(vovworld)- ຖ້າມີໂອກາດມາຢ້ຽມຢາມນະຄອນ ໂຮ່ຈິມີນ, ນັກທ່ອງທ່ຽວຈະພົບເຫັນບັນດາກິດຈະກຳສະຖາປັດຕະຍະກຳຊື່ງໄດ້ຮັບການກໍ່ສ້າງແຕ່ສະໄຫມຝລັ່ງຢູ່ ໄຊງ່ອນໃນເມື່ອກ່ອນ. ໂຮງລະຄອນໃຫຍ່ ນະຄອນ ໂຮ່ຈິມີນ ແມ່ນຫນຶ່ງໃນບັນດາກິດຈະກຳເຫລົ່ານັ້ນ. ບໍ່ພຽງແຕ່ແມ່ນກິດຈະກຳສະຖາປັດຕະຍະກຳ ວັດທະນະທຳ ທີ່ຕິດພັນກັບປະຫວັດສາດຂອງນະຄອນເທົ່ານັ້ນ, ໂຮງລະຄອນໃຫຍ່ນະຄອນໂຮ່ຈິມີນ ຍັງແມ່ນກິດຈະກຳສະຖາປັດຕະຍະກຳທີ່ສວຍງາມດຶງດູດນັກທ່ອງທ່ຽວມາຢ້ຽມຊົມເປັນຈຳນວນຫລວງຫລາຍອີກດ້ວຍ. ໃນລາຍການຄົ້ນຫາຫວຽດນາມພາກນີ້ ເຊີນທ່ານຮັບຟັງບົດຂຽນຂອງນັກຂ່າວ ໂຕຕວນທີ່ມີຫົວຂໍ້ວ່າ: ໂຮງລະຄອນໃຫຍ່ນະຄອນ-ສັນຍາລັກຂອງນະຄອນໂຮ່ຈິມີນ.
ໂຮງລະຄອນໃຫຍ່ນະຄອນໂຮ່ຈິມີນ
ພາບ:internet
|
ໂຮງລະຄອນໃຫຍ່ນະຄອນໂຮ່ຈິມີນ, ຫລືເອີ້ນວ່າ ໂຮງລະຄອນໃຫຍ່ນະຄອນ, ຖືກຕັ້ງຢູ່ຖະຫນົນ ດົງເຂີຍ, ເມືອງ 1 ນະຄອນ ໂຮ່ຈິມີນ. ເຖິງວ່າ ມີອາຍຸກວ່າຮ້ອຍປີແລ້ວກໍຕາມ ແຕ່ໂຮງລະຄອນໃຫຍ່ນະຄອນໂຮ່ຈິມີນ ຍັງຄົງຮັກສາຄວາມງາມແບບເກົ່າແກ່ ໄວ້. ໂຮງລະຄອນໃຫຍ່ນະຄອນ ໄດ້ເລີ່ມລົງມືກໍ່ສ້າງເມື່ອປີ 1898 ແລະ ສຳເລັດໃນວັນທີ 1/1/1900. ການອອກແບບຂອງໂຮງລະຄອນ ແມ່ນຕາມສະຖາປັດຕະຍະກຳ Gothique ຊື່ງຝລັ່ງ ນິຍົມໃຊ້ໃນສັດຕະວັດທີ 19, ຕົ້ນສັດຕະວັດທີ 20 ໂດຍ ກຸ່ມນັກສະຖາປະນິກ ຝລັ່ງ ເປັນຜູ້ອອກແບບ. ຈຸດພິເສດຂອງສະຖາປັດຕະຍະກຳນີ້ແມ່ນການປະສານສົມທົບຢ່າງຄ່ອງແຄ້ວລະຫວ່າງສະຖາປັດຕະຍະກຳ ແລະ ປະຕິມາກຳ. ນັກສະຖາປະນິກ ຫງວຽນຫືວທາຍ ຢູ່ ນະຄອນ ໂຮ່ຈິມີນ ໃຫ້ຮູ້ວ່າ:
“ຊາວຝລັ່ງ ເມື່ອມານະຄອນ ໂຮ່ຈິມີນ ໄດ້ຕັດສິນໃຈກໍ່ສ້າງນະຄອນນີ້ກາຍເປັນນະຄອນທີ່ທັນສະໄຫມ ຕາມຮູບແບບຂອງເອີລົບ. ພິເສດ ຊາວຝລັ່ງ ເຄີຍກໍ່ສ້າງບັນດາຖະຫນົນຫລວງ ແລະ ຢູ່ເຂດສາມແຍກ ຫລື 6 ແຍກ ລ້ວນແຕ່ມີບັນດາກິດຈະກຳສະຖາປັດຕະຍະກຳໃຫຍ່ ເພື່ອເປັນຈຸດດູດດື່ມ ແລະ ໂຮງລະຄອນໃຫຍ່ນະຄອນແມ່ນຫນຶ່ງໃນບັນດາກິດຈະກຳຄືແນວນັ້ນ. ໃນໄລຍະນີ້, ມີກິດຈະກຳຂອງຝລັ່ງ ຫລາຍແຫ່ງ ຕິດພັນກັບຮູບແບບໃຫມ່, ແມ່ນການປະສານສົມທົບລະຫວ່າງສະຖາປັດຕະຍະກຳ ຝ່າຍຕາເວັນອອກ ແລະ ຕາເວັນຕົກ.”
