(vovworld)- ສານລັດຖະທຳມະນູນ ອິນໂດເນເຊຍ ຫາກໍຍົກເລີກກົດໝາຍວ່າດ້ວຍຊັບພະຍາກອນນ້ຳ ຊື່ງປະກາດໃຊ້ເມື່ອປີ 2004. ນີ້ແມ່ນບາດກ້າວເດີນ ເພື່ອເປີດຊ່ອງທາງໃຫ້ເລື່ອງສ້າງກອບກົດໝາຍເພື່ອພັດທະນາຮູບແບບການຮ່ວມມືພາກລັດ-ເອກະຊົນໃນການຜະລິດ ແລະ ສະຫນອງນ້ຳສະອາດ. ການປ່ຽນແປງນີ້ ເພື່ອແນໃສ່ບັນລຸຈຸດໝາຍເພີ່ມຈຳນວນຄອບຄົວໄດ້ນຳໃຊ້ນ້ຳສະອາດຈາກ 25% ໃຫ້ຂຶ້ນເຖິງ 60% ໃນປີ 2019.
ພາບປະກອບ:baomoi.com
|
ພາຍຫລັງຫລາຍປີທີ່ນຳໃຊ້ນ້ຳບາດານເພື່ອຮັບໃຊ້ຊີວິດປະຈຳວັນ, ອ້າຍ Andi Nirwanto, ດຳລົງຊີວິດຢູ່ນະຄອນ Tangerang ແຂວງ Banten ປະເທດ ອິນໂດເນເຊຍ ໄດ້ຕົກລົງຫັນມານຳໃຊ້ນ້ຳສະອາດ. ເຖິງຢ່າງໃດກໍຕາມ, ໃນໄລຍະຍາວນັບແຕ່ເມື່ອສະເຫນີໄດ້ນຳໃຊ້ນ້ຳສະອາດມາຮອດປະຈຸບັນ, Andi Nirwanto ບໍ່ທັນໄດ້ຮັບການຕອບສະໜອງຈາກບໍລິສັດນຳ້ສະອາດເທື່ອ. ເລື່ອງລາວຂອງ ອ້າຍ Andi Nirwanto ແມ່ນຫນຶ່ງໃນບັນດາຕົວຢ່າງກ່ຽວກັບການບໍລິການສະຫນອງນ້ຳສະອາດຢ່າງຊັກຊ້າ ແລະ ຂາດລັກສະນະວິຊາການຂອງບັນດາບໍລິສັດນ້ຳສະອາດຂອງລັດ.
ເພາະສະນັ້ນ ຫວ່າງແລ້ວນີ້ ສານລັດຖະທຳມະນູນ ອິນໂດເນເຊຍ ໄດ້ຍົກເລິກ ກົດໝາຍວ່າດ້ວຍຊັບພະຍາກອນນ້ຳທີ່ປະກາດໃຊ້ເມື່ອປີ 2004. ຕາມບັນດາເອກະສານທີ່ປະກາດໃຊ້ຫວ່າງແລ້ວນີ້ແທນທີ່ກົດໝາຍເກົ່າ, ເລື່ອງນຳໃຊ້ນ້ຳສະອາດໄດ້ຮັບຖືວ່າແມ່ນສິດພື້ນຖານຂອງມະນຸດ. ເພາະສະນັ້ນ ປະຈຸບັນ ລັດຖະບານ ອິນໂດເນເຊຍ ພວມພິຈາລະນາ ແລະ ຍູ້ແຮງຮູບແບບການຮ່ວມມືພາກລັດ - ເອກະຊົນໃນການຜະລິດ ແລະ ສະຫນອງນ້ຳສະອາດ ເພື່ອບັນລຸຈຸດໝາຍເພີ່ມຈຳນວນຄອບຄົວໄດ້ນຳໃຊ້ນ້ຳສະອາດແຕ່ 25% ຂຶ້ນເຖິງ 60% ໃນປີ 2019.
