(vovworld)- ທ່ານ Pham Xuan Hong, ປະທານສະພາບໍລິຫານ, ຜູ້ອຳນວຍການໃຫຍ່ບໍລິສັດຫຸ້ນສ່ວນຕັດຫຍິບໄຊງ່ອນ 3, ຫາກໍ່ໄດ້ຮັບນາມມະຍົດວິລະຊົນແຮງງານຈາກປະທານປະເທດ. ເນື່ອງໃນໂອກາດວັນນັກທຸລະກິດຫວຽດນາມໃນເດືອນ 10 ນີ້, ນັກຂ່າວ Cao Thoa, ຂໍແນະນຳນັກທຸລະກິດທີ່ດີເດັ່ນຜູ້ນີ້ຜ່ານບົດຂຽນທີ່ມີຫົວຂໍ້ວ່າ: ວິລະຊົນແຮງງານ Pham Xuan Hong ຜູ້ຖືຜົນປະໂຫຍດຂອງຜູ້ອອກແຮງງານເປັນສຳຄັນ. ເຊີນທ່ານຮັບຟັງ.
ວິລະຊົນແຮງງານ Pham Xuan Hong
20 ປີ ຕິດພັນກັບບໍລິສັດຕັດຫຍິບໄຊງ່ອນ 3, ຫັນບໍລິສັດເປັນຫຸ້ນສ່ວນ, ນຳບໍລິສັດກາຍເປັນຫົວໜ່ວຍວິລະຊົນແຮງງານໃນຂະແໜງຕັດຫຍິບຂອງທົ່ວປະເທດ ແລະ ທ່ານເອງກໍ່ແມ່ນວິລະຊົນ, ຍາມໃດທ່ານ Pham Xuan Hong, ປະທານສະພາບໍລິຫານ, ຜູ້ອຳນວຍການໃຫຍ່ບໍລິສັດກໍ່ມີຄວາມເອົາໃຈໃສ່ເຖິງຊີວິດຂອງຜູ້ອອກແຮງງານ. ເພາະທ່ານເຂົ້າໃຈວ່າ: ຂະແໜງຕັດຫຍິບແມ່ນຂະແໜງຫຍຸ້ງຍາກທີ່ສຸດ, ກຳມະກອນສ່ວນຫຼາຍແມ່ນມາຈາກເຂດບ້ານນາທີ່ທຸກຍາກໃນທົ່ວປະເທດ. ດັ່ງນັ້ນຕ້ອງຊ່ວຍໃຫ້ເຂົາເຈົ້າມີວຽກເຮັດງານທຳເປັນປົກກະຕິ ເພື່ອຍົກສູງຊີວິດການເປັນຢູ່, ນັ້ນແມ່ນເປົ້າໝາຍຂອງການນຳບໍລິສັດ. ທ່ານກຳນົດວ່າ, ຊາວຜູ້ອອກແຮງງານແມ່ນປັດໃຈຕັດສິນຊີ້ຂາດໃຫ້ແກ່ການພັດທະນາຂອງບໍລິສັດໄຊງ່ອນ 3.
”ໄຊງ່ອນ 3 ໄດ້ຜ່ານໄລຍະທາງທີ່ຫຍຸ້ງຍາກຫຼາຍຢ່າງ, ແຕ່ໃນຈຸດເວລານັ້ນ ຂ້າພະເຈົ້າຍິ່ງມີຄວາມເຊື່ອໝັ້ນ ແລະ ເອົາໃຈໃສ່ເຖິງຊາວຜູ້ອອກແຮງງານກວ່າ, ມີບາງຄັ້ງພວກຂ້າພະເຈົ້າຕ້ອງໄປກູ້ຢືມເງິນ ຫຼືຂາຍເຄື່ອງຂອງຄ້າງສາງ ເພື່ອຈ່າຍເງິນເດືອນ, ແບ່ງປັນຄວາມຫຍຸ້ງຍາກກັບຜູ້ອອກແຮງງານ, ດັ່ງນັ້ນໄດ້ສ້າງຄວາມເຊື່ອໝັ້ນໃຫ້ແກ່ເຂົາເຈົ້າ ເພື່ອພ້ອມກັບບໍລິສັດຜ່ານຜ່າຄວາມຫຍຸ້ງຍາກ ”.
