(VOVWORLD) -ໃນຄາວຍັງມີຊີວິດຢູ່, ປະທານໂຮ່ຈີມິນ ຍາມໃດກໍ່ມີຄວາມເອົາໃຈໃສ່ເປັນພິເສດເຖິງບັນຫາຊົນເຜົ່າ, ວຽກງານຊົນເຜົ່າແລະຊາວຊົນເຜົ່າສ່ວນຫນ້ອຍ. ໂດຍຕອບຄືນຄວາມຮັກແພງນັ້ນ, ຊາວຊົນເຜົ່າ ຢູ່ ຫວຽດນາມພິເສດແມ່ນຊາວຊົນເຜົ່າສ່ວນຫນ້ອຍຍາມໃດກໍ່ສະແດງຄວາມເຄົາລົບນັບຖື, ຄວາມຮັກແພງຕໍ່ເພີ່ນ, ພະຍາຍາມປະຕິບັດຕາມຄຳສັ່ງສອນ, ຄຳຕັກເຕືອນຂອງເພີ່ນ, ຮ່ຳຮຽນແລະປະຕິບັດຕາມແນວຄິດ, ຄຸນສົມບັດ, ແບບແຜນການດຳລົງຊີວິດຂອງປະທານໂຮ່ຈີມິນ.
 ຮູບພາບປະທານ ໂຮ່ຈີມິນ ໄດ້ຕັ້ງໃນ ເຮືອນເກືອຍ ຂອງຊາວເຜົ່າ ເກີຕູ |
ເພື່ອສະແດງຄວາມເຄົາລົບນັບຖື, ຄວາມຮູ້ບຸນຄຸນແລະຄິດຮອດຄິດເຖິງປະທານໂຮ່ຈີມິນ, ຊາວເຜົ່າເຊີດັງ, ກໍ, ກາຢົງ, ປາໂກ, ເບິເຮິນອງ ທີ່ດຳລົງຊີວິດຢູ່ບັນດາແຂວງຄື: ເງ້ອານ, ເທື່ອທຽນເຫ້ວ, ກວ໋າງນາມ, ກວ໋າງຫງາຍ... ລ້ວນແຕ່ຖືນາມສະກຸນໂຮ່ ດ້ວຍຄວາມສະຫມັກໃຈ. ປະຊາຊົນຖືນາມສະກຸນໂຮ່ ເປັນນາມສະກຸນຂອງວົງຕະກຸນຕົນແລະຖືນັ້ນແມ່ນວິທີເພື່ອສະແດງຄວາມຮູ້ບຸນຄຸນ, ຂາລຶກຄຸນງາມຄວາມດີຕໍ່ທ່ານປະທານໂຮ່ຈີມິນ. ອ້າຍໂຮ່ວັນຮວັນ, ຊາວເຜົ່າເຊີດັງ ຢູ່ ຕາແສງຈ່າມາຍເມືອງນາມຈ່າມີແຂວງກວ໋າງນາມໃຫ້ຮູ້ວ່າ:
“ຖ້າຫາກບໍ່ມີທ່ານປະທານໂຮ່ຈີມິນ, ແມ່ນຈະບໍ່ມີປະເທດຫວຽດນາມເອກະລາດ, ສັນຕິພາບ, ປະຊາຊົນບໍ່ມີຄວາມອີ່ມໜຳສຳລານສົມບູນພູນສຸກ. ໂດຍແມ່ນລູກຫລານຂອງປະທານໂຮ່ຈີມິນແລ້ວຕ້ອງຮ່ຳຮຽນປະຕິບັດຕາມແບບຢ່າງຂອງເພີ່ນ. ກ່ອນນີ້ ພໍ່ເຖົ້າແມ່ເຖົ້າພໍ່ແມ່ເດີນຕາມການປະຕິວັດເຂົາເຈົ້າກໍ່ຖືນາມສະກຸນໂຮ່ແລ້ວ. ຂ້າພະເຈົ້າມີຄວາມປິຕິຊົມຊື່ນແລະເອກອ້າງທະນົງໃຈຍ້ອນຕົນເອງໄດ້ຖືນາມສະກຸນໂຮ່”.
ໃນແຕ່ລະເລື່ອງລາວ, ວຽກເຮັດ, ຊາວຊົນເຜົ່າສ່ວນຫນ້ອຍລ້ວນແຕ່ຄິດເຖິງປະທານໂຮ່ຈີມິນດ້ວຍອາລົມຈິດຄວາມຮັກແພງແລະເຄົາລົບນັບຖື. ຢູ່ ສຳນັກງານຂອງອົງການລັດລ້ວນແຕ່ແຂວນຄຳຂວັນທີ່ມີແຖວຫນັງສືວ່າ: “ຮູ້ບຸນຄຸນປະທານໂຮ່ຈີມິນ ຕະຫລອດໄປ”; “ປະທານໂຮ່ຈີມິນຍືນຍົງຄົງຕົວໃນພາລະກິດຂອງພວກເຮົາຕະຫລອດໄປ”...ສ່ວນຢູ່ເຮືອນຊານຂອງປະຊາຊົນ, ຄອບຄົວໃດມີເງື່ອນໄຂດ້ານເສດຖະກິດເຂົາເຈົ້າໄດ້ຕັ້ງຮູບປັ້ນປະທານໂຮ່ຈີມິນຢູ່ບ່ອນໃຈກາງເຮືອນຫລືເທິງຮ້ານບູຊາ. ລຸງໂຮ່ວັນເດ່, ຊາວເຜົ່າເບິເຮິນອງ (Bh'noong)ຢູ່ ຕາແສງຈາແລງເມືອງນາມຈາມີແຂວງກວ໋າງນາມເລົ່າສູ່ຟັງວ່າ:
“ແຕ່ກ່ອນມາຮອດປະຈຸບັນ ປະຊາຊົນມີຄວາມເອກອ້າງທະນົງໃຈເມື່ອໄດ້ຖືນາມສະກຸນໂຮ່. ພໍ່ຂ້າພະເຈົ້າກໍ່ຖືນາມສະກຸນໂຮ່ ຍ້ອນຮູ້ບຸນຄຸນຕໍ່ພັກ, ປະທານໂຮ່ຈີມິນ. ເພີ່ນໄດ້ຊີ້ນຳນຳພາສ້າງສາປະເທດຊາດ, ຮັບປະກັນໃຫ້ປະຊາຊົນມີຊີວິດທີ່ອີ່ມໜຳສຳລານສົມບູນພູນສຸກ”.
