(VOVWORLD) -ວັນທີ 1 ເມສາ ປີ 1992 ແມ່ນວັນທີ່ມີຄວາມໝາຍສຳຄັນສຳລັບແຂວງນິງຖ້ວນ, ເປັນຂີດໝາຍແຂວງ ນິງຖ້ວນ ໄດ້ສ້າງຕັ້ງຄືນ 4 ເມືອງ, ລວມມີ ເທດສະບານ ຟານຣາງ - ທາບຈາມ, ເມືອງ ນິງເຊີນ, ນິງຫາຍ, ນິງເຟືອກ. ພາຍຫລັງ 30 ປີແຫ່ງການສ້າງຕັ້ງ, ແຂວງ ນິງຖ້ວນ ໄດ້ມີບາດກ້າວຫັນປ່ຽນຢ່າງກະໂດດຂັ້ນ ປະກອບສ່ວນມີໜ້າໃນກຸ່ມບັນດາທ້ອງຖິ່ນທີ່ມີການເຕີບໂຕເສດຖະກິດທີ່ຫນ້າປະທັບໃຈທີ່ສຸດໃນທົ່ວປະເທດ.
 ກຸ່ມ ສະຫນາມຫລວງ -ຫໍພິພິທະພັນ ນິງຖ້ວນ. (ພາບ:danviet.vn) |
ປີ 1992 ເມື່ອຫາກໍ່ໄດ້ຮັບການສ້າງຕັ້ງໃຫມ່, ລະບົບຄົມມະນາຄົມຂອງແຂວງ ນິງຖ້ວນ ຍັງມີຄວາມຈຳກັດຫລາຍຢ່າງ, ລະບົບເສັ້ນທາງທ້ອງຖິ່ນ ໄປຜ່ານພຽງແຕ່ເຂດໃຈກາງ, ບັນດາຕາແສງເຂດຫ່າງໄກສອກຫລີກ, ເຂດຊົນເຜົ່າສ່ວນຫນ້ອຍແມ່ນຖືກຕັດແຍກ. ສະນັ້ນ ການເຄື່ອນໄຫວພົວພັນຄ້າຂາຍພາຍໃນແຂວງກໍ່ຖືກຈຳກັດ, ຊີວິດການເປັນຢູ່ຂອງປະຊາຊົນປະສົບກັບຄວາມຫຍຸ້ງຍາກຫລາຍຢ່າງ. ເຖິງຢ່າງໃດກໍຕາມ ພາຍຫລັງ 30 ປີແຫ່ງການສ້າງຕັ້ງໃຫມ່, ເຄືອຂ່າຍຄົມມະນາຄົມຂອງແຂວງ ນິງຖ້ວນ ໄດ້ກໍ່ສ້າງຕາມການວາງແຜນຜັງເທື່ອລະກ້າວ ຈາກນັ້ນ ການພົວພັນແລກປ່ຽນລະຫວ່າງ ແຂວງ ນິງຖ້ວນ ກັບບັນດາທ້ອງຖິ່ນອື່ນກໍ່ມີຄວາມສະດວກກວ່າ, ຜ່ານນັ້ນ ກໍ່ຊຸກຍູ້ການຜະລິດ, ການຈໍລະຈອນສິນຄ້າ. ຊີວິດການເປັນຢູ່ຂອງປະຊາຊົນນັບມື້ນັບດີຂຶ້ນ.
