(vovworld)- ວັດຕຽວ ຫລືເອີ້ນວ່າ “ທຽນເຕີມຕື້” ຂຶ້ນກັບຕາແສງ ເຕືອງຢາງ ເທດສະບານ ຕືເຊີນ ແຂວງ ບັກນີງ. ມາຢ້ຽມຢາມວັດແຫ່ງນີ້ ນັກທ່ອງທ່ຽວ ແລະ ສາສະນີກະຊົນກໍແມ່ນຢາກຊອກຮູ້ແຫ່ງທີ່ພະອາຈານມະຫາວ້ານແຫ້ງເປັນອະທິການວັດ, ອົງທີ່ໄດ້ລ້ຽງດູ ຫລີກົງອວນ, ຊື່ງແມ່ນເຈົ້າຊີວິດ ມີຄຸນງາມຄວາມດີໃນການກໍ່ຕັ້ງສະໄຫມລາຊະວົງຫລີ ແລະ ພື້ນຖານອະລິຍະທຳ ດ້າຍຫວຽດ(1009-1225).
ວັດຕຽວ ຂຶ້ນກັບຕາແສງ ເຕືອງຢາງ ແຂວງ ບັກນີງ
photo:internet
|
ໄປລຽບຕາມເສັ້ນທາງຈາກຕີນພູເຖິງວັດຕຽວ, ດ້ວຍສີຂຽວທີ່ງົດງາມຂອງຕົ້ນໄມ້ໃບຫຍ້າ, ນັກທ່ອງທ່ຽວຈະໄດ້ສູບອາກາດທີ່ປອດໂປ່ງ, ເຢັນສະບາຍ. ເມື່ອໄປເຖີງເນີນພູ ໃນສາຍຕາຂອງນັກທ່ອງທ່ຽວແມ່ນປະກົດມີວັດແຫ່ງຫນຶ່ງເກົ່າແກ່ ດ້ວຍຫນອງດອກບົວທີ່ສວຍງາມ ແລະມີຮູບປັ້ນເຈົ້າແມ່ກວນອີນ. ຢູ່ອ້ອມແອ້ມວັດແມ່ນ ທົ່ງນາທີ່ຍາວຢຽດ ຊື່ງກ່ອນນີ້ ມີແມ່ນ້ຳ ຕຽວເຕືອງໄຫລຜ່ານ.
ຕາມການເລົ່າສືບທອດກັນມາແຕ່ບູຮານນະການ, ວັດຕຽວ ມີມາແຕ່ດົນນານແລ້ວ. ຮອດສະໄຫມລາຊະວົງຫລີ, ວັດແຫ່ງນີ້ ແມ່ນສູນກາງສາສະຫນາພຸດ, ແມ່ນສະຖານທີ່ຊື່ງນັກບວດຫລີວ້ານແຫ້ງເປັນເຈົ້າອະທິການວັດ. ຕາມເລື່ອງລາວເລົ່າຂານກັນມາວ່າ, ເຂດດິນໂກ້ຟາບ ກ່ອນນີ້ ມີນາງສາວຜູ້ຫນື່ງ ຂຶ້ນກັບວົງຕະກຸນຟ້າມ. ນາງຂຶ້ນວັດຕຽວເຊີນ ຖະຫວາຍທູບທຽນເປັນປະຈຳ. ສະນັ້ນ ເທວະດາໄດ້ດົນບັນດານໃຫ້ນາງຖືພາເກີດລູກຊາຍຜູ້ຫນຶ່ງຢູ່ ວັດ ອືງເຕີມ ຫລືເອີ້ນວ່າ ວັດເຢີ້ນ ຂຶ້ນກັບເມືອງ ດີງບາງປະຈຸບັນ. ເມື່ອຮອດອາຍຸ 3 ປີ, ເດັກຊາຍຄົນຖືກນັກບວດ ຫລີແຄງວັນ ຊື່ງແມ່ນນ້ອງຊາຍຂອງນັກບວດ ຫລີວ້ານແຫ້ງ ຮັບເປັນລູກລ້ຽງແລະ ຖືກຕັ້ງຊື່ວ່າ ຫລີກົງອວນ. ໂດຍແມ່ນຜູ້ສະຫລາດສະຫລຽວ ແລະ ເກັ່ງກ້າສາມາດກວ່າເມື່ອທຽບກັບເດັກທຳມະດາ ສະນັ້ນ ຄາວຍັງນ້ອຍເມື່ອໄປຮຽນ, ຫລີກົງອວນ ໄດ້ຮັບການຍ້ອງຍໍຈາກນັກບວດ ຫລີວ້ານແຫ້ງວ່າ: ເດັກຊາຍຄົນນີ້ບໍ່ແມ່ນຄົນທຳມະດາ, ເມື່ອເຕີບໃຫຍ່ຂຶ້ນອາດຈະເປັນຜູ້ສາມາດແກ້ໄຂຄວາມຫຍຸ້ງຍາກໃຫ້ແກ່ປະເທດຊາດໄດ້.”
