ຮູບແຕ້ມສີນ້ຳມັນກ່ວາ 40 ແຜ່ນກ່ຽວກັບທິວທັດທຳມະຊາດທີ່ງົດງາມຂອງນະຄອນຫລວງ ຮ່າໂນ້ຍ ແລະ ພາກເໜືອ ຫວຽດນາມ ຂອງຈິດຕະກອນ ເອກະໄຊ ລວດສູງເນີນ - ຜູ້ທີ່ມີຄວາມສາມາດທີ່ສຸດກ່ຽວກັບການແຕ້ມທິວທັດທຳມະຊາດ ໄທ ພວມໄດ້ນຳມາວາງສະແດງຢູ່ງານວາງສະແດງ “ແສງແດດຈາກຮົ່ມເງົາ” ທີ່ຮ່າໂນ້ຍ. ບັນດາຮູບແຕ້ມນີ້ ແມ່ນເລື່ອງລາວກ່ຽວກັບຄວາມຮັກທິວທັດທຳມະຊາດ, ປະຊາຊົນ ແລະ ມູມມອງກ່ຽວກັບປະເທດ ຫວຽດນາມ ຂອງຈິດຕະກອນທີ່ມາຈາກ ໄທ. ໃນລາຍການຊາຍຄາອາຊຽນມື້ນີ້, ຂໍເຊີນທ່ານຜູ້ຟັງພ້ອມກັບນັກຂ່າວ VOV ເຂົ້າຮ່ວມງານວາງສະແດງ ເພື່ອຊອກຮູ້ກ່ຽວກັບຄວາມຮັກ ແລະ ມູມມອງຂອງຈິດຕະກອນ ເອກະໄຊ ລວດສູງເນີນ ສຳລັບ ຮ່າໂນ້ຍ ແລະ ຫວຽດນາມ ແດ່ເດີ.

ເຖິງວ່າອາຍຸເກືອບ 60 ປີແລ້ວກໍ່ຕາມ, ແຕ່ຈິດຕະກອນ ເອກະໄຊ ລວດສູງເນີນ ຍັງເປັນຄົນເຈົ້າຊູ້, ລາວນຸ່ງເສື້ອແວັດສີຊ້ຳ, ທາງໃນນຸ່ງເສື້ອຍືດສີນ້ຳເງິນ, ແລະ ນຸ່ງໂສ້ງຢິນສີຟ້າແກ່. ຮູບຮ່າງເປັນຄົນຕ່ຳເກິ່ງ, ຜິວດຳແດງ ແລະ ຜົມກູດຍາວພຽງບ່າ. ຈິດຕະກອນ ເອກະໄຊ ລວດສູງເນີນ ພວມຢືນຢູ່ຂ້າງຮູບແຕ້ມທີ່ມີຂະໜາດ 85 ຄູນ 130 ຊັງຕີແມັດ ທີ່ແຕ້ມຮູບຕົ້ນໄມ້ໃຫຍ່ທີ່ມີອາຍຸຫລາຍຮ້ອຍປີ, ລຳຕົ້ນເປັນກະຕູດກະຕີດ, ຫຍາບກະດ້າງ, ສີເຫລືອງແກ່ ແລະ 4 ຄົນຂອບຈຶ່ງສາມາດຮອບໄດ້.

ເບິ່ງຕົ້ນໄມ້ໃຫຍ່ເຫລົ່ານີ້ ແນ່ນອນວ່າ ແມ່ນຢູ່ ໜອງຮ່ວານກຽມ ແລ້ວ. ນ້ອງເຫັນໄດ້ທິວທັດທຳມະຊາດທີ່ລຶ້ງເຄີຍ. ນ້ອງຮູ້ສຶກໄດ້ເຖິງພະລັງຊີວິດຂອງຕົ້ນໄມ້, ແສງແດດ. ຕ້ອງເວົ້າວ່າ ຈິດຕະກອນຄົນນີ້ ໃຊ້ສີສຸດທີ່ງ່າຍດາຍ, ແຕ່ພັດພັນລະນາໄດ້ເຖິງບັນຍາກາດໃນຮູບແຕ້ມ. ມັນເຮັດໃຫ້ຄົນເຮົາຮູ້ສຶກໄດ້ເຖິງຄວາມອົບອຸ່ນ, ຜາສຸກ.

  ສຳລັບກະໂຕນ້ອງເອງ ເມື່ອຊົມຮູບແຕ້ມກໍ່ມັກຫລາຍ. ຮູບແຕ້ມນີ້ໄດ້ແຕ້ມກ່ຽວກັບ ນິງບີງ. ນີ້ແມ່ນແມ່ນ້ຳສາຍໜຶ່ງຢູ່ ນິງບີງ. ເມື່ອຢືນຢູ່ໄກຫລຽວເບິ່ງ, ເຮົາສາມາດຮູ້ສຶກໄດ້ລະດັບໄກ້-ໄກ, ການຄິດສ້າງບັນຍາກາດຂອງອາວ ເອກະໄຊ, ທຸກສິ່ງທຸກຢ່າງເລັ່ງໃສ່ແສງແດດຢູ່ທາງລຸ່ມ. ທຸກສ່ວນນັບແຕ່ພູ, ແມ່ນ້ຳ, ສາຍນ້ຳໄຫຼຂອງແມ່ນ້ຳລ້ວນແຕ່ສຸມໃສ່ແສງແດດ.

ເພື່ອແຕ້ມໄດ້ບັນດາຮູບແຕ້ມມີ “ຊີວິດຊີວາ” ນັ້ນ, ຈິດຕະກອນ ເອກະໄຊ ລວດສູງເນີນ ໄດ້ສະຫລະເວລາປະມານ 10 ເດືອນ ເພື່ອລົງຕົວຈິງຢູ່ ຮ່າໂນ້ຍ ແລະ ບັນດາແຂວງພາກເໜືອຂອງ ຫວຽດນາມ ຄື: ຮ່າຢາງ, ຮ່ວາບີງ, ນິງບີງ, ແທງຮ໊ວາ. ເຖິງວ່າກ່ອນນັ້ນ ລາວໄດ້ມີປະສົບການແຕ້ມທິວທັດທຳມະຊາດກ່ວາ 30 ປີ ແລະ ເຄີຍໄປແຕ້ມຢູ່ຫລາຍປະເທດຄື: ເຢຍລະມັນ, ຝຣັ່ງ, ເອີຣົບ…ກໍ່ຕາມ.

ຍ້ອນບັນດາຄວາມຮັກແພງຕໍ່ປະຊາຊົນ ແລະ ທິວທັດທຳມະຊາດ ຫວຽດນາມ ໃນໄລຍະເວລາຍາວ, ບວກກັບການພົບເຫັນທີ່ເປັນໜ້າຈັບໃຈກ່ຽວກັບ “ແສງແດດ”, “ຕົ້ນໄມ້” ແລະ “ຮົ່ມເງົາ” ເຮັດໃຫ້ບັນດາຮູບແຕ້ມຂອງຈິດຕະກອນ ເອກະໄຊ ລວດສູງເນີນ ໄດ້ກາຍເປັນຮູບແຕ້ມທີ່ມີຊີວິດຊີວາທີ່ສຸດ, ດຶງດູດໃຈຜູ້ຊົມ. ສ່ວນທ່ານ ທານີ ແສງຣັດ ເອກອັກຄະລັດຖະທູດ ໄທ ປະຈຳ ຮ່າໂນ້ຍ ໃຫ້ຮູ້ວ່າ:

ນີ້ແມ່ນຂ່າວດີຂາວມ່ວນສຳລັບຈິດຕະກອນ ເອກະໄຊ ລວດສູງເນີນ ຍ້ອນວ່າລາວກຳລັງສ້າງແຜນການລົງຕົວຈິງຢູ່ພາກກາງ ແລະ ພາກໃຕ້ຂອງ ຫວຽດນາມ ໃນປີ 2019. ພາຍຫລັງງານວາງສະແດງສິ້ນສຸດລົງໃນວັນທີ 09 ມີນາ ຢູ່ຮ່າໂນ້ຍ, ຈິດຕະກອນ ເອກະໄຊ ລວດສູງເນີນ ແລະ ຜູ້ຮ່ວມງານຈະນຳບັນດາຮູບແຕ້ມດັ່ງກ່າວ ໄປວາງສະແດງຢູ່ ບັງກອກ, ປະເທດ ໄທ ໃນລະຫວ່າງວັນທີ 01-30 ມິຖຸນາ 2019 ເພື່ອຊ່ວຍໃຫ້ປະຊາຊົນ ໄທ ເຂົ້າໃຈກ່ຽວກັບປະເທດ ຫວຽດນາມ ຕື່ມອີກ ./.