(VOVWORLD) -ພ້ອມກັບບັນດາວິສາຫະກິດຢູ່ພາຍໃນປະເທດ, ມີວິສາຫະກິດຕ່າງປະເທດຫລາຍແຫ່ງຄື ກຸ່ມບໍລິສັດ Charoen Pokphand (CP) ຂອງໄທ ກໍ່ມີການເຄື່ອນໄຫວກຸສົນຫລາຍຢ່າງ. ໃນ 24 ປີແຫ່ງການເນີນທຸລະກິດ ຢູ່ ຫວຽດນາມ ກໍ່ແມ່ນ 24 ປີ ທີ່ CP ໄດ້ເຂົ້າຮ່ວມການເຄື່ອນໄຫວກຸສົນເປັນປະຈຳ. ໃນລາຍການຊາຍຄາອາຊຽນ ພາກນີ້, ເຊີນທ່ານພ້ອມກັບນັກຂ່າວ ກີມເງິນ ຊອກຮູ້ການເຄື່ອນໄຫວກຸສົນຂອງກຸ່ມບໍລິສັດ CP ຢູ່ ຫວຽດນາມ.
 ຄົນເຈັບຮັບເຂົ້າປຽກຈາກພາລະກອນບໍລິສັດ CP |
ເວລາ 11 ໂມງຢູ່ ຮ້ານກິນດື່ມ ຂອງໂຮງໝໍ K ເຕີນຈ່ຽວ (ແມ່ນໂຮງໝໍປິ່ນປົວພະຍາດມະເຮັງ), ເອື້ອຍ ຕົງທິທູຮ່າ ອາຍຸ 36 ປີ ຢູ່ ແຂວງ ຟູທໍ້ ພ້ອມກັບລູກສາວຂອງຕົນ ອາຍຸ 13 ປີ ນຸ່ງຊຸດໂສ້ງເສື້ອຂອງຄົນເຈັບ ມີຄວາມຮູ້ສຶກດີໃຈຫລາຍເມື່ອໄດ້ຮັບເຂົ້າປຽກກຸສົນ ໂດຍບັນດາພາລະກອນບໍລິສັດ Charoen Pokphand ມອບໃຫ້. ເອື້ອຍຮ່າ ເວົ້າດ້ວຍຄວາມຕື້ນຕັນໃຈເວົ້າວ່າ:
“ ຍ້ອນໄດ້ໄປປິ່ນປົວດ້ວຍການສາຍແສງຫລາຍເທື່ອແລ້ວ, ສະນັ້ນ ຫລານພຽງແຕ່ກິນເຂົ້າປຽກໄດ້ເທົ່ານັ້ນ. ເມື່ອຫລານໄດ້ຮັບເຂົ້າປຽກຂອງພວກອາພວກອາວ ເອື້ອຍກໍ່ບໍ່ຕ້ອງເສຍເງິນເພື່ອຊື້ອາຫານຢູ່ນອກອີກ. ຂ້າພະເຈົ້າຂໍຂອບອົກຂອບໃຈການຊ່ວຍເຫລືອອັນລ້ຳຄ່າຂອງບໍລິສັດ.”
ສຳລັບລຸງ ເຢືອງວັນເຮົ້າ ບ້ານເກີດເມືອງນອນ ຢູ່ ຮືງອຽນ ແລ້ວ, ຜ່ານການສາຍແສງມາເປັນເວລາ 6 ເດືອນ ຍ້ອນພະຍາດມະເຮັງໄດ້ເຮັດໃຫ້ຜົມຂອງລຸງຫລົ້ນໝົດ, ສຸຂະພາບຂອງລຸງນັບມື້ນັບອ່ອນເພຍລົງ. ເບິ່ງລຸງຄ້າຍຄືເດັກນ້ອຍຫລາຍກວ່າແມ່ນຜູ້ມີອາຍຸກວ່າ 60 ປີ. ມືລຸງທັງຈັບຖ້ວຍເຂົ້າປຽກກຸສົນທັງເວົ້າດ້ວຍຄວາມຕື້ນຕັນໃຈວ່າ: ຖ້າຫາກບໍ່ໄດ້ຮັບການຊ່ວຍເຫລືອດ້ານກຸສົນ ຂ້າພະເຈົ້າກໍ່ບໍ່ສາມາດຢູ່ປີ່ນປົວຢູ່ໂຮງໝໍນີ້ໄດ້.
