ໂດຍມີຄວາມສູງສະເລ່ຍ 1.050 ແມັດ ເມື່ອທຽບໃສ່ໜ້ານ້ຳທະເລ, ມີຈຸດພິເສດສະເພາະຂອງເຂດມີອາກາດອົບອຸ່ນ, ເຂດພູພຽງ ມົກເຈົາ ແມ່ນສະຖານທີ່ທ່ອງທ່ຽວທີ່ດູດດື່ມຂອງແຂກທ່ອງທ່ຽວດ້ວຍບັນດາຮູບແບບທ່ອງທ່ຽວລະຫຼິ້ນຢ່ອນອາລົມ, ຄົ້ນຫາທຳມະຊາດ ເພາະເຂດນີ້ແມ່ນແຫ່ງໃຫ້ກຳເນີດມວນມາລາ. ແຕ່ລະເທື່ອເມື່ອມີໂອກາດມາຢ້ຽມຢາມເຂດພູພຽງ ມົກເຈົາ, ແຂກທ່ອງທ່ຽວຈະມີໂອກາດໄດ້ຮັບຊົມທິວທັດທຳມະຊາດ ແລະ ເຊື່ອມຕົວເຂົ້າກັບໂລກແຫ່ງມວນມາລາຫຼາກຫຼາຍສີ.
ດອກບານຢູ່ໂມກເຈົາ |
ຍາມທ້າຍລະດູໜາວຕໍ່ລະດູບານໃໝ່, ອາກາດໜາວເຢັນ, ມີແສງແດດຍາມຕົ້ນປີສາດສ່ອງລົງໜ້າດິນ ອັນໄດ້ເຮັດໃຫ້ບັນຍາກາດທີ່ປອດໂປ່ງຂອງເຂດພູພຽງ ເພີ່ມຄວາມອົບອຸ່ນຫຼາຍຂຶ້ນ. ນີ້ກໍແມ່ນຊ່ວງເວລາທີ່ດອກຄາຍບານສະພັ່ງຢູ່ໂມກເຈົາ. ບັນດາຕົ້ນຄາຍເທິ່ງພູ ຫຼືໃນສວນຕ່າງໆໄດ້ເຮັດໃຫ້ສີສັນຂອງດິນແດນແຫ່ງນີ້ປ່ຽນແປງໄປ. ຢູ່ຕາມທາງສາຍຕ່າງໆ, ດອກຄາຍພາກັນບານສະພັ່ງເອ້ຄວາມ ມັນປຽບເໝືອນຮອຍຍິ້ມຂອງພວກນາງສາວເຜົ່າມົ້ງ, ຜູ້ໄທຢູ່ໂມກເຈົາອີຫຼີ
ໃນເດືອນ 2 ໄລຕາມຈັນທະປະຕິທິນ, ພາຍຫຼັງຊຸມມື້ທີ່ໜາວຈັດ, ອາກາດຢູ່ແຫ່ງນີ້ໄດ້ຄ່ອຍອົບອຸ່ນຂື້ນ, ນີ້ກໍແມ່ນຈຸດເວລາທີ່ບັນດາສວນໝາກໝັ້ນຢູ່ໂມກເຈົາ ພາກັນແຕກດອກອອກໜໍ່ດ້ວຍສີຂາວທີ່ງາມຕາ, ອັນໄດ້ສ້າງທັດສະນີຍະພາບທີ່ສວຍງານດັ່ງໃນຝັນ ແລະ ມີລັກສະນະເພີ່ມຈິດ. ບໍ່ສາມາດທົນທານຄືດັ່ງດອກໄມ້ຊະນິດອື່ນໆ, ດອກໝັ້ນໂມກເຈົາພຽງບານສະພັ່ງພາຍໃນ 2-3 ອາທິດເທົ່ານັ້ນ, ແລ້ວກໍຫ່ຽວໄປ ແທນທີ່ບັນດາໝາກໝັ້ນນ້ອຍໆງາມໆທີ່ເຕັມໄປດ້ວຍພະລັງຊີວິດ. ທ້າວ ຫງວຽນກີ ແຂກທ່ອງທ່ຽວ ມາຈາກຮ່າໂນ້ຍ ໃຫ້ຮູ້ວ່າ :
“ ເມື່ອພວກເຮົາຊົມດອກໄມ້ຖືກປັກໃນໂຖຢູ່ຕົວເມືອງນັ້ນ, ເຖິງແມ່ນວ່າ ພວກເຮົາເຫັນໄດ້ເຖິງຄວາມງາມຂອງດອກໄມ້ກໍຕາມ, ແຕ່ກໍບໍ່ສາມາດເຫັນຈົນສຸດວິນຍານຂອງດອກໄມ້. ດອກໄມ້ເກີດມາຈາກທຳມະຊາດ, ເມື່ອເຮົາເຫັນມັນຢູ່ຕາມທຳມະຊາດ ແມ່ນຈະຮູ້ສຶກມີຄວາມປະທັບໃຈ ແລະ ລັກສະນະເພີ່ນຈິດຂອງດອກໄມ້, ພິເສດແມ່ນດອກໝັ້ນ ”
ມາຮອດເດືອນ 3 ແລະ ເດືອນ 4, ເບິ່ງຄືວ່າ ໂມກເຈົາ ຖືກປ່ຽນເສື້ອໃໝ່ດ້ວຍສີຂາວຂອງດອກບານ. ປະຊາຊົນຢູ່ ໂມກເຈົາ ຖືດອກບານປຽບເໝືອນນາງສາວເຜົ່າຜູ້ໄທທີ່ສວຍງາມແບບລຽບງ່າຍແຕ່ພັດດຶງດູດຄວາມສົນໃຈຂອງແຂກທ່ອງທ່ຽວມາຢ້ຽມຢາມ ໂມກເຈົາ ຈາກສາລະທິດ. ທ່ານນາງ ຟຸ່ງທິລິວລີ ຮອງຫົວໜ້າຂະແໜງວັດທະນະທຳເມືອງ ໂມກເຈົາ ໃຫ້ຮູ້ວ່າ :
