(vovworld)-ບົນເສັ້ນທາງແຕ່ພາກເໜືອລົງພາກໃຕ້, ເມື່ອໄປຮອດກີ່ວກາ, ໃນບໍລິເວນແຂວງຟູ໋ອຽນ, ແຂກທ່ອງທ່ຽວຈະຮູ້ສຶກແປກປະຫຼາດໃຈເມື່ອເຫັນເຂດພູຜາປ່າໄມ້ທີ່ໃຫຍ່ໂຕມະໂຫຖານແລະຂຽວສົດງົດງາມ. ນັ້ນແມ່ນວຸງໂຣ, ທີ່ຂຶ້ນກັບຕາແສງຊວນນາມ, ເມືອງດົງຮ່ວາ, ຫ່າງຈາກຈອມກີ່ວປະມານ 3 ກມ, ນີ້ແມ່ນໜຶ່ງໃນບັນດາອ່າວງາມກວ່າໝູ່ຂອງແຂວງຟູ໋ອຽນ ກໍ່ຄືທັງເຂດແຄມທະເລທາງພາກກາງຫວຽດນາມ. ວຸງໂຣ ຍັງແມ່ນສະຖານທີ່ປະຫວັດສາດທີ່ຕິດພັນກັບເສັ້ນທາງໂຮ່ຈີມິນ ບົນທະເລ.
ທະເລວຸງໂຣແຂວງຟູ໋ອຽນ
(ພາບ: ອິນເຕີແນດ)
ຕາມເສັ້ນທາງຫຼວງ 1A ຈາດພາກເໜືອລົງພາກໃຕ້, ວຸງໂຣ ຫ່າງຈາກນະຄອນຕູຍຮ່ວາ 25 ກມ.ໂດຍຕັ້ງຢູ່ຕີນກີ່ວກາທີ່ຂຽວອຸ່ມທູ່ມ, ວຸງໂຣຖືກອ້ອມຮອບທັງສາມທິດຄື: ທິດເໜືອ, ທິດຕາເວັນອອກ ແລະ ທິດຕາເວັນຕົກ ດ້ວຍສາຍພູແດ່ວກາ, ດ໋າເບຍ, ຮ່ອນບ່າ. ສ່ວນຢູ່ທິດໃຕ້ແມ່ນປາກແມ່ນ້ຳ, ດ້ວຍເກາະຮ່ອນເນືອທີ່ມີຮູບຊົງຄ້າຍຄືກັບເສົາຄ້ຳສູງ 105 ແມັດ ທີ່ແບ່ງເຄິ່ງເປັນ 2 ບານປະຕູເຂົ້າວຸງໂຣ. ເບິ່ງໃນແຜນທີ່ຟູ໋ອຽນ, ເຫັນວ່າຢູ່ທິດຕາເວັນອອກສ່ຽງໃຕ້ກໍ່ມີແຫຼມແຫ່ງໜຶ່ງທີ່ມີຮູບຄ້າຍຄືກັນກັບຫົວນົກ. ແຫຼມແຫ່ງນີ້ໂດຍພູວຸງໂຣ ສ້າງຂຶ້ນ, ອັນໄດ້ເຮັດໃຫ້ຝັ່ງທະເລທັງມີຄວາມສູງ ແລະ ຊັນ. ວຸງໂຣ ມີຫາດນ້ອຍຫຼາຍແຫ່ງຄືຫາດແລກ, ຫາດຈົ່ວ (ວັດ), ຫາດເຈີນເຈົາ (ຕີນຄວາຍ), ຫາດຫຍໍ (ນ້ອຍ), ຫາດຈີ່ນ (ຕົ້ນຕໍ່), ຫາດເລົາ… ດ້ວຍທັດສະນີຍະພາບທີ່ສວຍງາມນັ້ນ,ໄດ້ສ້າງຄວາມດຶງດູດໃຫ້ນັກທ່ອງທ່ຽວມາຢ້ຽມຢາມແຫ່ງນີ້.
