(vovworld)- ຫວຽດນາມ ແລະ ລາວ ແມ່ນສອງປະເທດບ້ານໃກ້ເຮືອນຄຽງ ມີການພົວພັນສະຫນິດຕິດພັນນຳກັນມາແຕ່ດົນນານ. ໃນປະຫວັດສາດແຫ່ງການຕໍ່ຍູ້ຍາດເອົາເອກະລາດ, ເສລີພາບຂອງແຕ່ລະປະເທດ, ສາຍພົວພັນນີ້ຍິ່ງພິເສດກວ່າ ເມື່ອ ສອງພັກ ແລະ ສອງລັດຍາມໃດກໍຖືວ່າ ແມ່ນສາຍພົວພັນຍຸດທະສາດທີ່ມີລັກສະນະເປັນຕາຍຂອງແຕ່ລະປະເທດ. ພິເສດ ນັບແຕ່ເມື່ອປີ 1977, ສອງລັດ ໄດ້ລົງນາມໃນສົນທິສັນຍາມິດຕະພາບ ແລະ ການຮ່ວມມື. ໃນນັ້ນ ການຮ່ວມມືວັດທະນະທຳ ການສຶກສາ ບຳລຸງສ້າງ ໄດ້ຮັບຖືວ່າແມ່ນຂົງເຂດຮ່ວມມືພື້ນຖານ ແລະ ເປັນຈຸດສຸມຂອງສາຍພົວພັນຮ່ວມມືຮອບດ້ານລະຫວ່າງສອງປະເທດ.
ທ່ານສົມພອນ ສີຈະເລີນ, ເອກອັກຄະລັດຖະທູດລາວ
ປະຈຳຫວຽດນາມມອບໃບຍ້ອງຍໍໃຫ້ແກ່ນັກສຶກສາລາວ
ພາບ:vov
|
ເພື່ອພັດທະນາ ແລະ ຍົກສູງຄຸນນະພາບແຫລ່ງຊັບພະຍາກອນມະນຸດ, ແຕ່ຊຸມປີ 90 ຂອງສັດຕະວັດທີ 20, ໃນການກຳນົດທິດຮ່ວມມືຂອງກະຊວງສຶກສາ ແລະ ບຳລຸງສ້າງ, ສອງປະເທດໄດ້ມີແຜນນະໂຍບາຍ ບຳລຸງສາງນັກສຶກສາລາວຂັ້ນມະຫາວິທະຍາໄລ, ເພີ່ມຈຳນວນຜູ້ມາຮຽນປະລິຍາໂທ ແລະ ປະລິຍາເອກ, ເອົາໃຈໃສ່ເຖິງບັນດາຂະແຫນງປາຍແຫລມຄື: ເສດຖະກິດ, ວິທະຍາສາດ, ເຕັກນິກ. ດ້ວຍທັດສະນະນັ້ນ, ໃນວິວັດການສ້າງການພົວພັນຮ່ວມມືເວົ້າລວມ, ໃນໄລຍະ 20 ປີຜ່ານມາເວົ້າສະເພາະ, ຫວຽດນາມ ໄດ້ສະຫງວນແຫລ່ງງົບປະມານໃຫ້ແກ່ ລາວ ບໍ່ຫນ້ອຍ ແລະ ຫນູນຊ່ວຍດ້ານການສຶກສາບຳລຸງສ້າງຢ່າງຮອບດ້ານ. ຝ່າຍລາວ ໄດ້ສົ່ງນັກສຶກສາ, ພະນັກງານ, ນັກຄົ້ນຄ້ວາ ນັບໝື່ນໆຄົນ ມາຮ່ຳຮຽນ, ຄົ້ນຄ້ວາຢູ່ຫວຽດນາມ. ທ່ານນາງ ຫງວຽນທິແທງມີງ, ຮອງຫົວຫນ້າກົມບຳລຸງສ້າງກັບຕ່າງປະເທດ ໃຫ້ຮູ້ວ່າ:
“ໃນຊຸມປີຜ່ານມາ, ກົມບຳລຸງສ້າງກັບຕ່າງປະເທດ, ສັງກັດກະຊວງສຶກສາ ແລະ ບຳລຸງສ້າງຫວຽດນາມ ໄດ້ຮັບຫນ້າທີ່ຄຸ້ມຄອງ ແລະ ບຳລຸງສ້າງນັກສຶກສາຕ່າງປະເທດມາຮ່ຳຮຽນຢູ່ຫວຽດນາມ, ໃນນັ້ນສ່ວນຫລາຍແມ່ນນັກສຶກສາລາວ. ໄລ່ຮອດປີ 2014, ຈຳນວນນັກສຶກສາລາວ ມາຮຽນຢູ່ຫວຽດນາມ ເກືອບ 8000 ຄົນ. ໃນການກຳນົດໃຫມ່ ສຳລັບນັກສຶກສາລາວມາຮ່ຳຮຽນຢູ່ຫວຽດນາມ ຈະໄດ້ຍົກເວັ້ນວິຊາປ້ອງກັນຊາດປ້ອງກັນຄວາມສະຫງົບ ແທນທີ່ນັ້ນ ແມ່ນຊົ່ວໂມງຮຽນພາສາຫວຽດ ເພື່ອສາມາດຍົກສູງລະດັບດ້ານພາສາຫວຽດກວ່າອີກ. ເມື່ອມາຮຽນຢູ່ບັນດາມະຫາວິທະຍາໄລຂອງຫວຽດນາມ, ບັນດານັກສຶກສາສືບຕໍ່ໄດ້ຮັບການບຳລຸງສ້າງພາສາຫວຽດ ຕື່ມອີກ ເພື່ອຍົກສູງຄຸນນະພາບ, ປະສິດທິຜົນການຮຽນ.”