“ ດອກບານແມ່ນໜຶ່ງໃນຈຳນວນດອກໄມ້ຫຼາຍຊະນິດທີມີຊື່ສຽງ ແລະ ໂມກເຈົາມີແຜນການປູກດອກໄມ້ຊະນິດນີ້ຢູ່ຕາມທາງສາຍຕ່າງໆ. ຊຸມປີແລ້ວນີ້, ຊາວ ໂມກເຈົາໄດ້ປະຕິບັດແຜນຮ່າງປູກດອກບານ. ພ້ອມກັບການປູກດອກບານນັ້ນ, ພວກຂ້າພະເຈົ້າກໍໄດ້ຜັນຂະຫຍາຍປູກດອກໄມ້ຊະນິດອື່ນໆ ເພື່ອມຸ່ງໄປສູ່ການສ້າງ ໂມກເຈົາ ເປັນແດນສະຫວັນມວນມາລາ ຄືດັ່ງຄຳຍົກຍ້ອງຂອງແຂກທ່ອງທ່ຽວຫຼາຍຄົນ”
ໃນຊ່ວງເວລາທ້າຍລະດູໃບໄມ້ຫຼົ່ນ ແລະ ເລີ່ມກ້າວເຂົ້າສູ່ລະດູໜາວຄືໃນລະຫວ່າງເດືອນ 10 ຫາ 11 , ຢູ່ຕາມຮອມພູໃນເຂດພູພຽງ ໂມກເຈົາ, ດອກຜັກກາດຂາວພາກັນບານສະພັ່ງ ປຽບເໝືອນແຜ່ນແພໄໝສີຂາວທີ່ອ່ອນນຸ່ມຄຽນອ້ອມຕີນພູ. ນີ້ກໍແມ່ນຊ່ວງໄລຍະຢູ່ ໂມກເຈົາມີດອກໄມ້ນາໆຊະນິດດ້ວຍສີຫຼາກຫຼາຍ ເປັນໜ້າຈັບອົກຈັບໃຈ. ໂດຍມີຄວາມເອກອ້າງທະນົງໃຈຕໍ່ດິນແດນ ໂມກເຈົາ ດ້ວຍດອກໄມ້ນາໆຊະນິດ, ທ່ານນາງ ຟຸ່ງທິລິວລີ ຮອງຫົວໜ້າຂະແໜງວັດທະນະທຳເມືອງ ໂມກເຈົາ ເວົ້າຄວາມໃນໃຈສູ່ຟັງວ່າ :
“ ຂ້າພະເຈົ້າມີຄວາມເອກອ້າງທະນົງໃຈ ເພາະຕົນເອງແມ່ນລູກຮັກຫຼານແພງຂອງເຂດພູຜາປ່າໄມ້ ໄຕບັກ ທາງທິດຕາເວັນຕົກສ່ຽງເໜືອຫວຽດນາມ, ໄດ້ກຳເນີດຂຶ້ນຢູ່ດິນແດນ ໂມກເຈົາ ເປັນໜ້າຮັກ. ສິ່ງທຳອິດທີ່ຂ້າພະເຈົ້າຢາກເວົ້າເຖິງ, ນັ້ນແມ່ນດອກໄມ້, ໂມກເຈົາແມ່ນເຂດດອກຄາຍດ້ວຍສີຊົມພູ ຊຶ່ງແມ່ນສີງາມ ເປັນສັນຍາລັກຂອງເຂດພູຜາປ່າໄມ້ ໄຕບັກ. ຖັດມາແມ່ນຕ້ອງເວົ້າເຖິງດອກບານຂາວ. ໃນຍາມໃກ້ບຸນເຕັດ ແລະ ກາຍບຸນເຕັດ, ໂມກເຈົາ ຍິ່ງສວຍສົດງົດງາມຫຼາຍຂຶ້ນຍ້ອນແມ່ນລະດູດອກໄມ້ 2 ຊະນິດດັ່ງກ່າວ, ອັນໄດ້ສ້າງຄວາມປະທັບໃຈໃຫ້ແກ່ແຂກທ່ອງທ່ຽວທັງຫຼາຍ. ຂ້າພະເຈົ້າເອງ ມີຄວາມຮັກແພງ ໂມກເຈົາ ທີ່ສຸດ ແລະ ປາດຖະໜາວ່າ ແຂກທ່ອງທ່ຽວ ກໍສະຫງວນອາລົມຈິດຄວາມຮັກແພງໃຫ້ ໂມກເຈົາ ”
ທຳມະຊາດໄດ້ດົນບັນດານໃຫ້ມະນຸດມີສັດສາວາສິ່ງ, ທິວທັດທຳມະຊາດ ມະຫັດສະຈັນ. ໂມກເຈົາ ກໍແມ່ນແຫ່ງໜຶ່ງໄດ້ຮັບສິ່ງທີ່ພິເສດນີ້. ຖ້າຫາກພວກເພື່ອນມີໂອກາດມາຢ້ຽມຢາມຫວຽດນາມ, ຢາລືມລົງຢ້ຽມຢາມ ໂມກເຈົາ ເພື່ອຮັບຊົມຄວາມງາມຂອງທິວທັດທຳມະຊາດທີ່ສວຍງາມດັ່ງໃນຝັນ ແລະ ມວນມາລາຫຼາກຫຼາຍສີສັນ.