ໂດຍກຳເນີດ ແລະ ເຕີບໃຫຍ່ຢູ່ຕາແສງ ດ້າຍເຕິມ ທີ່ມີມູນເຊື້ອເຮັດກະສິກຳ, ເຊິ່ງເປັນຕາແສງທີ່ມີອັດຕາຊາວເຜົ່າຂະແມກວມເອົາຫຼາຍກວ່າ 85% ປະຊາກອນ. ນັບແຕ່ຄາວຍັງນ້ອຍ, ຍ້ອນຄອບຄົວກໍປະສົບກັບຄວາມຫຍຸ້ງຍາກ, ເພື່ອສາມາດຮຽນໜັງສືໄດ້ ອ້າຍບ່າວ Danh Chanh Da ໄດ້ຍາດເວລາຕອນໜຶ່ງໄປຮຽນ, ສ່ວນຕອນໜຶ່ງຢູ່ເຮືອນຊ່ວຍເຫຼືອວຽກເຮືອນການຊານ, ວຽກໄຮ່ການນາ, ນັບທັງໄປຮັບຈ້າງເພື່ອຫາເງິນຊື້ປື້ມໄປໂຮງຮຽນ. Danh Chanh Da ມີຄວາມຮັກມັກໃນການຮຽນວິຊາວັນນະຄະດີ, ສະນັ້ນ, ນັບແຕ່ຄາວຍັງນ້ອຍ ລາວມີຄວາມຝັນຢາກກາຍເປັນນັກຂ່າວ. ດ້ວຍບັນດາຄວາມມານະພະຍາຍຍາມຂອງຕົນ,  ຄວາມຝັນຂອງ Danh Chanh Da ໄດ້ປະກົດຜົນເປັນຈິງ ເມື່ອໄດ້ເສັງເຂົ້າພາກວິຊາວັນນະຄະດີຂອງມະຫາວິທະຍາໄລວິທະຍາສາດສັງຄົມ ແລະ ມະນຸດສາດ ນະຄອນ ໂຮ່ຈີມິນ. ພາຍຫຼັງຮ່ຳຮຽນມາເປັນເວລາ 4 ປີ, Danh Chanh Da ກໍໄດ້ຮັບໃບປະກາດສະນີຍະບັດ ປະລິນຍາຕີໃນຄວາມປະຕິຊົມຊື່ນ ແລະ ພາກພູມໃຈຂອງທັງຄອບຄົວ ແລະ ຍາດຕິພີ່ນ້ອງ.

   ຫຼັງຈາກທີ່ຮຽນຈົບ ແລະ ໄດ້ຮັບຂ່າວວ່າ ອົງການຜູ້ຕາງໜ້າສຳນັກຂ່າວສານ ຫວຽດນາມ ປະຈຳ ພາກໃຕ້ ພວມຕ້ອງການຮັບສະໝັກນັກຂ່າວ, Danh Chanh Da ໄດ້ກໍຍື່ນເອກະສານເພື່ອເສັງຄັດເລືອກເຂົ້າເຮັດ ແລະ ໄດ້ຮັບເຂົ້າມາເຮັດວຽກເປັນນັກຂ່າວຂອງ ຫ້ອງການຕາງໜ້າສຳນັກຂ່າວສານ ຫວຽດນາມ ປະຈຳ ແຂວງ ຊອັກຈັງ - ບ້ານເກີດເມືອງນອນຂອງ Danh Chanh Da.

Danh Chanh Da ຖ່າຍທຳຢູ່ ເຈິ່ນເດ, ຊອັກຈັງ (ພາບ: TTXVN)

   ໃນຊຸມວັນທຳອິດທີ່ເຂົ້າມາເຮັດວຽກ, ກໍຄືກັນກັບນັກຂ່າວໜຸ່ມຄົນອື່ນໆທີ່ຫາກໍເຮັດວຽກໃໝ່ໆ, Danh Chanh Da ຍັງສັບສົນ ແລະ ຍັງບໍ່ທັນກຳໄດ້ບັນດາໜ້າທີ່ຕົນເອງຕ້ອງເຮັດ. ແຕ່ດ້ວຍຄວາມມານະພະຍາຍາມດ້ວຍຕົນເອງ ພ້ອມທັງໄດ້ຮັບການຊ່ວຍເຫຼືອ ແລະ ການອຳນວຍຄວາມສະດວກຈາກທ່ານຫົວໜ້າຫ້ອງການຕາງໜ້າ ກໍໄດ້ຊ່ວຍໃຫ້ Danh Chanh Da ປັບຕົວເຂົ້າກັບສະພາບແວດລ້ອມ ແລະ ທຳຄວາມລື້ງເລີຍກັບວຽກງານຂອງຕົນໄດ້ຢ່າງວ່ອງໄວ, ເປັນເຈົ້າການໃນການເອົາຂ່າວ, ໄຈ້ແຍກ, ຕີລາຄາ ແລະ ຂຽນຂ່າວ, ບົດ. ພາຍຫຼັງຝຶກຝົນມາເປັນໄລຍະໜຶ່ງ, ປາຍປາກກາຂອງ Danh Chanh Da ນັບມື້ນັບແຫຼມຄົມກວ່າ, ວຽກງານແມ່ນແລ່ນສະດວກ ແລະ ມີປະສິດທິຜົນດີ. Danh Chanh Da ໄດ້ກາຍເປັນໜຶ່ງໃນບັນດາປາຍປາກກາຫຼັກໆຂອງ ຫ້ອງການຕາງໜ້າສຳນັກຂ່າວສານ ຫວຽດນາມ ປະຈຳ ຊອັກຈັງ ແລະ ຍາດໄດ້ຫຼາຍລາງວັນສື່ມວນຊົນໂດຍຫ້ອງການຈັດຂຶ້ນ.

        ພົ້ນເດັ່ນທີ່ສຸດ ແມ່ນປີ 2018, Danh Chanh Da ຍາດໄດ້ລາງວັນ A (ລາງວັນລວມໝູ່) ໃນສາຍຂ່າວການພົວພັນກັບຕ່າງປະເທດ ແລະ ລາງວັນ B ໃນສາຍສື່ມວນຊົນລະດັບຊາດ ດ້ວຍຜົນງານມີຊື່ວ່າ “ເຮົາເສຍສະຫຼະເພື່ອໃຫ້ປະເທດເພື່ອນຟື້ນຟູຄືນໃໝ່.”

        ທ່ານ ເຈິ່ນງອກທ້ຽນ, ຫົວໜ້າຫ້ອງການຕາງໜ້າສຳນັກຂ່າວສານ ຫວຽດນາມ ປະຈຳ ເກີ່ນເທີ, ເລຂາຄະນະພັກ ບັນດາຫ້ອງການຜູ້ຕາງໜ້າສຳນັກຂ່າວສານ ຫວຽດນາມ ປະຈຳ ພາກໃຕ້ແມ່ນ້ຳ ເຮົ້າ ໃຫ້ຮູ້ວ່າ ນັບແຕ່ເມື່ອຮຽນຈົບຈາກມະຫາວິທະຍາໄລມາຮອດປັດຈຸບັນ, ນັກຂ່າວໜຸ່ມຊາວເຜົ່າຂະແມ Danh Chanh Da ຍາມໃດກໍປະຕິບັດໜ້າທີ່ທີ່ໄດ້ຮັບການມອບໝາຍໄດ້ເປັນຢ່າງດີ. ທ່ານກ່າວວ່າ:

        “ນັກຂ່າວໜຸ່ມ Danh Chanh Da ແມ່ນໜຶ່ງໃນຈຳນວນໜ້ອຍນັກຂ່າວຊາວເຜົ່າຂະແມ ທີ່ມີຈັນຍາບັນຄຸນສົມບັດດີ, ປະຕິບັດບັນດາກົດລະບຽບຂອງອົງການຢ່າງຄົບຖ້ວນ, ນັກຂ່າວໜຸ່ມ Danh Chanh Da ແມ່ນສະມາຊິກພັກ ທີ່ຍາມໃດກໍປະຕິບັດໜ້າທີ່ຂອງຕົນໄດ້ເປັນຢ່າງດີ. ພິເສດ, ລາວເຄີຍມີໄລຍະເວລາປະຕິບັດງານຢູ່ ກຳປູເຈຍ ແລະ ຜະລິດໄດ້ຫຼາຍຜົນງານທີ່ມີຄຸນນະພາບ. Danh Chanh Da ກໍແມ່ນນັກຂ່າວທີ່ສາມາດເຮັດໄດ້ທັງສາມຮູບແບບຂ່າວ ຄື ໂທລະພາບ, ຂ່າວບົດ ແລະ ຂ່າວພາບ”.

Danh Chanh Da ປະຕິບັດໜ້າທີ່ຢູ່ຫ້ອງວ່າການລັດຖະບານ ລາຊະອານາຈັກ ກຳປູເຈຍ (ພາບ: TTXVN)

  ພາຍຫຼັງ ເປັນນັກຂ່າວຂອງສຳນັກຂ່າວສານ ຫວຽດນາມ ປະຈຳ ແຂວງ ຊອກຈັງ ມາເປັນເວລາ 6 ປີ, ໂດຍສະສົມ ແລະ ເກັບກຳໄດ້ຫຼາຍປະສົບການ, ການນຳສຳນັກຂ່າວສານ ຫວຽດນາມ ມີຄວາມເຊື່ອໝັ້ນ ແລະ ສົ່ງໄປປະຕິບັດງານຢູ່ ຫ້ອງການຕາງໜ້າສຳນັກຂ່າວສານ ຫວຽດນາມ ປະຈຳ ພະນົມເປັນ, ລາຊະອານາຈັກ ກຳປູເຈຍ ໃນໄລຍະ 3 ປີ. ນີ້ກໍແມ່ນຈຸດເວລາທີ່ ປະເທດ ກຳປູເຈຍ ໄດ້ດຳເນີນຫຼາຍເຫດການໃຫຍ່ຄື ການເລືອກຕັ້ງສະພາແຫ່ງຊາດ, ການເລືອກຕັ້ງສະພາປະຊາຊົນຕາແສງ, ເທດສະບານເມືອງ ພ້ອມດ້ວຍບັນດາກອງປະຊຸມ, ສຳມະນາ ທີ່ມີລະດັບພາກພື້ນ ແລະ ສາກົນ… ບັນດານັກຂ່າວສັງກັດ ຫ້ອງການຕາງໜ້າສຳນັກຂ່າວສານ ຫວຽດນາມ ປະຈຳ ພະນົມເປັນ ໄດ້ໄຈ້ແຍກ, ຕີລາຄາ, ສັງເກດ ແລະ ສ່ອງແສງກ່ຽວກັບບັນດາເຫດການສຳຄັນດັ່ງກ່າວເຖິງຜູ້ອ່ານພາຍໃນປະເທດໄດ້ຢ່າງທັນການ. ການຢ້ຽມຢາມຄັ້ງຕ່າງໆຂອງການນຳພັກ, ລັດ, ລັດຖະບານ, ສະພາແຫ່ງຊາດ ຫວຽດນາມ, ການເຄື່ອນໄຫວຕ່າງໆຂອງບັນດາກະຊວງ, ຂະແໜງການຂອງສະຖານທູດ ຫວຽດນາມ ປະຈຳ ກຳປູເຈຍ ກໍໄດ້ສ່ອງແສງຢ່າງທັນການ, ປະກອບສ່ວນຢ່າງແທດຈິງເຂົ້າໃນການເພີ່ມພູນຄູນສ້າງ ແລະ ພັດທະນາໄມຕີຈິດມິດຕະພາບ, ຄວາມສາມັກຄີ, ການຮ່ວມມື ລະຫວ່າງ ຫວຽດນາມ ແລະ ກຳປູເຈຍ ໃຫ້ຍືນຍົງ.