ທະເລວຸງໂຣ ມີສິນທະເລຫຼາຍປະເພດ, ຢູ່ພື້ນທະເລມີຫີນປະກາລັງນາໆສີເໝາະສົມກັບຮູບການທ່ອງທ່ຽວຕຶກປາ, ລອຍນ້ຳ, ດຳນ້ຳ. ຖ້ານັກທ່ອງທ່ຽວມີເວລາຢ້ຽມຢາມຫຼາຍວັນ, ສາມາດກະກຽມຄັນເບັດເພື່ອຕຶກປາຢູ່ໂກນຫີນ ຫຼືເທິງເຮືອເພລ້ຽງປາ, ກຸ້ງຂອງຊາວປະມົງ, ນັກທ່ອງທ່ຽວກໍ່ສາມາດເຊົ່າເຮືອຈັກນ້ອຍຂອງຊາວປະມົງໃນທ້ອງຖີ່ນເພື່ອໄປທັດສະນາຈອນຢູ່ອ້ອມເຂດອ່າວ ຫຼື ໄປຫ່ອນເນືອ ເພື່ອທ່ຽວຊົມທັດສະນີຍະພາບທີ່ຮົກເຮື້ອວ່າງເປົ່າຂອງທະເລໝູ່ເກາະ, ຫຼືອາບນຳ້ທີ່ຂຽວສະອາດຢູ່ທີ່ນີ. ອ້າຍ ເລຮ່ວາງແທງຕຸ່ງ, ຜູ້ອຳນວຍການບໍລິສັດທ່ອງທ່ຽວຕູຍຮ່ວາ, ແນະນຳວ່າ:
“ຢູ່ລຽບຕາມອ່າວວຸງໂຣ ມີຫາດຊາຍທະເລທີ່ສວຍງາມຫຼາຍແຫ່ງ, ຫາດມົນ ແມ່ນໜຶ່ງໃນບັນດາຫາດອາບນ້ຳທະເລທີ່ສວຍງາມກວ່າໝູ່. ຂີ້ຊາຍຢູ່ທີ່ນີ້ຂາວແລະກ້ຽງສະເໝີ, ສ່ວນນ້ຳທະເລແມ່ນໄສສະອາດ, ຖ້າພວກເຮົາຢືນເທິງເຮືອຫຼຽວລົງມາກໍ່ສາມາດເຫັນປາ ຫຼືຫີນປະກາລັງຢູ່ພື້ນທະເລໄດ້”.
ທະເລວຸງໂຣແຂວງຟູ໋ອຽນ
(ພາບ: ອິນເຕີແນດ) ວຸງໂຣ ຍັງຕິດພັນກັບເສັ້ນທາງແຫ່ງເທບນິຍາຍກ່ອນນີ້ 50 ກວ່າປີ, ນັ້ນແມ່ນເສັ້ນທາງ ໂຮ່ຈີມິນ ບົນທະເລ. ເຊິ່ງແມ່ນໜຶ່ງໃນບັນດາທ່າກ່ຳປັ່ນທີ່ສຳຄັນ ເພື່ອຮັບເອົາອາວຸດນັບຮ້ອຍໂຕນ ໂດຍກ່ຳປັ່ນບໍ່ມີໝາຍເລກຂົນສົ່ງຈາກພາກເໜືອໄປຍັງສະໜາມຮົບພາກໃຕ້ໃນຊຸມປີແຫ່ງການຕໍ່ຕ້ານຕ້ານອາເມລິກາ ກູ້ຊາດ. ພາຍໃນເວລາອັນສັ້ນໆຄືແຕ່ເດືອນ 11/1964 – 02/1965 ເທົ່ານັ້ນ, ແຕ່ທ່າກ່ຳປັ່ນວຸງໂຣ ໄດ້ຮັບກ່ຳປັ່ນບໍ່ມີໝາຍເລກ 4 ລຳເຂົ້າທຽບທ່າ. ສະເພາະກ່ຳປັ່ນລຳທີ 4 ເມື່ອເຂົ້າທຽບທ່າໃນວັນທີ 15/2/1965 ກໍ່ຖືກສັດຕູພົບເຫັນ. ເພື່ອຮັກສາຄວາມລັບໃຫ້ເສັ້ນທາງ ໂຮ່ຈີມິນ ບົນທະເລ, ທະຫານປົດປ່ອຍພາກໃຕ້ຕ້ອງທຳລາຍກ່ຳປັ່ນນີ້ໃນທັນທີ. ອ້າຍ ເລຮ່ວາງແທງຕຸ່ງ, ເລົ່າສູ່ຟັງວ່າ:
“ເມື່ອໄປຢ້ຽມຢາມຫາດຢູ່ເບື້ອງຫຼັງຂອງວຸງໂຣ, ເພື່ອນຈະເຫັນອະນຸສາວະລີແຫ່ງໜຶ່ງທີ່ຖືກກໍ່ສ້າງຕາມຮູບກ່ຳປັ່ນລຳໜຶ່ງພວມມຸ່ງໄປສູ່ທິດໃຕ້, ໃນນັ້ນມີຮູບບັນດານັກຮົບທີ່ເຮັດໜ້າທີ່ປົກປັກຮັກສາກ່ຳປັ່ນໃນຊຸດເຄື່ອງແບບຂອງຊາວປະມົງ. ໃນນັ້ນຍັງມີຮູບຈຳລອງສາງອາວຸດ ແລະ ອຸປະກອນຂອງກ່ຳປັ່ນອີກ”.