ໃນຄຳພິໄນກຳ, ປະທານໂຮ່ຈີມິນໄດ້ຕັກເຕືອນວ່າ “ປະຊາຊົນຫວຽດນາມເຖິງວ່າຢູ່ເຂດທົ່ງພຽງກໍ່ຄືຢູ່ເຂດພູດອຍ, ໃນຫລາຍໆປີທີ່ປະສົບກັບຄວາມຫຍຸ້ງຍາກລຳບາກ, ຖືກລະບອບສັກດີນາແລະລ່າເມືອງຂຶ້ນກົດຂີ່ຂູດຮີດ, ຖືກສົງຄາມ… ແຕ່ເຖິງຢ່າງໃດກໍຕາມປະຊາຊົນຫວຽດນາມກໍ່ມີຄວາມອົງອາດກ້າຫານ, ດຸໝັ່ນຂະຫຍັນພຽນ, ຫ້າວຫັນ. ໂດຍປະຕິບັດຕາມຄຳສັ່ງສອນຂອງເພິ່ນ, ປະຊາຊົນບັນດາເຜົ່າລ້ວນແຕ່ມີຄວາມສາມັກຄີກັນ, ອອກແຮງແຂ່ງຂັນໃນການຜະລິດ, ສ້າງສາບ້ານເກີດເມືອງນອນໃຫ້ຮັ່ງມີສວຍງາມ. ລຸງໂຮ່ວັນແຫ້ງ, ຊາວເຜົ່າປາໂກຢູ່ ເມືອງອາເລືອຍແຂວງເທື່ອທຽນເຫ້ວແບ່ງປັນວ່າ:
“ຖືນາມສະກຸນໂຮ່ ຕ້ອງປັບຕົວໃຫ້ສົມກັບນາມສະກຸນ. ໝາຍຄວາມວ່າທັງໝົດກໍ່ຕ້ອງປະຕິບັດວຽກດີໆໃຫ້ແກ່ຊາວບ້ານ. ສິ່ງໃດບໍ່ດີ, ຝືນກັບຫລັກສິນທຳແລະກົດໝາຍແມ່ນບໍ່ເຮັດ”.
 ທຸງຊາດ ໄດ້ແຂວນຢູ່ ເຂດຊຸມຊົນ ບັ່ງລາ ເມືອງ ນາມຈ່າມີ |
ປະຊາຊົນບັນດາເຜົ່າຢູ່ ຫວຽດນາມຍາມໃດກໍ່ອວ່າຍຫນ້າໄປຫາພັກ, ປະທານໂຮ່ຈີມິນ. ສຳລັບປະຊາຊົນແລ້ວ, ມີພັກ, ມີປະທານໂຮ່ຈີມິນປະເທດຊາດຈຶ່ງມີສັນຕິພາບ, ປະຊາຊົນຈຶ່ງມີຄວາມອີ່ມໜຳສຳລານສົມບູນພູນສຸກ. ທ່ານໂຮ່ວັນນີ, ອະດີດປະທານຄະນະກຳມະການປະຊາຊົນເມືອງນາມຈາມີແຂວງກວ໋າງນາມໃຫ້ຮູ້ວ່າ:
“ມີປະທານໂຮ່ຈີມິນຈຶ່ງມີປະເທດຫວຽດນາມຄືປະຈຸບັນໄດ້. ສະນັ້ນລູກຫລານຕົນຕ້ອງຮ່ຳຮຽນເກັ່ງ, ສ້າງສາປະເທດຊາດໃຫ້ຮັ່ງມີສວຍງາມ”.
ສຳລັບປະຊາຊົນຫວຽດນາມແຕ່ລະຄົນເວົ້າລວມ, ຊາວຊົນເຜົ່າສ່ວນຫນ້ອຍເວົ້າສະເພາະ, ປະທານໂຮ່ຈີມິນແມ່ນຜູ້ນຳທີ່ຍິ່ງໃຫຍ່, ເປັນພໍ່ທີ່ແສນເຄົາລົບຮັກ. ເພິ່ນມີຄວາມສຸດຈິດສຸດໃຈເພື່ອປະເທດຊາດ, ເພື່ອປະຊາຊົນ, ຕະຫລອດຊີວິດຂອງເພີ່ນແມ່ນເພື່ອພາລະກິດປົດປ່ອຍຊາດ. ປະຈຸບັນເຖິງວ່າປະທານໂຮ່ຈີມິນໄດ້ຈາກພວກເຮົາໄປແສນໄກແລ້ວກໍ່ຕາມແຕ່ຍາມໃດຮູບພາບຂອງເພິ່ນກໍ່ລ້ວນແຕ່ຝັງເລິກໃນໃຈຂອງຊາວຫວຽດນາມແຕ່ລະຄົນເວົ້າລວມແລະຊາວຊົນເຜົ່າສ່ວນຫນ້ອຍເວົ້າສະເພາະ.