(vovworld)- ຄວາມເປັນເອກະລັກສະເພາະ, ປະທັບໃຈ, ດູດດື່ມ, ນັ້ນແມ່ນ ຄວາມຮູ້ສຶກຂອງຜູ້ຊົມທັງໝົດທີ່ມີຫນ້າຢູ່ງານລາຕີພົວພັນແລກປ່ຽນສິລະປະ ອິນໂດເນເຊຍ -ຫວຽດນາມ ຊື່ງດຳເນີນໃນຕອນຄ່ຳວັນທີ 2/12 ຜ່ານມາຢູ່ ຮ່າໂນ້ຍ. ເຫດການນີ້ ໄດ້ປະກອບສ່ວນໂຄສະນາບັນດາຈຸດພິເສດສະເພາະຂອງພື້ນຖານວັດທະນະທຳຫລາຍເຜົ່າພັນຂອງສອງປະເທດ, ພ້ອມທັງຍູ້ແຮງການພົວພັນແລກປ່ຽນ ແລະ ຄວາມເຂົ້າອົກເຂົ້າໃຈເຊິ່ງກັນ ແລະກັນ ລະຫວ່າງປະຊາຊົນຫວຽດນາມ ແລະ ອິນໂດເນເຊຍ.
ຢູ່ຫໍປະຊຸມວິທະຍາໄລການຟ້ອນ ຮ່າໂນ້ຍ ດ້ວຍເນື້ອທີ 250 ຕາລາງແມັດ, ເປີດສາກງານລາຕີພົວພັນແລກປ່ຽນວັດທະນະທຳ - ສິລະປະ ອິນໂດເນເຊຍ -ຫວຽດນາມ ແມ່ນລາຍການສະແດງຂອງນັກສິລະປິນ Trie Aprina Safitri ພ້ອມກັບວົງດົນຕີພື້ນເມືອງມາຈາກ ອິນໂດເນເຊຍ. ສອງບົດເພງທຳອິດເປີດສາກລາຍການ ນັ້ນແມ່ນເພງ: Kalangkang ແລະ Tibelat ໄດ້ສະແດງດ້ວຍສຽງດົນຕີພື້ນເມືອງຄື: Kecapi, Suling ແມ່ນເວົ້າເຖິງຄວາມຮັກຂອງນາງສາວຜູ້ຫນຶ່ງ.
ລາຍການ ຟ້ອນMaung Lugay(ອິນໂດເນເຊຍ)
ພາບ:vov
|
ງານລາຕີຍິ່ງຟົດຟື້ນກວ່າດ້ວຍລາຍການຟ້ອນ Maung Lugay ທີ່ເປັນເອກະລັກສະເພາະຂອງຊົນເຜົ່າ Sunda ຢູ່ Bandung ໂດຍນັກຟ້ອນ Hardyanti Pratiwi ແລະ Agus Badeng ສະແດງ. ໃນຊຸດອາພອນພື້ນເມືອງຂອງຊົນເຜົ່າ Sunda, ນັກຟ້ອນ 2 ຄົນໄດ້ສະແດງວາດຟ້ອນ Maung Lugay ຈຶກຈັກຫ້າວຫັນ ເຂົ້າກັບຈັງຫວະທີ່ສ້າງຄວາມທັບໃຈທີ່ສຸດ. ເນື້ອໃນຂອງວາດຟ້ອນນີ້ແມ່ນເວົ້າເຖິງຊີວິດ, ວັດທະນະທຳ, ຮີດຄອງປະເພນີຂອງປູ່ຍ່າຕາຍາຍຊົນເຜົ່າ Sunda. ທ່ານ Yoyon Darsono, ນັກເສບດົນຕີຂອງກອງສິລະປະກອນ ອິນໂດເນເຊຍ ໃຫ້ຮູ້ວ່າ:
“Maung Lugay ແມ່ນຖືເອົາຮູບໂຕເສືອ ພວມບືນຂຶ້ນ, ສະນັ້ນ ບັນດາທ່າຟ້ອນນີ້ແມ່ນຈຶກຈັກຫ້າວຫັນວ່ອງໄວ ແລະ ເຕັມໄປດ້ວຍພະລັງຊີວິດ. .ບັນດາວາດຟ້ອນນັ້ນ ໄດ້ສ້າງຄວາມໄວ້ເນື້ອເຊື່ອໃຈ ແລະ ຄວາມເກັ່ງກ້າສາມາດເພື່ອປົກປ້ອງຄວາມຖືກຕ້ອງ. ວາດຟ້ອນນີ້ກໍສະແດງໃຫ້ເຫັນຄວາມປິຕິຊົມຊື່ນ ຍ້ອນວ່າ ມັນແມ່ນຮູບພາບແຫ່ງການຕໍ່ສູ້ເພື່ອບັນດາຄຸນຄ່າຂອງຊີວິດມະນຸດ.”
