(VOVWORLD) -ພາຍຫລັງໄລຍະຍາວຍ້ອນຖືກຜົນສະທ້ອນຈາກໂລກລະບາດໂຄວິດ 19, ແຕ່ຕົ້ນປີ 2022 ມາຮອດປະຈຸບັນ, ຮ່າໂນ້ຍ ໄດ້ ແລະ ພວມຜັນຂະຫຍາຍການເຄື່ອນໄຫວເພື່ອແນໃສ່ໂຄສະນາເຜີຍແຜ່, ສົ່ງເສີມ, ຟື້ນຟູການທ່ອງທ່ຽວ ຮ່າໂນ້ຍ. ການເຄື່ອນໄຫວນີ້ ໄດ້ປະກອບສ່ວນແນະນຳພາບພົດ ນະຄອນຫລວງ ຮ່າໂນ້ຍ ທີ່ເຕັມໄປດ້ວຍມູນເຊື້ອວັດທະນະທຳ, ຮັກຫອມສັນຕິພາບ ແລະ ນັບມື້ນັບພັດທະນາ, ແມ່ນສະຖານທີ່ທ່ອງທ່ຽວປອດໄພ, ສະຫນິດສະຫນົມ ຮັກແພງແຂກຄົນ, ເອກະລັກສະເພາະໃຫ້ແກ່ແຂກທ່ອງທ່ຽວສາກົນ.
 ໄຂລາຍການ Get on Hanoi 2022. (ພາບ:Thủy Tiên/ VOV) |
ນັບແຕ່ຕົ້ນປີມາຮອດປະຈຸບັນ, ນະຄອນຫຼວງຮ່າໂນ້ຍ ໄດ້ຜັນຂະຫຍາຍຫລາຍເຫດການໂຄສະນາການທ່ອງທ່ຽວ, ງານບຸນ, ໃນນັ້ນ ຫລາຍເຫດການແມ່ນມີຂອບຂະຫນາດໃຫຍ່ຄື: ງານບຸນທ່ອງທ່ຽວຮ່າໂນ້ຍປີ 2022. ລາຍການ Get on Hanoi ດ້ວຍຫລາຍຮູບພາບແປກຕາ.
ດ້ວຍຫລາຍຈຸດໃຫມ່ທີ່ດູດດຶ່ມໃນວຽກງານຈັດຕັ້ງ, ບັນດາການເຄື່ອນໄຫວງານບຸນ, ສົ່ງເສີມການໂຄສະນາທ່ອງທ່ຽວ ໄດ້ນຳມາເຊິ່ງປະສົບການທີ່ໃຫມ່ອ່ຽມໃຫ້ແກ່ນັກທ່ອງທ່ຽວ ແລະ ແນະນຳພາບພົດ ຮ່າໂນ້ຍ ທີ່ເຕັມໄປດ້ວຍພະລັງຊີວິດ, ປະທັບໃຈ ແລະ ມີຫົວປະດິດສ້າງ,
“ຂ້າພະເຈົ້າປາດຖະຫນາຢາກມາຢ້ຽມຢາມຮ່າໂນ້ຍ ຫວຽດນາມ ກ່ອນນີ້ 2 ປີແລ້ວ ແຕ່ຍ້ອນໂລກລະບາດໂຄວິດ 19 ສະນັ້ນ ມາຮອດດຽວນີ້ ຂ້າພະເຈົ້າຈຶ່ງໄດ້ມາຢາມ. ຂ້າພະເຈົ້າມີຄວາມປະທັບໃຈຫລາຍ, ເພາະວ່າຊາວຮ່າໂນ້ຍທຸກຄົນຜູ້ໃດກໍ່ຮັກແພງແຂກຄົນ, ມີຄວາມສະຫນິດສະຫນົມ, ອາຫານການກິນຂອງ ຮ່າໂນ້ຍ ກໍ່ແຊບນົວ, ທິວທັດທຳມະຊາດສວຍງາມ”
