(vovworld)- ຊາປາ ຊື່ງແມ່ນແຫ່ງທີ່ມີທິວທັດທຳມະຊາດສວຍງາມດັ່ງໃນຝັນ, ນ້ຳໝອກປົກຄຸມຕະຫລອດປີ, ແມ່ນສະຖານທີ່ທ່ອງທ່ຽວທີ່ມີຊື່ສຽງ ແລະ ເປັນໃຈກາງຂອງແຂວງ ລາວກາຍ ແລະ ເຂດໄຕບັກ (ໝາຍເຖິງເຂດຕາເວັນຕົກສຽງເຫນືອຂອງ ຫວຽດນາມ). ກ່ອນນີ້, ຈາກຮ່າໂນ້ຍໄປລາວກາຍ-ຊາປາ ດ້ວຍລົດໂອໂຕ ຫລື ລົດໄຟ ນັກທ່ອງທ່ຽວກໍ່ຕ້ອງເສຍເວລາມື້ຫນຶ່ງ. ແຕ່ປະຈຸບັນ ດ້ວຍເສັ້ນທາງຄວາມໄວສູງ ຮ່າໂນ້ຍ - ລາວກາຍ ນັກທ່ອງທ່ຽວໄປຊາປາ ມີແຕ່ເສຍເວລາພຽງ 3 ຊົ່ວໂມງເຄິ່ງເທົ່ານັ້ນ. ບົດຂຽນຂອງນັກຂ່າວ ລານແອງ ທີ່ພາດຫົວເລື່ອງວ່າ: ເສັ້ນທາງໄປເຖິງ ຊາປາ ບໍ່ໄກອີກ
ຊາປາ ສະຖານທີ່ທ່ອງທ່ຽວທີ່ມີຊື່ສຽງຢູ່ຫວຽດນາມ
ພາບ:ivivu.com
|
ເສັ້ນທາງຄວາມໄວສູງ ໂນ້ຍບາຍ - ລາວກາຍ ມີຄວາມຍາວ 245 ກິໂລແມັດ, ໄດ້ນຳເຂົ້າເຄື່ອນໄຫວແຕ່ເດືອນ 9/2014. ເສັ້ນທາງນີ້ ໄປຜ່ານ 5 ແຂວງ ແລະ ນະຄອນຄື: ຮ່າໂນ້ຍ, ຫວີງຟຸກ, ຟູທໍ້, ອຽນບາຍ ແລະ ລາວກາຍ. ນີ້ແມ່ນເສັ້ນທາງຄວາມໄວສູງທີ່ມີຂະຫນາດໃຫຍ່ກວ່າໝູູ່, ຍາວກວ່າໝູ່ ແລະ ທັນສະໄຫມທີ່ສຸດຢູ່ຫວຽດນາມ. ເສັ້ນທາງຄວາມໄວສູງ ໂນ້ຍບາຍ - ລາວກາຍ ຖືກນຳເຂົ້າເຄື່ອນໄຫວ ໄດ້ສ້າງຄວາມສະດວກໃຫ້ຜູ້ນິຍົມໄປທ່ອງທ່ຽວພິເສດແມ່ນໄປທ່ອງທ່ຽວຊາປາ ແລະ ຄົ້ນຫາທັດສະນີຍະພາບຢູ່ໄຕບັກ.
ຖ້າຂີ່ລົດໂອໂຕຈາກ ຮ່າໂນ້ຍ ໄປ ຊາປາ, ນັກທ່ອງທ່ຽວຈະໄດ້ຮັບຊົມທິວທັດທຳມະຊາດທີ່ສວຍງາມຂອງເຂດ ໄຕບັກ. ບໍ່ຄືບັນດາເສັ້ນທາງເກົ່າ. ກ່ອນນີ້, ຈາກຮ່າໂນ້ຍໄປລາວກາຍ ຕ້ອງໄປລຽບຕາມເນີນພູ, ສ່ວນເສັ້ນທາງຄວາມໄວສູງ ໂນ້ຍບາຍ ລາວກາຍ ປະກອບດ້ວຍ 4 ລານ, ທະລຸຜ່ານພູ, ໄປຍັງລາວກາຍ. ລຽບຕາມເສັ້ນທາງນີ້ ທ່ານຈະເຫັນປ່າໄມ້ທີ່ຂຽວສົດງົດງາມ ແລະ ທົ່ງນາທີ່ກວ້າງໃຫຍ່. ທິວທັດທຳມະຊາດສະຫງົບງຽບ, ອາກາດປອດໂປ່ງເຮັດໃຫ້ນັກທ່ອງທ່ຽວຮູ້ສຶກສະຫວາດສະເຫວີຍ, ມີຄວາມປະທັບໃຈເມື່ອມາຢ້ຽມຢາມ ຊາປາ. ອ້າຍ ຫງວຽນຫາຍ, ນັກທ່ອງທ່ຽວມາຈາກຮ່າໂນ້ຍ ແບ່ງປັນວ່າ:
“ກ່ອນນີ້ ເມື່ອເດີນທາງຜ່ານບັນດາເສັ້ນທາງເກົ່າໄປໄຕບັກ ຂ້າພະເຈົ້າຮູ້ສຶກເປັນຫ່ວງກັນວົນທີ່ສຸດ. ປະຈຸບັນ ເສັ້ນທາງຄວາມໄວສູງ ຮ່າໂນ້ຍ - ລາວກາຍໄດ້ສ້າງຄວາມສະດວກທີ່ສຸດໃຫ້ແກ່ນັກທ່ອງທ່ຽວຄືພວກຂ້າພະເຈົ້າ ແລະ ສິ່ງທີ່ສ້າງຄວາມປະທັບໃຈທີ່ສຸດ ນັ້ນແມ່ນນັກທ່ອງທ່ຽວໄດ້ຮັບຊົມທິວທັດທຳມະຊາດສວຍສົດງົດງາມລຽບຕາມສອງຟາກທາງ.”
