວນແຕ່ຮັບປະກັນຫຼັກອະນາໄມ, ຕອບສະໜອງອາຫານປະຈຳວັນໃຫ້ແກ່ພະນັກງານ, ນັກຮົບ, ທ່ານ ຫງວຽນວຽດທວນ, ປະທານຄະນະກຳມະການປະຊາຊົນເມືອງເຈື່ອງຊາ, ແຂວງແຄ໋ງຮ່ວາ, ໃຫ້ຮູ້ວ່າ:
“ດ້ວຍຄວາມເອົາໃຈໃສ່ຂອງພັກ, ລັດ ແລະ ປະຊາຊົນທົ່ວປະເທດ. ນັບແຕ່ມີມະຕິກ່ຽວກັບຍຸດທະສາດທະເລຫວຽດນາມເຖິງປີ 2020, ຊີວິດຂອງພະນັກງານນັກຮົບ ແລະ ປະຊາຊົນເມືອງເກາະເຈື່ອງຊາ ໄດ້ຮັບການຍົກສູງຂຶ້ນຢ່າງຈະແຈ້ງ. ປະຈຸບັນ, ບັນດາຕາແສງໃນເມືອງໄດ້ມີໄຟຟ້າພະລັງແສງຕາເວັນ, ພື້ນຖານໂຄງລ່າງ, ບັນດາກິດຈະກຳວັດທະນະທຳໄດ້ຮັບການບຸລະນະສ້ອມແປງ, ຮັບປະກັນຊີວິດທາງດ້ານວັດທະນະທຳເພື່ອໃຫ້ປະຊາຊົນໃນເກາະພັດທະນາເສດຖະກິດສັງຄຄົມ, ດັ່ງນັ້ນຍາມໃດຊີວິດທາງດ້ານວັດຖຸຂອງພະນັກງານນັກຮົບ ແລະ ປະຊາຊົນເມືອງເກາະເຈື່ອງຊາ ກໍ່ໄດ້ຮັບປະກັນ”
ບັນດາຕາແສງໃນເມືອງໄດ້ມີໄຟຟ້າພະລັງແສງຕາເວັນ
(ພາບ: thanhnien.com.vn)
ບັນດາຄອບຄົວປະຊາຊົນຢູ່ເມືອງເກາະເຈື່ອງຊາ ລ້ອນແຕ່ມີເຮືອນຕຶກແບບຖາວອນ ດ້ວຍເຄື່ອງໃຊ້ໄມ້ສອຍໃນການດຳລົງຊີວິດຢ່າງຄົບຖ້ວນ. ສາຍພົວພັນລະຫວ່າງທະຫານ ແລະ ປະຊາຊົນນັບມື້ນັບໃກ້ຊິດສະໜິດສະໜົມ. ພິເສດ, ອຳນາດການປົກຄອງໃນເກາະໄດ້ມີຄວາມເອົາໃຈໃສ່ຊ່ວຍເຫຼືອປະຊາຊົນໃນການຜະລິດ, ປັບປຸງຊີວິດ ກໍ່ຄືເບິ່ງແຍງເຖິງການຮ່ຳຮຽນໃຫ້ລູກຫຼານຂອງເຂົາເຈົ້າອີກດ້ວຍ. ເອື້ອຍ ບູ່ຍທິຍູງ, ຄູສອນຢູ່ເທດສະບານເຈື່ອງຊາ, ເມືອງເຈື່ອງຊາ, ແຂວງແຄ໋ງຮ່ວາ, ໃຫ້ຮູ້ວ່າ:
“ເມື່ອຫາກໍ່ມາດຳລົງຊີວິດຢູ່ເກາະແຫ່ງນີ້ ຊີວິດປະສົບກັບຄວາມຫຍຸ້ງຍາກຫຼາຍ, ແຕ່ປະຈຸບັນຄ່ອຍໆເປັນປົກກະຕິແລ້ວ. ພວກຂ້າພະເຈົ້າຫວັງວ່າ, ເຈື່ອງຊາ ນັບມື້ນັບໃຫຍ່ໂຕ, ສວຍງາມ ແລະ ໄດ້ຮັບການກໍ່ສ້າງຢ່າງໝັ້ນຄົງກວ່າອີກ”.
ສາຍພົວພັນລະຫວ່າງທະຫານ ແລະ ປະຊາຊົນຢູ່ເມືອງເກາະເຈື່ອງຊານັບມື້ນັບໃກ້ຊິດສະໜິດສະໜົມ
(ພາບ: thanhnien.com.vn)
ດ້ວຍນ້ຳໃຈທົ່ວປະເທດເພື່ອເຈື່ອງຊາ. ໃນຊຸມປີຜ່ານມາ, ພ້ອມກັບຄວາມເອົາໃຈໃສ່ຂອງພັກ, ລັດ ແລະ ປະຊາຊົນ, ນັກຮົບໃນທົ່ວປະເທດ, ທະຫານ ແລະ ປະຊາຊົນເຈື່ອງຊາ ຍາມໃດກໍ່ມີຄວາມອູ່ນອ່ຽນໃຈດຳລົງຊີວິດຢູ່ທີ່ຕັ້ງດ່ານໜ້າ, ປະຕິບັດສຳເລັດໜ້າທີ່ປົກປັກຮັກສາອະທິປະໄຕເຂດທະເລໝູ່ເກາະ, ເປັນບ່ອນອີງຢ່າງໝັ້ນຄົງເພື່ອໃຫ້ຊາວປະມົງໄປຫາປາຢູ່ທະເລ; ສົມກັບຄວາມໄວ້ເນື້ອເຊື່ອໃຈ, ການແບ່ງປັນ, ຄວາມເອົາໃຈໃສ່ຢ່າງເລິກເຊິ່ງຈາກປະຊາຊົນໃນທົ່ວປະເທດ.