“ຖ້າມີຄົນຖາມນັ້ນ ຂ້າພະເຈົ້າຈະຕອບວ່າ ຫວຽດນາມ ຄືດັ່ງຈຸດນັດພົບຂອງຄອບຄົວຂ້າພະເຈົ້າ. ຢູ່ຫວຽດນາມ ທຸກສິ່ງທຸກຢ່າງລ້ວນແຕ່ມີສ່ວນກ່ຽວຂ້ອງເຖິງຄອບຄົວ, ມີຄວາມອົບອຸ່ນຫລາຍ. ຍົກຕົວຢ່າງຄື ການຖ່າຍຮູບ, ຂ້າພະເຈົ້າໄດ້ຖ່າຍເອົາທຸກສິ່ງທຸກຢ່າງ, ນັບທັງເດັກນ້ອຍທີ່ກຳລັງແລ່ນຫລິ້ນ ກໍ່ກາຍເປັນຮູບພາບທີ່ສວຍງາມ”
ເລື່ອງ ນະຄອນຫຼວງ ຮ່າໂນ້ຍ ຈັດຕັ້ງງານບຸນ, ເຫດການໂຄສະນາ ສົ່ງເສີມການທ່ອງທ່ຽວກໍ່ຄື ໄດ້ນຳມາເຊິ່ງກຳລັງຫນູນໃຫ້ແກ່ບັນດາບໍລິສັດທ່ອງທ່ຽວຢູ່ບໍລິເວນ ນະຄອນຫຼວງ ພາຍຫລັງຖືກຢຸດສະງັກມາໄລຍະຍາວ. ທ່ານ ຫງວຽນຕຽນດາດ, ຜູ້ອຳນວຍການບໍລິສັດທ່ອງທ່ຽວ Aza ຢັ້ງຢືນວ່າ:
“ຂ້າພະເຈົ້າຖືວ່າ ນີ້ແມ່ນການເຄື່ອນໄຫວຫນູນຊ່ວຍ, ແຕ່ມີຄວາມໝາຍພິເສດ, ເຮັດໃຫ້ພາບພົດການທ່ອງທ່ຽວ ຂອງນະຄອນຫຼວງຮ່າໂນ້ຍ ຍິ່ງສວຍງາມ ແລະ ອຸດົມສົມບູນຂຶ້ນຕື່ມ, ແມ່ນໂອກາດເພື່ອໂຄສະນາໃຫ້ນັກທ່ອງທ່ຽວ ເປັນຕົ້ນແມ່ນແຂກຕ່າງປະເທດ ທີ່ມາຮ່າໂນ້ຍ ຮູ້ຈັກບັນດາຜະລິດຕະພັນທ່ອງທ່ຽວກໍ່ຄືທັດສະນີຍະພາບ ຂອງນະຄອນຫຼວງຮ່າໂນ້ຍຕື່ມອີກ. ຂ້າພະເຈົ້າຕີລາຄາສູງລາຍການໂຄສະນາ, ແນະນຳຜະລິດຕະພັນທ່ອງທ່ຽວ ຮ່າໂນ້ຍ ແມ່ນອຸດົມສົມບູນ”
 ລາຍການມອບຂອງຂວັນ ທ່ອງທ່ຽວ ຮ່າໂນ້ຍ ປິ 2022. (ພາບ: ພະແນກທ່ອງທ່ຽວ ຮ່າໂນ້ຍ) |
ບັນດາລາຍການສົ່ງເສີມ, ໂຄສະນາ ຊື່ງ ຮ່າໂນ້ຍ ໄດ້ຈັດຕັ້ງໃນໄລຍະຜ່ານມາ ດ້ວຍຫລາຍໝາກຜົນ ສະແດງໃຫ້ເຫັນສັນຍານຟື້ນຕົວຢ່າງແຮງຂອງການທ່ອງທ່ຽວ ຫວຽດນາມ ເວົ້າລວມ, ຮ່າໂນ້ຍ ເວົ້າສະເພາະ. ຄະນະກຳມະການປະຊາຊົນ ນະຄອນ ໄດ້ປະກາດໃຊ້ແຜນການ ກ່ຽວກັບການຟື້ນຟູພັດທະນາການເຄື່ອນໄຫວທ່ອງທ່ຽວ ນະຄອນຫລວງ, ຮັບມືຢ່າງປອດໄພ, ມີໄຫວພິບ, ຄວບຄຸມໂລກລະບາດຢ່າງມີປະສິດທິຜົນໃນປີ 2022 ແລະ ຊຸມປີຕໍ່ໄປ. ໄປຄຽງຄູ່ກັນນັ້ນ, ຮ່າໂນ້ຍ ກໍ່ຂຸດຄົ້ນຫລາຍຜະລິດຕະພັນທ່ອງທ່ຽວໃຫມ່, ນັ້ນແມ່ນ Tour ທີ່ເປັນເອກະລັກສະເພາະ, ໃຫມ່ອ່ຽມ, ນຳມາເຊິ່ງປະສົບການໃຫມ່ ໂດຍໄດ້ສ້າງຂຶ້ນບົນພື້ນຖານບັນດາເຂດຮ່ອງຮອຍປະຫວັດສາດ, ວັດທະນະທຳຂອງຮ່າໂນ້ຍ. ບັນດາຜະລິດຕະພັນທ່ອງທ່ຽວນັ້ນ ໄດ້ເຮັດໃຫ້ນັກທ່ອງທ່ຽວສາກົນມີຄວາມທັບໃຈທີ່ສຸດ. ເອື້ອຍ Berangere Tachenne ມາຈາກ ຝລັ່ງ ແບ່ງປັນວ່າ:
“ໃນຊຸມມື້ ທີ່ຢູ່ ຮ່າໂນ້ຍ, ຂ້າພະເຈົ້າ ໄດ້ໄປທ່ອງທ່ຽວ, ຢ້ຽມຊົມແຕ່ເຊົ້າຈົນຮອດຄ່ຳ. ຊີວິດການເປັນຢູ່ຂອງຊາວນະຄອນຫລວງ ຮ່າໂນ້ຍ ຢູ່ ຄຸ້ມຖະຫນົນເກົ່າ ແລະ ບັນຍາກາດຢູ່ອ້ອມຫນອງ ໂຮ່ເກືອມ ແມ່ນຈັບອົກຈັບໃຈທີ່ສຸດ. ນອກຈາກນັ້ນ ຂ້າພະເຈົ້າຍັງໄດ້ໄປຢ້ຽມຢາມ ໝູ່ບ້ານຜະລິດເຄື່ອງປັ້ນດິນເຜົາ ບາດຈ່າງ, ເບິ່ງຂັ້ນຕອນຜະລິດໂດຍກົງ ແລະໄປຢ້ຽມຢາມ ພະລາຊະວັງ ທັງລອງນຳອີກ, ຂ້າພະເຈົ້າ ມີຄວາມເຂົ້າໃຈກ່ຽວກັບປະຫວັດສາດ, ວັດທະນະທຳ ຂອງຮ່າໂນ້ຍກວ່າເກົ່າ. ອາຫານການກິນຂອງ ຮ່າໂນ້ຍ ກໍ່ແຊບທີ່ສຸດ”
ຕາມຕົວເລກສະຖິຕິ ໃນເດືອນ ຕຸລາ, ແຂກທ່ອງທ່ຽວທີ່ມາຢ້ຽມຢາມ ຮ່າໂນ້ຍ ຄາດວ່າ ບັນລຸ 1,51 ລ້ານເທື່ອຄົນ, ໃນນັ້ນ ແຂກທ່ອງທ່ຽວສາກົນແມ່ນຫຼາຍ ກວ່າ 212.000 ເທື່ອຄົນ. ໄລ່ລວມ 10 ເດືອນຂອງປີ 2022, ຍອດຈຳນວນແຂກທ່ອງທ່ຽວມາ ຮ່າໂນ້ຍ ຄາດວ່າບັນລຸ 15,3 ລ້ານເທື່ອຄົນ, ເພີ່ມຂຶ້ນທົບ 5 ເທົ່າ ເມື່ອທຽບໃສ່ໄລຍະດຽວກັນຂອງປີກາຍ. ບັນດາໝາກຜົນນີ້ໄດ້ສ້າງທ່ວງທ່າໃຫ້ແກ່ຂະແຫນງທ່ອງທ່ຽວ ນະຄອນຫລວງ ສືບຕໍ່ບັນລຸບາດກ້າວບຸກທະລຸໃນໄລຍະຈະມາເຖິງ.