(vovworld)-ວັດວິ້ງງຽມ ຫຼືເອີ້ນວ່າວັດດຶກລາ ແມ່ນວັດທີ່ມີຊື່ສຽງຢູ່ຫວຽດນາມ, ຕັ້ງຢູ່ຕາແສງຈີ໋ອຽນ, ເມືອງອຽນຢຸ້ງ, ແຂວງບັກຢາງ, ຫ່າງຈາກຮ່າໂນ້ຍ ໄປທາງທິດເໜືອປະມານ 80 ກມ. ໃນປະຫວັດສາດ, ວັດວີ້ງງຽມ ເຄີຍແມ່ນສູນພຸດທະສາສະໜາ, ແມ່ນແຫ່ງສຶກສາພະສົງສາມະເນນໃຫ້ທົ່ວປະເທດ. ປະຈຸບັນ, ວັດວີ້ງງຽມ ບໍ່ພຽງແຕ່ແມ່ນປູຊະນີຍະສະຖານປະຫວັດສາດອັນລ້ຳຄ່າເທົ່ານັ້ນ, ຫາກຍັງແມ່ນແຫ່ງເພື່ອໃຫ້ນັກທ່ອງທ່ຽວຈາກທຸກສາລະທິດມາຊອກຫາຄວາມສະຫວາດສະເຫວີຍທາງຈິດໃຈອີກດ້ວຍ.
ວັດວີ້ງງຽມ (ພາບ:google.com)
ວັດວີ້ງງຽມ ຕັ້ງເທິງໂນນພູແຄມແມ່ນ້ຳເທືອງ. ຕາມເລື່ອງລາວທີ່ເລົ່າຂານກັນມາວ່າ, ວັດວີ້ງງຽມ ມີມາແຕ່ສະໄໝເຈົ້າຊີວິດຫຼີທ້າຍໂຕ (ປີ 1010-1028). ຮອດສະໄໝເຈົ້າຊີວິດເຈິ່ນແທ໋ງຕົງ (1258-1278) ວັດວີ້ງງຽມ ໄດ້ມີທີ່ຕັ້ງພິເສດໃນປະຫວັດສາດພຸດທະສາສະໜາຫວຽດນາມ, ກາຍເປັນແຫ່ງຖືສິນຂອງພະສົງສາມະເນນ. ບຸລຸດສາມອົງຂອງນິກາຍຈຸກເລິມຄື: ເຈົ້າຊີວິດເຈິ່ນຍີນຕົງ, ຟາບລວາ ແລະ ຮ່ວຽນກວາງ ແມ່ນຜູ້ກໍ່ຕັ້ງນິກາຍທ່ຽນຕົງ ຂອງພຸດທະສາສະໜາຫວຽດນາມ, ແລະຖືນີ້ແມ່ນສູນພຸດທະສາສະໜາໃນສະໄໝລາຊະວົງເຈິ່ນ ເພື່ອສຶກສາພະສົງ ແລະ ແຕ່ງຕັ້ງຍົດສັກໃຫ້ພະສົງສາມະເນນຢູ່ວັດຕ່າງໆໃນທົ່ວປະເທດ. ຜ່ານຫຼາຍທົດສະວັດ, ວັດວີ້ງງຽມ ຍັງຄົງຮັກສາຈຸດທີ່ເປັນເອກະລັກສະເພາະຂອງວັດບູຮານທີ່ສຸດຢູ່ພາກເໜືອຫວຽດນາມໄວ້ໄດ້. ວັດແຫ່ງນີ້ທັງໃຫຍ່ໂຕໂອໂຖງ, ທັງສວຍງາມ ເຊິ່ງປະກອບດ້ວຍ ສະຖາປັດຕະຍະກຳຫຼາຍຢ່າງທີ່ແຕກຕ່າງກັນ, ໃນບໍລິເວນເນື້ອທີ່ປະມານ 1 ເຮັກຕາ. ວັດຖືກກໍ່ສ້າງ ແລະ ປະດັບປະດາຕາມຮູບດອກບົວທີ່ພວມບານອອກ. ບັນດາວັດຖຸພັນຢູ່ໃນວັດກໍ່ອຸດົມສົມບຸນ, ຫຼາຍຮູບຫຼາຍແບບທີ່ສຸດ, ດ້ວຍພະພຸດທະຮູບ, ລະບົບສີລາ, ເຄື່ອງບູຊາ, ແຜ່ນຄຳຜະຫຍາ… ພິເສດ, ປະຈຸບັນ, ໃນວັດຍັງຄົງຮັກສາວັດຖຸອັນລ້ຳຄ່າຫຼາຍຊິ້ນ, ໂດຍສະເພາະແມ່ນແຜ່ນພິມຄຳພີດ້ວຍໄມ້ 3000 ກວ່າແຜ່ນ, ເຖິງວ່າໄດ້ມີມາກ່ອນນີ້ກວ່າ 300 ປີແລ້ວກໍ່ຕາມ, ແຕ່ບັນດາແຜ່ນພິມດັ່ງກ່າວຍັງຄົງຮັກສາຮູບເດີມໄວ້ໄດ້ຢ່າງຄົບຖ້ວນ ແລະ ໄດ້ຮັບຖືວ່າແມ່ນວັດຖຸພັນທີ່ມີຄ່າຂອງຊາດ. ພະອາຈານ ທິກແທງວີ້ງ, ເຈົ້າອາວາດວັດວີ້ງງຽມ, ໃຫ້ຮູ້ວ່າ:
ວັດວີ້ງງຽມ (ພາບ:google.com)
ແຜ່ນພິມຄຳພີດ້ວຍໄມ້ຊຸດທຳອິດຂອງວັດວີ້ງງຽມ ແມ່ນມີແຕ່ຕົ້ນສະຕະວັດທີ 17 ແລະແຜ່ນພິມຄຳພີຊຸດຫຼ້າສຸດແມ່ນມີແຕ່ທ້າຍສະຕະວັດທີ 19 ຕົ້ນສະຕະວັດທີ 20… ບັນດາຕຳລາຄຳພີທັງໝົດຢູ່ທີ່ນີ້ລ້ວນແຕ່ພິມດ້ວຍແຜ່ນພິມດັ່ງກ່າວ.
ຕາມ ພະອາຈານ ທິກແທງວີ້ງ ແລ້ວ, ເລື່ອງປະດິດແຜ່ນພິມດ້ວຍໄມ້ ຖືກດຳເນີນໄປໃນຕະຫຼອດໄລຍະເວລານັບຮ້ອຍປີ, ນັກສິລະປະກຳ, ຊ່າງໄມ້ໃນເມື່ອກ່ອນ ບໍ່ພຽງແຕ່ມີສີມືການຊ່າງເທົ່ານັ້ນ, ຫາກຍັງເກັ່ງທັງພາສາຈີນ, ພິເສດແມ່ນຕ້ອງມີຄວາມສຸດຈິດສຸດໃຈໃນວຽກງານຄວັດແຜ່ນພິມອີກດ້ວຍ. ຜ່ານການຄົ້ນຄ້ວາບັນດາແຜ່ນພິມດ້ວຍໄມ້, ສາມາດເຫັນໄດ້ຄວາມສົມບຸນດ້ານຂໍ້ມູນຂ່າວ, ລັກສະນະຫຼາຍຮູບຫຼາຍແບບ ທາງດ້ານປະຫວັດສາດພຸດທະສາສະໜາ ແລະ ແນວຄິດໃນການເທດສະໜາຂອງນິກາຍຈຸກເລິມ, ນອກນັ້ນຍັງມີບັນດາບົດກະວີ, ບົດບັນທຶກປະຈຳວັນຂອງພະສົງ ແລະປື້ມຂຽນກ່ຽວກັບອາຊີບການຢາຈຳນວນໜຶ່ງ.
