(vovworld) - ງານວາງສະແດງ “ຄົ້ນຫາສິງກະໂປ - ສີສັນມໍລະດົກ” ພວມດຳເນີນໄປຢູ່ ຮ່າໂນ້ຍ ເຮັດໃຫ້ຜູ້ຊົມຫວຽດນາມ ມີຄວາມເຂົ້າໃຈຕື່ມກ່ຽວກັບປະເທດຊາດ, ປະຊາຊົນ ແລະ ວັດທະນະທຳ ສິງກະໂປ - ຊື່ງແມ່ນປະເທດສະມາຊິກຕັ້ງຫນ້າຂອງ ອາຊຽນ ທັງແມ່ນຫນຶ່ງໃນບັນດາຄູ່ເຈລະຈາຍຸດທະສາດຂອງ ຫວຽດນາມ. ນີ້ແມ່ນເຫດການວັດທະນະທຳທີ່ມີຄວາມໝາຍ, ປະກອບສ່ວນເພີ່ມທະວີຄວາມເຂົ້າອົກເຂົ້າໃຈລະຫວ່າງປະຊາຊົນສອງປະເທດ.
ເມື່ອເຂົ້າຢ້ຽມງານວາງສະແດງຄັ້ງນີ້, ຜູ້ຊົມຈະໄດ້ຊົມບັນດາວັດຖຸພັນທີ່ເປັນເອກະລັກສະເພາະ ທີ່ວາດພາບກ່ຽວກັບໝູ່ບ້ານປະມົງຂອງສິງກະໂປໃນສັດຕະວັດທີ 19. ຜ່ານນັ້ນ ຜູ້ຊົມສາມາດເຂົ້າໃຈຢ່າງຈະແຈ້ງກ່ຽວກັບວິວັດແຫ່ງການພັດທະນາຂອງສິງກະໂປຈາກໝູ່ບ້ານປະມົງແຫ່ງນ້ອຍໆໄດ້ກາຍເປັນສູນການຄ້າທີ່ຄັບຄາຫນາແຫນ້ນ. ງານວາງສະແດງໄດ້ແບ່ງອອກເປັນ 6 ພາກສ່ວນຄື: ປະຫວັດສາດ, ປະຊາຊົນ, ບັນດາອາຊີບທີ່ເປັນມູນເຊື້ອ, ງານບຸນຕ່າງໆຂອງບັນດາເຜົ່າ ແລະ ວັດທະນະທຳທີ່ມີຫລາຍຮູບແບບ ກໍ່ຄືເຍື່ອງອາຫານພື້ນເມືອງທີ່ລືຊື່ຕ່າງໆ. ເພື່ອນ Nguyen Thi Vang, ນັກສຶກສາມະຫາວິທະຍາໄລວັດທະນະທຳ ແບ່ງປັນວ່າ:
“ເມື່ອມາຊົມງານວາງສະແດງ ນ້ອງຈຶ່ງເຂົ້າໃຈໄດ້ກ່ຽວກັບຈຸດວັດທະນະທຳສະເພາະຂອງປະເທດ ສິງກະໂປ, ເຊິ່ງແມ່ນປະເທດທີ່ພັດທະນາກວ່າໝູ່ຢູ່ ອາຊີ, ພິເສດ ສິ່ງແວດລ້ອມທີ່ຂຽວສະອາດ ຊຶ່ງແມ່ນແຫ່ງທີ່ມີສີສັນວັດທະນະທຳສະເພາະ, ອັນໄດ້ດຶງດູດນັກທ່ອງທ່ຽວມາຢາມເປັນຈຳນວນຫລວງຫລາຍ .”
ພິທີໄຂງານວາງສະແດງ
ພາບ: internet |
ບັນດາຮ້ານວາງສະແດງແນະນຳອາຊີບທີ່ເປັນມູນເຊື້ອທີ່ລືຊື່ຄື: ອາຊີບສະໝຸນໄພພື້ນເມືອງ, ອາຊີບ ເຮັດເກີບສົ້ນຍ່ອງ, ອາຊີບບົດເຄື່ອງເທດ ເມື່ອເຂົ້າຊົມໃນງານວາງສະແດງນີ້, ນັກທ່ອງທ່ຽວຮູ້ສຶກເໝືອນດັ່ງໄດ້ດຳລົງຊີວິດພ້ອມກັບປະຊາຊົນສິງກະໂປໃນເມື່ອກ່ອນ. ນອກນັ້ນ ຢູ່ທີ່ນີ້ ຍັງແນະນຳບັນດາເຍ່ືອງອາຫານທົ່ວໄປຂອງສິງກະໂປຄື: ເຂົ້າຊີ້ນໄກ Hainannese, ເຍື່ອງອາຫານ Rojak ຂອງອິນເດຍ, Roti Plata, Satay ແລະ Peranakan Laksa. ນອ້ງ Le Van Anh ນັກຮຽນມັດທະຍົມ Nam Thanh Cong ເວົ້າວ່າ:
“ຫລານເຫັນວ່າ ຮູບພາບນຳມາວາງສະແດງຢູ່ທີ່ນີ້ແມ່ນງາມຫລາຍ, ເຍື່ອງອາຫານກໍແຊບນົວ, ຫລານຢາກຊີມເຍື່ອງອາຫານເຫລົ່ານັ້ນ.”