ທ່ານ Pham Xuan Hong
ໃນພິທີຮັບນາມມະຍົດວິລະຊົນແຮງງານ
ໃນຈຸດເວລາທີ່ບໍລິສັດປະສົບກັບຄວາມຫຍຸ້ງຍາກຍ້ອນຜົນສະທ້ອນຈາກວິກິດການເສດຖະກິດປີ 2008, ມີຫຼາຍຄົນໄດ້ສະເໜີຫຼຸດຜ່ອນຈຳນວນຜູ້ອອກແຮງງານລົງເພື່ອສືບຕໍ່ການເຄື່ອນໄຫວ ແລະ ຮັບປະກັນຜົນກຳໄລ, ແຕ່ທ່ານ Pham Xuan Hong ຍັງຄົງເດັດດ່ຽວຊອກຫາວິທີເພື່ອຮັກສາຜູ້ອອກແຮງງານໄວ້. ທ່ານໄດ້ຕົກລົງຫຼຸດຜ່ອນເງິນເດືອນຂອງສະພາບໍລິຫານ ພ້ອມກັບຄ່າທຳນຽມອື່ນໆເພື່ອສືບຕໍ່ຮັກສາກຳລັງຜູ້ອອກແຮງງານໄວ້. ໃນຂະນະທີ່ມີວິສາຫະກິດອື່ນໆຫຼາຍແຫ່ງຂາດກຳລັງແຮງງານນັ້ນ, ແຕ່ບໍລິສັດໄຊງ່ອນ 3 ພັດມີກຳມະກອນ 2.800 ຄົນເຮັດວຽກເປັນປົກກະຕິ ຮັບປະກັນຜະລິດສິນຄ້າຖືກກັບກຳນົດເວລາ, ເງິນເດືອນສະເລ່ຍຂອງກຳມະກອນໃນບໍລິສັດຍາມໃດກໍ່ບັນລຸ 6 ລ້ານດົ່ງ/ຄົນ/ເດືອນ.
ໂດຍແມ່ນຜູ້ເດັດດ່ຽວໃນວຽກງານ, ມີປະສົບການໃນການເຊັນສັນຍາ ແລະ ຍາມໃດສ້າງຄວາມໄວ້ເນື້ອເຊື່ອໃຈຕໍ່ຄູ່ຮ່ວມມື, ດັ່ງນັ້ນເພື່ອນຮ່ວມງານທັງພາຍໃນ, ແລະ ຕ່າງປະເທດຍາມໃດກໍ່ນັບຖືທ່ານ. ປະຈຸບັນ, ນອກຈາກຕະຫຼາດສົ່ງອອກທີ່ເປັນມູນເຊື້ອຄື: ຍີ່ປຸ່ນ, ອາເມລິກາ, ເອີລົບ ແລະ ປະເທດຈຳນວນໜຶ່ງແລ້ວ, ໄຊງ່ອນ 3 ພວມພັດທະນາຕະຫຼາດໃໝ່ຕື່ມອີກຄື: ສເກົາຫຼີ, ເອີລົບຕາເວັນອອກ, ອາເມລະກາໃຕ້... ທ່ານ Pham Xuan Hong ໃຫ້ຮູ້ວ່າ: ຜົນງານຂອງໄຊງ່ອນ 3 ແມ່ນຍ້ອນກົງຈັກການນຳມີຄວາມສາມັກຄີ, ເຂົ້າອົກເຂົ້າໃຈ, ມີເຈດຈຳນົງພັດທະນາຮ່ວມກັນ ແລະ ພິເສດແມ່ນມີຖັນແຖວຜູ້ອອກແຮງງານທີຊຳນານງານ ແລະ ສຸດຈິດສຸດໃຈກັບບໍລິສັດ, ອັນໄດ້ສ້າງສະພາບແວດລ້ອມທີ່ມີຄວາມສະດວກທີ່ສຸດ ເພື່ອໃຫ້ກຳມະກອນຫຼໍ່ຫຼອມ ແລະ ເຕີບໃຫຍ່, ອຸທິດສ່ວນໃຫ້ແກ່ບໍລິສັດ. ອ້າຍ Tran Van Vuong, ກຳມະກອນຜູ້ໜຶ່ງວທີ່ຫາກໍ່ໄດ້ຮັບເຂົ້າເປັນສະມາຊິກພັກ, ໄດ້ເວົ້າດ້ວຍຄວາມຕື້ນຕັນໃຈວ່າ:
”ນ້ອງເຫັນວ່າສະພາບແວດລ້ອມແຫ່ງການເຮັດວຽກຢູ່ທີ່ນີ້ສະດວກສະບາຍທີ່ສຸດ. ຄະນະຜູ້ອຳນວຍການໄດ້ເອົາໃຈໃສ່ເບິ່ງແຍງເຖິງຊີວິດການເປັນຢູ່ຂອງກຳມະກອນໃນບໍລິສັດ, ສ້າງວຽກເຮັດງານທຳ, ເພີ່ມລາຍຮັບ ກໍ່ຄືຊີວິດທາງດ້ານຈິດໃຈໃຫ້ແກ່ກຳມະກອນໃຫ້ດີກວ່າ”.
