(vovworld) - ໃນຊຸມມື້ນີ້, ແຂວງນິງບິ່ງ ພວມປັບປຸງສຳເນົາເຂດທັດສະນີຍະພາບສັງລວມຈ່າງອານ ໃຫ້ສຳເລັດບໍລິບູນ ເພື່ອຍື່ນສະເໜີຕໍ່ UNESCO ຮັບຮອງວ່າ: ແມ່ນມໍລະດົກທຳມະຊາດໂລກ. ດ້ວຍບັນດາຄຸນຄ່າອັນໃຫຍ່ຫຼວງທາງດ້ານວັດທະນະທຳປະຫວັດສາດ, ກ່ຽວກັບທັດສະນີຍະພາບ, ທໍລະນີສາດທີ່ເປັນເອກະລັກສະເພາະ, ເຂດທັດສະນີຍະພາບສັງລວມກຸງເກົ່າ ຮວາລື - ຈ່າງອານ, ຕາມກົກ, ບິກດົ້ງ ຂອງແຂວງນິງບິ່ງ ສົມຄວນໄດ້ຮັບການສະເໜີຕໍ່ UNESCO ຮັບຮອງວ່າແມ່ນມໍລະດົກໂລກ.
ທັດສະນີຍະພາບຮວາລື - ຈ່າງອານ
(ພາບ: google.com.vn)
ໂດຍຫ່າງຈາກຮ່າໂນ້ຍ ໄປທາງທິດໃຕ້ປະມານ 100 ກມ, ຮວາລື ຂື້ນກັບແຂວງນິງບິ່ງ ເຊິ່ງແມ່ນເຂດດິນທີ່ມີຊື່ສຽງໃນປະຫວັດສາດຂອງຫວຽດນາມ. ນິ້ແມ່ນກຸງເກົ່າທຳອິດຂອງປະເທດ Dai Co Viet (ໝາຍເຖິງປະເທດຫວຽດນາມ)ໃນສະຕະວັດທີ X. ແມ່ນດິນແດນຂອງສາມສະໄໝລາດຊະວົງຄື ດິງ, ເລ ແລະ ຫຼີ ດ້ວຍເຈົ້າຊີວິດ 6 ອົງໃນປະຫວັດສາດ. 10 ກວ່າສະຕະວັດໄດ້ຜ່ານໄປແລ້ວ, ເຖິງວ່າກຸງເກົ່າຮວາລື ບໍ່ສາມາດຮັກສາຮູບເດີມໄວ້ໄດ້ຄືເກົ່າກໍ່ຕາມ, ແຕ່ບັນດາປູຊະນີຍະສະຖານທີ່ຕິດພັນກັບປະຫວັດສາດຄື: ວິຫານບູຊາເຈົ້າຊີວິດ Dinh Tien Hoang, ວິຫານບູຊາເຈົ້າຊີວິດ Le Dai Hanh, ຂົວດົງ, ຂົວເຢັ່ນ; ບັນດາຮ່ອງຮອຍຂອງກຳແພງທິດຕາເວັນອອກ, ກຳແພງທິດເໜືອ, ກຳແພງເຢັ່ນ, ກຳແພງທິດໃຕ້, ວັດ Nhat Tru (ເສົາດຽວ)... ຮວາລື ຍັງມີພູຜາປ່າໄມ້ ແມ່ນ້ຳລຳເຊທີ່ສວຍງາມອີກເຊັ່ນ: ຕາມກົກ - ບິກດົ້ງ, ເມືອງຫຼວງຮວາລື, ຈ່າງອານ. ໃນນັ້ນເຂດປູຊະນີຍະສະຖານສັງລວມຈ່າງອານ ໄດ້ຮັບຖືວ່າແມ່ນຫໍພິພິດທະພັນກາງແຈ້ງ ດ້ວຍເນື້ອທີ່ທັງໝົດກວ່າ 5 ພັນເຮັກຕາ ພ້ອມກັບບັນດາສາຍພູຫີນປູນ, ໜອງນ້ຳຂຽວສົດໃສທີ່ເຊື່ອມຕໍ່ກັບຖ້ຳ 48 ແຫ່ງ. ໃນຖ້ຳມີຫີນນົມຜາທີ່ມີມານັບລ້ານປີ. ນອກຈາກບັນດາຄຸນຄ່າດ້ານປະຫວັດສາດວັດທະນະທຳແລ້ວ, ບັນດາຄຸນຄ່າດ້ານທໍລະນີສາດ, ປູຊະນີຍະສະຖານບູຮານ ແລະ ທັດສະນີຍະພາບຢູ່ທີ່ນີ້ໄດ້ດຶງດູດນັກຊ່ຽວຊານ, ແຂກທ່ອງທ່ຽວພາຍໃນ ແລະ ຕ່າງປະເທດຫຼາຍຄົນມາຢ້ຽມຢາມ ແລະ ຊອກຮູ້. ເມື່ອມາແຫ່ງນີ້, ນັກທ່ອງທ່ຽວມີໂອກາດໄດ້ໄປຢ້ຽມຢາມວັດ ບ໋າຍດິ໋ງ ເຊິ່ງແມ່ນເຂດວັດວາອາຮາມສັງລວມທັງສວຍງາມ, ທັງໃຫຍ່ກວ່າໝູ່ຢູ່ອາຊີຕາເວັນອອກສ່ຽງໃຕ້. ຜ່ານການຢ້ຽມຢາມ, ບັນດາທ່ານເອກອັກຄະລັດຖະທູດ, ຜູ້ຕາງໜ້າບັນດາອົງການຈັດຕັ້ງ ແລະ ການທູດສາກົນ ລ້ວນແຕ່ສະໜັບສະໜູນເລື່ອງຫວຽດນາມ ສະໜີ UNESCO ຮັບຮອງເຂດທັດສະນີຍະພາບກຸງເກົ່າ ຮວາລື - ຈ່າງອານ ເປັນມໍລະດົກທຳມະຊາດໂລກ. ທ່ານເອກອັກຄະລັດຖະທູດ ກູບາ ປະຈຳຫວຽດນາມ Gonzalet, ເວົ້າວ່າ:
”ຂ້າພະເຈົ້າມາຈ່າງອານ ຫຼາຍເທື່ອແລ້ວ. ແຕ່ລະເທື່ອມາແຫ່ງນີ້ຂ້າພະເຈົ້າລ້ວນແຕ່ພົບເຫັນບັນດາສິ່ງທີ່ໃໝ່ອ່ຽມ, ພິເສດທັດສະນີຍະພາບທຳມະຊາດຢູ່ທີ່ນີ້ແມ່ນສວຍງາມທີ່ສຸດ”.
ທັດສະນີຍະພາບຮວາລື - ຈ່າງອານ
(ພາບ: google.com.vn)
ເອກອັກຄະລັດຖະທູດປະເທດຕ່າງໆຫຼາຍທ່ານຖືວ່າ: ເຂດທັດສະນີຍະພາບສັງລວມຮວາລື - ຈ່າງອານ ສົມເປັນມໍລະດົກທຳມະຊາດໂລກ ຍ້ອນບັນດາຄຸນຄ່າທີ່ເປັນເອກະລັກສະເພາະຂອງມັນ. ເອກອັກຄະລັດຖະທູດ ແລະ ຜູ້ຕາງໜ້າບັນດາອົງການຈັດຕັ້ງພາຍໃນ ແລະ ຕ່າງປະເທດຫຼາຍທ່ານຍັງຕັ້ງໜ້າສະໜັບສະໜູນການໂຄສະນາ, ແນະນຳກ່ຽວກັບເຂດປູຊະນີຍະສະຖານ ທັດສະນີຍະພາບ ເພື່ອຍື່ນສະເໜີຕໍ່ UNESCO ຮັບຮອງເປັນມໍລະດົກທຳມະຊາດຂອງໂລກ. ທ່ານ Vu Xuan Hong ປະທານສະຫະພັນບັນດາອົງການຈັດຕັ້ງມິດຕະພາບຫວຽດນາມ, ໃຫ້ຮູ້ວ່າ:
”ພວກຂ້າພະເຈົ້າຈະສົມທົບກັບແຂວງ ນິງບິ່ງ, ກະຊວງວັດທະນະທຳ ກິລາ ແລະ ທ່ອງທ່ຽວ ກໍ່ຄືບັນດາອົງການທີ່ກ່ຽວຂ້ອງຂອງຫວຽດນາມ ເພື່ອຂົນຂວາຍເພື່ອນມິດສາກົນມາຫວຽດນາມ, ຢ້ຽມຢາມຈ່າງອານ ຫຼາຍກວ່າອີກ ບົນພື້ນຖານນັ້ນຈະຮູ້ ແລະ ສະໜັບສະໜູນແນວຄວາມຄິດຂອງພວກເຮົາໃນການຮັບຮອງປູຊະນີຍະສະຖານນີ້”.
