(VOVWORLD) -ຄວາມຢຶດໝັ້ນອົດທົນ, ມານະພະຍາຍາມ ແມ່ນສິ່ງສຳຄັນທີ່ສຸດສຳລັບຜົນສຳເລັດຂອງແຕ່ລະຄົນ. ເພື່ອນ Keut Vannet - ນັກສຶກສາ ຫ້ອງ 58 NQL - ຂະແໜງເຕັກນິກຊັບພະຍາກອນນ້ຳຂອງມະຫາວິທະຍາໄລຊົນລະປະທານ ແມ່ນໜຶ່ງໃນບັນດາແບບຢ່າງບືນຕົວຂຶ້ນຜ່ານຄວາມຫຍຸ້ງຍາກ ດ້ວຍການຮຽນເກັ່ງ ເພື່ອສາມາດຮຽນຈົບໄວກວ່າໝູ່ໜຶ່ງພາກຮຽນ. ມານະຈິດທີ່ເຂັ້ມແຂງແຮງກ້າຂອງທ້າວ ໄດ້ກາຍເປັນຄວາມປະທັບໃຈສຳລັບນັກສຶກສາຢູ່ພາຍໃນ ແລະ ຢູ່ນອກໂຮງຮຽນ.
 Keut Vannet |
Keut Vannet ກຳເນີດ ແລະ ເຕີບໃຫຍ່ຢູ່ແຂວງ Kandal ຂອງ ກຳປູເຈຍ ແມ່ນໜຶ່ງໃນຈຳນວນນັກສຶກສານັບຮ້ອຍຄົນທີ່ພວມຮ່ຳຮຽນຢູ່ ມະຫາວິທະຍາໄລຊົນລະປະທານ ດ້ວຍຄວາມຝັນຢາກກາຍເປັນນັກວິສະວະກອນຊັບພະຍາກອນນ້ຳ ເພື່ອສ້າງຄວາມຮັ່ງມີແກ່ສັງຄົມ, ຄອບຄົວ ແລະ ບ້ານເກີດເມືອງນອນ, ປະເທດຊາດຂອງຕົນ. ດ້ວຍຄວາມມານະພະຍາຍາມຮ່ຳຮຽນ, ປີ 2016 Keaut Vannet ໄດ້ລົງທະບຽນເຂົ້າຮຽນຢູ່ຂະແໜງເຕັກນິກຊັບພະຍາກອນນ້ຳ ມະຫາວິທະຍາໄລຊົນລະປະທານຢ່າງເປັນທາງການ, ສືບຕໍ່ເດີນຕາມຄວາມເມົາມົວ, ຄວາມຝັນຂອງຕົນ. ເມື່ອຖາມກ່ຽວກັບເຫດຜົນທີ່ເລືອກຮຽນຂະແໜງດັ່ງກ່າວ, Keut Vannet ແບ່ງປັນວ່າ:
“ຂ້າພະເຈົ້າກຳເນີດ ແລະ ເຕີບໃຫຍ່ໃນຄອບຄົວທີ່ມີອ້າຍນ້ອງທັງໝົດຫ້າຄົນ, ພໍ່ແມ່ຂ້າພະເຈົ້າກໍເຮັດກະສິກຳ ແລະ ຍາມໃດກໍຕ້ອງເອື່ອຍອີງໃສ່ເງື່ອນໄຂທຳມະຊາດ, ສະນັ້ນ, ຂ້າພະເຈົ້າເຂົ້າໃຈໄດ້ລັກສະນະສະເພາະຂອງການເຮັດກະສິກຳວ່າແມ່ນລຳບາກແນວໃດ. ສະນັ້ນ, ຂ້າພະເຈົ້າຍາມໃດກໍມີຄວາມຝັນຢາກເຮັດແນວໃດເພື່ອສາມາດນຳໃຊ້ແຫຼ່ງນ້ຳຫົດຜົນລະປູກຢູ່ປະເທດຂອງຕົນໃຫ້ດີທີ່ສຸດ ເພື່ອພັດທະນາກະສິກຳແບບຍືນຍົງ ແລະ ມີປະສິດທິຜົນ, ຫຼຸດຜ່ອນຄວາມລຳບາກຂອງຊາວກະສິກອນ. ຍ້ອນເຫດນັ້ນ, ຂ້າພະເຈົ້າຈຶ່ງລົງທະບຽນມາຮຽນຢູ່ມະຫາວິທະຍາໄລຊົນລະປະທານ”.