ໃນຕະຫຼອດໄລຍະກວ່າ 7 ສະຕະວັດ, ວັດວີ້ງງຽມ ແມ່ນໜຶ່ງໃນບັນດາບ່ອນທີ່ຮັກສາ ແລະ ພິມຄຳພີໃຫ້ແກ່ພຸດທະສາສະໜາຫວຽດນາມ. ນັບແຕ່ສະໄໝເຈົ້າຊີວິດ ເລແກງຮຶງ (ສະຕະວັດທີ XVII) ເຖິງສະໄໝລາດຊະວົງ ຫງວຽນແທ່ງທ້າຍ (ສະຕະວັດທີ XIX) ສາງຄຳພີໄດ້ຮັບການເພີ່ມເຕີມແຜ່ນພິມພຳພີເປັນຈຳນວນຫຼວງຫຼາຍ. ປະຈຸບັນ, ວັດວີ້ງງຽມ ກາຍເປັນວັດທີ່ມີສາງຮັກສາຄຳພີດ້ວຍຂອບຂະໜາດໃຫຍ່ທີ່ສຸດ ແລະລ້ຳຄ່າທີ່ສຸດຢູ່ຫວຽດນາມ. ໃນຊຸມປີມໍ່ໆມານີ້, ພະແນກວັດທະນະທຳ ກິລາ ແລະ ທ່ອງທ່ຽວແຂວງບັກຢາງ ໄດ້ໃຫ້ພິມຄຳພີທັງໝົດອອກເຈ້ຍເພື່ອຄົ້ນຄ້ວາ. ໃນເບື້ອງຕົ້ນເຫັນວ່າບັນດາຄຳພີມີຄຸນຄ່າຄົ້ນຄ້ວາກ່ຽວກັບປັດສະຍາພຸດທະສາສະໜາ ແລະ ວັດທະນະທຳຫວຽດນາມ. ທ່ານ ໂງວັນຈຸ, ຮອງຫົວໜ້າພະແນກວັດທະນະທຳ ກິລາ ແລະ ທ່ອງທ່ຽວແຂວງບັກຢາງ, ໃຫ້ຮູ້ວ່າ:
ວັດວີ້ງງຽມແມ່ນຈຸດນັດພົບຂອງນັກທ່ອງທ່ຽວ (ພາບ:google.com)
”ບັນດາແຜ່ນພິມທີ່ເຕື້ອງເຖິງນິກາຍ ຈຸກເລິມ ອຽນຕື ມີຄຸນຄ່າຄົ້ນຄ້ວາກ່ຽວກັບພຸດທະສາສະໜານິກາຍຈຸກເລິມ, ສິລະປະຄວັດໄມ້ຂອງສະໄໝລາຊະວົງເລ, ແລະ ຫງວຽນ, ກໍ່ຄືຄົ້ນຄ້ວາກ່ຽວກັບຫໍສະໝຸດ, ປະຫວັດສາດຂອງປື້ມຢູ່ຫວຽດນາມ”.
ມີນັກຄົ້ນຄ້ວາປະຫວັດສາດ, ວັດທະນະທຳຫຼາຍຄົນຍັງຖືວັດແຫ່ງນີ້ແມ່ນຫໍສະໝຸດວັດທະນະທຳພຸດທະສາສະໜາມະຫາຍານທີ່ພົ້ນເດັ່ນຢູ່ພາກເໜືອຫວຽດນາມ. ມາຢ້ຽມຢາມວັດວີ້ງງຽມ, ນັກທ່ອງທ່ຽວຈະເຫັນຄວາມສະຫງົບງຽບ, ຄວາມເຄັ່ງຂຶມຂອງວັດ ແລະທັດສະນີຍະພາບທີ່ສວຍງາມຂອງພູຜາປ່າໄມ້. ປ້າ ເຈິ່ນທິຮວາ, ນັກທ່ອງທ່ຽວທີ່ມາຈາກ ຮ່າໂນ້ຍ, ໃຫ້ຮູ້ວ່າ:
”ນີ້ແມ່ນເທື່ອທຳອິດທີ່ຂ້າພະເຈົ້າມາແຫ່ງນີ້, ເຖິງວ່າຂ້າພະເຈົ້າໄດ້ໄປຢ້ຽມຢາມຫຼາຍແຫ່ງແລ້ວກໍ່ຕາມ ແຕ່ເຫັນວ່ານີ້ແມ່ນວັດ ທັງບູຮານທັງສວຍງາມແທ້ໆ”.
ໂດຍຜ່ານຫຼາຍສະຕະວັດ, ວັດວີ້ງງຽມ ຍັງຄົງແມ່ນໜຶ່ງໃນບັນດາວັດທີ່ມີຄວາມສຳຄັນຂອງພຸດທະສາສະໜາຢູ່ຫວຽດນາມ. ດ້ວຍຄຸນຄ່າດ້ານປະຫວັດສາດ, ສິລະປະດ້ານສະຖາປັດຕະຍະກຳ, ວັດວີ້ງງຽມ ໃນປະຈຸບັນ ບໍ່ພຽງແຕ່ດຶງດູດບັນດານັກຄົ້ນຄ້ວາມາຊອກຮູ້ວັດທະນະທຳຂອງຊາດຫວຽດນາມເທົ່ານັ້ນ,ຫາກຍັງແມ່ນແຫ່ງເພື່ອໃຫ້ພຸດທະສາສະນິກະຊົນ, ນັກທ່ອງທ່ຽວຊອກຫາຄວາມສະຫວາດສະເຫວີຍທາງຈິດໃຈອີກດ້ວຍ.