ອາຈານ ທີກດາມຈີງ, ເຈົ້າອະທິການວັດຕຽວ ຕາແສງ ເຕືອງຢາງ ເທດສະບານ ຕືເຊີນ ແຂວງ ບັກນີງ ໃຫ້ຮູ້ວ່າ:
“ນັກບວດ ຫລີວ້ານແຫ້ງ ອາໄສຢູ່ທີ່ນີ້ ແລະ ເມື່ອເຈົ້າຊີວິດ ຫລີທາຍໂຕ ກຳເນີດຂຶ້ນ ກໍໄດ້ຮັບມາດຳລົງຊີວິດຢູ່ວັດນີ້ ແລະ ໄດ້ຮັບການສິດສອນຈາກນັກບວດ ຫລີວ້ານແຫ້ງ. ເມື່ອເຫັນວ່າ ເຈົ້າຊີວິດ ເລຫງວ້າຈຽວ ບໍ່ສາມາດນຳພາປະເທດຊາດໄດ້, ນັກບວດ ຫລີວ້ານແຫ້ງ ໄດ້ອອກເຫື່ອແຮງເພື່ອສິດສອນໃຫ້ຫລີທາຍໂຕກາຍເປັນເຈົ້າຊີວິດ, ຄຸ້ມຄອງປະເທດຊາດ.”
ຜ່ານການອະນຸລັກຮັກສາແລະ ປະຕິສັງຂອນເປັນຫລາຍຄັ້ງ ແຕ່ວັດຕຽວ ຍັງຄົງຮັກສາໄດ້ບັນດາກິດຈະກຳສະຖາປັດຕະຍະກຳໃນສະໄຫມລາຊະວົງເລ (1740-1786 )- ສະໄຫມລາຊະວົງຫງວຽນ (1802-1925). ຄຽງຄູ່ກັນນັ້ນ ວັດຕຽວ ຍັງຮັກສາເອກະສານ, ວັດຖຸພັນອັນລ້ຳຄ່າຫລາຍຢ່າງທີ່ກ່ຽວຂ້ອງເຖິງປະຫວັດສາດຫວຽດນາມ. ເປັນຫນ້າສົນໃຈ ນັ້ນແມ່ນແຜ່ນສີລາບູຮານ ໂດຍຄວັດບັນດາຕົວຫນັງສືໃຫຍ່ຄື: ຫລີຢາລີງແຈກ(ໝາຍເຖິງກ້ອນຫີນທີ່ສັກກະລະບູຊາຂອງລາຊະວົງຫລີ). ນອກນັ້ນ ວັດແຫ່ງນີ້ຍັງຮັກສາບົດນິພົນປະຫວັດສາດ ແລະ ວັດທະນະທຳ ໂດຍໄດ້ຂຽນກ່ຽວກັບບັນດາເຈົ້າຊີວິດທີ່ສະຫລາດສ່ອງໃສໃນສະໄຫມລາຊະວົງຫລີ.
ເມື່ອມາຢ້ຽມຢາມວັດຕຽວ, ນັກທ່ອງທ່ຽວຍັງໄດ້ຊອກຮູ້ກ່ຽວກັບພະອາຈານມະຫາ ທີກຍືຈີ, ແມ່ນອົງທີ່ມີຄຸນງາມຄວາມດີໃນການຮຽບຮຽງ ແລະ ພິມ ບັນດາປື້ມກ່ຽວກັບສາສະຫນາພຸດ, ບົດກະວີມ່ວນ.
ປີ 1991, ວັດຕຽວ ໄດ້ຮັບການຮັບຮອງວ່າແມ່ນປູຊະນີຍະສະຖານປະຫວັດສາດວັດທະນະທຳລະດັບຊາດ. ໃນຊຸມປີມໍ່ໆມານີ້, ນັກທ່ອງທ່ຽວພາຍໃນ ແລະ ຕ່າງປະເທດກໍຄືຊາວຫວຽດນາມ ອາໄສຢູ່ຕ່າງປະເທດ ໄດ້ມາຢ້ຽມຢາມວັດແຫ່ງນີ້ນັບມື້ນັບຫລາຍ, ທ່ານ ຫງວຽນດັງເຮີບ, ນັກທ່ອງທ່ຽວມາຈາກເມືອງ ບາດີງ, ນະຄອນຫລວງຮ່າໂນ້ຍ ໃຫ້ຮູ້ວ່າ:
“ຂ້າພະເຈົ້າມາຢ້ຽມຢາມວັດຕຽວ ເປັນ 5 ຄັ້ງແລ້ວ. ມາຄັ້ງໃດ ຂ້າພະເຈົ້າກໍເຫັນວ່າ ວັດແຫ່ງນີ້ຍິ່ງງາມກວ່າ ແລະ ໄດ້ຮັບການອະນຸລັກຮັກສາດີກວ່າເກົ່າ. ຂ້າພະເຈົ້າກໍຄືປະຊາຊົນ ແລະ ນັກທ່ອງທ່ຽວຫລາຍຄົນ ມາຢ້ຽມຢາມວັດກໍຢາກປະກອບກຳລັງເຫື່ອແຮງສ່ວນຫນຶ່ງເພື່ອປະຕິສັງຂອນໃຫ້ວັດຕຽວ ສົມກັບທີ່ຕັ້ງໃນປະຫວັດສາດຂອງປະເທດຊາດ.”
ຖ້າທ່ານໄດ້ມາຢ້ຽມຢາມວັດຕຽວ ເທື່ອຫນຶ່ງ, ທ່ານບໍ່ພຽງແຕ່ໄດ້ຮັບຊົມຄວາມງາມດ້ານວັດທະນະທຳຂອງເຂດດິນກີງບັກເທົ່ານັ້ນ ຫາກຍັງເຂົ້າໃຈຕື່ມອີກກ່ຽວກັບເຈົ້າຊີວິດ ຫລີກົງອວນ ແລະປະຫວັດສາດແຫ່ງການສ້າງສາປະເທດຊາດຫວຽດນາມອີກດ້ວຍ.