(ຜູ້ແຍກຕົວໄດ້ຕິດຕາມອາການສຸຂະພາບໃນແຕ່ລະວັນ)

ເພື່ອປ້ອງກັນ, ຄວບຄຸມໂລກລະບາດໂຄວິດ-19ຢ່າງມີປະສິດທິຜົນ, ຮັບປະກັນຄວາມປອດໄພດ້ານສຸຂະພາບໃຫ້ແກ່ ປະຊາຊົນ ແລະ ນັກທ່ອງທ່ຽວທຸກຄົນ, ລັດຖະບານຫວຽດນາມ ພວມປະຕິບັດມາດຕະການແກ້ໄຂຫຼາຍຢ່າງ, ໃນນັ້ນມີມາດຕະການຈັດຕັ້ງເຂດແຍກຕົວໃຫ້ບັນດາກໍລະນີທີ່ກັບຄືນມາປະເທດຈາກເຂດເກີດໂລກລະບາດ ຫຼື ບັນດາກໍລະນີມີຄວາມສ່ຽງຕິດເຊື້ອ SARS-CoV-2. ຢູ່ຕາມເຂດແຍກຕົວແຫ່ງຕ່າງໆ, ນ້ຳໃຈລະຫວ່າງມະນຸດໄດ້ສະແດງອອກໃຫ້ເຫັນຜ່ານການເຄື່ອນໄຫວອັນອົບອຸ່ນ, ລຽບງ່າຍ.

        ບັນດາເຂດແຍກຕົວຢູ່ຫວຽດນາມ ສ່ວນຫຼາຍໄດ້ກຳນົດເອົາບັນດາຄ້າຍທະຫານ, ວິທະຍາຄານການທະຫານ, ຫໍພັກນັກສຶກສາບັນດາມະຫາວິທະຍາໄລ, ວິທະຍາໄລ… ສັບຊ້ອນຢ່າງມີໄຫວພິບ, ເໝາະສົມກັບເງື່ອນໄຂຂອງແຕ່ລະທ້ອງຖິ່ນ. ນະທີ່ນີ້, ຜູ້ແຍກຕົວລວມທັງຊາວຫວຽດນາມ ແລະ ຊາວຕ່າງປະເທດທີ່ໄດ້ເຝົ້າລະວັງ, ຕິດຕາມອາການສຸຂະພາບໃນແຕ່ລະວັນ, ໄດ້ກິນຢູ່ໂດຍບໍ່ເສຍຄ່າ, ສາມາດອອກກຳລັງກາຍ, ຝຶກແອບຮ່າງກາຍໃຫ້ແຂງແຮງ, ມີສະຖານໃຊ້ wifi ຟຣີ ເພື່ອໃຫ້ເຂົາເຈົ້າ ໄດ້ຕິດຕໍ່ກັບຄອບຄົວ, ຍາດຕິພີ່ນ້ອງ, ເພື່ອນມິດຂອງຕົນ.

        ຫໍພັກມະຫາວິທະຍາໄລແຫ່ງຊາດນະຄອນໂຮ່ຈີມິນ, ຕັ້ງຢູ່ບ້ານ ລິງຈູງ, ເມືອງ ທູ໋ດຶກ, ສາມາດ ຮັບໃຊ້ໃຫ້ແກ່ວຽກງານແຍກຕົວໄດ້ 40.000 ບ່ອນ, ເພື່ອປ້ອງກັນ, ຄວບຄຸມໂລກລະບາດໂຄວິດ-19. ໃນຊຸມມື້ຜ່ານມາ, ເຂດຫໍພັກນີ້ໄດ້ຕ້ອນຮັບເອົາຄົນມາແຍກຕົວນັບເປັນພັນໆເທື່ອຄົນ, ໃນນັ້ນສ່ວນຫຼາຍແມ່ນນັກສຶກສາຫວຽດນາມ ທີ່ຮ່ຳຮຽນຢູ່ຕ່າງປະເທດກັບຄືນມາປະເທດ. ເອື້ອຍ ເລທຸ່ຍຈາງ,  ເຊິ່ງແມ່ນຜູ້ທີ່ຫາກໍ່ເຂົ້າມາແຍກຕົວຢູ່ມະຫາວິທະຍາໄລແຫ່ງນີ້, ມີຄວາມຕື້ນຕັນໃຈຫຼາຍ ເມື່ອໄດ້ຮັບການຊ່ວຍເຫຼືອຢ່າງສຸດອົກສຸດໃຈຈາກບັນດາພາລະກອນການແພດ, ຖັນແຖວນັກອາສາສະໝັກໃນການຂົນເຄື່ອງ, ຂ້າເຊື້ອພະຍາດ, ວັດແທກອຸນຫະພູມຮ່າງກາຍໃນແຕ່ລະມື້ ເອື້ອຍ ເລທຸ່ຍຈາງ ກ່າວວ່າ.