ເປັນຫນ້າສົນໃຈ, ໄລຍະ 2011 – 2020 ແມ່ນໄລຍະທາງ ແຂວງ ນິງຖ້ວນ ພັດທະນາຮອບດ້ານ ຕາມທິດວ່ອງໄວ ແລະ ໝັ້ນຄົງ. 3 ປີມານີ້ ເຖິງວ່າຖືກຜົນສະທ້ອນຈາກໂລກລະບາດໂຄວິດ 19, ແຕ່ລະດັບເຕີບໂຕຍອດຜະລິດຕະພັນໃນແຂວງ ຍັງຈັດຢູ່ໃນກຸ່ມນຳຫນ້າຂອງທົ່ວປະເທດ. ທ່ານ ເຈືອງວັນຕຽນ ຮອງຫົວຫນ້າພະແນກແຜນການ ແລະ ການລົງທຶນ ແຂວງ ນິງຖ້ວນ ໃຫ້ຮູ້ວ່າ:
“ແຂວງ ກໍ່ໄດ້ຜັນຂະຫຍາຍບັນດາມາດຕະການຢ່າງຄົບຊຸດເພື່ອຍົກສູງດັດຊະນີກຳລັງແກ້ງແຍ້ງຂັ້ນແຂວງ, ພັດທະນາເສດຖະກິດສັງຄົມ. ດ້ວຍຈຸດສຸມແມ່ນວຽກງານວາງແຜນກຳນົດ, ແຂວງ ໄດ້ກໍ່ສ້າງ, ປັບປຸງບັນດາການຈັດສັນທີ່ດິນໄລຍະ 2021 - 2030 ສຳເລັດ. ນີ້ແມ່ນພື້ນຖານເພື່ອຜັນຂະຫຍາຍບັນດາກິດຈະກຳ, ໂຄງການຈຸດສຸມໃຫຍ່ຂອງແຂວງໃນໄລຍະຈະມາເຖິງ ພ້ອມທັງແມ່ນພື້ນຖານເພື່ອດຶງດູດໂຄງການໃຫຍ່. ຄຽງຄູ່ກັນນັ້ນ ແຂວງ ກໍ່ຍູ້ແຮງການຫັນເປັນດິຈີຕອນ, ໝູນໃຊ້ເຕັກໂນໂລຊີຂໍ້ມູນຂ່າວສານເຂົ້າໃນການປະຕິຮູບດ້ານບໍລິຫານ, ສ້າງຄວາມສະດວກໃຫ້ນັກລົງທຶນ”.
 ທົ່ງໄຟຟ້າໃຊ້ແຮງລົມ ເດີມຫນ້າຍ. (ພາບ: VNExpress) |
ການປ່ຽນແປງຂອງແຂວງ ນິງຖ້ວນ ອາດເຫັນໄດ້ວ່າ ນັ້ນແມ່ນບັນດາທົ່ງໄຟຟ້າແຮງລົມ ໄຟຟ້າແສງຕະເວັນ. ສະເພາະປີ 2020 ແລະ 2021 ທົ່ວແຂວງ ມີ 49 ໂຄງການລົງທຶນເຂົ້າພະລັງງານຜະລິດຄືນໃຫມ່ ດ້ວຍຂອບຂະຫນາດກຳລັງການຜະລິດ 3055 MW, ໃນນັ້ນ ມີ 43 ໂຄງການໄດ້ນຳເຂົ້າເຄື່ອນໄຫວ, ປະກອບສ່ວນສຳຄັນເຂົ້າໃນການເຕີບໂຕລວມຂອງແຂວງ. ທ່ານ ດ່າວວັນເຣີດ ຮອງຫົວຫນ້າພະແນກອຸດສາຫະກຳ ການຄ້າ ແຂວງ ນິງຖ້ວນ ໃຫ້ຮູ້ວ່າ:
“ເພື່ອພັດທະນາໃຫ້ກາຍເປັນສູນພະລັງງານຜະລິດຄືນໃຫມ່ຂອງທົ່ວປະເທດ, ແຂວງ ສູ້ຊົນຮອດປີ 2025 ຈະບັນລຸຂອບຂະຫນາດມີກຳລັງຜະລິດໄຟຟ້າປະມານ 6500 MW ແລະ ຮອດປີ 2030 ແມ່ນ 11800 MW. ເພື່ອບັນລຸໄດ້ຕົວເລກຄາດໝາຍນີ້ ໄລຍະຈະມາເຖິງ ແຂວງ ນິງຖ້ວນ ຈະສຸມໃສ່ໃຫ້ບັນຫາແຫລ່ງພະລັງງານຜະລິດຄືນໃຫມ່, ເສີມຂະຫຍາຍຄວາມສາມາດບົ່ມຊ້ອນ, ທ່າໄດ້ປຽບຂອງແຂວງ ກໍ່ຄືບັນຫາລົງທຶນພື້ນຖານໂຄງລ່າງ”.
