(vovworld) - ກໍເຊັ່ນດຽວກັນກັບປະເທດຈຳນວນຫນຶ່ງໃນກຸ່ມ ອາຊຽນ, ແຕ່ລະປີ ລັດຖະບານ ສິງກະໂປ ສະຫງວນທຶນສຶກສາຈຳນວນຫນຶ່ງໃຫ້ແກ່ນັກຮຽນ, ນັກສຶກສາບັນດາປະເທດ ອາຊຽນ ທີ່ມີຜົນງານສູງໃນການຮ່ຳຮຽນ, ໃນນັ້ນ ມີ ຫວຽດນາມ. ສຳລັບນັກຮຽນ, ນັກສຶກສາຫວຽດນາມ, ເລື່ອງໄດ້ຮັບທຶນສຶກສາ ອາຊຽນ ຂອງລັດຖະບານສິງກະໂປ ບໍ່ພຽງແຕ່ແມ່ນກາລະໂອກາດເພື່ອສຳພັດກັບພື້ນຖານການສຶກສາທີ່ທັນສະໄຫມເທົ່ານັ້ນ ຫາກຍັງແມ່ນກາລະໂອກາດເພື່ອເຂົ້າໃຈກວ່າກ່ຽວກັບປະເທດ ແລະ ຊາວສິງກະໂປ, ຊຶ່ງແມ່ນຫນຶ່ງໃນບັນດາປະເທດສະມາຊິກກໍ່ຕັ້ງ ກຸ່ມອາຊຽນ .
ນັກສຶກສາ ຫວຽດນາມ ພ້ອມກັບນັກສຶກສາຕ່າງປະເທດ ຢູ່ ສິງກະໂປ
ພາບ:internet |
ທຶນສຶກສາ ອາຊຽນ ຂອງລັດຖະບານ ສິງກະໂປ ມີສອງປະເພດ: ທຶນສະຫງວນໃຫ້ແກ່ນັກຮຽນມັດທະຍົມຕອນປາຍ ແລະ ມະຫາວິທະຍາໄລ. ທຶນສຶກສາ ອາຊຽນ ສະຫງວນໃຫ້ແກ່ນັກຮຽນມັດທະຍົມຕອນປາຍ ແມ່ນທຶນສຶກສາໃຫ້ທັງ 4 ປີ. ຢູ່ ຫວຽດນາມ, ທຶນສຶກສານີ້ໄດ້ມອບເປັນຄັ້ງທຳອິດເມື່ອປີ 1996. ນັບແຕ່ນັ້ນມາຮອດປະຈຸບັນ, ມີນັກຮຽນປະມານ 300 ຄົນໄດ້ຮັບທຶນສຶກສາເຂົ້າຮຽນຢູ່ບັນດາໂຮງຮຽນຊັ້ນນຳຂອງ ສິງກະໂປ. ຄອບຄົວລຸງ ໂງດຶກດາດ ຢູ່ ຮ່າໂນ້ຍ ມີຄວາມປິຕິຊົມຊື່ນເມື່ອໄດ້ຮັບຂ່າວວ່າ ລູກຊາຍຂອງຕົນແມ່ນນ້ອງ ໂງດາດຟຸກ ໄດ້ຮັບທຶນສຶກສາດັ່ງກ່າວ. ລຸງດຶກໃຫ້ຮູ້ວ່າ:
“ຜ່ານການຊອກຮູ້ ຂ້າພະເຈົ້າໄດ້ຮູ້ວ່າ: ທຶນສຶກສາ ອາຊຽນ ຂອງລັດຖະບານສິງກະໂປ ເພື່ອແນໃສ່ຊ່ວຍເຫລືອສຶກສາໃຫ້ພວກນ້ອງນັກຮຽນມີຜົນງານດີເດັ່ນໃນການຮ່ຳຮຽນ ແລະ ມີຄຸນສົມບັດດີ ຂອງບັນດາປະເທດສະມາຊິກ ອາຊຽນ ໃຫ້ກາຍເປັນຜູ້ມີປະໂຫຍດ, ເພື່ອຮັບໃຊ້ໃຫ້ແຕ່ລະປະເທດ. ນັກຮຽນຂອງປະເທດຈຳນວນຫນຶ່ງໃນພາກພື້ນຄື: ຈີນ, ມາເລເຊຍ, ອິນໂດເນເຊຍ, ໄທ ລ້ວນແຕ່ໄປຮຽນຢູ່ສິງກະໂປເປັນຈຳນວນຫລວງຫລາຍ.”