ຈຸດພົ້ນເດັ່ນຂອງໂຮງລະຄອນໃຫຍ່ນະຄອນໂຮ່ຈິມີນ ແມ່ນການປະດັບປະດາປະຕິມາກຳ, ຢູ່ເບື້ອງນອກກໍຄືຢູ່ເບື້ອງໃນຂອງໂຮງລະຄອນລ້ວນແຕ່ໄດ້ຮັບການປະດັບປະດາຮູບແກະຄວັດສະຫລັກ ແລະ ຮູບປັ້ນຫລາຍຮູບ. ຢູ່ປະຕູເຂົ້າໂຮງລະຄອນໄດ້ຮັບການກໍ່ສ້າງຕາມສະຖາປັດຕະຍະກຳຂອງ ໂຮງລະຄອນ Petit Palais ຂອງ ຝລັ່ງ. ນອກຈາກຊັ້ນລຸ່ມແລ້ວ ຍັງມີ 2 ຊັ້ນ ບັນຈຸ 1800 ບ່ອນນັ່ງ. ຮູບປັ້ນ ແລະ ຮູບແກະຄວັດສະຫລັກຢູ່ໂຮງລະຄອນໃຫຍ່ນະຄອນ ລ້ວນແຕ່ແມ່ນຈິດຕະກອນ ຝລັ່ງ ແຕ້ມຕາມຮູບແບບຂອງບັນດາໂຮງລະຄອນໃຫຍ່ຂອງ ຝລັ່ງ ໃນທ້າຍສັດຕະວັດທີ 19.
ເບື້ອງໃນຂອງໂຮງລະຄອນໃຫຍ່ນະຄອນໂຮ່ຈິມີນ
ພາບ:internet
|
ໄລຍະຕົ້ນ ໂຮງລະຄອນໃຫຍ່ນະຄອນໂຮ່ຈິມີນ ແມ່ນສະຖານທີ່ບັນເທີງຂອງຊົນຊັ້ນຂຸນນາງເສດຖີຝລັ່ງ. ບັນດາບົດລະຄອນ ແລະ ລາຍການດົນຕີທີ່ນຳມາສະແດງຢູ່ໂຮງລະຄອນໃຫຍ່ ແມ່ນຮັບໃຊ້ຜູ້ມີຖານະຕຳແຫນ່ງສຳຄັນໃນອຳນາດການປົກຄອງລ່າເມືອງຂຶ້ນ.ເຖິງຢ່າງໃດກໍຕາມ ຮອດປີ 1944 ໂຮງລະຄອນໃຫຍ່ນະຄອນໂຮ່ຈິມີນ ຖືກເຮືອບິນຂອງພັນທະມິດ ທຳລາຍຢ່າງຫນັກຫນ່ວງ ຕ້ອງຢຸດຕິການເຄື່ອນໄຫວ. ປີ 1955 ໂຮງລະຄອນໃຫຍ່ນະຄອນໂຮ່ຈິມີນ ໄດ້ຮັບການບູລະນະປະຕິສັງຂອນ ແລະ ໄດ້ນຳໃຊ້ເປັນສຳນັກງານສະພາຕ່ຳຂອງ ອຳນາດການປົກຄອງ ສາທາລະນະລັດຫວຽດນາມ. ຫລັງປີ 1975, ໂຮງລະຄອນໃຫຍ່ນະຄອນໂຮ່ຈິມີນ ສືບຕໍ່ແມ່ນສະຖານທີ່ສະແດງລາຍການສິລະປະ. ປີ 1998, ອຳນາດການປົກຄອງນະຄອນ ໂຮ່ຈິມີນ ໄດ້ຮັບການບູລະນະປະຕິສັງຂອນຂະຫນາດໃຫຍ່ ດ້ວຍທິດນຳປະຕິສັງຂອນຕາມຮູບແບບສະຖາປັດຕະຍະກຳເບື້ອງຕົ້ນ.
