ວັນທີ 30 ທັນວາ 1955, ອິນໂດເນເຊຍ ໄດ້ກາຍເປັນປະເທດທຳອິດໃນພາກພື້ນ ອາຊີຕາເວັນອອກສ່ຽງໃຕ້ ທີ່ສ້າງການພົວພັນທາງການທູດກັບ ຫວຽດນາມ ຢ່າງເປັນທາງການ. ປີ 2020 ເປັນຂີດໝາຍ 65 ປີ ແຫ່ງວັນສ້າງຕັ້ງການພົວພັນທາງການທູດ ລະຫວ່າງ ຫວຽດນາມ - ອິນໂດເນເຊຍ. ຜ່ານບັນດາໄລຍະປະຫວັດສາດ ແລະ ການຜັນແປຫຼາຍຢ່າງໃນພາກພື້ນ ແລະ ໃນໂລກ, ຍາມໃດ ຫວຽດນາມ ແລະ ອິນໂດເນເຊຍ ກໍໃຫ້ການຊ່ວຍເຫຼືອເຊິ່ງກັນແລະກັນ. ດ້ວຍບັນດາຄວາມມານະພະຍາຍາມຢ່າງໃຫຍ່ຫຼວງຂອງການນຳລຸ້ນຕ່າງໆ ແລະ ປະຊາຊົນສອງປະເທດ, ການພົວພັນມິດຕະພາບລະຫວ່າງສອງປະເທດ ໄດ້, ພວມ ແລະ ຈະພັດທະນາຢ່າງແຮງ, ເລິກເຊິ່ງກວ້າງຂວາງ ແລະ ມີປະສິດທິຜົນໃນການພົວພັນສອງຝ່າຍ ແລະ ຫຼາຍຝ່າຍ ແລະ ຫວຽດນາມ - ອິນໂດເນເຊຍ ໄດ້ກາຍເປັນຄູ່ຮ່ວມມືສຳຄັນໃນພາກພື້ນ.

        “ອາດເວົ້າໄດ້ວ່າ ຫວຽດນາມ ແລະ ອິນໂດເນເຊຍ ແມ່ນບັນດາຄູ່ຮ່ວມມືທີ່ມີຄວາມຜູກພັນກັນຍ້ອນມີຈຸດຄ້າຍຄືກັນກ່ຽວກັບພື້ນຖານວັດທະນະທຳ, ສະພາບການປະຫວັດສາດ, ທີ່ຕັ້ງພູມສັນຖານຍຸດທະສາດ, ບັນດາຜົນປະໂຫຍດຄືກັນໃນພາກພື້ນ, ສາກົນ ແລະ ສຳຄັນທີ່ສຸດແມ່ນມູນເຊື້ອຄວາມສະໜິດຕິດພັນໂດຍປະທານໂຮ່ຈີມິນ ແລະ ທ່ານປະທານາທິບໍດີ Soekarno ໄດ້ສ້າງພື້ນຖານໄວ້. ຫວຽດນາມ ແລະ ອິນໂດເນເຊຍ ໄດ້ມີບັນດາການປະກອບສ່ວນຢ່າງຕັ້ງໜ້າໃຫ້ແກ່ວິວັດການກໍ່ສ້າງປະຊາຄົມອາຊຽນສາມັກຄີ ແລະ ພັດທະນາ.”

