ພິທີມອບເຮືອນແຫ່ງມະຫາສາມັກຄີໃຫ້ແກ່ປະຊາຊົນຜູ້ທຸກຍາກ

 “ເປັນຄັ້ງທຳອິດທີ່ມີເຮືອນຢູ່ແໜ້ນໜາຖາວອນ, ເປັນລະບຽບຄືແນວນີ້, ແມ່ລູກຂ້າພະເຈົ້າມີຄວາມປິຕິຊົມຊື່ນທີ່ສຸດ” - ນີ້ແມ່ນຄຳແບ່ງປັນຂອງເອື້ອຍ ຕັງທິໂຊແບັງ, ຢູ່ບ້ານ ບືງຈຽດ, ຕາແສງ ລຽວຕູ໊, ເມືອງ ເຈິ່ນເດ່, ເມື່ອໄດ້ຮັບເຮືອນມະຫາສາມັກຄີໂດຍທ້ອງຖິ່ນໜູນຊ່ວຍໃຫ້. ເຮືອນແຫ່ງນີ້ມີເນື້ອທີ່ກ່ວາ 40ມ2 ເທົ່ານັ້ນ ແຕ່ໄດ້ນຳເອົາຄວາມອົບອຸ່ນມາໃຫ້ຄອບຄົວເອື້ອຍ ໂຊແບັງ , ບໍ່ມີຄວາມເປັນຫ່ວງເປັນໃຍໃນເວລາຝົນຕົກລົມແຮງອີກແລ້ວ. ໂດຍໄດ້ຮັບຮູ້ມາວ່າ, ຄອບຄົວເອື້ອຍ ໂຊແບັງ ແມ່ນໜຶ່ງໃນບັນດາຄອບຄົວທຸກຍາກ, ກ່ອນໜ້ານີ້, ສອງແມ່ລູກເອື້ອຍ ໄດ້ດຳລົງຊີວິດຢູ່ໃນເຮືອນແບບຊາມຊາ ເຊິ່ງມີເນື້ອທີ່ກ້ວາງແຕ່ 20ມ2 ເທົ່ານັ້ນ. ກ່ອນໜ້ານີ້ສອງປີ, ໃນຂະນະທີ່ກຳລັງອອກແຮງງານຢູ່ນັ້ນ, ເອື້ອຍເກີດອຸປະຕິເຫດທາງຕາ, ຕ້ອງພັກຜ່ອນເພື່ອປິ່ນປົວ, ບໍ່ມີລາຍຮັບ ດັ່ງນັ້ນຊີວິດຂອງຄອບຄົວຍິ່ງຫຍຸ້ງຍາກກ່ວາເກົ່າ. ເມື່ອໄດ້ຮັບເຮືອນມະຫາສາມັກຄີ, ເອື້ອຍຈຶ່ງມີເຮືອນຢູ່ແໜ້ນໜາຖາວອນ, ອຸ່ນອ່ຽນໃຈໄປອອກແຮງງານ, ທຳການຜະລິດ, ຊີວິດການເປັນຢູ່ກໍ່ດີຂຶ້ນ:

“ຂ້າພະເຈົ້າມີຄວາມປິຕິຊົມຊື່ນ ແລະ ຂໍຂອບອົກຂອບໃຈອຳນາດການປົກຄອງທ້ອງຖິ່ນ, ລັດ ທີ່ໄດ້ຊ່ວຍເຫຼືອຄອບຄົວຂ້າພະເຈົ້າມີເຮືອນຢູ່. ຂ້າພະເຈົ້າມີຄວາມຜາສຸກຍ້ອນໄດ້ຮັບການເບິ່ງແຍງດູແລຈາກລັດ, ຄອບຄົວຈຶ່ງໄດ້ຢູ່ເຮືອນແບບນີ້”.

