(vovworld)- ພາຍຫລັງເຂົ້າຮ່ວມຊຸດຝຶກອົບຮົມມາເປັນເວລາ 20 ມື້ ແລະໄດ້ໄປຢ້ຽມຢາມປູຊະນີຍະສະຖານປະຫວັດສາດຈຳນວນຫນຶ່ງ, ຢ້ຽມຊົມທັດສະນີຍະພາບບາງແຫ່ງຢູ່ພາກເຫນືອ ຫວຽດນາມ, ບັນດາພະນັກງານ, ລັດຖະກອນແຕ່ລະຄົນຂອງສູນກາງຄະນະຊາວຫນຸ່ມປະຊາຊົນປະຕິວັດລາວ ລ້ວນແຕ່ຕີລາຄາສູງຊຸດຝືກອົບຮົມກ່ຽວກັບວຽກງານຊາວຫນຸ່ມ ໂດຍສູນກາງຄະນະຊາວຫນຸ່ມກອມມູນິດໂຮ່ຈິມີນ ຈັດຕັ້ງ. ດ້ວຍບົດຮຽນຕ່າງໆທີ່ຖອດຖອນມາໄດ້, ບັນດາພະນັກງານ, ລັດຖະກອນລາວ ຈະນຳເອົາໄປໝູນໃຊ້ໃນຕົວຈິງເພື່ອສ້າງຂະບວນການຊາວຫນຸ່ມຂອງລາວໃຫ້ນັບມື້ນັບພັດທະນາ, ເຕີບໃຫຍ່ ແລະ ເຂັ້ມແຂງກວ່າ.
ບັນດານັກສຳມະນາກອນຂອງຊຸດຝຶກອົບຮົມໄປຢ້ຽມຢາມເຂດປູຊະນີຍະສະຖານເຕີນຈ່າວ
|
ຊຸດຝືກອົບຮົມ ດຳເນີນແຕ່ວັນທີ 1-20/10 ຊື່ງລວມມີສຳມະນາກອນ 30 ຄົນ. ເຂົາເຈົ້າລ້ວນແຕ່ແມ່ນພະນັກງານຫລັກແຫລ່ງຮັບຜິດຊອບວຽກງານຊາວຫນຸ່ມຂອງສູນກາງຊາວຫນຸ່ມທີ່ມາຈາກ 18 ແຂວງ, ນະຄອນໃນທົ່ວປະເທດລາວ. ນອກຈາກບັນດາບົດຮຽນທິດສະດີກ່ຽວກັບລະບົບການເມືອງຂອງຫວຽດນາມ, ການພົວພັນລະຫວ່າງສອງປະເທດ, ການພົວພັນລະຫວ່າງຊາວຫນຸ່ມສອງປະເທດ, ວິທີສ້າງແຜນເຄື່ອນໄຫວໃຫ້ຊາວຫນຸ່ມເຍົາວະຊົນ, ທັກສະໃນການຈັດຕັ້ງໂອ້ລົມສົນທະນາ, ເວທີປາໄສ… ບັນດາສຳມະນາກອນຍັງໄດ້ປະຕິບັດໃນພາກຕົວຈິງຢູ່ຫ້ອງຮຽນ. ສຳລັບ ອ້າຍລອນຄຳ ສຸມາວົງ, ຮອງເລຂາຊາວຫນຸ່ມ ແຂວງ ຫົວພັນ ແລ້ວ, ການຮຽນ, ໂຄສະນາກ່ຽວກັບແນວທາງ, ນະໂຍບາຍໃຫ້ແກ່ຊາວຫນຸ່ມແມ່ນສິ່ງທີ່ຂາດບໍ່ໄດ້.
ສຽງທ່ານ ລອນຄຳ
ນັບແຕ່ປີ 1972 ມາຮອດປະຈຸບັນ, ສູນກາງຊາວຫນຸ່ມກອມມູນິດ ໂຮ່ຈິມີນ ໄດ້ຈັດຕັ້ງ ຊຸດຝືກອົບຮົມ 23 ຊຸດ ທີ່ສະຫງວນໃຫ້ພະນັກງານເຮັດວຽກງານຊາວຫນຸ່ມຂອງລາວເກືອບ 800 ຄົນ. ນອກນັ້ນ ແຕ່ລະປີ, ບັນດາແຂວງ ມີເສັ້ນຊາຍແດນຮ່ວມລະຫວ່າງສອງປະເທດຄື: ເຊີນລາ- ຫົວພັນ, ເຫງ້ອານ - ຊຽງຂວາງ, ກອນຕູມ -ອັດຕະປື.. ກໍໄດ້້້້້ເປັນແຮກສ່ຽວນຳກັນ ແລະ ແລກປ່ຽນຄະນະຊາວຫນຸ່ມຂັ້ນແຂວງ ມາພົວພັນແລກປ່ຽນ, ຖອດຖອນບົດຮຽນ. ມີຊາວຫນຸ່ມລາວຫລາຍຄົນ, ພິເສດແມ່ນຊາວຫນຸ່ມແຂວງ ຫົວພັນ ໄດ້ຮັບທຶນການສຶກສາຂອງແຂວງ ຮ່າຕີງ ມາຮຽນວິຊາຊີບຢູ່ມະຫາວິທະຍາໄລ ຮົ່ງບາງ ແຂວງ ຮ່າຕີງ ແລະ ເມື່ອກັບຄືນເມືອປະເທດລ້ວນແຕ່ສ້າງອາຊີບດ້ວຍອາຊີບຊື່ງຕົນເອງໄດ້ຮ່ຳຮຽນມາຢູ່ ຫວຽດນາມ. ເພື່ອເຮັດໃຫ້ສຳມະນາກອນຮູ້ສຶກມີຄວາມປະທັບໃຈໃນການຮ່ຳຮຽນ, ຫລັກສູດໄດ້ມີການປ່ຽນແປງເມື່ອທຽບໃສ່ຊຸມປີກ່ອນນີ້. ທ່ານ ຟານມີງທາຍ, ກຳມະການຄະນະບໍລິຫານງານອົງຄະນະພັກ, ຫົວຫນ້າພະແນກວຽກງານອະນຸຊົນ ສະຖາບັນຊາວຫນຸ່ມເຍົາວະຊົນຫວຽດນາມ, ຫົວຫນ້າຄະນະຈັດຕັ້ງຊຸດຝືກອົບຮົມໃຫ້ຮູ້ວ່າ:
“ຫລັກສູດທີ່ເອົາມາສອນໃນຊຸດອົມຮົມປີນີ້ ມີຫລາຍຈຸດໃຫມ່ເມື່ອທຽບໃສ່ຊຸມປີກ່ອນນີ້. ຈຸດພິເສດທີ່ສຸດແມ່ນສ້າງຕາມຄວາມມຸ້ງມາດປາດຖະຫນາຂອງສຳມະນາກອນທີ່ເຂົ້າຮ່ວມຊຸດຝືກອົບຮົມກ່ອນນີ້. ປີນີ້ ພວກຂ້າພະເຈົ້າໄດ້ເຊື້ອເຊີນພະນັກງານຢູ່ກົມລົງທຶນມາແນະນຳກ່ຽວກັບສະພາບການລົງທຶນລະຫວ່າງສອງປະເທດຫວຽດນາມ ແລະ ລາວ, ບັນດາສຳມະນາກອນມັກຮຽນໃນຊົ່ວໂມງນີ້ທີ່ສຸດ.”
ບັນດາຄູອາຈານທີ່ເຂົ້າຮ່ວມການສອນລ້ວນແຕ່ແມ່ນຫົວຫນ້າ, ຮອງຫົວຫນ້າພະແນກຂອງສະຖາບັນຊາວຫນຸ່ມເຍົາວະຊົນ ຫວຽດນາມ, ນອກນັ້ນຍັງມີພະນັກງານຂັ້ນສູງສັງກັດບາງກະຊວງ, ຄະນະ, ຂະແຫນງການ. ຮູບການຮ່ຳຮຽນ ແມ່ນຄຽງຄູ່ກັບການປະຕິບັດຕົວຈິງໃນຊຸດຝືກອົບຮົມອັນໄດ້ເຮັດໃຫ້ສຳມະນາກອນຫລາຍຄົນ ມີຄວາມປະທັບໃຈ. ອ້າຍ ບຸນຍົງ ເພດວິໄຊ, ຫົວຫນ້າຫ້ອງການສັງລວມ, ເລຂານຸການສູນກາງຊາວຫນຸ່ມປະຊາຊົນປະຕິວັດລາວ.
ສຽງທ່ານບຸນຍົງ
ນອກນັ້ນ, ບັນດາການເຄື່ອນໄຫວແລກປ່ຽນບົດຮຽນກັບຄະນະຊາວຫນຸ່ມກຸ່ມບໍລິສັດໂທລະຄົມມະນາຄົມຫວຽດນາມ, ການໄປຢ້ຽມຢາມປູຊະນີຍະສະຖານປະຫວັດສາດແມ່ນບັນດາການເຄື່ອນໄຫວມີຄວາມໝາຍທີ່ສຸດ. ສຳລັບ ອ້າຍ ລອນຄຳ ສຸມາວົງ, ຮອງເລຂາຄະນະພັກຊາວຫນຸ່ມ ແຂວງ ຫົວພັນແລ້ວ, ເລື່ອງໄດ້ໄປຢ້ຽມຢາມປູຊະນີຍະສະຖານປະຫວັດສາດ ເຕີນຈ່າວ ແຂວງ ຕວຽນກວາງ “ນະຄອນຫລວງແຫ່ງການຕໍ່ຕ້ານ”ໃນໄລຍະຕໍ່ຕ້ານພວກລ່າເມືອງຂຶ້ນ ຝລັ່ງ ແມ່ນການເຄື່ອນໄຫວ ໂຄສະນາ ສຶກສາອົບຮົມມູນເຊື້ອທີ່ມີຄວາມຈຳເປັນ.
ສຽງທ່ານ ລອນຄຳ
ຄາດວ່າໃນປີ 2017 ຈະມາເຖິງ, ນອກຈາກຊຸດຝືກອົບຮົມຊຸດທີ 24 ແລ້ວ, ຄະນະຊາວຫນຸ່ມກອມມູນິດ ໂຮ່ຈິມິນ ຍັງໄດ້ຈັດຕັ້ງ ຊຸດຮຽນອີກ 2 ຊຸດທີ່ສະຫງວນໃຫ້ພະນັກງານຊາວຫນຸ່ມຂັ້ນສູງຂອງລາວ 50 ຄົນ. ບັນດາບົດຮຽນທີ່ຖອດຖອນມາໄດ້ໃນຊຸດຝຶກອົບຮົມ ຫວັງວ່າ ບັນດາພະນັກງານຄະນະຊາວຫນຸ່ມລາວຈະໝູນໃຊ້ເຂົ້າໃນພຶດຕິກຳຕົວຈິງ ເພື່ອໃຫ້ວຽກງານຊາວຫນຸ່ມເຍົາວະຊົນຂອງລາວນັບມື້ນັບພັດທະນາດີກວ່າອີກ.