        ຍ້ອນບັນລຸໄດ້ຜົນງານຫຼາຍຢ່າງໃນວຽກງານຂອງຕົນ ສະນັ້ນ, ເມື່ອປະຕິບັດສຳເລັດໜ້າທີ່ຢູ່ ກຳປູເຈຍ, Danh Chanh Da ໄດ້ຮັບຫຼຽນໄຊຮ່ວມມືມິດຕະພາບ ໂດຍທ່ານນາຍົກລັດຖະມົນຕີ ກຳປູເຈຍ Samdech Techo Hunsen ມອບໃຫ້ ເນື່ອງໃນໂອກາດສະເຫຼີມສະຫຼອງ 50 ປີ ແຫ່ງວັນສ້າງຕັ້ງການພົວພັນທາງການທູດ ລະຫວ່າງ ຫວຽດນາມ - ກຳປູເຈຍ (24/6/1967 – 24/6/2017).

        ສິ້ນສຸດອາຍຸການປະຕິບັດງານຢູ່ ກຳປູເຈຍ, ນັກຂ່າວ Danh Chanh Da ໄດ້ກັບມາເຮັດວຽກຕໍ່ຢູ່ ຊອັກຈັງ ຕື່ມອີກໄລຍະໜຶ່ງ, ຫຼັງຈາກນັ້ນ ກໍໄດ້ສົ່ງໄປປະຈຳການຢູ່ ບາກລຽວ. Danh Chanh Da ໃຫ້ຮູ້ວ່າ ນີ້ແມ່ນຄວາມເປັນກຽດ ແລະ ກໍແມ່ນໜ້າທີ່ຄວາມຮັບຜິດຊອບທີ່ສູງສົ່ງ, ຈາກນັ້ນ ລາວຈະພະຍາຍາມຫຼາຍກວ່າອີກ ເພື່ອປະຕິບັດໜ້າທີ່ທີ່ຕົນໄດ້ຮັບມອບໝາຍໃຫ້ເປັນຢ່າງດີ.

        “ຂ້າພະເຈົ້າຄິດວ່າ ສຳລັບນັກຂ່າວຄົນໜຶ່ງ ເຮົາຕ້ອງປະຕິບັດໜ້າທີ່ທີ່ໄດ້ມອບໝາຍເປັນຢ່າງດີ. ພິເສດ, ສຳລັບນັກຂ່າວໜຸ່ມຄືຂ້າພະເຈົ້າ ຕ້ອງຮຽນຮູ້ຫຼາຍສິ່ງຫຼາຍຢ່າງກວ່າອີກ ເພື່ອຍົກສູງລະດັບວິຊາຊີບຂອງຕົນ. ຂ້າພະເຈົ້າຈະພະຍາຍາມເຮັດວຽກ ເພື່ອປະຕິບັດສຳເລັດໜ້າທີ່ໃໝ່. ເພາະຂ້າພະເຈົ້າຄິດວ່າ ຜົນສຳເລັດທີ່ຂ້າພະເຈົ້າບັນລຸໄດ້ໃນໄລຍະຜ່ານມາກໍຍ້ອນມີຄວາມມານະພະຍາຍາມ”.

        ໂດຍຫາກໍມີອາຍຸ 34 ປີ, ແຕ່ນັກຂ່າວ Danh Chanh Da ໄດ້ຮັບຫຼາຍໜ້າທີ່ ແລະ ວຽກງານທີ່ສຳຄັນທັງຢູ່ພາຍໃນ ແລະ ຕ່າງປະເທດ. ເຖິງວ່າຈະຢູ່ໃນໜ້າທີ່ໃດກໍຕາມ, ອ້າຍກໍລ້ວນແຕ່ປະຕິບັດສຳເລັດໜ້າທີ່ທີ່ໄດ້ຮັບການມອບໝາຍໄດ້ເປັນຢ່າງດີ. ບໍ່ພຽງແຕ່ເທົ່ານັ້ນ, ຍາມໃດລາວກໍໄດ້ຮັບຄວາມຮັກແພງຈາກເພື່ອນຮ່ວມງານ ແລະ ມິດສະຫາຍ, ພ້ອມທີ່ຈະໃຫ້ການຊ່ວຍເຫຼືອແກ່ນັກຂ່າວເຂົ້າມາໃໝ່ ເພື່ອພ້ອມກັນພັດທະນາອີກດ້ວຍ../.