        “ເມື່ອໄປເຖິງບ່ອນຢູ່ໃໝ່ນັ້ນ ຂ້າພະເຈົ້າມີຄວາມກັງວົນໜ້ອຍໜຶ່ງ, ແຕ່ວ່າບັນດາພາລະກອນການແພດ ຫຼື ອ້າຍນ້ອງທະຫານ ຢູ່ທີ່ນີ້ແມ່ນມີຄວາມສຸດອົກສຸດໃຈຫຼາຍ ເຖິງແມ່ນວ່າມີຄວາມລຳບາກຕໍ່ກັບບັນດາໜ້າທີ່ວຽກງານຕ່າງໆ… ຂ້າພະເຈົ້າມີຄວາມຮູ້ບຸນຄຸນຕໍ່ບັນດາພວກເພື່ອນຢູ່ທີ່ນີ້ທີ່ສຸດ”.

        ຄອບຄົວຂອງ ຜູ້ທີ່ມາແຍກຕົວຢູ່ທີ່ນີ້ ມີຄວາມອຸ່ນອ່ຽນໃຈ, ມີຄວາມເຊື່ອໝັ້ນຕໍ່ບັນດາກຳລັງ ທີ່ພວມປະຕິບັດໜ້າທີ່ຢູ່ຕາມເຂດແຍກຕົວຕ່າງໆ. ໂດຍໄດ້ເຫັນປະຈັກຕາການຕ້ອນຮັບຢ່າງລອບຄອບທີ່ຖ້ວນຂອງບັນດາກຳລັງທີ່ມີໜ້າທີ່ຮັບຜິດຊອບ, ອ້າຍ ຫງວຽນແທັງດາດ, ມີເອື້ອຍທີ່ກັບມາຈາກປະເທດອັງກິດ ພວມ ແຍກຕົວຢູ່ຫໍພັກມະຫາວິທະຍາໄລແຫ່ງຊາດໂຮ່ຈີມິນ, ໃຫ້ຮູ້ວ່າ.

        “ຂ້າພະເຈົ້າເຫັນວ່າບັນດາອ້າຍນ້ອງທະຫານເຂົາເຈົ້າເຮັດວຽກຢ່າງສຸດຈິດສຸດໃຈ. ພິເສດແມ່ນເຄົາລົບຕໍ່ຜູ້ແຍກຕົວ. ຕາມທຳມະດາແລ້ວ, ເມື່ອໄດ້ ຍິນຄຳວ່າ ແຍກຕົວ ນັ້ນຫຼາຍຄົນກໍ່ຈະລັງກຽດ ແຕ່ຄວາມຈິງແມ່ນບໍ່ມີຄືແນວນັ້ນ. ເຖິງວ່າແດດຮ້ອນເອົາກໍ່ຕາມ ແຕ່ບັນດາອ້າຍນ້ອງທະຫານ ຍັງໄປຮັບເອົາເຄື່ອງຂອງ ຈາກຍາດຕິພີ່ນ້ອງ ທີ່ຝາກມາໃຫ້ຜູ້ພວມແຍກຕົວຢູ່ຕາມຫໍພັກຫຼັງຕ່າງໆ. ເຂົາເຈົ້າມີຄວາມເອື້ອເຟື້ອເພື່ອແຜ່ທີ່ສຸດ”.