ຮອດວັນສຸກປະຈຳອາທິດ, ເດືອນລະ 2 ເທື່ອ, ບັນດາພາກສ່ວນໃນບໍລິສັດ CP ຜັດປ່ຽນກັນຕົ້ມເຂົ້າປຽກໄກ່ປະມານ 500 ຖ້ວຍ ແລະ ຫລວກໄຂ່ປະມານ 1000 ຫນ່ວຍ ເອົາໄປມອບໃຫ້ຄົນເຈັບທີ່ທຸກຍາກຢູ່ ໂຮງໝໍປິ່ນປົວພະຍາດມະເຮັງ ເຕີນຈ່ຽວ, ນີ້ແມ່ນວັດຖຸດິບປອດສານພິດໂດຍບໍລິສັດຜະລິດເອງ. ອ້າຍ ຫວູແອງຕວນ - ຮອງຜູ້ອຳນວຍການໃຫຍ່ ບໍລິສັດ CP ປະຈຳຫວຽດນາມ ໃຫ້ຮູ້ວ່າ:
“ບໍລິສັດຂອງພວກຂ້າພະເຈົ້າກຳນົດວ່າ ເມື່ອບໍລິສັດໄດ້ໄປລົງທຶນບໍ່ວ່າຢູ່ປະເທດໃດ ກໍ່ຕ້ອງນຳມາເຊິ່ງຜົນປະໂຫຍດໃຫ້ປະເທດນັ້ນ, ພິເສດແມ່ນໃຫ້ປະຊາຊົນຢູ່ບັນດາປະເທດຊື່ງບໍລິສັດໄປລົງທຶນ. ນອກຈາກແບ່ງປັນກັບວົງຄະນາຍາດ, ປະກອບສ່ວນກັບວົງຄະນາຍາດແລ້ວ ບໍລິສັດກໍ່ຢາກສ້າງສະຕິໃຫ້ ພະນັກງານ, ກຳມະກອນໃນບໍລິສັດມີຄວາມເຂົ້າໃຈກ່ຽວກັບບັນດາການເຄື່ອນໄຫວສັງຄົມ, ຮູ້ຈັກວິທີແບ່ງປັນກັບວົງຄະນາຍາດ, ມີຄວາມຮັກແພງເຊິ່ງກັນ ແລະກັນ, ເວລານັ້ນ ພະນັກງານ, ກຳມະກອນທັງໝົດຈະມີຈິດໃຈແບ່ງປັນໃນວຽກງານດີກວ່າ.”
ນອກຈາກຖ້ວຍເຂົ້າປຽກກຸສົນແລ້ວ, ບໍລິສັດ ຍັງມີການເຄື່ອນໄຫວກຸສົນອື່ນໆອີກຢູ່ທຸກແຖບຖິ່ນຂອງຫວຽດນາມ. ນັບແຕ່ວັນສ້າງຕັ້ງບໍລິສັດເມື່ອປີ 1993 ມາຮອດປະຈຸບັນ, ບັນດາການເຄື່ອນໄຫວກຸສົນຂອງບໍລິສັດນັບມື້ນັບອຸດົມສົມບູນກວ່າຄື: ມອບແນວພັນໝູ ແລະ ໄຂ່ໄກ່ໃຫ້ທະຫານ ເຈື່ອງຊາ, ຫນູນຊ່ວຍສະມາຄົມແພດໝໍ ຫນຸ່ມຜ່າຕັດຫົວໃຈ ແລະ ສົບແຫວ່ງປາກຫວີກໃຫ້ແກ່ເດັກນ້ອຍ, ຮ່ວມເດີນທາງກັບຂະບວນການເຄື່ອນໄຫວກຸສົນ ແລະ ການເຄື່ອນໄຫວສະແດງຄວາມຮູ້ບຸນຄຸນເນື່ອງໃນໂອກາດວັນທະຫານເສຍອົງຄະ ແລະ ນັກຮົບເສຍສະຫລະຊີວິດເພື່ອຊາດ 27/7.
ບັນດາການເຄື່ອນໄຫວກຸສົນຈາກບໍລິສັດ CP ບໍ່ພຽງແຕ່ຊ່ວຍໃຫ້ຜູ້ດ້ອຍໂອກາດເທົ່ານັ້ນຫາກຍັງສ້າງຄວາມໄວ້ເນື້ອເຊື່ອໃຈໃຫ້ຖັນແຖວພາລະກອນ ຫວຽດນາມ ໃນບໍລິສັດຂອງຕົນອີກດ້ວຍ.
“ຂ້າພະເຈົ້າໄດ້ເຮັດວຽກຢູ່ບໍລິສັດມາເປັນເວລາ 23 ປີແລ້ວ. ໃນຕະຫລອດວິວັດການເຮັດວຽກນັ້ນ ການເຄື່ອນໄຫວກຸສົນຂອງບໍລິສັດແມ່ນສິ່ງທີ່ຂ້າພະເຈົ້າຮູ້ສຶກເອກອ້າງທະນົງໃຈ. ນີ້ແມ່ນກຳລັງຫນູນເພື່ອໃຫ້ຂ້າພະເຈົ້າສະຫນິດຕິດພັນກັບບໍລິສັດ, ສ້າງຈິດໃຈ ແລະ ກຳລັງຫນູນໃຫ້ພະນັກງານລຸ້ນຫລັງ ໂດຍສະເພາະແມ່ນພະນັກງານຫວຽດນາມ ທີ່ເຮັດວຽກໃນບໍລິສັດ”
“ເຮັດວຽກໃນບໍລິສັດຄືແນວນັ້ນ, ຂ້າພະເຈົ້າຮູ້ສຶກວ່າ ຕົນເອງຕ້ອງສູ້ຊົນຫລາຍກວ່າອີກ” ນັ້ນບໍ່ພຽງແຕ່ແມ່ນຄວາມຄິດສະເພາະຂອງ ເອື້ອຍ ຫວູມີງເຊີມ - ແມ່ນທູດແຫ່ງຄວາມເມດຕາປານີ ຂອງ ບໍລິສັດ CP ເທົ່ານັ້ນ ຫາກຍັງມີພາລະກອນຫລາຍຄົນໃນບໍລິສັດອີກດ້ວຍ. ນັ້ນແມ່ນແຫ່ງກຳລັງຫນູນຊ່ວຍໃຫ້ເຂົາເຈົ້າອຸທິດສ່ວນຫລາຍກວ່າຊ່ວຍໃຫ້ບໍລິສັດນັບມື້ນັບເຕີບໃຫຍ່ກວ່າ ຢູ່ ຫວຽດນາມ.