ແຕ່ລະປີ, ກະຊວງສຶກສາ ແລະ ບຳລຸງສ້າງ ຫວຽດນາມ ຄັດເລືອກນັກຮຽນມັດທະຍົມຕອນປາຍປະມານ 200 ຄົນເຂົ້າຮ່ວມການສອບເສັງເພື່ອຮັບທຶນສຶກສາ ອາຊຽນ ຂອງລັດຖະບານ ສິງກະໂປ. ປີ 2012, ມີນັກຮຽນ ຫວຽດນາມ 9 ຄົນ ໄດ້ຮັບທຶນສຶກສາດັ່ງກ່າວ. ເພື່ອບັນລຸໄດ້ທຶນສຶກສານັ້ນ, ບັນດານັກຮຽນຕ້ອງຜ່ານການສອບເສັງໂດຍກະຊວງສຶກສາ ສິງກະໂປ ຈັດຕັ້ງ ຊຶ່ງລວມມີ: ວິຊາເລກ, ພາສາອັງກິດ, IQ ແລະ ເສັງປາກເປົ່າກັບບັນດາຄູອາຈານມາຈາກສິງກະໂປ. ນ້ອງ ຫງວຽນທູ່ຍເຢືອງ, ນັກສຶກສາຫ້ອງ 9 G ໂຮງຮຽນມັດທະຍົມຕອນຕົ້ນ ດັ້ງທາຍມາຍ, ນະຄອນ ວີງ ແຂວງເຫງ້ອານ ແບ່ງປັນຄວາມຮູ້ສຶກຂອງຕົນພາຍຫລັງໄດ້ຮັບທຶນສຶກສາດັ່ງກ່າວວ່າ:
“ນ້ອງຮູ້ສຶກປິຕິຊົມຊຶ່ນ ແລະ ມີຄວາມເອກອ້າງທະນົງໃຈຫລາຍເມື່ອໄດ້ຮັບທຶນສຶກສາ ເພາະວ່າ ນີ້ແມ່ນທຶນສຶກສາທີ່ມີຊື່ສຽງຂອງລັດຖະບານສິງກະໂປສະຫງວນໃຫ້ແກ່ນັກຮຽນຫ້ອງ ມໍ 9 ແລະ ມໍ10 ຂອງບັນດາປະເທດສະມາຊິກໃນກຸ່ມ ອາຊຽນ,ໃນນັ້ນ ມີ ຫວຽດນາມ. ຢູ່ແຂວງ ເຫງ້ອານ ກາລະໂອກາດສຳພັດກັບທຶນສຶກສາຄືແນວນີ້ແມ່ນຫນ້ອຍສຸດ. ນ້ອງໄດ້ຮັບໃບຈົດຊື່ເຂົ້າຮ່ວມການສອບເສັງເພື່ອຮັບທຶນສຶກສານີ້ ພາຍຫລັງນ້ອງເສັງໄດ້ລາງວັນທີ 1 ໃນການສອບເສັງນັກຮຽນເກັ່ງພາສາອັງກິດ ຂັ້ນແຂວງ.”
|
| ປະເທດສິງກະໂປ: vietgiaitri.com |
ຕ່າງກັບນ້ອງທູ່ຍເຢືອງ, ນ້ອງ ໂງດາດຟຸກ ນັກຮຽນ ຫ້ອງ 9 K1 ໂຮງຮຽນມັດທະຍົມຕອນຕົ້ນ ຈຶງເວືອງ ຮ່າໂນ້ຍ ພັດມີກາລະໂອກາດສຳພັດກັບທຶນສຶກສາປະເພດຕ່າງໆກວ່າ, ແຕ່ນ້ອງຍັງຄົງເລືອກເຟັ້ນທຶນສຶກສາ ອາຊຽນ ຂອງລັດຖະບານ ສິງກະໂປ ແລະ ເສັງໄດ້ຄະແນນສູງໃນການສອບເສັງຍາດເອົາທຶນສຶກສາດັ່ງກ່າວ. ຟຸກ ໃຫ້ຮູ້ວ່າ:
“ນ້ອງເລືອກເຟັ້ນ ທຶນສຶກສາ ອາຊຽນ ເພາະວ່າ ພື້ນຖານການສຶກສາຂອງສິງກະໂປດີທີ່ສຸດ. ສິງກະໂປ ແມ່ນປະເທດ ອາຊີ ແຕ່ມີພື້ນຖານວັດທະນະທຳເປັນຫລາຍຮູບແບບຄື: ມາເລເຊຍ, ຈີນ, ອິນໂດເນເຊຍ, ອິນເດຍ ແລະ ເອີລົບ ສະນັ້ນ ນອກຈາກການຮ່ຳຮຽນແລ້ວ ນ້ອງຍັງສາມາດແລກປ່ຽນວັດທະນະທຳກັບຫຼາຍພື້ນຖານອະລິຍະທຳ ຄືແນວນັ້ນຂ້າພະເຈົ້າບໍ່ຕ້ອງໄປທ່ອງທ່ຽວຫລາຍ, ສາມາດປະຢັດເວລາໄດ້.”