        ຮຽງບ່າຮຽງໄຫຼ່ໄປກັບການຊ່ວຍເຫຼືອ, ລະດົມກຳລັງໃຈ, ແບ່ງປັນກັບບັນດາຜູ້ແຍກຕົວ ແມ່ນບັນດາກຳລັງທີ່ມີໜ້າທີ່. ເຂົາເຈົ້າແມ່ນທະຫານ, ຕຳຫຼວດ, ພາລະກອນການແພດ, ນັກອາສາສະໝັກ, ຊາວໜຸ່ມຕະລຸມບອນ, ທະຫານລາດ… ພວມເບິ່ງແຍງດູແລສຸຂະພາບໃຫ້ຜູ້ແຍກຕົວນັບທັງວັນ ແລະ ຄືນ. ຮ້ອຍຕີ ຕ໊ານແທັງຕຸ່ງ, ຕຳຫຼວດເມືອງ ຫ໋າຍເຈົາ, ນະຄອນດ່ານັ້ງ ພ້ອມກັບເພື່ອນຮ່ວມກົມກອງ ໄດ້ເວນຍາມຢູ່ເຂດພາຍນອກໂຮງແຮມ Vanda, ເຊິ່ງແມ່ນບ່ອນກຳນົດໃຫ້ເປັນເຂດແຍກຕົວ, ໄດ້ເລົ່າສູ່ຟັງວ່າ, ຍ້ອນມີຄວາມຕື້ນຕັນໃຈຕໍ່ວຽກງານທີ່ລຳບາກຂອງບັນດາອ້າຍນ້ອງຕຳຫຼວດ, ມີປະຊາຊົນຢູ່ອ້ອມຂ້າງຫຼາຍຄົນໄດ້ເອົາຄັນຮົ່ມ, ນ້ຳດື່ມມາໃຫ້.

        “ມີຫຼາຍຄົນອີ່ຕົນພວກຂ້າພະເຈົ້າຫຼາຍ, ນັບແຕ່ຜູ້ເຖົ້າຜູ້ແກ່ຕະຫຼອດຮອດໄວໜຸ່ມ. ຫວ່າງແລ້ວນີ້, ມີ ສາມຄົນ ເຂົາເຈົ້າໄດ້ຂີ່ລົດຖີບໄປຊື້ເຂົ້າຈີ່ ແລະ ນ້ຳດື່ມບໍລິສຸດມາໃຫ້ອ້າຍນ້ອງທີ່ພວມເວນຍາມຢູ່ທີ່ນີ້. ຍ້ອນວ່າ, ໃນເວລາເວນຍາມບໍ່ໄດ້ອອກໄປໃສ. ບັນດາວຽກງານນັ້ນແມ່ນມີຄວາມໝາຍຫຼາຍ, ເຕັມໄປດ້ວຍຄວາມອົບອຸ່ນຂອງຕຳຫຼວດ ແລະ ປະຊາຊົນ”.

        ບັນດາຜູ້ແຍກຕົວຢູ່ເຂດຕ່າງໆໃນທົ່ວປະເທດໄດ້ຮັບປະກັນເລື່ອງກິນດື່ມໃຫ້ມີໂພສະນາການ, ສາມາດອອກກຳລັງກາຍ, ໄດ້ດຳລົງຊິວິດຢູ່ໃນບັນຍາກາດທີ່ປະເອີບໃຈ, ເບີກບານມ່ວນຊື່ນ, ພ້ອມແລ້ວທີ່ຈະຍູ້ໂລກລະບາດໃຫ້ຖອຍໄປ. ຢູ່ຕາມເຂດແຍກຕົວ, ທຸກຄົນກໍ່ໄດ້້້ລະດົມກຳລັງໃຈກັນ ນັບທັງທາງດ້ານວັດຖຸ ແລະ ຈິດໃຈ, ສ້າງບັນຍາກາດແຫ່ງຄວາມອົບອຸ່ນ, ປະເອີບໃຈ ແລະ ເຈືອຈານເຂົ້າກັບສະພາບແວດລ້ອມ. ພາຍຫຼັງໝົດເວລາແຍກຕົວ, ບັນດາອົງການທີ່ມີໜ້າທີ່ຍັງໜູນຊ່ວຍພາຫະນະການໄປ-ມາໃຫ້ແກ່ຜູ້ຢູ່ ໄກໄດ້ກັບເມືອບ້ານ. ບັນດາເຂດແຍກຕົວທີ່ເຕັມໄປດ້ວຍນ້ຳໃຈແຫ່ງຄວາມອົບອຸ່ນນີ້ ໄດ້ ແລະ ພວມປະກອບສ່ວນພ້ອມກັບທົ່ວປະເທດຍູ້ໂລກລະບາດໃຫ້ຖອຍໄປ, ຮັບມືກັບໂລກລະບາດໂຄວິດ-19 ໃຫ້ບັນລຸຜົນສຳເລັດ.