(vovworld) - ພາຍຫຼັງຂີ່ເຮືອຈາກນະຄອນໂຮ່ຈີມິນ ເປັນເວລາກວ່າ 1 ຊົ່ວໂມງ ຫຼື ຈາກຮ່າໂນ້ຍ ເປັນເວລາກວ່າ 2 ຊົ່ວໂມງ, ນັກທ່ອງທ່ຽວຈະເຫັນເກາະທີ່ສວຍງາມແຫ່ງໜຶ່ງຢູ່ກາງທະເລ, ນັ້ນແມ່ນເກາະເພັດຟູ່ກວົກ, ເຊິ່ງແມ່ນເກາະໃຫຍ່ທີ່ສຸດຂອງຫວຽດນາມ. ທຳມະຊາດໄດ້ບັນດານໃຫ້ຟູ໋ກວກ ບັນດາຫາດຊາຍທະເລທີ່ສວຍງາມ, ໃນນັ້ນມີຫາດຊາວ, ແມ່ນຫາດຊາຍທະເລທັງຂາວ ແລະ ຮາບພຽງ, ພ້ອມກັບນ້ຳທະເລທີ່ຂຽວສະອາດ.
ເກາະເພັດຟູ່ກວົກຢູ່ກາງທະເລ
(ພາບ: ອິນເຕີແນດ)
ຄວາມປະທັບໃຈທຳອິດຂອງນັກທ່ອງທ່ຽວ ເມື່ອມາຟູ໋ກວົກ ນັ້ນແມ່ນ ເກາະແຫ່ງນີ້ຖືກປົກຄຸມໄປທົ່ວດ້ວຍສີຂຽວ, ນັ້ນແມ່ນສີຂຽວຂອງຕົ້ນໄມ້, ທະເລ ແລະ ທ້ອງຟ້າ. ມາຟູ໋ກວກ, ນັກທ່ອງທ່ຽວຢາກປ່ອຍຕົວໃນນ້ຳທະເລທີ່ເຢັນສະບາຍ, ຕາກແດດເທິງຫາດຊາຍທີ່ຮາບພຽງ ແລະ ຮັບເອົາສາຍລົມທີ່ພັດມາຈາກທະເລ.
ເກາະເພັດຟູ່ກວກ
(ພາບ: ອິນເຕີແນດ)
ຫາດຊາວ ຕັ້ງຢູ່ທິດໃຕ້ເກາະຟູ໋ກວົກ, ຂີ້ຊາຍຢູ່ທີ່ນີ້ຂາວປຽບເໝືອນແກ້ວມະນີ, ນ້ຳໃສສະອາດຈົນເຫັນໄດ້ພື້ນທະເລ. ຍາມເຊົ້າຫາດຊາຍທະເລແຫ່ງນີ້ຍັງງຽບເຫງົາຢູ່, ຮອດຕອນທ່ຽງນັກທ່ອງທ່ຽວຈຶ່ງໄປອາບນ້ຳເປັນຈຳນວນຫຼວງຫຼາຍ. ນັກທ່ອງທ່ຽວຫຼາຍຄົນມັກນອນຕາກແດດເທິງຫາດຊາຍທະເລນີ້ຫຼາຍ, ເຂົາເຈົ້າປຽບທຽບຫາດຊາຍທະເລຢູ່ທີ່ນີ້ງາມເທົ່າກັບຫາດຊາຍ Hawaii, ຢູ່ບາລີ, ປະເທດອິນໂດເນເຊຍ. ບັນດາຜູ້ທີ່ເຮັດວຽກງານທ່ອງທ່ຽວຢູ່ຟູ໋ກວົກ ໄດ້ຂຸດຄົ້ນຄວາມສາມາດບົ່ມຊ້ອນທັງໝົດຢູ່ທີ່ນີ້ ເພື່ອສ້າງບັນດາລາຍການທ່ອງທ່ຽວທີ່ດູດດື່ມ ຮັບໃຊ້ໃຫ້ແກ່ນັກທ່ອງທ່ຽວ. ທ່ານຟຸ່ງຊວນມາຍ, ຜູ້ອຳນວຍການໂຮງແຮມໄຊງ່ອນ - ຟູ໋ກວົກ, ໃຫ້ຮູ້ວ່າ:
“ພວກຂ້າພະເຈົ້າຂຸດຄົ້ນຜະລິດຕະພັນທ່ອງທ່ຽວຊີວະພາບເປັນຕົ້ນຕໍ່, ເຊິ່ງລວມມີບັນດາຊັບພະຍາກອນທຳມະຊາດໃຕ້ທະເລຄືດຳນ້ຳ, ຕຶກປາ, ຕຶກປາມຶກ, ຕຶກມອງ, ທັງໝົດເຫຼົ່ານັ້ນໄດ້ສ້າງເປັນຜະລິດຕະພັນທ່ອງທ່ຽວຢູ່ຟູ໋ກວົກ. ທີສອງ, ພວກຂ້າພະເຈົ້າຍັງສ້າງບັນດາລາຍການທ່ອງທ່ຽວພະຈົນໄພ, ຂຶ້ນພູ… ນັ້ນແມ່ນຊັບພະຍາກອນທຳມະຊາດທີ່ມີຢູ່ແລ້ວ ທັງແມ່ນທ່າແຮງຂອງຟູ໋ກວກ”.