ພາຍຫລັງໄດ້ຮັບທຶນສຶກສາ, ບັນດານັກຮຽນມີຜົນງານດີເດັ່ນໃນການຮ່ຳຮຽນຂອງ ຫວຽດນາມ ຈະໄດ້ຮັບເຂົ້າຮຽນຫ້ອງ 3 ໃນລະບົບສຶກສາຊັ້ນມັດທະຍົມຂອງສິງກະໂປ ແມ່ນເທົ່າກັບຫ້ອງ 9 ຂອງຫວຽດນາມ. ສິ້ນສຸດ 4 ປີ, ບັນດານັກຮຽນຈະໄດ້ຮັບໃບປະກາດສະນິຍະບັດຈົບຊັ້ນມັດທະຍົມລາຍການ Cambrigdege GCE A Level . ຫລັງຈາກນັ້ນ ນັກຮຽນດີເດ່ັນບັນລຸຜົນງານສູງໃນການຮ່ຳຮຽນຈະມີກາລະໂອກາດຈົດລາຍຊຶ່ເຂົ້າຮ່ວມການເສັງເພື່ອຮັບທຶນສຶກສາ ອາຊຽນ ສືບຕໍ່ຮຽນມະຫາວິທະຍາໄລຢູ່ບັນດາໂຮງຮຽນ: ມະຫາວິທະຍາໄລແຫ່ງຊາດ ສິງກະໂປ, ມະຫາວິທະຍາໄລເຕັກໂນໂລຊີ Nanyang, ມະຫາວິທະຍາໄລບໍລິຫານສິງກະໂປ ຫລື ໂຮງຮຽນເຕັກໂລໂລຊີ ແລະ ສະຖາປັດຕະຍະກຳ ສິງກະໂປ. ນ້ອງ ໂງດາດຟຸກ ສະແດງຄວາມຕັດສິນໃຈກ່ອນເດີນທາງໄປຮຽນຢູ່ ສິງກະໂປດ້ວຍທຶນສຶກສາ ອາຊຽນ ວ່າ.
“ນ້ອງຈະພະຍາຍາມຮຽນສຳເລັດ 4 ປີ ຕາມທຶນສຶກສານີ້, ຫລັງຈາກນັ້ນ ນ້ອງຈະເຂົ້າຮ່ວມການເສັງຍາດທຶນສຶກສາເພື່ອຮຽນຕໍ່ ຢູ່ໂຮງຮຽນແຫ່ງໃດຫນຶ່ງທີ່ມີຊຶ່ສຽງຂອງສິງກະໂປ ຫລື ຢູ່ປະເທດທີ 3 ເພື່ອອະນາຄົດອັນດີງາມຂອງຕົນ ແລະ ກາຍເປັນຄົນດີ, ມີຜົນປະໂຫຍດໃຫ້ແກ່ປະເທດຊາດ.”
ໃນສະພາບການ ຫວຽດນາມ ພວມຍູ້ແຮງການຫັນປະເທດຊາດເປັນປະເທດອຸດສາຫະກຳ, ທັນສະໄຫມ ແລະ ພັດທະນາເສດຖະກິດພູມປັນຍາ, ສ້າງພື້ນຖານເພື່ອກາຍເປັນປະເທດອຸດສາຫະກຳຕາມທິດທັນສະໄຫມໃນປີ 2020 ນັ້ນ, ທຶນສຶກສາ ອາຊຽນຂອງລັດຖະບານ ສິງກະໂປ ໄດ້ປະກອບສ່ວນບໍ່ຫນ້ອຍເຂົ້າໃນການບຳລຸງສ້າງແຫລ່ງຊັບພະຍາກອນມະນຸດທີ່ມີຄຸນນະພາບສູງໃຫ້ແກ່ ຫວຽດນາມ. ພ້ອມກັນນັ້ນ ທຶນສຶກສາ ອາຊຽນ ກໍປະກອບສ່ວນເພີ່ມທະວີຄວາມເຂົ້າອົກເຂົ້າໃຈເຊິ່ງກັນ ແລະ ກັນລະຫວ່າງ ປະຊາຊົນສອງປະເທດ ຫວຽດນາມ ແລະ ສິງກະໂປ ແມ່ນປະກົດການທີ່ມີຊີວິດຊີວາໃນການຊຸກຍູ້ການຮ່ວມມືລະຫວ່າງບັນດາປະເທດ ອາຊຽນໃຫ້ນັບມື້ນັບຂັ້ມແຂງ, ມຸ່ງໄປເຖິງຈຸດໝາຍສ້າງປະຊາຄົມ ອາຊຽນສຳເລັດຜົນໃນປີ 2015.