ນອກຈາກເບິ່ງແຍງດູແລທາງດ້ານຈິດໃຈແລ້ວ, ແຂວງ ຊອກຈັງ ກໍ່ໄດ້ເອົາໃຈໃສ່ເປັນພິເສດເຖິງຊີວິດທາງດ້ານວັດຖຸຂອງພໍ່ແມ່ປະຊາຊົນ ທີ່ນອນໃນເປົ້າໝາຍທຸກຍາກ . ໃນຊຸມປີຜ່ານມາ, ເລື່ອງກໍ່ສ້າງເຮືອນຢູ່ໃຫ້ແກ່ພໍ່ແມ່ປະຊາຊົນ ຍາມໃດກໍ່ໄດ້ຮັບຄວາມເອົາໃຈໃສ່. ເຮືອນຢູ່ບໍ່ພຽງແຕ່ແມ່ນບ່ອນກັນຝົນ, ກັນແດດເທົ່ານັ້ນ, ຫາກຍັງແມ່ນບ່ອນເພິ່ງພາອາໄສເພື່ອໃຫ້ພໍ່ແມ່ປະຊາຊົນມີຄວາມອຸ່ນອ່ຽນໃຈທຳມາຫາກິນ, ມີຊີວິດການເປັນຢູ່ເປັນປົກກະຕິ. ປີ 2022, ທ່ານ ດ່ຽນຮູ່ງ, ຄອບຄົວຊາວຂະແມ ທີ່ປະສົບກັບຄວາມຫຍຸ້ງຍາກຢູ່ ບ້ານ ຝູນິງ, ຕາແສງ ອານນິງ, ເມືອງ ເຈົາແທັ່ງ, ໄດ້ຮັບການຊ່ວຍເຫຼືອຈາກອຳນາດການປົກຄອງໜູນຊ່ວຍສ້າງເຮືອນແຫ່ງມະຫາສາມັກຄີ. ທ່ານ ດ່ຽນຮູ່ງ, ແບ່ງປັນວ່າ:

“ກ່ອນນີ້, ຂ້າພະເຈົ້າຄິດວ່າ, ບໍ່ຮູ້ວ່າຮອດເວລາໃດ ຕົນເອງຈຶ່ງກໍ່ສ້າງໄດ້ເຮືອນຢູ່ຖາວອນຄືແນວນີ້, ຮູ້ແຕ່ພະຍາຍາມເຮັດວຽກເທົ່ານັ້ນ. ປະຈຸບັນ, ທາງທ້ອງຖິ່ນໄດ້ພິຈາລະນາ, ເຫັນວ່າຄອບຄົວຕົນເອງປະສົບກັບຄວາມຫຍຸ້ງຍາກ ຈຶ່ງໜູນຊ່ວຍເຮືອນແຫ່ງມະຫາສາມັກຄີໃຫ້ຄືແນວນີ້, ຂ້າພະເຈົ້າມີຄວາມປິຕິຊົມຊື່ນທີ່ສຸດ. ຂ້າພະເຈົ້າໄດ້ຮັບເງິນ ໜູນຊ່ວຍ ຈຳນວນ 50 ລ້ານດົ່ງເພື່ອກໍ່ສ້າງເຮືອນຢູ່, ສ່ວນຄ່າແຮງງານແມ່ນຈ່າຍເອງ. ປະຈຸບັນມີເຮືອນຢູ່ແລ້ວ, ຕົນເອງພະຍາຍາມທຳມາຫາກິນ ບຸກບືນເພື່ອໃຫ້ມີຊີວິດເປັນປົກກະຕິ”.

ເຮືອນແຫ່ງມະຫາສາມັກຄີຊ່ວຍໃຫ້ປະຊາຊົນທຸກຍາກມີຊີວິດການເປັນຢູ່ເປັນປົກກະຕິ

ຕາມຄະນະຊີ້ນຳປຸກລະດົມຂົນຂວາຍການໜູນຊ່ວຍກໍ່ສ້າງເຮືອນຢູ່ໃຫ້ບັນດາຄອບຄົວປະສົບກັບຄວາມຫຍຸ້ງຍາກ ແຂວງ ຊອກຈັງ ແລ້ວ, ການປະຕິບັດຂະບວນການແຂ່ງຂັນ “ທົ່ວປະເທດຮ່ວມແຮງຮ່ວມໃຈເພື່ອຄົນທຸກຍາກ - ບໍ່ປະໃຫ້ຜູ້ໃດຖືກຕົກຢູ່ທາງຫຼັງ”, ທາງແຂວງ ໄດ້ສ້າງແຜນການ, ຈັດຕັ້ງການປຸກລະດົມ, ຂົນຂວາຍການໜູນຊ່ວຍກໍ່ສ້າງເຮືອນຢູ່ໃຫ້ຄອບຄົວທຸກຍາກ. ໃນໄລຍະເວລາ 2 ປີ, ແຕ່ປີ 2021 ແລະ 2022, ແຂວງ ປຸກລະດົມ, ຂົນຂວາຍການ ໜູນຊ່ວຍກໍ່ສ້າງເຮືອນໄດ້ 3.496 ຫຼັງ, ດ້ວຍຍອດມູນຄ່າທັງໝົດ 174 ຕື້ດົ່ງ (ປະມານ 7 ລ້ານ USD). ທ່ານ ເລິມວັນເໝິນ, ເລຂາພັກແຂວງ ຊອກຈັງ, ໃຫ້ຮູ້ວ່າ:

“ຖ້າຄິດໄລ່ໄລຍະ 2019 – 2020, ແຂວງ ໄດ້ໜູນຊ່ວຍເຮືອນຢູ່ໃຫ້ ບັນດາຄອບຄົວທີ່ມີຄຸນງາມຄວາມດີໄດ້ 1.900 ຫຼັງ, ມາຮອດປະຈຸບັນ, ທົ່ວແຂວງໄດ້ປຸກລະດົມ, ຂົນຂວາຍ ແລະ ກໍ່ສ້າງເຮືອນຢູ່ທັງໝົດໄດ້ 5.200 ຫຼັງ. ປະຈຸບັນ, ແຂວງ ຊອກຈັງ ໄດ້ປະຕິບັດສຳເລັດ ການກໍ່ສ້າງເຮືອນຢູ່ໃຫ້ຄອບຄົວທີ່ມີຄຸນງາມຄວາມດີ, ຄອບຄົວທຸກຍາກກ່ຽວກັບເຮືອນຢູ່ ແລະ ຄອບຄົວທຸກຍາກທີ່ມີຄວາມຕ້ອງການດ້ານເຮືອນຢູ່ໂດຍພື້ນຖານ”.

ໂຄງການກໍ່ສ້າງເຮືອນຢູ່ໃຫ້ບັນດາຄອບຄົວທຸກຍາກກ່ຽວກັບເຮືອນຢູ່ມີຄວາມໝາຍສູງສົ່ງ ແລະ ທັງມີລັກສະນະມະນຸດສະທຳຢ່າງເລິກເຊິ່ງ, ສະແດງໃຫ້ເຫັນຄວາມເອົາໃຈໃສ່ຂອງອົງຄະນະພັກ, ອຳນາດການປົກຄອງ, ອົງການຈັດຕັ້ງມະຫາຊົນແນວໂຮມ, ຜູ້ໃຈບຸນໃຈກຸສົນ… ຕໍ່ຄອບຄົວທຸກຍາກ, ຊ່ວຍບັນດາຄອບຄົວທຸກຍາກດ້ານເຮືອນຢູ່ໃນບໍລິເວນແຂວງມີເຮືອນຢູ່ຢ່າງແໜ້ນໜາຖາວອນ, ກ້ວາງຂວາງເພື່ອໃຫ້ຊີວິດການເປັນຢູ່ເປັນປົກກະຕິ, ຫລຸດຜ່ອນ ຄວາມເປັນຫ່ວງເປັນໃຍ, ຄວາມຫຍຸ້ງຍາກລຳບາກໃນຊີວິດການເປັນຢູ່ໄດ້ສ່ວນໃດສ່ວນໜຶ່ງ. ບັນດາເຮືອນແຫ່ງມະຫາສາມັກຄີສຳລັບຜູ້ທຸກຍາກຢູ່ ແຂວງ ຊອກຈັງ ບໍ່ພຽງແຕ່ແມ່ນການຊ່ວຍເຫຼືອທາງດ້ານວັດຖຸເທົ່ານັ້ນ, ຫາກຍັງແມ່ນແຫຼ່ງລະດົມກຳລັງໃຈທາງດ້ານຈິດໃຈ, ສ້າງກຳລັງໜູນເພື່ອໃຫ້ບັນດາຄອບຄົວເຫຼົ່ານັ້ນມີຄວາມອຸ່ນອ່ຽນໃຈ, ມານະພະຍາຍາມອອກແຮງງານທຳການຜະລິດ, ກຸ້ມຕົນເອງບືນຕົວຂຶ້ນເພື່ອປັບປຸງຊີວິດການເປັນຢູ່ໃຫ້ດີຂຶ້ນ.