ນັກສຶກສາຫວຽດນາມຢູ່ລາວ ແລະ ນັກສຶກສາລາວ ພ້ອມກັນເຂົ້າຮ່ວມລາຍການສະແດງສິລະປະ
ພາບ:vietbao.vn
|
ບົນພື້ນຖານບັນດາຂໍ້ຕົກລົງຂັ້ນສູງຂອງການນຳສອງພັກ, ສອງລັດ, ຫວຽດນາມ ແລະ ລາວ ໄດ້ສ້າງຕັ້ງຄະນະກຳມະການລະຫວ່າງລັດຖະບານ ແລະ ຄະນະກຳມາທິການຮ່ວມມືຢູ່ແຕ່ລະປະເທດ ເພື່ອສຳຫລວດກວດຄືນ, ຕີລາຄາສະພາບການຮ່ວມມືດ້ານວັດທະນະທຳ-ການສຶກສາລະຫວ່າງສອງປະເທດໃນຂອບເຂດຮ່ວມມືສອງຝ່າຍ. ສອງຝ່າຍ ໄດ້ລົງນາມແຜນການຮ່ວມມືໄລຍະກາງ ແລະ ຍາວຄື: ໂຄງການຮ່ວມມືໄລຍະ 1992-1995, 1996-2000, 2001-2005, ຍຸດທະສາດຮ່ວມມືໄລຍະ 2001-2010 ແລະ ການກຳນົດທິດຮອດປີ 2020. ການຮ່ວມມືດ້ານການສຶກສາ- ບຳລຸງສ້າງ ແມ່ນຂົງເຂດຊື່ງສອງພັກ, ສອງລັດ ກຳນົດວ່າ ແມ່ນຫນ້າທີ່ສຳຄັນ, ແມ່ນຂົງເຂດຮ່ວມມືຍຸດທະສາດ ແລະ ຍາມໃດກໍໄດ້ຮັບການບຸລິມະສິດຕົ້ນຕໍ. ຮຈ.ດຣ. ກອງສີ ແສງມະນີ ລັດຖະມົນຕີຊ່ວຍວ່າການກະຊວງສຶກສາທິການ ແລະ ກີລາ ລາວ ໃຫ້ຮູ້ວ່າ:
ສຽງທ່ານກອງສີ
ຕໍ່ຫນ້າຄວາມຮຽກຮ້ອງຕ້ອງການການພັດທະນາຂອງສອງປະເທດໃນໄລຍະໃຫມ່, ເລື່ອງຍົກສູງຄຸນນະພາບ ແລະ ປະສິດທິຜົນການບຳລຸງສ້າງແຫລ່ງຊັບພະຍາກອນມະນຸດສູງໃຫ້ແກ່ ລາວ ແມ່ນຫນ້າທີ່ການເມືອງສຳຄັນ, ມີຄວາມໝາຍຍຸດທະສາດຂອງການຮ່ວມມືດ້ານການສຶກສາ ແລະ ບຳລຸງສ້າງໄລຍະ 2011-2020. ໃນໄລຍະຈະມາເຖິງ, ເພື່ອຍົກສູງຄຸນນະພາບ ແລະ ປະສິດທິຜົນການຮ່ວມມື ຫວຽດນາມ - ລາວ ໃນຂົງເຂດການສຶກສາ ແລະ ພັດທະນາແຫລ່ງຊັບພະຍາກອນມະນຸດ, ກະຊວງສຶກສາ ແລະ ບຳລຸງສ້າງຫວຽດນາມ ພ້ອມກັບກະຊວງສຶກສາ ແລະ ກິລາ ລາວ ຈະສືບຕໍ່ຜັນຂະຫຍາຍບັນດາໂຄງການຮ່ວມມື ກ່ຽວກັບດ້ານການສຶກສາ. ທ່ານ ສົມພອນ ສີຈະເລີນ, ເອກອັກຄະລັດຖະທູດວິສາມັນຜູ້ມີອຳນາດເຕັມແຫ່ງ ສປປ ລາວ ປະຈຳຫວຽດນາມ ໄດ້ເນັ້ນຫນັກວ່າ:
ສຽງທ່ານ ສົມພອນ
ຫວນຄືນໄລຍະປະຫວັດສາດແຫ່ງການຮ່ວມມືລະຫວ່າງຫວຽດນາມ ແລະ ລາວ, ນັບແຕ່ເມື່ອສອງປະເທດສ້າງການພົວພັນທາງການທູດ, ການພົວພັນລະຫວ່າງສອງພັກ, ສອງລັດ ແລະ ປະຊາຊົນສອງປະເທດ ຫວຽດນາມ - ລາວ ຍາມໃດກໍໄດ້ຮັບການຮັກສາ ແລະ ພັດທະນາທັງລວງກວ້າງແລະລວງເລິກ, ບັນລຸໄດ້ຜົນງານຫລາຍຢ່າງໃນດ້ານການສຶກສາບຳລຸງສ້າງ. ບັນດາໝາກຜົນນັ້ນ ໄດ້ປະກອບສ່ວນເພີ່ມພູນຄູນສ້າງຄວາມສາມັກຄີມິດຕະພາບ ລະຫວ່າງສອງປະເທດຫວຽດນາມ ແລະ ລາວໃຫ້ ນັບມື້ນັບພັດທະນາ ແລະ ສະຫນິດຕິດພັນກວ່າອີກ.