(vovworld) ກ່ອນນີ້ 15 ປີ, ປີ 1995, ຄະນະກຳມະການປະຊາຊົນນະຄອນຮ່າໂນ້ຍ ໄດ້ຕົກລົງເລືອກເຟັ້ນຮູບແຕ້ມ ເຄວັນກາກ (Khue Van Cac) ຂອງນັກແຕ້ມ ຟ້າມງອກຕ໋ວນ ແມ່ນຮູບພາບທີ່ເປັນສັນຍາລັກຂອງນະຄອນຫຼວງ ຮ່າໂນ້ຍ. ຮອດວັນທີ 21 ∕ 11 ປີນີ້, ສະພາແຫ່ງຊາດຫວຽດນາມ ໄດ້ຮັບຮອງເອົາກົດໝາຍວ່າດ້ວຍນະຄອນຫຼວງ, ໃນນັ້ນ ເຄວັນກາກ (Khue Van Cac) ໄດ້ຮັບເລືອກເຟັ້ນເປັນສັນຍາລັກຂອງນະຄອນຫຼວງຮ່າໂນ້ຍ ຢ່າງເປັນທາງການ.
ເຄວັນກາກ - ສັນຍາລັກຂອງນະຄອນຫຼວງຮ່າໂນ້ຍ
(ພາບອິນເຕີແນດ)
ເຄວັນກາກ (Khue Van Cac) ຕັ້ງໃນເຂດປູຊະນີຍະສະຖານ ວັນມ໋ຽວກວົກຕືຢ໋າມ (Van Mieu – Quoc Tu Giam), ນະຄອນຫຼວງ ຮ່າໂນ້ຍ, ນີ້ຖືກຖືວ່າແມ່ນມະຫາວິທະຍາໄລແຫ່ງທຳອິດຂອງຫວຽດນາມ ທີ່ໄດ້ຮັບການກໍ່ສ້າງແຕ່ສະໄໝລາດຊະວົງ ຫງຽນ ເມື່ອປີ 1805, ເຄວັນກາກ (Khue Van Cac) ແມ່ນ ຕຶກ 2 ຊັ້ນ, ຮູບຈັດຕຸລັດ ຖືກປຸກສ້າງດ້ວຍໄມ້ ແລະ ດິນຈີ່. ຊັ້ນລຸ່ມຂອງ ເຄວັນກາກ (Khue Van Cac) ມີ 4 ເສົາດ້ວຍດິນຈີ່ທີ່ຄວັດຮູບກ້ອນເມກ, ຖານເສົາຮູບ 4 ຫຼ໋ຽມມົນທົນເຮັດດ້ວຍດິນຈີ່ບາດຈ່າງ. ສ່ວນຊັ້ນສອງເຮັດດ້ວຍໄມ້ຕັ້ງເທິງ 4 ເສົາ ແລະ ມີ 4 ປ່ອງຢ້ຽມຮູບວົງມົນ, ປະກອບດ້ວຍລັດສະໝີແສງຕາເວັນ ທີ່ແຜ່ອອກ 4 ທິດ. ກ່ອນນີ້, ເຄວັນກາກ (Khue Van Cac) ແມ່ນບ່ອນຈັກການປະຊຸມເພື່ອວິຈານບັນດາບົດວັນນະຄະດີທີ່ດີເດັ່ນໃນການສອບເສັງ. ເຄວັນກາກ (Khue Van Cac) ຍັງແມ່ນສັນຍາລັກຂອງດາວ ເຄ (khue) ເຊິ່ງແມ່ນດາວແຫ່ງສິລະປະ ວັດນະຄະດີ, ມັນມີຄວາມໝາຍແຫ່ງການກຳເນີດ, ພັດທະນາຂອງໂລກຈັກກະວານ, ແລະຊີວິດຂອງໂລກມະນຸດ. ຕາມນັກຄົ້ນຄ້ວາປະຫວັດສາດ ເຢືອງຈຸງກວົກ ແລ້ວ, ໃນຈຳນວນກິດຈະກຳທີ່ດີເດັ່ນຂອງຮ່າໂນ້ຍ, ເຄວັນກາກ (Khue Van Cac) ແມ່ນກິດຈະກຳທີ່ມີຄວາມໝາຍປະຫວັດສາດຂອງຊາດຫວຽດນາມ. ເລື່ອງ ເຄວັນກາກ (Khue Van Cac) ໄດ້ຮັບການເລືອກເຟັ້ນເປັນສັນຍາລັກຂອງນະຄອນຫຼວງ ຮ່າໂນ້ຍ ແມ່ນການເຊີດຊູບັນດາຄວາມໝາຍປະຫວັດສາດ, ວັດທະນະທຳ ແລະ ວັດທະນະທຳມະນຸດຢ່າງເລິກເຊິ່ງຂອງກິດຈະກຳນີ້.