ຫາດຊາວ ຕັ້ງຢູ່ທິດໃຕ້ເກາະຟູ໋ກວກ
(ພາບ: ອິນເຕີແນດ)
ນອກຈາກຫາດຊາວ ຢູ່ທິດໃຕ້ເກາະຟູ໋ກວົກ ແລ້ວ, ຫາດຢ່າຍ (ຫາດຊາຍທະເລຍາວ) ຢູ່ທິດເໜືອກໍ່ງາມທີ່ສຸດ. ຫາດຊາຍທະເລນີ້ຍາວຢຽດ ດ້ວຍຂີ້ຊາຍສີເຫຼືອງອ່ອນ, ປະຈຸບັນຍັງຄົງຮັກສາຄວາມງາມແບບຮົກເຮື້ອໄວ້ໄດ້. ສຳນັກຂ່າວສານຂອງອາເມລິກາ ໄດ້ເລືອກເຟັ້ນຫາດຊາຍນີ້ແມ່ນໜຶ່ງໃນຈຳນວນຫາດຊາຍທະເລທີ່ສວຍງາມ ແລະ ສະອາດຢູ່ໃນໂລກ. ນອກຈາກບັນດາຫາດຊາຍທະເລທີ່ສວຍງາມດັ່ງກ່າວແລ້ວ, ໝູ່ບ້ານປະມົງຫ່າມນິງ ກໍ່ແມ່ນແຫ່ງທີ່ສ້າງຄວາມດຶງດູດນັກທ່ອງທ່ຽວທີ່ສຸດ. ຢູ່ຕໍ່ໜ້າໝູ່ບ້ານແມ່ນທະເລທີ່ກວ້າງໃຫຍ່, ທາງຫຼັງໝູ່ບ້ານແມ່ນພູຜາປ່າໄມ້. ຊາວປະມົງຢູ່ທີ່ນີ້ຫາເງິນລ້ຽງຊີບດ້ວຍການດຳນ້ຳຫາໄຂ່ມຸກ, ຫາປີງທະເລ. ໄປທ່ຽວອ້ອມໝູ່ບ້ານປະມົງ, ນັກທ່ອງທ່ຽວສາມາດເຂົ້າໃຈຕື່ມອີກກ່ຽວກັບຊີວິດຂອງປະຊາຊົນໃນເກາະເພັດແຫ່ງນີ້.
ຫາດຊາຍທະເລຍາວຢູ່ທິດເໜືອເກາະຟູ໋ກວກ
(ພາບ: ອິນເຕີແນດ)
ເມື່ອເວົ້າເຖິງຟູ໋ກວົກ, ແມ່ນຕ້ອງເວົ້າເຖິງນ້ຳປາ. ນ້ຳປາຟູ໋ກວົກ ມີທາດ ປໂຮເຕອີນຫຼາຍ, ມີລົດນົວ ແລະ ມີກິ່ນຫອມຂອງປາຊິວ. ປາຊິວປະເພດຕ່າງໆທີ່ຫາໄດ້ຢູ່ທະເລຟູ໋ກວົກ ແມ່ນພາກສ່ວນຕົ້ນຕໍ່ເພື່ອຜະລິດນ້ຳປາຟູ໋ກວົກ. ປາຊິວທີ່ຫາໄດ້ຈາກທະເລຈະຖືກເອືອບກັບເກືອ ແລ້ວບົ່ມໃນຖັງໄມ້ຈົນຮອດເວລາປາຖືກລະລາຍໃຫ້ໝົດ, ປາບົ່ມຍິ່ງດົນເທົ່າໃດ, ນ້ຳປາຍິ່ງແຊບເທົ່ານັ້ນ. ບັນດາຖັງໄມ້ບັນຈຸປາຊິວເພື່ອຜະລິດນ້ຳປາຟູ໋ກວົກນັ້ນ, ແມ່ນຮູບພາບທີ່ແຂກທ່ອງທ່ຽວລືມບໍ່ໄດ້ເມື່ອມາຢາມຟູ໋ກວົກ. ປ້າດັ້ງທິກ໋າຍ, ຫາກໍ່ກັບມາຈາກຟູ໋ກວົກ, ໃຫ້ຮູ້ວ່າ:
“ໃນລາຍການທ່ອງທ່ຽວຟູ໋ກວກ, ຂ້າພະເຈົ້າໄດ້ໄປຢາມບໍລິສັດຜະລິດນ້ຳປາ, ໄດ້ເຫັນປະຈັກຕາວິທີຜະລິດນ້ຳປາ. ຂ້າພະເຈົ້າກໍ່ໄດ້ຂີ່ເຮືອອອກສູ່ທະເລ ແລະ ປ່ອຍຄັນເບັດຕຶກປາເອງ. ປາທີ່ຫາໄດ້, ເຂົາເຈົ້າຈະປຸງແຕ່ງອາຫານໃຫ້ນັກທ່ອງທ່ຽວກິນເທິງເຮືອ. ທະເລຟູ໋ກວົກ ງາມຫຼາຍ. ນີ້ແມ່ນລາຍການທ່ອງທ່ຽວຈັບອົກຈັບໃຈທີ່ສຸດ”.
ນ້ຳປາຟູ໋ກວກ
(ພາບ: ອິນເຕີແນດ)
ຟູ໋ກວກ ມີທັດສະນີຍະພາບທີ່ສວຍງາມ ແລະ ມີຜະລິດຕະພັນພິເສດຫຼາຍຢ່າງຄື: ໄຂ່ມຸກທຳມະຊາດ, ນ້ຳປາຊິວ, ໝາກຜິກໄທ. ໝາກຜິກໄທຟູ໋ກວົກ ທັງເຜັດ ແລະ ຫອມກວ່າຢູ່ບ່ອນອື່ນ. ກໍ່ເຊັ່ນດຽວກັບນ້ຳປາ, ໝາກຜິກໄທຟູ໋ກວກ ໄດ້ກາຍເປັນເຄື່ອງໝາຍການຄ້າພິເສດຂອງ ຟູ໋ກວົກ. ຕົ້ມໝາກຜິກໄທແມ່ນພາກສ່ວນທີ່ຂາດບໍ່ໄດ້ໃນຊີວິດຂອງປະຊາຊົນຢູ່ທີ່ນີ້. ທ່ານ ຟ້າມວັນມິງ, ຊາວຟູ໋ກວກ, ໃຫ້ຮູ້ວ່າ:
“ຕົ້ນໝາກຜິກໄທໄດ້ປະກົດມີຢູ່ໃນເກາະກ່ອນນີ້ນັບຮ້ອຍປີແລ້ວ, ແນວໝາກຜິກໄທນີ້ແມ່ນມາຈາກອິນເດຍ. ອາກາດ ແລະ ທີ່ດິນຢູ່ເກາະຟູ໋ກວົກ ແມ່ນເໝາະສົມທີ່ສຸດເພື່ອໃຫ້ຕົ້ນໝາກຜິກໄທພັດທະນາ”.
ໝາກຜິກໄທຟູ໋ກວກ
(ພາບ: ອິນເຕີແນດ) ບໍ່ພຽງແຕ່ສະໜອງຜະລິດຕະພັນກະເສດທີ່ມີຄ່າເທົ່ານັ້ນ, ຫາກສວນໝາກມວງຫິມມະພານຟູ໋ກວົກ ຍັງແມ່ນທີ່ຢູ່ອາໄສຂອງນົກຫຼາຍປະເພດ, ແມ່ນສະຖານທີ່ທ່ອງທ່ຽວທີ່ສ້າງຄວາມນິຍົມໃຫ້ແກ່ນັກທ່ອງທ່ຽວອີກດ້ວຍ. ນັກທ່ອງທ່ຽວມາແຫ່ງນີ້ໄດ້ຊົມເຫັນ ແລະ ດົມກິ່ນຫອມຂອງໝາກມວງຫິມມະພານສຸກງອມໃນເຂດສວນ ກໍ່ຮູ້ສຶກສະຫວາດສະເຫວີຍ ແລະ ມີຄວາມປະທັບໃຈຕໍ່ເກາະເພັດຟູ໋ກວົກ ກວ່າອີກ.