(vovworld)- ທຳມະດາເມື່ອຮອດວັນໄຫວ້ພະຈັນ, ບັນດາເຮືອນບູຮານຢູ່ໂຮ້ຍອານ ລ້ວນແຕ່ມອດໄຟ, ແທນທີ່ນັ້ນແມ່ນບັນດາໂຄມໄຟມີສີຫລາຍຫລາຍ ເຮັດໃຫ້ຄຸ້ມເມືອງເກົ່າໂຮ້ຍອານ ສວຍງາມກວ່າ. ສະເພາະຄ່ຳຄືນວັນໄຫວ້ພະຈັນເດືອນ 3 (ໄລ່ຕາມຈັນທະປະຕິທິນ) ປີນີ້, ຄຸ້ມເມືອງເກົ່າ ໂຮ້ຍອານ ຍິ່ງຟົດຟື້ນກວ່າ ຍ້ອນການມີຫນ້າຂອງນັກສິລະປິນສະໝັກຫລິ້ນ 1500 ຄົນທີ່ມາຈາກ ກອງດົນຕີປະສານສຽງ 45 ກອງຂອງ 45 ປະເທດໃນໂລກ. ເຂົາເຈົ້າມາໂຮ້ຍອານ, ແຂວງ ກວ໋າງນາມ ເພື່ອເຂົ້າຮ່ວມງານປະກວດດົນຕີປະສານສຽງສາກົນຫວຽດນາມຄັ້ງທີ 4 ຖືກດຳເນີນໄປກົງກັບໂອກາດສະເຫລີມສະຫລອງ 40 ປີແຫ່ງວັນປົດປ່ອຍພາກໃຕ້ຫວຽດນາມ, ໂຮມປະເທດຊາດເປັນເອກະພາບ. ເຫດການສິລະປະດົນຕີທີ່ມີຂອບຂະຫນາດສາກົນນີ້ ກໍແມ່ນໂອກາດເພື່ອແນະນຳ, ໂຄສະນາພາບພົດຂອງໂຮ້ຍອານເຖິງນັກທ່ອງທ່ຽວພາຍໃນ ແລະ ຕ່າງປະເທດ.
ສຽງທີ່ທ່ານຫາກໍຮັບຟັງຜ່ານໄປແລ້ວນັ້ນ ແມ່ນສຽງດົນຕີປະສານສຽງໂດຍໂຮງຮຽນມັດທະຍົມ Bogor ປະເທດອິນໂດເນເຊຍ ສະແດງ ນີ້ແມ່ນບົດເພງທີ່ເປັນມູນເຊື້ອຂອງນະຄອນຫລວງ ຈາກາຕາ ທີ່ມີຊື່ວ່າ Sirih Kuning. ກອງດົນຕີປະສານສຽງ ນີ້ ຫາກໍໄດ້ຮັບການສ້າງຕັ້ງກ່ອນນີ້ 6 ເດືອນ, ດ້ວຍສະມາຊິກ 18 ຄົນ ຊື່ງແມ່ນນັກຮຽນຂອງໂຮງຮຽນມັດທະຍົມ Bogor ທັງແມ່ນກອງດົນຕີປະສານສຽງ ຫນຸ່ມກວ່າໝູ່ໃນງານປະກວດດົນຕີປະສານສຽງຄັ້ງນີ້. ອ້າຍຄູ Benhasinaga, ຄູສອນ ໂຮງຮຽນມັດທະຍົມ Bogor Raya ເປັນຫົວຫນ້າກອງດົນຕີປະສານສຽງ ໄດ້ແບ່ງປັນວ່າ:
“ເຂົ້າຮ່ວມງານປະກວດຄັ້ງນີ້ ພວກຂ້າພະເຈົ້າສະແດງ ສາມບົດເພງທຳອິດເປັນພາສາອັງກິດ ແລະ ອີກບົດເພງທີສອງແມ່ນເພງມູນເຊື້ອຂອງ Jakarta ແລະ ບົດເພງທີສາມ ຂອງເຂດທາງທິດເຫນືອເກາະ Sumatera. ເຖິງວ່າ ໝາກຜົນທີ່ກອງດົນຕີປະສານສຽງອິນໂດເນເຊຍຍາດໄດ້ໃນງານປະກວດຄັ້ງນີ້ຄືແນວໃດກໍຕາມ ແຕ່ເມື່ອໄດ້ເຂົ້າຮ່ວມງານປະກວດດົນຕີປະສານສຽງຫວຽດນາມ ຄັ້ງນີ້ ກອງດົນຕີປະສານສຽງ ອິນໂດເນເຊຍ ມີໂອກາດໄດ້ພົບປະ ແລກປ່ຽນກັບເພື່ອນມິດສາກົນ.”