ດ້ວຍ ທ່າໄດ້ປຽບມີແຄມທະເລຍາວ 105 km, ນິງຖ້ວນ ນັບມື້ນັບກາຍເປັນຫນຶ່ງໃນບັນດາສະຖານທີ່ທ່ອງທ່ຽວມີຊື່ສຽງຂອງຫວຽດນາມ. ຢູ່ທີ່ນີ້ ມີເຂດພັກຜ່ອນບຳລຸງສຸຂະພາບບັນລຸມາດຕະຖານສາກົນ, ຊັບພະຍາກອນທຳມະຊາດອຸດົມສົມບູນ ແລະ ມີທິວທັດທຳມະຊາດລືຊື່ຫລາຍແຫ່ງ. ພ້ອມກັນນັ້ນ ແມ່ນພື້ນຖານວັດທະນະທຳສິລະປະເປັນເອກະລັກຂອງຊາວເຜົ່າຈຳ. ທ່ານ ເຈີນກວັກນາມ, ປະທານຄະນະກຳມະການປະຊາຊົນ ແຂວງ ນິງຖ້ວນ ໃຫ້ຮູ້ວ່າ:
“ແຂວງ ໄດ້ປະກາດໃຊ້ຫລາຍກົນໄກນະໂຍບາຍດຶງດູດບັນດານັກລົງທຶນເຂົ້າມາດຳເນີນບັນດາໂຄງການທ່ອງທ່ຽວທີ່ມີມາດຕະຖານສູງ. ບັນດານະໂຍບາຍກົນໄກພິເສດສະເພາະ ຊື່ງແຂວງ ປະກາດໃຊ້ໃນໄລຍະຜ່ານມາ ສາມາດດຶງດູດນັກລົງທຶນໃຫຍ່ໄດ້ຫລາຍພໍສົມຄວນ. ໄລຍະຈະມາເຖິງ ດ້ວຍຈິດໃຈແມ່ນສືບຕໍ່ປັບປຸງສະພາບແວດລ້ອມແຫ່ງການລົງທຶນຢ່າງແຮງກວ່າອີກ, ແຂວງ ກໍ່ສືບຕໍ່ປະກາດໃຊ້ບັນດານະໂຍບາຍລະອຽດກ່ຽວກັບດ້ານພະລັງງານ, ພະລັງງານຜະລິດຄືນໃຫມ່, ການທ່ອງທ່ຽວ, ກະສິກຳເຕັກໂນໂລຊີສູງ ແລະ ນັບທັງຂົງເຂດຕົວເມືອງໃຫມ່ຄື ຕົວເມືອງທ່ອງທ່ຽວ ແລະ ຕົວເມືອງພັກຜ່ອນບຳລຸງສຸຂະພາບ”.
ການວາງແຜນຜັງແຂວງ ນິງຖ້ວນ ໄລຍະ 2021 – 2030, ວິໄສທັດຮອດປີ 2050 ໄດ້ວາງອອກ slogan ແມ່ນ “ນິງຖ້ວນ ເຂດດິນແດນເຕົ້າໂຮມຄຸນຄ່າພິເສດ”. ເປົ້າໝາຍແມ່ນຮອດປີ 2025, ນິງຖ້ວນ ກາຍເປັນແຂວງພັດທະນາດີສົມຄວນຂອງເຂດ ແລະ ທົ່ວປະເທດ; ແມ່ນຫນຶ່ງໃນບັນດາສູນພະລັງງານຜະລິດຄືນໃຫມ່, ພະລັງງານສະອາດ. ຮອດປີ 2030 ກາຍເປັນແຂວງ ມີລະດັບລາຍຮັບສະເລ່ຍນອນໃນກຸ່ມສະເລ່ຍປານກາງສູງ. ຮອດປີ 2050 ນິງຖ້ວຍກາຍເປັນແຂວງ ມີພື້ນຖານເສດຖະກິດເປັນຫລາຍຮູບແບບ ແລະ ວັດທະນາຖາວອນ, ພັດທະນາບັນລຸລະດັບສູງເມື່ອທຽບໃສ່ທ້ອງຖິ່ນອື່ນໃນທົ່ວປະເທດ ແມ່ນແຂວງ ສີຂຽວ ແລະ ມີສະພາບແວດລ້ອມແຫ່ງການດຳລົງຊີວິດທີ່ດີ, ພັດທະນາແບບຍືນຍົງ. ບັນດາຜົນສຳເລັດພາຍຫລັງ 30 ປີແຫ່ງການສ້າງຕັ້ງຄືນໃຫມ່ ແມ່ນປະຖົມປັດໄຈອັນຫນັກແຫນ້ນເພື່ອໃຫ້ແຂວງ ນິງຖ້ວນ ບັນລຸໄດ້ຄາດໝາຍວາງອອກໃນໄລຍະຈະມາເຖິງ.