ອະນຸສາວະລີແຫ່ງໜຶ່ງທີ່ຖືກກໍ່ສ້າງຕາມຮູບກ່ຳປັ່ນລຳໜຶ່ງພວມມຸ່ງໄປສູ່ທິດໃຕ້
(ພາບ: ອິນເຕີແນດ) ວຸງໂຣ ປຽບເໝືອນຂອງຂວັນໂດຍທຳມະຊາດບັນດານໃຫ້ແຂວງຟູ໋ອຽນ, ປະຈຸບັນ, ບໍລິສັດທ່ອງທ່ຽວຕ່າງໆໃນແຂວງພວມຂຸດຄົ້ນບັນດາຫາດຊາຍທີ່ສວຍງາມຢູ່ທີ່ນີ້ເພື່ອແນະນຳໃຫ້ນັກທ່ອງທ່ຽວຄວາມງາມແບບຮົກເຮື້ອຂອງດິນແດນແຫ່ງນີ້. ທ່ານ ເຈິ່ນກວາງເຍິດ, ຮອງປະທານຄະນະກຳມະການປະຊາຊົນແຂວງຟູ໋ອຽນ, ໃຫ້ຮູ້ວ່າ:
“ດ້ວຍປູຊະນີຍະສະຖານຢູ່ວຸງໂຣ, ພວກຂ້າພະເຈົ້າຈະລົງເລິກວຽກງານຂຸດຄົ້ນການທ່ອງທ່ຽວທະເລຕິດພັນກັບທ່ອງທ່ຽວວັດທະນະທຳ, ການສຶກສາ ແລະ ຂຶ້ນພູ. ພວກຂ້າພະເຈົ້າຈະພັດທະນາທ່ອງທ່ຽວວຸງໂຮ ນີ້ໃຫ້ກາຍເປັນສະຖານທີ່ທ່ອງທ່ຽວທີ່ຈັບອົກຈັບໃຈໃນລາຍການທ່ອງທ່ຽວພາກກາງກໍ່ຄືທົ່ວປະເທດ”.
ທັດສະນີຍະພາບທີ່ສວຍງາມຢູ່ທະເລວຸງໂຣ
(ພາບ: ອິນເຕີແນດ) ເລື່ອງອົງການທ່ອງທ່ຽວໂລກ (CWT) ຕີລາຄາວຸງໂຣ ແມ່ນໜຶ່ງໃນບັນດາທັດສະນີຍະພາບທີ່ສວຍງາມກວ່າໝູ່ຢູ່ອາຊີ ແລະ ເຂດຕາເວັນອອກໄກ, ແລະ ແມ່ນແຫ່ງທີ່ສາມາດປຽບທຽບກັບບັນດາທັດສະນີຍະພາບທີ່ສວຍງາມຂອງໂລກນັ້ນບໍ່ແມ່ນເລື່ອງບັງເອີນ, ຫາກຄວາມງາມແບບຮົກເຮື້ອວ່າງເປົ່າ, ມະໂຫຖານຂອງພູຜາປ່າໄມ້ ແລະ ທະເລຢູ່ແຫ່ງນີ້ ໄດ້ສ້າງຄວາມປະທັບໃຈຢ່າງເລິກເຊິ່ງໃຫ້ແກ່ນັກທ່ອງທ່ຽວທີ່ມາຢາມດິນແດນແຫ່ງນີ້.