ກອງດົນຕີປະສານສຽງ ອິນໂດເນເຊຍ
ພາບ:vov5
|
ສຳລັບ ກອງດົນຕີປະສານສຽງ ມາເລເຊຍ ແລ້ວ, ທ່ານນາງ Hartini, ສະມາຊິກກອງສິລະປະ ມາເລເຊຍ ໃຫ້ຮູ້ວ່າ ກອງດົນຕີປະສານສຽງ ມາເລເຊຍ ລວມມີ ສະມາຊິກທັງໝົດ 15 ຄົນ, ລ້ວນແຕ່ມີອາຍຸສູງໃກ້ຈະອອກກິນເບ້ຍບຳນານແລ້ວ ແຕ່ເຄີຍເຂົ້າຮ່ວມງານປະກວດດົນຕີປະສານສຽງທັງຢູ່ພາຍໃນປະເທດ ແລະ ຕ່າງປະເທດເປັນຫລາຍຄັ້ງ ແລະ ໄດ້ຮັບລາງວັນສູງຫລາຍລາງວັນ. ງານປະກວດດົນຕີປະສານສຽງຄັ້ງນີ້ດຳເນີນໄປຢູ່ຕາມຖະຫນົນສາຍຕ່າງໆຂອງ ໂຮ້ຍອານ ໄດ້ນຳມາເຊິ່ງຄວາມຮູ້ສຶກໃຫມ່ອ່ຽມໃຫ້ພວກຂ້າພະເຈົ້າ. ນັ້ນກໍແມ່ນຄວາມຮູ້ສຶກລວມຂອງທ່ານນາງ Hartini ກອງດົນຕີປະສານສຽງ ມາເລເຊຍ ແລະ ເພື່ອນ Chandra ກອງດົນຕີປະສານສຽງ ຟິລິບປີນ.
“ພວກຂ້າພະເຈົ້າມາຈາກ ກອງດົນຕີປະສານສຽງ ແຫ່ງຊາດມາເລເຊຍ. ພວກຂ້າພະເຈົ້າເຂົ້າຮ່ວມງານປະກວດດົນຕີປະສານສຽງ ຄັ້ງທຳອິດຢູ່ ຈີນ. ຄັ້ງນີ້ແມ່ນ ຢູ່ ຄຸ້ມເມືອງເກົ່າ ໂຮ້ຍອານ. ນີ້ແມ່ນກາລະໂອກາດທີ່ດີເພື່ອໃຫ້ພວກຂ້າພະເຈົ້າໄດ້ພົບປະແລກປ່ຽນກັບເພື່ອນມິດບັນດາປະເທດເພື່ອນບ້ານ, ເຊື່ອມຕໍ່ກັບ ກອງດົນຕີປະສານສຽງ ພ້ອມທັງເຂົ້າໃຈຕື່ມອີກກ່ຽວກັບປະຫວັດສາດຂອງເຂດດິນແດນນີ້.”
“ນີ້ແມ່ນຫນຶ່ງໃນບັນດາກາລະໂອກາດທີ່ດີໃຫ້ບັນດາປະເທດ, ພິເສດແມ່ນບັນດາປະເທດ ອາຊຽນ ເພື່ອເຕົ້າໂຮມກັນ, ພ້ອມກັນຮ້ອງເພງຕາມຖະຫນົນຫົນທາງ. ຂ້າພະເຈົ້າຄິດວ່າດົນຕີແມ່ນພາສາສາກົນ, ຜ່ານດົນຕີພວກເຮົາສາມາດຫຍັບເຂົ້າໃກ້ກັນກວ່າ.”