ມີບໍລິສັດຫນຶ່ງໄດ້ປະສົບຜົນສຳເລັດໃນການໝູນໃຊ້ຮູບແບບດັ່ງກ່າວ, ນັ້ນແມ່ນບໍລິສັດ Aetra Air Tangerang. ແຕ່ລະວິນາທີ ມີນ້ຳ 900 ລິດທີ່ສູບມາຈາກແມ່ນ້ຳ Cisadane ແລະ ຖືກກັ່ນຕອງຢູ່ໂຮງຈັກ Aetra Air Tangerang. ປະຈຸບັນ ບໍລິສັດນີ້ ໄດ້ສະຫນອງນ້ຳສະອາດໃຫ້ 72.000 ຄອບຄົວ ແລະ 560 ໂຮງງານ. ທ່ານ Ungtung Suruadi, ຜູ້ອຳນວຍການໃຫຍ່ບໍລິສັດ Aetra Air Tangerang ໃຫ້ຮູ້ວ່າ:
“ການພົວພັນຮ່ວມມືຂອງບໍລິສັດ ແມ່ນການຮ່ວມມືລະຫວ່າງລັດຖະບານ ແລະ ວິສາຫະກິດພາກເອກະຊົນ. ວິສາຫະກິດພ້ອມແລ້ວທີ່ຈະເຂົ້າຮ່ວມວຽກງານກ່ຽວຂ້ອງເຖິງບໍລິການສາທາລະນະໃຫ້ໄດ້ເຄິ່ງໜຶ່ງ.”
ເພື່ອຮັບປະກັນໃຫ້ປະຊາຊົນ ອິນໂດເນເຊຍ ໄດ້ນຳໃຊ້ນ້ຳສະອາດ, ຄຽງຄູ່ກັບການກຽມພ້ອມຂອງບັນດາວິສາຫະກິດພາກເອກະຊົນແລ້ວ, ບົດບາດຂອງລັດຖະບານກໍສຳຄັນທີ່ສຸດ. ທ່ານ Tamin Zakaria Amin, ຫົວຫນ້າກົມພັດທະນາລະບົບສະຫນອງນ້ຳສະອາດຂອງ ອິນໂດເນເຊຍ ເນັ້ນຫນັກວ່າ: ວຽກງານນີ້ຄວນມີການຫນູນຊ່ວຍຢ່າງຕັ້ງຫນ້າຈາກການນຳບັນດາເມືອງ, ເຂດ.
“ສິ່ງສຳຄັນນັ້ນແມ່ນຕ້ອງມີການສະຫນັບສະຫນູນຈາກການນຳບັນດາທ້ອງຖິ່ນ. ໃນຂະນະທີ່ບັນດາລັດວິສາຫະກິດມີຫລາຍກາລະໂອກາດດຳເນີນທຸລະກິດ, ແຕ່ເຂົາເຈົ້າພັດບໍ່ປະຕິບັດ, ກົງກັນຂ້າມ ບັນດາບໍລິສັດສະຫນອງນ້ຳສະອາດພາກເອກະຊົນພັດຖືນີ້ແມ່ນກາລະໂອກາດຳເນີນທຸລະກິດທີ່ດູດດື່ມ.”
ພາຍຫລັງ ສານລັດຖະທຳມະນູນ ອິນໂດເນເຊຍ ຍົກເລີກກົດໝາຍວ່າດ້ວຍຊັບພະຍາກອນນ້ຳດັ່ງກ່າວ, ກະຊວງໂຍທາທິການ ແລະ ເຮືອນຢູ່ ອິນໂດເນເຊຍ ຈະປະກາດໃຊ້ມະຕິສະບັບໃຫມ່ກ່ຽວກັບການດຳເນີນທຸລະກິດນ້ຳສະອາດໃນເດືອນ 5 ນີ້. ປະຈຸບັນ ມີວິສາຫະກິດພາກເອກະຊົນຫລາຍແຫ່ງທີ່ເຄື່ອນໄຫວໃນຂະແຫນງດຳເນີນທຸລະກິດນ້ຳສະອາດພວມລໍຖ້າບັນດາກາລະໂອກາດນີ້.