ການເຄື່ອນໄຫວທີ່ສ້າງຄວາມປະທັບໃຈໃນງານວາງສະແດງນັ້ນແມ່ນ ຜູ້ຊົມໄດ້ຄົ້ນຫາສິ່ງເລິກລັບຂອງປະເທດສິງກະໂປ ຜ່ານການເປີດບັນດາຫີບທີ່ວາງສະແດງຢູ່ທີ່ນີ້. ແຕ່ລະຫີບບັນຈຸຂໍ້ມູນຂ່າວກ່ຽວກັບຄວາມອຸດົມສົບບູນ, ຫລາຍຮູບຫລາຍແບບ ແລະ ສີສັນຫລາກຫລາຍຂອງບັນດາງານບຸນ, ຮີດຄອງປະເພນີ ແລະ ບັນດາເຍື່ອງອາຫານໃນງານບຸນຄື: ຮູບພາບກ່ຽວກັບເຂົ້າໜົມໃນບຸນວັນເພງເດືອນ 8, ບຸນປີໃຫມ່ຂອງຊາວຈີນ, ງານບຸນ Hari Raya Puasa ຫລືງານບຸນສາສະຫນາໃຫຍ່ຂອງວົງຄະນາຍາດເຊື່ອຖືສາສະຫນາອິດສະລາມ, ງານບຸນ Deepavali ແລະ ບຸນກຼິສມາດ. ຈຸດພິເສດອີກອັນຫນຶ່ງໃນງານວາງສະແດງທີ່ໄດ້ດຶງດູດຄວາມສົນໃຈຈາກຜູ້ຊົມ ນັ້ນແມ່ນການວາງສະແດງຊຸດສະແຕມແນະນຳບັນດາກິດຈະກຳສະຖາປັດຕະຍະກຳ, ໝາກໄມ້, ບັນດາເຫດການປະຫວັດສາດ, ງານບຸນໃຫຍ່ຂອງສິງກະໂປ. ຄຽງຂ້າງນັ້ນ ແມ່ນຮູບພາບສິງໂຕ 3 ມິຕິ ສັນຍາລັກແຫ່ງການທ່ອງທ່ຽວຂອງສິງກະໂປ ແລະ ລົດສາມລໍ້ສ້າງເປັນພາບພົດທີ່ສວຍງາມ ເພື່ອໃຫ້ຜູ້ຊົມສາມາດຖ່າຍຮູບກ່ຽວກັບປະເທດສິງກະໂປໄດ້. ເພື່ອນ Nguyen Xuan Hung ນັກສືກສາມະຫາວິທະຍາໄລສະຖາປັດຕະຍະກຳ ໃຫ້ຮູ້ວ່າ:
“ເຖິງວ່າບໍ່ທັນໄດ້ໄປຢ້ຽມຢາມສິງກະໂປເກໍ່ຕາມ ແຕ່ຜ່ານງານວາງສະແດງຄັ້ງນີ້ ຂ້າພະເຈົ້າເຫັນວ່າພາບພົດຂອງປະເທດຊາດ ແລະ ຊາວສິງກະໂປແມ່ນໃກ້ຊິດສະຫນິດສະຫນົມ. ຂ້າພະເຈົ້າຫວັງວ່າ ໃນໄລຍະຈະມາເຖິງ ຈະມີໂອກາດເພື່ອໄປຢ້ຽມຢາມປະເທດທ່ີສວຍງາມນີ້.”
ໂດຍແຕກຕ່າງກັບບັນດາງານວາງສະແດງກ່ອນນີ້, ງານວາງສະແດງ “ຄົ້ນຫາສິງກະໂປ ສີສັນມໍລະດົກ ” ຍັງແນະນຳບັນດາການເຄື່ອນໄຫວສຶກສາປະດິດສ້າງເພື່ອໃຫ້ຜູ້ຊົມລຸ້ນຫນຸ່ມໄດ້ເຂົ້າຮ່ວມການເຄື່ອນໄຫວຕ່າງໆ. ແລະສິ່ງພິເສດ ແມ່ນພວກນ້ອງໄດ້ນຸ່ງຊຸດອາພອນຂອງເດັກນ້ອຍຈີນ, ອິນເດຍ, ມາເລເຊຍ ແລະສິງກະໂປ.
ງານວາງສະແດງ“ຄົ້ນຫາສິງກະໂປ ສີສັນມໍລະດົກ ໂດຍຫໍພິພິດທະພັນແມ່ຍິງ ຫວຽດນາມ ສົມທົບກັບຫໍພິພິດທະພັນສະແຕມສິງກະໂປຈັດຕັ້ງຂື້ນ ແມ່ນນອນໃນບັນດາການເຄື່ອນໄຫວເນື່ອງໃນໂອກາດສະເຫຼີມສະຫຼອງ 40 ປີ ແຫ່ງວັນສ້າງຕັ້ງສາຍພົວພັນທາງການທູດລະຫວ່າງ ຫວຽດນາມ ແລະ ສິງກະໂປ (1/8/1973 - 1/8/2012) ປະກອບສ່ວນເພີ່ມພູນຄູນສ້າງສາຍພົວພັນມິດຕະພາບທີ່ເປັນມູນເຊື້ອລະຫວ່າງ ຫວຽດນາມ ແລະ ສິງກະໂປ.