ວັດເກືອງຊ້າຢູ່ຕາແສງຫາຍເຕີນ ແມ່ນໜຶ່ງໃນບັນດາກິດຈະກຳສາສະໜາດ້ວຍສະຖາປັດຕະຍະກຳທີ່ເປັນເອກະລັກສະເພາະໃນແຂວງຫາຍເຢືອງ. ວັດເກືອງຊ້າແມ່ນສະຖານທີ່ທາງດ້ານຈິດວິນຍານ ແລະ ແມ່ນຈຸດທ່ອງທ່ຽວທີ່ມີຊື່ສຽງຂອງຊາວແຂວງຫາຍເຢືອງ ແລະ ແຂກທ່ອງທ່ຽວທັງຢູ່ພາຍໃນ ແລະ ຕ່າງປະເທດ .
ທາງໜ້າວັດເກືອງຊ້າ (baohaiduong) |
ໂດຍຕັ້ງຢູ່ຫ່າງຈາກນະຄອນຫຼວງປະມານ 80 ກິໂລແມັດ, ວັດເກືອງຊ້າມີຄວາມງາມແບບບູຮານ ແລະ ແມ່ນໜຶ່ງໃນບັນດາວັດທີ່ມີອາຍຸຫຼາຍກວ່າຫມູ່ຢູ່ຫວຽດນາມ. ວັດເກືອງຊ້າຖືກຕັ້ງບົນໂນນແຫ່ງໜຶ່ງທາງກ້ຳຕາເວັນຕົກສ່ຽງໃຕ້ຂອງຕາແສງຫາຍເຕີນ. ຕາມເອກະສານປະຫວັດສາດແລ້ວ, ວັດນີ້ ໄດ້ຮັບການບູລະນະປະຕິສັງຂອນຄັ້ງທີ 1 ໃນສະໄໝເຈົ້າຊີວິດ ເລວິ້ງໂຕະ (1619-1628). ຍ້ອນສົງຄາມທຳລາຍ, ວັດໄດ້ຖືກເປເພ, ເສື່ອມຄຸນນະພາບຢ່າງໜັກ, ເພາະສະນັ້ນ, ມາເຖິງປີ 1946, ປະຊາຊົນໃນເຂດຈຶ່ງດຳເນີນ ການບູລະນະປະຕິສັງຂອນຄັ້ງທີ 2. ພະອາຈານ ທິກແທງເກືອງ ເຈົ້າອະທິການວັດເກືອງຊ້າ ໃຫ້ຮູ້ວ່າ : ປີ 2009, ວັດໄດ້ຮັບ ການບູລະນະປະຕິສັງຂອນຄັ້ງທີ 3 ແລະ ເນື້ອທີ່ໄດ້ຮັບການເປີດກ້ວາງ ກວ່າ 360 ຕາແມັດ. ເມື່ອດຳເນີນວາງສີລາລຶກໄດ້ພົບເຫັນບັນດາຮ່ອງຮອຍປະຫວັດສາດທີ່ມີຄຸນຄ່າກ່ຽວກັບອາຍຸຂອງວັດ. ພະອາຈານ ທິກແທງເກືອງ ເຈົ້າອະທິການວັດເກືອງຊ້າ ໃຫ້ຮູ້ວ່າ :
“ ເມື່ອດຳເນີນການບູລະນະປະຕິສັງຂອນໄດ້ພົບເຫັນພື້ນ ແລະ ຕີນເສົາຂອງວັດທີ່ເກົ່າແກ່. ຄາວນັ້ນ ທາງວັດໄດ້ເຊື້ອເຊີນບັນດານັກຄົ້ນຄ້ວາປະຫວັດສາດມາກວດກາ. ພາຍຫຼັງການກວດກາ ແລະ ຄົ້ນຄ້ວາແລ້ວ, ນັກປະຫວັດສາດ ຕັງບ້າແຮ່ງ ແລະ ນັກປະຫວັດສາດ ເລວັນລານ ໄດ້ຢືນຢັນວ່າ ວັດເກືອງຊ້າໄດ້ມີມາແຕ່ສະຕະວັດທີ 1 ຫາທີ 3. ຕາມນັ້ນແລ້ວ, ວັດເກືອງຊ້າຍັງມືຊື່ອື່ນວ່າ ກີງເຄົາຕຶ ຫຼືວັດກໍຫງອກ ”
ວັດເກືອງຊ້າປະກອບດ້ວຍ 5 ຫ້ອງໃຫຍ່, 3 ຫ້ອງທາງຫຼັງ, ເບື້ອງຂວາມີ 5 ຫ້ອງບູຊາຜູ້ກໍ່ຕັ້ງວັດ, ເບື້ອງຊ້າຍມີ 5 ຫ້ອງບູຊາເຈົ້າແມ່ ແລະ ຫ້ອງທາງຫຼັງພະພຸດ. ວັດເກືອງຊ້າໄດ້ຮັບການກໍ່ສ້າງດ້ວຍຫີນກ້ອນໃຫຍ່ 3000 ກ້ອນ, ແຕ່ລະກ້ອນມີນ້ຳໜັກປະມານ 80 ກິໂລຣາມ, ຍາວ 40 cm, ກ້ວາງ 30 cm ແລະ ໜາ 35 cm. ຫີນແຕ່ລະກ້ອນ ກໍລ້ວນແຕ່ຄວັດຕົວໜັງສື ວ້ານ ໝາຍເຖິງຄວາມໂຊກດີ, ບ່ອນໃຫ້ກຳເນີດແຫຼ່ງຊີວິດອະມະຕະ. ວັດເກືອງຊ້າ ໄດ້ຮັບການຮັບຮອງຈາກອົງການສະຖີຕິຫວຽດນາມແມ່ນລະບົບວັດທຳອິດຢູ່ຫວຽດນາມມີຝາກໍ່ດ້ວຍຫີນໂດຍຖືກຄວັດຕົວໜັງສື ວ້ານ. ມາຮອດເດືອນ 4/2016, ວັດເກືອງຊ້າໄດ້ເປີດຫ້ອງບູຊາພະພຸດ ຕາມບາວ. ນີ້ແມ່ນກິດຈະກຳທີ່ພົ້ນເດັ່ນຂອງວັດດ້ວຍຕີນເສົາ ແລະ ຝາຖືກກໍ່ດ້ວຍຫີນພ້ອມດ້ວຍເສົາໄມ້ແດງ 18 ເສົາທີ່ມີລວງສູງ 8 ແມັດ ແລະ ມີນ້ຳໜັກ 1,7 ໂຕນ. ພະອາຈານ ທິກແທງເກືອງ ເຈົ້າອະທິການວັດເກືອງຊ້າ ໃຫ້ຮູ້ຕື່ມອີກວ່າ :
“ ໃນລະບົບພະພຸດທະຮູບຂອງວັດນັ້ນ, ຢູ່ແຖວໜ້າມີ ພະອະມີຕາພຸດທະ, ພະເຈົ້າແມ່ກວນອີມ, ພະມະຫາສະຖາມປະຮາບໂພທິສັດ. ແຖວທີ 2 ມີ ພະເຈົ້າແມ່ກວນອີມຮ້ອຍມືພັນຕາ ແລະ ແຖວທີ 3 ແມ່ນບູຊາພະພຸດທະເຈົ້າ ຊຶ່ງຖືກແກະຄວັດສະຫຼັກດ້ວຍຫີນຂາວຈາກພູງູ້ແຫ່ງເຊີນ, ນະຄອຍດານັ້ງ, ມີນ້ຳໜັກ 6,6 ໂຕນ. ສ່ວນຊັ້ນທີ 4 ແມ່ນຮູບຫຼໍ່ມັງກອນທອງ 9 ໂຕ ແລະ ຊັ້ນທີ 5 ແມ່ນຮູບປັ້ນພະໝໍຢາ 7 ອົງເພື່ອບູຊາພາວະນາໃຫ້ປະເທດຊາດມີສັນຕິພາບ, ປະຊາຊົນມີຄວາມສະຫງົບສຸກ, ດິນຟ້າອາກາດເອື້ອອຳນວຍຄວາມສະດວກ. ວັດເກືອງຊ້າຍັງສາມາດຮັກສາຈຸດວັດທະນະທຳທີ່ເປັນມູນເຊື້ອຂອງຊາດຜ່ານໄລຍະນັບພັນປີ ຊຶ່ງລວມມີວັດ, ຫໍບູຊາພະແມ່, ຫໍບູຊາຜູ້ກໍ່ຕັ້ງວັດ. ຍອດເນື້ອທີ່ທັງໝົດຂອງວັດແມ່ນ 7.000 ກວ່າຕາແມັດ”
ວັດເກືອງຊ້າ ໄດ້ຮັບການປຸກສ້າງຢູ່ສະຖານທີ່ສັກສິດ, ມີທິວທັດທຳມະຊາດແບບກົມກ່ຽວ. ເມື່ອເລືອກເອົາສະຖານທີ່ເພື່ອປຸກສ້າງວັດນັ້ນ ແມ່ນຕ້ອງມີຄົບ 4 ປັດໄຈສຳຄັນເຊັ່ນ: ຕ້ອງມີນ້ຳ, ໄຟ, ມີສະບຽງອາຫານ, ມີຕົ້ນໄມ້ໃບຫຍ້າ ແລະມີທັດສະນີຍະພາບທີ່ປອດໂປ່ງ. ປ້າ ອວງທິຮວາ ແຂກທ່ອງທ່ຽວຢູ່ຮ່າໂນ້ຍເປີດເຜີຍວ່າ :
“ ເມື່ອເຂົ້າວັດ, ຂ້າພະເຈົ້າເຫັນວ່າ ທັດສະນີຍະພາບໃນວັດແມ່ນສວຍງາມ ແລະ ໃຫຍ່ໂຕໂອຖົງ. ໃນວັດມີລະບົບພະພຸດທະຮູບທີ່ສະຫງ່າຜ່າເຜີຍ ແລະ ຍາກທີ່ຈະຫາໄດ້ຢູ່ວັດໃດມີຄວາມງາມເຊັ່ນກັບ ວັດເກືອງຊ້າ ”
ແຕ່ລະປີ, ວັດເກືອງຊ້າໄດ້ຕ້ອນຮັບແຂກທ່ອງທ່ຽວທັງຢູ່ພາຍໃນ ແລະ ຕ່າງ
ປະເທດພ້ອມກັບພໍ່ແມ່ພີນ້ອງຊາວຫວຽດນາມອາໄສຢູ່ຕ່າງປະເທດມາຢ້ຽມຊົມ, ຖວາຍທູບທຽນບູຊາພະພຸດ. ດ້ວຍທັດສະນີຍະພາບທີ່ສວຍງາມ ແລະ ປອດໂປ່ງ, ເມື່ອເຂົ້າໄປວັດເກືອງຊ້າ, ແຂກທ່ອງທ່ຽວທັງຫຼາຍຈະຮູ້ສຶກຄືໄດ້ເຊື່ອມຕົວເຂົ້າກັບດິນແດນແຫ່ງພຸດທະສາສະໜາໃນທ່າມກາງຄວາມສະຫງົບສຸກ ແລະ ເຊື່ອໝັ້ນຕໍ່ຊີວິດຂອງຕົນ.