“ຮູບພາບໜອງ ໂຮ່ເກືອມ ດ້ວຍທາດເຕົ່າ (Thap Rua) ໄດ້ນຳມາເຊິ່ງຄວາມໝາຍກ່ຽວກັບການເຫຼື້ອມໄສ. ສ່ວນວັດເສົາດຽວ (Chua Mot Cot) ແມ່ນສັນຍາລັກສະຖາປັດຕະຍາກຳຫວຽດນາມ ແຕ່ຕິດພັນກັບພຸດທະສາສະໜາ. ມີແຕ່ ເຄວັນກາກ (Khue Van Cac) ແມ່ນສົມກັບສັນຍາລັກຂອງ ຮ່າໂນ້ຍ, ເພາະວ່ານີ້ແມ່ນສັນຍາລັກໃຫ້ແກ່ພື້ນຖານອະລິຍະທຳຂອງຊາດ”
ເຄວັນກາກ (Khue Van Cac)
(ພາບອິນເຕີແນດ)
ທ່ານນາງ ຫງວຽນງາ, ຜູ້ອຳນວຍການເຮືອນສິລະປະ, ຖືວ່າ ເຄວັນກາກ (Khue Van Cac) ແມ່ນສັນຍາລັກຂອງນະຄອນຫຼວງ ຮ່າໂນ້ຍ, ແລະສິ່ງດັ່ງກ່າວໄດ້ຮັບຄວາມເຫັນດີເຫັນພ້ອມຈາກຊາວ ຮ່າໂນ້ຍເປັນຈຳນວນຫຼວງຫຼາຍ.
“ວັດເສົາດຽວ ແລະ ວັນມ໋ຽວ ມີຄວາມໝາຍອັນໃຫຍ່ຫຼວງ. ວັດເສົາດຽວມີຄວາມໝາຍທາງສາສະໜາຫຼາຍກວ່າ, ສ່ວນ ວັນມ໋ຽວ ພັດມີຄວາມໝາຍກວ່ານັ້ນ, ເພາະວ່າມັນແມ່ນມະຫາວິທະຍາໄລຂອງຫວຽດນາມທີ່ມີມາແຕ່ດົນນານ. ສະແດງໃຫ້ເຫັນຄວາມຮູ້ຂອງປະເທດໜຶ່ງທີ່ມີມາແຕ່ດົນນານ”.
ຮູບແບບສັນຍາລັກ ເຄວັນກາກ (Khue Van Cac) ຂອງນັກແຕ້ມ ຟ້າມງອກຕ໋ວານ (Pham Ngoc Tuan) ໄດ້ຊີ້ໃຫ້ເຫັນມູນເຊື້ອວັດທະນະທຳຂອງຊາດ ຜ່ານຮູບພາບມະຫາວິທະຍາໄລແຫ່ງທຳອິດຂອງຫວຽດນາມ. ວັນມ໋ຽວ - ກວົກຕືຢາມ ແມ່ນສູນວັດທະນະທຳ, ແຫ່ງບຳລຸງສ້າງຜູ້ທີ່ມີຄວາມເກັ່ງກ້າສາມາດຂອງປະເທດໃນປະຫວັດສາດ. ຮູບແບບນີ້ສະແດງໃຫ້ເຫັນຄວາມມຸ້ງຫວັງທາງດ້ານວັດທະນະທຳ, ປັນຍາຂອງຊາວ ທັງລອງ - ຮ່າໂນ້ຍ. ອາດເວົ້າໄດ້ວ່າຮູບແບບສັນຍາລັກ ໄດ້ສະແດງໃຫ້ເຫັນລັກສະນະ ແລະ ຈຸດພິເສດຂອງນະຄອນ ຮ່າໂນ້ຍ - ນະຄອນຫຼວງອະລິຍະທຳທີ່ມີມານັບພັນປີ, ສົມທົບຢ່າງກົມກຽວລະຫວ່າງລັກສະນະສິລະປະ, ສີສັນຂອງຊາດ ແລະ ລັກສະນະທີ່ທັນສະໄໝ, ເຄັ່ງຂຶມ. ນັກຄົ້ນຄ້ວາປະຫວັດສາດ ເລວັນລານຖືວ່າ, ນອກຈາກຮູບພາບ ເຄວັນກາກ (Khue Van Cac) ແລ້ວ, ຮ່າໂນ້ຍ ຍັງມີມໍລະດົກ, ຮູບພາບຫຼາຍຢ່າງທີ່ໄດ້ຝັງເລິດຢູ່ໃນໃຈຂອງຊາວຮ່າໂນ້ຍຄື: ວັດເສົາດຽວ, ທາດເຕົາ, ໜອງຮ່ວານກ໋ຽມ, ທາດບຸດ, ເສົາທຸງຮ່າໂນ້ຍ, ພະລາດຊະວັງທັງລອງ, ໂກລວາ… ນີ້ແມ່ນຮູບພາບທີ່ຂາດບໍ່ໄດ້ຂອງຊາວຮ່າໂນ້ຍ, ປະກອບສ່ວນສ້າງຊື່ສຽງຮຽງນາມໃຫ້ແກ່ ທັງລອງ - ຮ່າໂນ້ຍ. ແຕ່ເມື່ອເລືອກເຟັ້ນສັນຍັງລັກ ແມ່ນຕ້ອງລວບລວມທັງລັກສະນະມູນເຊື້ອ, ທັນສະໄໝ ແລະ ມຸ້ງໄປສູ່ອະນາຄົດ. ທ່ານ ເລວັນລານ ຢືນຢັນວ່າ, ເຄວັນກາກ (Khue Van Cac) ສົມເປັນສັນຍາລັກໃຫ້ແກ່ມູນເຊື້ອຂອງດິນແດນແຫ່ງອະລິຍະທຳທີ່ມີມານັບພັນປີ.
“ເມື່ອເລືອກເຟັ້ນ ເຄວັນກາກ (Khue Van Cac) ເປັນສັນຍາລັກ, ພວກເຮົາໄດ້ປຶກສາຫາລື ແລະ ເປັນເອກະພາບນຳກັນວ່າ, ເຄວັນກາກ (Khue Van Cac) ແມ່ນດາວເຄ, ເຊິ່ງແມ່ນດາວທີ່ເປັນສັນຍາລັກໃຫ້ແກ່ວັດທະນະທຳ, ການສຶກສາ, ການສອບເສັງ, ພວກເຮົາເລືອກມັນຍ້ອນຄວາມໝາຍດັ່ງກ່າວ, ເພາະວ່ານະຄອນຫຼວງ ຮ່າໂນ້ຍ ແມ່ນນະຄອນອະລິຍະທຳທີ່ມີມານັບພັນປີ”.
ເຄວັນກາກ (Khue Van Cac)
(ພາບອິນເຕີແນດ
ພ້ອມກັບການຮັບຮອງເອົາກົດໝາຍວ່າດ້ວຍນະຄອນຫຼວງ, ຮ່າໂນ້ຍຈະເພີ່ມທະວີການແນະນຳ, ໂຄສະນາຄຸນຄ່າ, ຄວາມໝາຍທີ່ຊ້ອນແຝງໃນສັນຍາລັກ ເຄວັນກາກ (Khue Van Cac) ເຖິງປະຊາຊົນທຸກຊັ້ນວັນນະ ກໍ່ຄືນັກທ່ອງທ່ຽວສາກົນ. ຮ່າໂນ້ຍ ກໍ່ຈະຈັດຕັ້ງການເຄື່ອນໄຫວທ່ອງທ່ຽວ, ການເຄື່ອນໄຫວທາງດ້ານວັດທະນະທຳທີ່ກ່ຽວຂ້ອງເຖິງຄວາມໝາຍຂອງສັນຍາລັກຢູ່ສະຖານທີ່ທ່ອງທ່ຽວຈຳນວນໜຶ່ງ, ພິເສດແມ່ນຢູ່ ວັນມ໋ຽວ - ກວົກຕືຢາມ ເພື່ອເຮັດໃຫ້ສັນຍາລັກນີ້ບໍ່ພຽງແຕ່ແມ່ນສັນຍາລັກຂອງນະຄອນ ຮ່າໂນ້ຍ ເທົ່ານັ້ນ, ຫາກຍັງແມ່ນສັນຍາລັກວັດທະນະທຳຂອງຊາວຫວຽດນາມອີກດ້ວຍ.