ດ້ວຍຈຸດປະສົງພົວພັນແລກປ່ຽນວັດທະນະທຳ, ບັນດານັກສຶກສາຮຽນປີສຸດທ້າຍຢູ່ວິທະຍາໄລການຟ້ອນ ຫວຽດນາມ ກໍນຳມາເຊິ່ງສິ່ງທີ່ສ້າງຄວາມປະທັບໃຈອັນເລິກເຊິ່ງໃຫ້ແກ່ຜູ້ຊົມເວົ້າລວມ ແລະ ເພື່ອນມິດມາຈາກ ອິນໂດເນເຊຍ ເວົ້າສະເພາະ. ໃນຊຸດອາພອນພື້ນເມືອງທີ່ເປັນເອກະລັກສະເພາະຂອງເຜົ່າ ເກີຕູ ແລະ ຊາວເຜົ່າຜູ້ໄທ, ບັນດານາງສາວຫວຽດນາມ ສະແດງບັນດາວາດຟ້ອນທີ່ອອນຊອນຊື່ງໄດ້ວາດພາບຄຸນລັກສະນະທີ່ສຸພາບອ່ອນໂຍນຂອງແມ່ຍິງເກີຕູ, ຜູ້ໄທ ເວົ້າສະເພາະ ແລະ ແມ່ຍິງຫວຽດນາມເວົ້າລວມ.
ບັນດານາງສາວຫວຽດນາມໃນຊຸດອາພອນພື້ນເມືອງ
ຂອງເຜົ່າ ເກີຕູ
ພາບ:vov
|
ລາຍການພົວພັນແລກປ່ຽນສິລະປະຟ້ອນໄດ້ກາຍເປັນງານລາຕີເຕັມໄປດ້ວຍຄວາມປະທັບໃຈ ຜ່ານວາດຟ້ອນ Mojang Priangan ໂດຍບັນດານັກສຶກສາວິທະຍາໄລການຟ້ອນ ຫວຽດນາມ ສະແດງ ພາຍໃຕ້ການນຳພາຂອງບັນດານັກສິລະປິນຟ້ອນມາຈາກອິນໂດເນເຊຍ. ເພື່ອນ ໂດທິຈາງຮ່ວຽນ, ນັກສຶກສາຟ້ອນເຂົ້າຮ່ວມລາຍການພົວພັນແລກປ່ຽນໃຫ້ຮູ້ວ່າ ຮຽນວາດຟ້ອນນີ້ກໍບໍ່ຍາກປານໃດ ແຕ່ຟ້ອນໃຫ້ງາມ ແລະ ດູດດື່ມໃຈຜູ້ຊົມກໍບໍ່ແມ່ນເລື່ອງງ່າຍ.