ວິລະຊົນແຮງງານ Pham Xuan Hong
ທ່ານ Pham Xuan Hong ມີທັດສະນະວ່າ, ເລື່ອງຖືຜົນປະໂຫຍດ ຂອງຜູ້ອອກແຮງງານເປັນສຳຄັນ ໝາຍຄວາມວ່າບໍລິສັດຕ້ອງເອົາໃຈໃສ່ເຖິງຊີວິດການເປັນຢູ່ກໍ່ຄືສຸຂະພາບຂອງຜູ້ອອກແຮງງານ. ໜຶ່ງໃນບັນດາກົດລະບຽບແຫ່ງການເຄື່ອນໄຫວຂອງບໍລິສັດນັ້ນແມ່ນກຳມະກອນທີມີລູກໄປຮຽນຈະໄດ້ຮັບເງິນໜູນຊ່ວຍໃນແຕ່ລະເດືອນ. ສະເພາະກໍລະນີປະສົບກັບຄວາມຫຍຸ້ງຍາກ, ເວລາເຈັບເປັນກໍ່ໄດ້ຮັບເງິນອຸດໜູນເປັນປະຈຳ. ມີກຳມະກອນບາງຄົນຖືກພະຍາດໜັກ, ຕ້ອງເສຍຄ່າປິ່ນປົວພະຍາດນັບຮ້ອຍລ້ານດົ່ງ, ທ່ານ Pham Xuan Hong ເອງ ແລະບັນດາໝູ່ຄະນະໄດ້ໄປຢາມເປັນປະຈຳ ແລະ ຊຳລະຄ່າປິ່ນປົວພະຍາດທັງໝົດໃຫ້ແກ່ເຂົາເຈົ້າ. ທ່ານ Nguyen Buu Xuyen, ກຳມະກອນບໍລິສັດໄຊງ່ອນ 3, ເວົ້າວ່າ:
”ອາວ Hong ແມ່ນຜູ້ອຳນວຍການຜູ້ໃຈດີ, ບໍ່ພຽງແຕ່ແມ່ນຜູ້ອຳນວຍການເທົ່ານັ້ນ, ຫາກຍັງແມ່ນຜູ້ເປັນພໍ່, ເປັນອາວ ຍາມໃດກໍ່ມີຄວາມເອົາໃຈໃສ່ເຖິງກຳມະກອນ, ເຖິງວ່າມີອາຍຸສູງແລ້ວກໍ່ຕາມ, ແຕ່ຍາມໃດອາວກໍ່ມີຄວາມໃກ້ຊິດຕິດແທດກັບການການເຄື່ອນໄຫວດຳເນີນຊີວິດຂອງຊາວໜຸ່ມພວກນ້ອງ ”.
ດ້ວຍນະໂຍບາຍຖືຜົນປະໂຫຍດຂອງຜູ້ອອກແຮງງານເປັນສຳຄັນ, ແລະຕິດພັນກັບຜູ້ອອກແຮງງານນັ້ນ, ບໍລິສັດຫຸ້ນສ່ວນຕັດຫຍິບໄຊງ່ອນ 3 ສືບຕໍ່ໄດ້ຮັບຜົນສຳເລັດ. ປີ 2012, ທາງບໍລິສັດຄາດວ່າຈະບັນລຸລາຍຮັບກວ່າ 1.600 ຕື້ດົ່ງ, ເພີ່ມຂຶ້ນເມື່ອທຽບໃສ່ປີ 2011 ແມ່ນ 10%. ດ້ວຍຄວາມຮັບຜິດຊອບຂອງຕົນ, ທ່ານ Pham Xuan Hong ພ້ອມກັບຄະນະການນຳບໍລິສັດຍາມໃດກໍ່ພະຍາຍາມຊອກຫາສັນຍາສົ່ງອອກສິນຄ້າ, ເພື່ອສ້າງລາຍຮັບໃຫ້ແກ່ບໍລິສັດ, ປະກອບສ່ວນສ້າງລາຍຮັບເປັນປົກກະຕິ ແລະ ຍົກສູງຊີວິດການເປັນຢູ່ໃຫ້ແກ່ກຳມະກອນຂອງບໍລິສັດ.