ຍ້ອນຄວາມໄຝ່ຝັນທີ່ສວຍງາມນັ້ນ ໄດ້ເຮັດໃຫ້ Vannet ມີມານະຈິດຜ່ານຜ່າຄວາມຫຍຸ້ງຍາກເພື່ອຮ່ຳຮຽນໃຫ້ດີໃນຊຸມປີທີ່ສຶກສາຢູ່ຫວຽດນາມ. ເມື່ອແບ່ງປັນກ່ຽວກັບປະສົບການ ແລະ ຜົນການຮຽນ, Vannet ໃຫ້ຮູ້ວ່າ:
“ສຳລັບຂ້າພະເຈົ້າແລ້ວ, ເພື່ອຮຽນໃຫ້ດີນັ້ນ ການຕັ້ງເປົ້າໝາຍແມ່ນສຳຄັນທີ່ສຸດ, ມັນຊ່ວຍໃຫ້ເຮົາມີທິດທາງສູ້ຊົນຢ່າງຈະແຈ້ງກວ່າ. ຂ້າພະເຈົ້າຍາມໃດກໍກຳນົດວ່າ ວິທີຮຽນດ້ວຍຕົນເອງແມ່ນປັດໄຈຕັດສິນຜົນສຳເລັດໃນການຮ່ຳຮຽນ. ເຖິງວ່າຮຽນຢູ່ໃນຫ້ອງຫຼືວ່າຢູ່ເຮືອນ, ຂ້າພະເຈົ້າລ້ວນແຕ່ຈົດຈໍ່ ແລະ ຕັ້ງໃຈຮຽນເພື່ອຫາວິທີສຳຜັດສະເພາະກັບແຫຼ່ງຄວາມຮູ້ນັ້ນໃຫ້ມີປະສິດທິຜົນ. ນອກຈາກນັ້ນ, ຂ້າພະເຈົ້າຍາມໃດກໍ່ເຂົ້າຮຽນຄົບທຸກຊົ່ວໂມງຮຽນ, ຕັ້ງໃຈຟັງອາຈານອະທິບາຍ, ອັນໃດທີ່ບໍ່ເຂົ້າໃຈ, ຂ້າພະເຈົ້າກໍຖາມອາຈານເລີຍ, ກັບເມືອເຮືອນກໍເຮັດວຽກບ້ານຢ່າງຄົບຖ້ວນ, ຄົ້ນຄວ້າເອກະສານ, ປື້ມ, ໜັງສືພິມເພີ່ມເຕີມເພື່ອມີຄວາມເຂົ້າໃຈຢ່າງເຖິງຖອງກວ່າ. ຖ້າຫາກວ່າ ນັກສຶກສາ ຫວຽດນາມ ຕ້ອງໃຊ້ເວລາພຽງແຕ່ 1 - 2 ຊົ່ວໂມງເພື່ອທວນຄືນບົດຮຽນ ແມ່ນສາມາດເຂົ້າໃຈໄດ້ທາດແທ້ຂອງບັນຫາ, ແຕ່ສຳລັບຂ້າພະເຈົ້າແລ້ວ ຕ້ອງໃຊ້ເວລາເພີ່ມຂຶ້ນທົບສອງເທົ່າ, ສາມເທົ່າ”.