        ນັ້ນແມ່ນຄຳແບ່ງປັນຂອງທ່ານ ຫງວຽນກວັກຢຸງ, ຮອງລັດຖະມົນຕີກະຊວງການຕ່າງປະເທດຫວຽດນາມ ທີ່ກອງປະຊຸມສຳມະນາດ້ວຍຫົວຂໍ້ “ຫວນຄືນໄລຍະ 65 ປີ ແຫ່ງວັນສ້າງຕັ້ງການພົວພັນລະຫວ່າງ ຫວຽດນາມ - ອິນໂດເນເຊຍ ແລະ ໄລຍະທາງໃນພາຍພາກໜ້າ” ທີ່ໄດ້ຈັດຂຶ້ນຜ່ານຮູບການ Hybrid - ເຊິ່ງເປັນການປະສານສົມທົບລະຫວ່າງຮູບການທາງອອນລາຍ ແລະ ຈັດການປະຊຸມໂດຍກົງ ໂດຍສະຖານທູດ ອິນໂດເນເຊຍ ປະຈຳ ຫວຽດນາມ ສົມທົບກັບສະຖາບັນການຕ່າງປະເທດຈັດຕັ້ງຂຶ້ນໃນວັນທີ 26 ຕຸລາ 2020 ຢູ່ຮ່າໂນ້ຍ. ທີ່ກອງປະຊຸມສຳມະນາ, ບັນດານັກປະຖະກະຖາ ຕ່າງກໍຖືວ່າ ໄລຍະ 65 ປີ ແຫ່ງການພົວພັນທາງການທູດລະຫວ່າງ ຫວຽດນາມ ແລະ ອິນໂດເນເຊຍ ແມ່ນໄລຍະທາງສ້າງຂີດໝາຍຫຼາຍເຫດການທີ່ສຳຄັນ, ເຊິ່ງໄດ້ເພີ່ມພູນຄູນສ້າງຈາກການພົວພັນທີ່ສະໜິດສະໜົມແບບພິເສດ ລະຫວ່າງ ປະທານໂຮ່ຈີມິນ - ການນຳຜູ້ຍິ່ງໃຫຍ່ ແລະ ປະທານາທິບໍດີ Soekarno. ຜ່ານໄລຍະກວ່າ 6 ທົດສະວັດ, ຕໍ່ໜ້າບັນດາສິ່ງທ້າທາຍຂອງພາກພື້ນ ແລະ ໃນໂລກ, ການພົວພັນລະຫວ່າງ ຫວຽດນາມ - ອິນໂດເນເຊຍ ນັບມື້ນັບໄດ້ຮັບການເພີ່ມພູນຄູນສ້າງໃຫ້ໝັ້ນແກ່ນ. ການພົວພັນຄູ່ຮ່ວມມືຮອບດ້ານລະຫວ່າງ ຫວຽດນາມ - ອິນໂດເນເນຊຍ ຖືກສ້າງຕັ້ງຂຶ້ນໃນປີ 2003 ແລະ ໄດ້ຍົກລະດັບຂຶ້ນເປັນການພົວພັນຄູ່ຮ່ວມມືຍຸດທະສາດໃນປີ 2013 ນັ້ນ ໄດ້ຢັ້ງຢືນໃຫ້ເຫັນການຖືເປັນສໍາຄັນຂອງທັງ ຫວຽດນາມ ແລະ ອິນໂດເນເຊຍ ສໍາລັບບົດບາດ ແລະ ທີ່ຕັ້ງຂອງກັນໃນພາກພື້ນ.

ທ່ານ ຫງວຽນກວັກຢຸງ, ຮອງລັດຖະມົນຕີກະຊວງການຕ່າງປະເທດຫວຽດນາມ  (ພາບ: baoquocte.vn)

        ເມື່ອຕີລາຄາກ່ຽວກັບການພົວພັນລະຫວ່າງ ຫວຽດນາມ - ອິນໂດເນເຊຍ, ທ່ານ Ibnu Hadi, ເອກອັກຄະລັດຖະທູດຜູ້ມີອໍານາດເຕັມ ອິນໂດເນເຊຍ ປະຈໍາ ຫວຽດນາມ ແບ່ງປັນວ່າ:

        “ຂ້າພະເຈົ້າມີຄວາມເອກອ້າງທະນົງໃຈ ເມື່ອໄດ້ເຫັນປະຈັກຕາໄລຍະ 65 ປີແຫ່ງການພົວພັນສອງຝ່າຍ ລະຫວ່າງ ຫວຽດນາມ - ອິນໂດເນເຊຍ. ແຕ່ດົນນານມາແລ້ວ, ການພົວພັນດັ່ງກ່າວໄດ້ເພີ່ມພູນຄູນສ້າງ ແລະ ພັດທະນາຢ່າງດີງາມທີ່ສຸດໃນທຸກຂົງເຂດ. ຕາມຂ້າພະເຈົ້າແລ້ວ, ໃນໄລຍະຈະມາເຖິງ, ການພົວພັນສອງຝ່າຍ ລະຫວ່າງ ຫວຽດນາມ ແລະ ອິນໂດເນເຊຍ ຈະນັບມື້ນັບໄດ້ຍົກສູງຂຶ້ນ ເພາະວ່າ ເພື່ອແກ້ໄຂໄດ້ທຸກບັນຫາ, ພວກເຮົາ ມີບໍ່ສາມາດເຮັດເອງໄດ້, ຕ້ອງມີການຮ່ວມມືກັບປະເທດອື່ນໆ, ບັນດາປະເທດບ້ານໃກ້ເຮືອນຄຽງ, ໃນນັ້ນ ມີ ຫວຽດນາມ. ສະນັ້ນ ການຮ່ວມມືລະຫວ່າງ ຫວຽດນາມ ແລະ ອິນໂດເນເຊຍ ຈະນັບມື້ນັບພັດທະນາ”.

ທ່ານ Ibnu Hadi, ເອກອັກຄະລັດຖະທູດຜູ້ມີອໍານາດເຕັມ ອິນໂດເນເຊຍ ປະຈໍາ ຫວຽດນາມ (ພາບ: ສະຖານທູດ ອິນໂດເນເຊຍ ປະຈຳ ຫວຽດນາມ)

ບົນພື້ນຖານສືບທອດພື້ນຖານປະຫວັດສາດອັນໝັ້ນແກ່ນ, ການພົວພັນສອງຝ່າຍ ລະຫວ່າງ ຫວຽດນາມ ແລະ ອິນໂດເນເຊຍ ບັນລຸໄດ້ຜົນງານພົ້ນເດັ່ນຫຼາຍຢ່າງໃນບັນດາຂົງເຂດຄື: ການເມືອງປ້ອງກັນຊາດ - ປ້ອງກັນຄວາມສະຫງົບ, ເສດຖະກິດ - ວັດທະນະທໍາ - ການທ່ອງທ່ຽວ. ພ້ອມກັນນັ້ນ, ການຮ່ວມມືທ້ອງຖິ່ນ ແລະ ການພົບປະແລກປ່ຽນປະຊາຊົນກໍໄດ້ຮັບຄວາມເອົາໃຈໃສ່. ໃນປີຜ່ານມາ, ວົງເງິນການຄ້າສອງສົ້ນລະຫວ່າງສອງປະເທດເພີ່ມຂຶ້ນ 60% ແຕ່ 5,6 ຕື້ USD ໃນປີ 2014 ຂຶ້ນເປັນ 9,1 ຕື້ USD ໃນປີ 2019. ໃນສະພາບການໂລກລະບາດໂຄວິດ - 19 ເຮັດໃຫ້ພື້ນຖານເສດຖະກິດຂອງຫຼາຍປະເທດຖືກຊຸດໂຊມ, 9 ເດືອນຕົ້ນປິ 2020, ວົງເງິນສອງຝ່າຍ ຍັງບັນລຸ 5,01 ຕື້ USD ແລະ ສອງປະເທດ ພວມມຸ່ງໄປເຖິງຕົວເລກ 10 ຕື້ USD ຕາມທີ່ໄດ້ວາງອອກໃນແຜນການດໍາເນີນງານ ໄລຍະ 2019 – 2023. ປັດຈຸບັນ, ອິນໂດເນເຊຍ ແມ່ນຄູ່ຮ່ວມມືທີ່ໜ້າໄວ້ວາງໃຈຂອງ ຫວຽດນາມ. ດ້ວຍຂອບຂະໜາດປະຊາກອນ, ຄວາມສາມາດບົ່ມຊ້ອນດ້ານເສດຖະກິດ ແລະ ຄວາມຕ້ອງການພັດທະນາ, ຍັງມີຫຼາຍກາລະໂອກາດເພື່ອນໍາສາຍພົວພັນສອງຝ່າຍຂຶ້ນສູ່ ລະດັບສູງໃໝ່. ເພື່ອບັນລຸໄດ້ບັນດາເປົ້າໝາຍຍຸດທະສາດໃນໄລຍະຈະມາເຖິງ, ທ່ານນາງ ຫງວຽນແທັງຮ່າ, ອັກຄະລັດຖະທູດທີ່ປຶກສາ, ສະຖານທູດຫວຽດນາມ ປະຈໍາ ອິນໂດເນເຊຍ ສະເໜີວ່າ:

        “ທີໜຶ່ງແມ່ນ ສືບຕໍ່ຍູ້ແຮງການພົບປະແລກປ່ຽນ, ພິເສດແມ່ນການພົບປະແລກປ່ຽນ ການນໍາຂັ້ນສູງ ເພື່ອເພີ່ມທະວີຄວາມເຂົ້າອົກເຂົ້າໃຈ ແລະ ຄວາມໄວ້ວາງໃຈດ້ານການເມືອງລະຫວ່າງສອງປະເທດ. ທີສອງແມ່ນ ຍາດແຍ່ງທ່າແຮງທີ່ຄ້າຍຄືກັນໃນການພົວພັນລະຫວ່າງ ຫວຽດນາມ - ອິນໂດເນເຊຍ ກ່ຽວກັບເຈດຈໍານົງເອກະລາດ, ນໍ້າໃຈສ້າງຄວາມເຂັ້ມແຂງດ້ວຍຕົນເອງ, ຍົກສູງລັດທິຫຼາຍຝ່າຍ ແລະ ເຄົາລົບກົດໝາຍສາກົນ. ທີສາມແມ່ນ ເພີ່ມທະວີການສົມທົບກັນຢ່າງແໜ້ນແຟ້ນໃນບັນດາຂອບເຂດການຮ່ວມມືຫຼາຍຝ່າຍ, ພິເສດແມ່ນໃນຂອບເຂດ ອາຊຽນ”.

        ປີ 2020, ຕໍ່ໜ້າສະພາບການທີ່ສັບສົນຂອງໂລກລະບາດໂຄວິດ - 19, ການນໍາສອງປະເທດໄດ້ເປັນເຈົ້າການແລກປ່ຽນປະສົບການໃນການຮັບມືກັບ ໂລກລະບາດ ແລະ ປຶກສາຫາລືກ່ຽວກັບບັນດາມາດຕະການຊຸກຍູ້ການແລກປ່ຽນການຄ້າ, ໜູນຊ່ວຍວິສາຫະກິດຟື້ນຟູການຜະລິດດໍາເນີນທຸລະກິດ, ຮັກສາການດໍາລົງຊີວິດເປັນປົກກະຕິໃຫ້ແກ່ປະຊາຊົນ. ເພື່ອຊຸກຍູ້ການພົວພັນຮ່ວມມືລະຫວ່າງສອງປະເທດ ກວ່າອີກ, ສະແດງຄວາມສາມັກຄີ ແລະ ຊ່ວຍເຫຼືອເຊິ່ງກັນແລະກັນ, ທ່ານຮອງລັດຖະມົນຕີການຕ່າງປະເທດ ອິນໂດເຍເຊຍ Mahendra Siregar ສະເໜີວ່າ:

        “ຫວຽດນາມ ແລະ ອິນໂດເນເຊຍ ຄວນສົ່ງເສີມການເປີດກວ້າງການຮ່ວມມື ໃນຂົງເຂດສິນໃນນໍ້າ, ລວມທັງປັບປຸງບົດບັນທຶກຊ່ວຍຈໍາກ່ຽວກັບການຮ່ວມມືດ້ານສິນໃນນໍ້າ ແລະ ສົ່ງເສີມການລົງທຶນເຂົ້າໃນຂົງເຂດຈັບຫາປາ ແລະ ປູກລ້ຽງສິນໃນນໍ້າ. ທີສອງແມ່ນ ສົ່ງເສີມບັນດາການພົວພັນຄູ່ຮ່ວມມື ແລະ ກາລະໂອກາດອື່ນໆ ເຊິ່ງບັນດາວິສາຫະກິດ ຫວຽດນາມ ແລະ ອິນໂດເນເຊຍ ສາມາດຂຸດຄ້ົນໄດ້. ທີສາມແມ່ນ, ໝູນໃຊ້ບັນດາວິທີການສໍາຜັດເພື່ອແກ້ໄຂບັນດາບັນຫາຍົກເວັ້ນພາສີໃນການພົວພັນການຄ້າສອງປະເທດ. ທີສີ່ແມ່ນ ຊຸກຍູ້ການຮ່ວມມືໃນຂົງເຂດເສດຖະກິດປະດິດຄິດສ້າງ. ສຸດທ້າຍ ແມ່ນເປີດກາລະໂອກາດຫຼາຍຢ່າງໃຫ້ແກ່ຄົນລຸ້ນໜຸ່ມສອງປະເທດ ດ້ວຍວິທີຊຸກຍູ້ການແລກປ່ຽນນັກສຶກສາ ແລະ ການຄົ້ນຄວ້າລວມ”.

        ຫວຽດນາມ ແລະ ອິນໂດເນເຊຍ ກໍແບ່ງປັນຜົນປະໂຫຍດຫຼາຍຢ່າງໃນການຊຸກຍູ້ການຮ່ວມສຳພັນໃນພາກພື້ນ ແລະ ເຊື່ອມໂຍງເຂົ້າກັບສາກົນ. ສອງປະເທດຕັ້ງໜ້າສົມທົບກັນຢ່າງແໜ້ນແຟ້ນ ແລະ ສະໜັບສະໜູນເຊິ່ງກັນແລະກັນໃນບັນດາລະບອບລະບຽບການ, ເວທີປາໄສຢູ່ພາກພື້ນ ແລະ ໃນໂລກ ເປັນຕົ້ນແມ່ນ ສະຫະປະຊາຊາດ, ອາຊຽນ, WTO, APEC, ASEM... ໂດຍສະເພາະແມ່ນໃນປີ 2020 ເຊິ່ງເປັນປີ ຫວຽດນາມ ເປັນປະເທດເຈົ້າພາບ ອາຊຽນ ແລະ ສອງປະເທດພ້ອມກັນຮັບດຳລົງບົດບາດເປັນ ຄະນະກໍາມະການບໍ່ປະຈຳການສະພາຄວາມໝັ້ນຄົງ ສປຊ. ສອງປະເທດ ໄດ້ມີບັນດາການປະກອບສ່ວນຢ່າງຕັ້ງໜ້າໃນວິວັດການສ້າງປະຊາຄົມ ອາຊຽນ ໃຫ້ມີຄວາມສາມັກຄີ ແລະ ພັດທະນາ, ສົມທົບກັນຢ່າງແໜ້ນແຟ້ນໃນບັນດາບັນຫາຄວາມໝັ້ນຄົງຂອງພາກພື້ນ, ຊຸກຍູ້ທັດສະນະຂອງ ອາຊຽນ ກ່ຽວກັບ ມະຫາສະໝຸດອິນເດຍປາຊີຟິກ (AOIP)... ທ່ານຮອງລັດຖະມົນຕີການຕ່າງປະເທດຫວຽດນາມ ຫງວຽນກວັກຢຸງ ເນັ້ນໜັກວ່າ:

        “ຄວາມສາມາດບົ່ມຊ້ອນໃນການຮ່ວມມືຂອງສອງປະເທດແມ່ນຍັງໃຫຍ່ຫຼວງຢູ່ ແລະ ໄດ້ຊຸກຍູ້ຢ່າງແຮງດ້ວຍກຳລັງພາຍໃນທີ່ອຸດົມສົມບູນຂອງສອງປະເທດ ກໍຄື ທ່າອ່ຽງຂອງຍຸກສະໄໝໃໝ່, ສະໄໝຂອງການປະຕິວັດວິທະຍາສາດເຕັກໂນໂລຢີ 4.0, ໃນປະຊາຄົມ ອາຊຽນໝັ້ນຄົງເຂັ້ມແຂງ, ສາມັກຄີ. ຫວຽດນາມ ແລະ ອິນໂດເນເຊຍ ຕ້ອງສືບຕໍ່ເຮັດໃຫ້ການພົວພັນຄູ່ຮ່ວມມືຍຸດທະສາດທີ່ພວມພັດທະນາຢ່າງດີງາມ ເລິກເຊິ່ງກວ່າເກົ່າ, ປະກອບສ່ວນຫຼາຍພໍສົມຄວນໃຫ້ແກ່ປະຊາຄົມ ອາຊຽນ ສະໜິດຕິດພັນ, ເປັນເຈົ້າການຮັບມື ແລະ ວັດທະນາຖາວອນ”.

        ຫວຽດນາມ ແລະ ອິນໂດເນເຊຍ ລ້ວນແຕ່ຕັ້ງຢູ່ໃຈກາງມະຫາສະໝຸດອິນເດຍ - ປາຊີຟິກ ແລະ ແມ່ນບັນດາປະເທດມີທີ່ຕັ້ງສຳຄັນໃນປະຊາຄົມ ອາຊຽນ. ເລື່ອງສອງປະເທດຮັດແໜ້ນສາຍພົວພັນຕ່າງໆຫຼາຍກວ່າອີກ ບໍ່ພຽງແຕ່ຕອບສະໜອງໄດ້ຜົນປະໂຫຍດຂອງສອງປະເທດເທົ່ານັ້ນ ຫາກຍັງປະກອບສ່ວນຢ່າງຕັ້ງໜ້າໃຫ້ແກ່ຄວາມສາມັກຄີ ແລະ ໝັ້ນຄົງເຂັ້ມແຂງຂອງ ອາຊຽນ. ບົນພື້ນຖານສາຍພົວພັນໄມຕີຈິດມິດຕະພາບ, ສາຍພົວພັນລະຫວ່າງ ຫວຽດນາມ - ອິນໂດເນເຊຍ ຈະນັບມື້ນັບພັດທະນາຢ່າງດີງາມກວ່າເກົ່າ, ຕອບສະໜອງໄດ້ຕາມຄວາມຫວັງ ແລະ ຜົນປະໂຫຍດຂອງປະຊາຊົນສອງປະເທດ, ສົມກັບຄໍາເວົ້າຂອງ ປະທານໂຮ່ຈີມິນ ທີ່ມອບໃຫ້ທ່ານປະທານາທິບໍດີ  Soekarno  ເນື່ອງໃນໂອກາດມາຢ້ຽມຢາມຫວຽດນາມ ໃນປີ 1959 ທີ່ວ່າ: “ຕົວໄກກັນແຕ່ໃຈບໍ່ໄກກັນ, ເໝືອນດັ່ງເພື່ອນມິດ, ເໝືອນດັ່ງອ້າຍນ້ອງກັນ”./.