ເມື່ອເດີນທາງຈາກ ຮ່າໂນ້ຍ ໄປຊາປາ ບໍ່ຕ້ອງເສຍເວລາຫລາຍຄືກ່ອນນີ້, ດັ່ງນັ້ນນັກທ່ອງທ່ຽວຈະມີເວລາຕື່ມອີກເພື່ອຄົ້ນຫາທັດສະນີຍະພາບ ແລະ ການດຳລົງຊີວິດຂອງຊາວຊົນເຜົ່າຢູ່ເຂດ ໄຕບັກ. ທ່ານ ຫງວຽນຮົ່ງທັງ, ຜູ້ອຳນວຍການບໍລິສັດ Sunline Travel ໃຫ້ຮູ້ວ່າ: ເມື່ອເສັ້ນທາງຄວາມໄວສູງເຊື່ອມຕໍ່ ຮ່າໂນ້ຍ - ລາວກາຍ, ນຳເຂົ້າເຄື່ອນໄຫວ, ຈຳນວນນັກທ່ອງທ່ຽວໄປຢ້ຽມຢາມ ຊາປາ ກໍ່ຫລາຍກວ່າ ເພາະວ່າ ນັກທ່ອງທ່ຽວປະຢັດເວລາ ໄດ້ 6 ຊົ່ວໂມງ.
“ເມື່ອເສັ້ນທາງ ຮ່າໂນ້ຍ - ລາວກາຍ ໄດ້ຮັບການກໍ່ສ້າງສຳເລັດ ນັກທ່ອງທ່ຽວມີໂອກາດໄດ້ສຳພັດກັບ 6 ແຂວງຢູ່ເຂດ ໄຕບັກ. ກ່ອນນີ້ ຂີ່ລົດໄຟຕ້ອງ ເສຍເວລາຫລາຍກວ່າ, ຄ່າເດີນທາງກໍ່ຫລາຍກວ່າ. ປະຈຸບັນມີເສັ້ນທາງຄວາມໄວສູງໄດ້ ຄວາມສະດວກຫລາຍຢ່າງ ໃຫ້ແກ່ນັກທ່ອງທ່ຽວ, ພິເສດສຳລັບຜູ້ບໍ່ມີເວລາຫລາຍ.”
ທິວທັດທຳມະຊາດສວຍງາມຢູ່ ຊາປາ
ພາບ:internet
|
ປະຈຸບັນ ໃນສາຍຕາຂອງນັກທ່ອງທ່ຽວ, ຊາປາ ຄືວ່າບໍ່ໄກຄືກ່ອນນີ້ອີກ. ເສັ້ນທາງຄວາມໄວສູງ ໂນ້ຍບາຍ - ລາວກາຍ ໄດ້ສ້າງຄວາມສະດວກຫລາຍຢ່າງໃຫ້ແກ່ບັນດາລາຍການທ່ອງທ່ຽວ ຊາປາ. ທ່ານ ເລແອງດ້າຍ, ຜູ້ອຳນວຍການບໍລິສັດທ່ອງທ່ຽວສາກົນ ບີງມີງ ໃຫ້ຮູ້ວ່າ: ນັບແຕ່ເສັ້ນທາງຄວາມໄວສູງຖືກນຳເຂົ້າເຄື່ອນໄຫວ, ຈຳນວນນັກທ່ອງທ່ຽວໄປຢ້ຽມຢາມ ຊາປາ ກໍ່ເພີ່ມຂຶ້ນຢ່າງກະໂດດຂັ້ນ.
“ປະຈຸບັນ ແຕ່ລະສັບປະດາ ຈຳນວນນັກທ່ອງທ່ຽວມາຢ້ຽມຢາມ ຊາປາ ກໍ່ຫລາຍ ກວ່າ. ອຳນາດການປົກຄອງ ຊາປາ ໄດ້ກະກຽມພື້ນຖານໂຄງລ່າງ, ໂຮງແຮມ, ບ່ອນຈອດລົດ ເພື່ອຕ້ອນຮັບນັກທ່ອງທ່ຽວ. ບັນດາບໍລິສັດທ່ອງທ່ຽວ ຢູ່ ຊາປາ ກໍ່ຜັດປ່ຽນກັນຈັດຕັ້ງບັນດາລາຍການສະແດງສິລະປະເພື່ອຮັບໃຊ້ນັກທ່ອງທ່ຽວ.”
ຊາປາ ຕັ້ງຢູ່ເຂດພູ ທີ່ມີຄວາມສູງເກືອບ 2000 ແມັດ ເມື່ອທຽບໃສ່ຫນ້ານ້ຳທະເລ, ສະນັ້ນ, ເມື່ອຍາມຫນາວວຽນມາ, ຖ້າເປີດປ່ອງຢ້ຽມໃນຕອນເຊົ້າ ທ່ານຈະເຫັນນ້ຳໝອກທີ່ງາມຕາພັດເຂົ້າ. ຍາມຄ່ຳຄືນ ນ້ຳໝອກກໍ່ປົກຄຸມໄປທົ່ວທຸກຖະຫນົນຫົນທາງ ສ້າງເປັນທັດສະນີຍະພາບທີ່ສວຍງາມດັ່ງໃນຝັນ, ເຮັດໃຫ້ນັກທ່ອງທ່ຽວມາຢ້ຽມຢາມຊາປາ ບໍ່ອາດຫລົງລືມໄດ້.