ດ້ວຍມານະຈິດນັ້ນ, ທ້າວໄດ້ສິ້ນສຸດຫຼັກສູດການຮຽນຂອງຕົນດ້ວຍສິ່ງທີ່ພິເສດ ເຊິ່ງນັກສຶກສາຄົນຫວຽດນາມຫຼາຍຄົນກໍຍາກທີ່ຈະເຮັດໄດ້. Vannet ຮຽນຈົບດ້ວຍປະເພດດີ (ຄະແນນສະເລ່ຍສະສົມແມ່ນ 3.16/4 ຄະແນນ), ໃນນັ້ນ ມີຫຼາຍພາກຮຽນ, ອ້າຍບ່າວຄົນນີ້ໄດ້ຮັບທຶນສົ່ງເສີມການສຶກສາປະເພດເກັ່ງ ພ້ອມດ້ວຍບົດປ້ອງກັນຈົບຊັ້ນບັນລຸ 9,1 ຄະແນນ (ຄະແນນ A). ຮຽນພາສາ ຫວຽດ ກໍຍາກຢູ່ແລ້ວ, ແຕ່ Vannet ຍັງບັນລຸຜົນງານບຸກທະລຸ, ຮຽນຈົບໄວກວ່າໝູ່ຄົນ ຫວຽດນາມ ທີ່ຮຽນລຸ້ນດຽວກັນ ໜຶ່ງພາກຮຽນ. ອາຈານ ເລແທງຖຸຍ -ເຊິ່ງເປັນອາຈານຜູ້ນຳພາການຂຽນບົດຈົບຊັ້ນຂອງ Vannet ໃຫ້ຮູ້ວ່າ:
“ໄລຍະຂຽນບົດຈົບຊັ້ນຂອງ Vannet ກໍແມ່ນໄລຍະທີ່ໂລກລະບາດໂຄວິດ - 19 ມີການຜັນແປຢ່າງສັບສົນທັງຢູ່ ຫວຽດນາມ ແລະ ກຳປູເຈຍ. ເວລາສ່ວນຫຼາຍໃນການຂຽນບົດຈົບຊັ້ນຂອງ Vannet ແມ່ນຢູ່ ກຳປູເຈຍ ດ້ວຍການແນະນຳແບບທາງໄກຈາກຄູອາຈານ ຢູ່ ຫວຽດນາມ. ເພື່ອສາມາດຂຽນສຳເລັດ ແລະ ໄດ້ຂຶ້ນປ້ອງກັນບົດຈົບຊັ້ນໃນທ່າມກາງໄລຍະໂລກລະບາດນັ້ນ, Vannet ກໍຕ້ອງປະຕິບັດການແຍກຕົວເປັນເວລາຫຼາຍວັນຕາມຂໍ້ກຳນົດຂອງກະຊວງສາທາລະນະສຸກ ແລະ Vannet ມາກ່ອນມື້ປ້ອງກັນບົດໄດ້ພຽງໜຶ່ງວັນ ແຕ່ Vannet ກໍໄດ້ເຮັດໃຫ້ທັງສະພາປ້ອງກັນບົດມີຄວາມປະຫຼາດໃຈ ຍ້ອນການໃຊ້ພາສາ ຫວຽດ ຢ່າງລຽນໄຫຼ ແລະ ມີໄຫວພິບ ກໍຄືປະຕິກິລິຍາຕອບຮັບຂອງ ລາວ ຕໍ່ຄຳຖາມຕ່າງໆຂອງສະພາໄດ້ຕັ້ງຂຶ້ນມາ ແມ່ນດີກວ່າເພື່ອນຄົນຫວຽດຫຼາຍເທົ່າ”.
ເພື່ອບັນລຸໄດ້ຜົນງານນັ້ນ, ນອກຈາກຄວາມຢຶດໝັ້ນອົດທົນ ແລະ ເຈດຈຳນົງອັນແຮງກ້າແລ້ວ, Vannet ກໍໃຫ້ຮູ້ວ່າ ລາວກໍມີຄວາມສະດວກຫຼາຍຢ່າງ ເມື່ອໄດ້ຮັບຄວາມເອົາໃຈໃສ່ຊ່ວຍເຫຼືອ ກໍຄືການອຳນວຍຄວາມສະດວກຈາກໂຮງຮຽນ ແລະ ໝູ່ເພື່ອນຄົນ ຫວຽດ. ພາຍຫຼັງໄດ້ຮັບໃບປະກາດຊະນີຍະບັດວິສະວະກອນ ຢູ່ມະຫາວິທະຍາໄລຊົນລະປະທານ, Vannet ໄດ້ກັບຄືນເມືອປະເທດ ແລະ ປັດຈຸບັນ, ລາວກຳລັງເຮັດວຽກຢູ່ ບໍລິສັດ CAIC Cambodia Airport Investment Co. ແຕ່ Vannet ເປີດເຜີຍວ່າ “ຂ້າພະເຈົ້າຈະກັບໄປ ຫວຽດນາມ ເພື່ອຮຽນຕໍ່, ແນ່ນອນວ່າ ຂ້າພະເຈົ້າຈະໄດ້ພົບຄູອາຈານ ແລະ ໝູ່ເພືື່ອນອີກ”.