ທັດສະນີຍະພາບຮວາລື - ຈ່າງອານ
(ພາບ: google.com.vn)
ສຳຫຼັບອຳນາດການປົກຄອງ ແລະ ປະຊາຊົນແຂວງນິງບິ່ງ ແລ້ວ, ບັນຫາທີ່ວາງອອກໃນປະຈຸບັນແມ່ນຕ້ອງເຮັດແນວໃດເພື່ອຮັກສາສິ່ງແວດລ້ອມທຳມະຊາດທີ່ສວຍງາມນີ້ໄວ້ ເຮັດໃຫ້ເຂດທັດສະນີຍະພາບນີ້ສົມເປັນມໍລະດົກທຳມະຊາດ ວັດທະນະທຳຂອງໂລກ. ທ່ານ Bui Van Nam, ເລຂາຄະນະພັກແຂວງນິງບິ່ງ, ໃຫ້ຮູ້ວ່າ:
”ພວກຂ້າພະເຈົ້າຂອບອົກຂອບໃຈບັນດາກະຊວງ, ຂະແໜງການ, ພິເສດແມ່ນກະຊວງການຕ່າງປະເທດທີ່ໄດ້ມີການປະສານສົມທົບຢ່າງແໜ້ນແຟ້ນກັບອຳນາດການປົກຄອງແຂວງນິງບິ່ງ ໃນການປັບປຸງສຳເນົາໃຫ້ສຳເລັດບໍລິບູນ, ແລະສ້າງເງື່ອນໄຂເພື່ອໃຫ້ UNESCO ພິຈາລະນາ. ຂ້າພະເຈົ້າເຊື່ອໝັ້ນວ່າ ດ້ວຍຄວາມເອົາໃຈໃສ່ຂອງລັດຖະບານ, ການໜູນຊ່ວຍຢ່າງຕັ້ງໜ້າຂອງບັນດາກະຊວງ, ຂະແໜງການ, ແນ່ນອນວ່າມໍລະດົກຈ່າງອານ ຈະໄດ້ຮັບການຮັບຮອງຈາກ UNESCO ວ່າແມ່ນມໍລະດົກທຳມະຊາດຂອງໂລກ”.
ຕາມແຜນການແລ້ວ, ໃນເດືອນ 9, ຄະນະກຳມະການປະຊາຊົນແຂວງນິງບິ່ງ ຕ້ອງປັບປຸງສຳເນົາໃຫ້ສຳເລັດເພື່ອຝາກເຖິງກົມມໍລະດົກວັດທະນະທຳ, ກະຊວງວັດທະນະທຳກິລາ ແລະ ທ່ອງທ່ຽວ. ສຳເນົາທາງການຈະຍື່ນຕໍ່ UNESCO ໃນປີ 2013. ປະຈຸບັນ, ຫວຽດນາມມີມໍລະດົກ 7 ແຫ່ງໄດ້ຮັບການຮັບຮອງຈາກ UNESCO ວ່າແມ່ນມໍລະດົກໂລກ. ຖ້າຫາກວ່າເຂດທັດສະນີຍະພາບຈ່າງອານ ໄດ້ຮັບການຮັບຮອງຈາກ UNESCO ແລ້ວ, ນີ້ຈະແມ່ນມໍລະດົກໂລກແຫ່ງທີ 8 ແລະ ແມ່ນມໍລະດົກວັດທະນະທຳໂລກແຫ່ງທຳອິດຂອງຫວຽດນາມທີ່ໄດ້ຮັບການຮັບຮອງຕາມມາດຕະຖານສັງລວມ ດ້ວຍບັນດາຄຸທນຄ່າທຳມະຊາດ, ທໍລະນີສາດ ແລະ ວັດທະນະທຳທີ່ເປັນເອກະລັກສະເພາະ.