ປະຈຸບັນ ໂຮງລະຄອນໃຫຍ່ນະຄອນໂຮ່ຈິມີນ ໄດ້ຮັບການຕິດຕັ້ງອຸປະກອນໄຟຟ້າ, ໄຟແສງສີ ແລະ ລະບົບດົນຕີທີ່ທັນສະໄຫມ, ແມ່ນສະຖານທີ່ຈັດຕັ້ງບັນດາຮູບການສະແດງສິລະປະເວທີຄື: ສະແດງບົດລະຄອນ, ຂັບກ໋າຍເລືອງ, ລາຍການດົນຕີ, Opera ຂອງບັນດາກອງສິລະປະພາຍໃນປະເທດ ແລະ ສາກົນ. ໂຮງລະຄອນໃຫຍ່ນະຄອນໂຮ່ຈິມີນ ປະຈຸບັນ ແມ່ນສະຖານທີ່ທ່ອງທ່ຽວດູດດື່ມຂອງນະຄອນໂຮ່ຈິມີນ. ອ້າຍ ຫງວຽນແອງຕູ, ນັກທ່ອງທ່ຽວມາຈາກນະຄອນ ຫາຍຟ່ອງ ສັງເກດວ່າ:
“ຂ້າພະເຈົ້າໄດ້ຮູ້ຈັກວ່າ ນີ້ແມ່ນສະຖານທີ່ທ່ອງທ່ຽວລືຊື່ ແລະ ກໍແມ່ນກິດຈະກຳທີ່ເປັນເອກະລັກສະເພາະໄດ້ຮັບການອອກແບບຕາມສະຖາປັດຕະຍະກຳຂອງ ຝລັ່ງ. ກິດຈະກຳ ໂຮງລະຄອນໃຫຍ່ນະຄອນໂຮ່ຈິມີນ ແມ່ນເໝາະສົມກັບທິວທັດທຳມະຊາດອ້ອມຂ້າງຄື ສວນອຸທະຍານຢູ່ເບື້ອງຫນ້າ ແລະ ບັນດາຄຸ້ມຖະຫນົນທັນສະໄຫມ. ຄ້າຍຄືສຳນັກງານຂອງຄະນະກຳມະການປະຊາຊົນນະຄອນ ໂຮ່ຈິມີນ, ໃນຕອນຄ່ຳ ໂຮງລະຄອນໃຫຍ່ນະຄອນໂຮ່ຈິມີນຍິ່ງດູດດື່ມ ຍ້ອນແສງສີຂອງລະບົບດອກໄຟ.”
ຜ່ານການເວລາ, ໂຮງລະຄອນໃຫຍ່ນະຄອນໂຮ່ຈິມີນ ບໍ່ພຽງແຕ່ແມ່ນສະຖານທີ່ວັດທະນະທຳຕິດພັນກັບປະຫວັດສາດຂອງນະຄອນເທົ່ານັ້ນ ຫາກຍັງແມ່ນກິດຈະກຳສະຖາປັດຕະຍະກຳສວຍງາມ, ແມ່ນສັນຍາລັກຂອງນະຄອນໂຮ່ຈິມີນປະຈຸບັນອີກດ້ວຍ.