“ຂ້າພະເຈົ້າແມ່ນຜູ້ເຂົ້າຮ່ວມລາຍການພົວພັນແລກປ່ຽນກັບບັນດາເພື່ອນ ອິນໂດເນເຊຍ. ຂ້າພະເຈົ້າເຫັນວ່າ ວາດຟ້ອນຂອງຫວຽດນາມອອນຊອນກວ່າ, ແຕ່ວາດຟ້ອນຂອງອິນໂດເນເຊຍ ແມ່ນຫ້າວຫັນ ແລະ ມ່ວນຊື່ນກວ່າ. ບັນດານັກສິລະປິນຂອງອິນໂດເນເຊຍ ແມ່ນມີລີລາການຟ້ອນດີ."
ລາຍການພົວພັນແລກປ່ຽນສິລະປະ ອິນໂດເນເຊຍ ຫວຽດນາມ ໄດ້ສ້າງຄວາມປະທັບໃຈຫລາຍຢ່າງໃຫ້ແກ່ຜູ້ຊົມ. ນີ້ບໍ່ພຽງແຕ່ ແມ່ນລາຍການສິລະປະທຳມະດາເທົ່ານັ້ນ ຫາກຍັງແມ່ນກາລະໂອກາດສຳພັດກັບບັນດາຈຸດວັດທະນະທຳສິລະປະຂອງອິນໂດເນເຊຍອີກດ້ວຍ. ນັ້ນແມ່ນຄວາມຮູ້ສຶກຂອງເພື່ອນ ດາວທິອຽນ,ນັກສຶກສາວິທະຍາໄລທ່ອງທ່ຽວ ຮ່າໂນ້ຍ ພາຍຫລັງໄດ້ເຂົ້າຮ່ວມລາຍການພົວພັນແລກປ່ຽນ.
“ນ້ອງເຫັນວ່າ ວັດທະນະທຳ ອິນໂດເນເຊຍ ແມ່ນດູດດື່ມໃຈ. ເມື່ອໄດ້ຮັບຊົມ ນ້ອງມີຄວາມເຂົ້າໃຈສ່ວນໃດຫນຶ່ງກ່ຽວກັບວັດທະນະທຳອິນໂດເນເຊຍ. ບັນດາວາດຟ້ອນຂອງອິນໂດເນເຊຍ ມ່ວນ ແລະ ສ້າງຄວາມປະທັບໃຈຫລາຍ. ນ້ອງຫວັງວ່າ ການເຄື່ອນໄຫວຄືແນວນີ້ ຈະຖືກຈັດຂຶ້ນຫລາຍຄັ້ງກວ່າ ເພື່ອໃຫ້ນັກສຶກສາຫວຽດນາມ ສາມາດເຂົ້າໃຈກ່ຽວກັບພື້ນຖານວັດທະນະທຳຂອງບັນດາປະເທດບ້ານໃກ້ເຮືອນຄຽງກວ່າ.”
ຕາມທ່ານ Sadikin, ທູດວັດທະນະທຳ ແລະ ຖະແຫລງຂ່າວ, ສະຖານທູດ ອິນໂດເນເຊຍ ປະຈຳ ຮ່າໂນ້ຍ ແລ້ວ, ລາຍການພົວພັນແລກປ່ຽນວັດທະນະທຳສິລະປະນີ້ແມ່ນຫນຶ່ງໃນບັນດາການເຄື່ອນໄຫວພິເສດມຸ່ງໄປສູ່ການສະເຫລີມສະຫລອງ 60 ປີແຫ່ງວັນສ້າງຕັ້ງສາຍພົວພັນທາງການທູດ ລະຫວ່າງຫວຽດນາມ ແລະ ອິນໂດເນເຊຍ(30/12/1955-30/12/2015) ຖືກຈັດຂຶ້ນໃນປີຫນ້າ. ລາຍການພົວພັນແລກປ່ຽນວັດທະນະທຳສິລະປະຄ້າຍຄືກັນ ຈະໄດ້ຮັບການຈັດຕັ້ງຂຶ້ນຢູ່ ອິນໂດເນເຊຍໃນທ້າຍເດືອນ12 ນີ້.