ກອງດົນຕີປະສານສຽງມາຈາກໄທ
ພາບ:vov5
|
ຫນຶ່ງໃນບັນດາການເຄື່ອນໄຫວຢູ່ນອກງານປະກວດດົນຕີປະສານສຽງ ນັ້ນແມ່ນການເດີນຂະບວນຢູ່ອ້ອມແອ້ມຄຸ້ມເມືອງເກົ່າ ໂຮ້ຍອານ ໃນຊຸດອາພອນປະຈຳຊາດຂອງບັນດາປະເທດ. ໂຮ້ຍອານ ໄດ້ສ້າງຄວາມປະທັບໃຈຫລາຍຢ່າງໃຫ້ເພື່ອນມິດສາກົນ. ເພື່ອນ Chakrapong ອາຍຸ 21 ປີ ຊື່ງແມ່ນສະມາຊິກໃນກອງດົນຕີປະສານສຽງ ໄທແບ່ງປັນວ່າ:
“ຂ້າພະເຈົ້າມີຄວາມເບີກບານມ່ວນຊື່ນ ແລະ ເອກອ້າງທະນົງໃຈເມື່ອໄດ້ເຂົ້າຮ່ວມງານປະກວດດົນຕີປະສານສຽງທີ່ມີຂອບຂະຫນາດໃຫຍ່ຄືແນວນີ້ຢູ່ຫວຽດນາມ. ຂ້າພະເຈົ້າ ແລະ ກອງດົນຕີປະສານສຽງໄທມາຫວຽດນາມເປັນຄັ້ງທຳອິດ ສະນັ້ນເຫັນວ່າຫລາຍສິ່ງຫລາຍຢ່າງສ້າງຄວາມປະທັບໃຈທີ່ສຸດ ພິເສດ ໄດ້ລຶ້ງເຄີຍກັບເພື່ອນມິດສາກົນຫລາຍຄົນ. ດົນຕີ ໄດ້ເຊື່ອມຕໍ່ພວກຂ້າພະເຈົ້ານຳກັນ ແລະ ຊ່ວຍພວກຂ້າພະເຈົ້າເຂົ້າໃຈກັນກວ່າ.”
ພິເສດ ທີ່ງານປະກວດຄັ້ງນີ້ ກອງດົນຕີປະສານສຽງ Vinschool One, ຕາງຫນ້າໃຫ້ກຸ່ມນັກຮຽນມັດທະຍົມ ຫວຽດນາມ ໄດ້ຮັບລາງວັນຄຳໃນງານປະກວດດົນຕີປະສານສຽງເພງພື້ນເມືອງ ແລະ ລາງວັນ ເຕັມໄປດ້ວຍແງ່ຫວັງ…. ນ້ອງ ເຟືອງຖາວ, ແບ່ງປັນວ່າ:
“ພວກນ້ອງດີໃຈຫລາຍເມື່ອກອງດົນຕີປະສານສຽງຂອງຫວຽດນາມ ໄດ້ຮັບລາງວັນ. ບັນດາເພື່ອນມິດສາກົນ ລ້ວນແຕ່ນິຍົມຊົມຊອບລາຍການຂອງພວກນ້ອງທີ່ສຸດ. ໃນໄລຍະດຳເນີນງານປະກວດ, ຍາມໃດພວກນ້ອງກໍໃກ້ຊິດສະຫນິດສະຫນົມ ແລະ ຊ່ວຍເຫລືອບັນດາເພື່ອນມິດສາກົນເພື່ອໃຫ້ພວກເພື່ອນຮູ້ສຶກ ຄືວ່າພວມຢູ່ປະເທດຕົນ.”
ລາງວັນອັນສູງສົ່ງໃນງານປະກວດດົນຕີປະສານສຽງຄັ້ງນີ້ແມ່ນມອບໃຫ້ກອງປະສານສຽງ PSM Unpar Tabela Harati ມາຈາກປະເທດ ອິນໂດເນເຊຍ.
ງານປະກວດດົນຕີປະສານສຽງຫວຽດນາມຄັ້ງທີ 4 ອັດລົງດ້ວຍລາຍການດົນຕີປະສານສຽງຮ່ວມຂອງບັນດາກອງດົນຕີປະສານສຽງຂອງ ປະເທດຕ່າງໆ ອັນໄດ້ສະແດງໃຫ້ເຫັນຄວາມສາມາຄີມິດຕະພາບ ແລະ ການເຊື່ອມໂຍງດ້ານ ສິລະປະດົນຕີລະຫວ່າງປະເທດຕ່າງໆນຳກັນ.