(vovworld)- ກ່ອນນີ້ 6 ປີເຕັມ, ສູນເຜີຍແຜ່ພາສາ ແລະ ວັດທະນະທຳ ໄທ ໄດ້ຮັບການສ້າງຕັ້ງຂຶ້ນ ຢູ່ ມະຫາວິທະຍາໄລ ຮ່າໂນ້ຍ ຕາມລາຍການຮ່ວມມືລະຫວ່າງ ອົງການຮ່ວມມືພັດທະນາສາກົນ ສັງກັດກະຊວງການຕ່າງປະເທດໄທ(TICA) ແລະ ກະຊວງສຶກສາ ບຳລຸງສ້າງຫວຽດນາມ. ຈຸດປະສົງ ແມ່ນເພື່ອຫນູນຊ່ວຍບັນດາມະຫາວິທະຍາໄລ ຫວຽດນາມ ເຜີຍແຜ່ພາສາ ແລະ ວັດທະນະທຳໄທ. ມາຮອດປະຈຸບັນ, ສູນດັ່ງກ່າວ ໄດ້ເປີດຊຸດບຳລຸງສ້າງພາສາໄທ 5 ຊຸດ ໃຫ້ແກ່ ນັກສຶກສາມະຫາວິທະຍາໄລ ຮ່າໂນ້ຍ ເກືອບ 300 ຄົນ. ໃນນັ້ນ ຈຳນວນນັກສຶກສາສົນໃຈຈົດທະບຽນຮຽນພາສາໄທຜ່ານແຕ່ລະປີແມ່ນເພີ່ມຂຶ້ນ ແລະ ມີຫລາຍຄົນຊອກໄດ້ວຽກເຮັດງານທຳ ທີ່ກ່ຽວຂ້ອງເຖິງ ພາສາໄທ ຢ່າງເໝາະສົມ.
ພັນລະຍານາຍົກລັດຖະມົນຕີ ໄທ ແລະ ຄະນະຜູ້ແທນໄທຢ້ຽມຢາມ ມະຫາວິທະຍາໄລ ຮ່າໂນ້ຍ
|
ເຖິງວ່າ ພຽງແຕ່ຮຽນພາສາຢູ່ ສູນເຜີຍແຜ່ພາສາ ແລະ ວັດທະນະທຳໄທ ບໍ່ທັນຮອດ 1 ປີ ກໍຕາມ ແຕ່ເພື່ອນ ຫງວຽນບ໋າວແຄງ, ອາຍຸ 23 ປີ, ອະດີດນັກສຶກສາພະແນກພາສາຈີນ, ມະຫາວິທະຍາໄລ ຮ່າໂນ້ຍ ພັດ ຊອກໄດ້ວຽກເຮັດງານທຳຢ່າງພໍໃຈ ກ່ຽວຂ້ອງເຖິງພາສາໄທ ຢູ່ ບໍລິສັດສົ່ງອອກເຕັກໂນໂລຊີການສຶກສາຂອງຫວຽດນາມ ຢູ່ ຮ່າໂນ້ຍ. ຫງວຽນບ໋າວແຄງ ແບ່ງປັນວ່າ:
“ພາສາໄທ ພວມແມ່ນພາສາໃຫມ່ອ່ຽມຢູ່ ຮ່າໂນ້ຍ, ໃນຂະນະທີ່ຄວາມຕ້ອງການຜູ້ຮູ້ພາສາຈີນ ບໍ່ຫລາຍອີກ. ໄລຍະ 8 ເດືອນທີ່ເຂົ້າຮຽນພາສາໄທຢູ່ ສູນດັ່ງກ່າວ ແລະ ອີກ 1 ເດືອນຝືກຫັດ ຢູ່ໄທ ໄດ້ຊ່ວຍໃຫ້ນ້ອງມີຄວາມຮູ້ດ້ານພາສາໄທຫລາຍສົມຄວນ. ປະຈຸບັນ ບໍລິສັດພວກນ້ອງ ພວມເປີດກວ້າງຕະຫລາດໄປຍັງໄທ. “
ຫງວຽນບ໋າວແຄງ ແມ່ນຫນຶ່ງໃນຈຳນວນນັກສຶກສາ ສີບໆຄົນຂອງມະຫາວິທະຍາໄລ ຮ່າໂນ້ຍ ເລືອກເຟັ້ນພາສາໄທ ແມ່ນພາສາຕ່າງປະເທດທີ 2 ໃນການຮ່ຳຮຽນຂອງຕົນ ແລະ ຍາດໄດ້ທຶນສຶກສາໃນໄລຍະ1 ເດືອນ ຢູ່ ມະຫາວິທະຍາໄລສີນາຄະຣີນວິໂຣດ. ທຶນສຶກສາດັ່ງກ່າວໂດຍ TICA ສະຫນອງໃຫ້ນັກສຶກສາຫວຽດນາມ 10 ຄົນທີ່ຮຽນພາສາໄທເກັ່ງສຸດໃນຊຸດຮຽນ. ມາຮອດປະຈຸບັນ ມີນັກສຶກສາ 60 ຄົນຢູ່ມະຫາວິທະຍາໄລ ຮ່າໂນ້ຍ ໄດ້ຮັບທຶນສຶກສາຂອງ TICA. ທ່ານນາງ ເຈີນເກີມຕູ, ຄູສອນພາສາໄທຢູ່ສູນດັ່ງກ່າວໃຫ້ຮູ້ວ່າ:
ສຽງຂອງທ່ານນາງເກີມຕູ
ເອື້ອຍຄູ ຟຸ່ງທິເຮືອງຢາງ ກ່ອນນີ້ ເປັນນັກສຶກສາຮຽນພາສາໄທຢູ່ສູນເຜີຍແຜ່ພາສາ ແລະ ວັດທະນະທຳໄທ ແຕ່ປະຈຸບັນໄດ້ກາຍເປັນຄູສອນພາສາໄທຢູ່ສູນແຫ່ງນີ້ ແບ່ງປັນວ່າ:
“ຂ້າພະເຈົ້າແມ່ນຜູ້ໂຊກດີເມື່ອກາຍເປັນຫນຶ່ງໃນຈຳນວນນັກສຶກສາ 10 ຄົນ ຊຸດທຳອິດ ໄດ້ເຂົ້າຮ່ວມຊຸດຮຽນໄລຍະ 1 ເດືອນ ຕາມທຶນສຶກສາຂອງ TICA. ໄລຍະດຽວກັນນີ້ ມະຫາວິທະຍາໄລ ຮ່າໂນ້ຍ ປະກາດວ່າ ມີຊຸດບຳລຸງສ້າງຫລັງມະຫາວິທະຍາໄລຢູ່ໄທ, ຂ້າພະເຈົ້າຕັດສິນໃຈຍາດທຶນສຶກສາດັ່ງກ່າວ ແລະ ຖືວ່ານີ້ແມ່ນກາລະໂອກາດໃຫມ່ຂອງຕົນ.”
ປີ 2014-2015, ສູນເຜີຍແຜ່ພາສາ ແລະ ວັດທະນະທຳໄທ ເປີດຊຸດຮຽນພາສາໄທ 3 ຊຸດ ລວມມີນັກຮຽນ 65 ຄົນ, ແມ່ນເພີ່ມຂຶ້ນທົບ 3 ເທົ່າ ເມ່ືອທຽບໃສ່ປີທຳອິດທີ່ ສູນດັ່ງກ່າວໄດ້ຮັບການສ້າງຕັ້ງຂຶ້ນເມື່ອປີ 2009.
ເພື່ອບັນລຸຜົນສຳເລັດຄືປະຈຸບັນ ນອກຈາກຄວາມມານະພະຍາຍາມຂອງຄູສອນ ແລະ ພະນັກງານໃນສູນ ຕ້ອງເວົ້າເຖິງການຊ່ວຍເຫລືອຫລາຍດ້ານຈາກ TICA ແລະ ສະຖານທູດ ໄທ ປະຈຳຫວຽດນາມ. ທ່ານນາງ ດອນລາດາ ທອງບຸນ, ເລຂາທີຫນຶ່ງ ສະຖານທູດ ໄທປະຈຳຫວຽດນາມ ໃຫ້ຮູ້ວ່າ:
ສຽງທ່ານນາງ ດອນລາດາ ທອງບຸນ
ປະຈຸບັນ, TICA ພວມສະຫນອງທຶນສຶກສາຊັ້ນປະລິຍາໂທ 2 ທຶນ ແລະ ປະລິຍາເອກ 1 ທຶນ ໃຫ້ຄູອາຈານສູນດັ່ງກ່າວ ເພື່ອຮັບໃຊ້ການສິດສອນພາສາໄທ. ນອກນັ້ນ ໃນບັນດາວັນບຸນສຳຄັນຂອງໄທ, ສະຖານທູດໄທ ກໍຫນູນຊ່ວຍຊຸດອາພອນ ແລະ ເຂົ້າຮ່ວມບັນດາການເຄື່ອນໄຫວໂດຍມະຫາວິທະຍາໄລຈັດຕັ້ງ.
ຕາມການຕີລາຄາຂອງທ່ານນາງ ດອນລາດາ ທອງບຸນ, ເລຂາທີຫນຶ່ງ ສະຖານທູດ ໄທ ປະຈຳຫວຽດນາມ ແລ້ວ, ມາຮອດຈຸດເວລານີ້ ອາດຈະເວົ້າໄດ້ວ່າ ໂຄງການຮ່ວມມືກ່ຽວກັບການສຶກສາລະຫວ່າງຫວຽດນາມ ແລະ ໄທ ບັນລຸໄດ້ຜົນສຳເລັດ ແລະ ຈະສືບຕໍ່ໄດ້ຮັບການປະຕິບັດໃນອະນາຄົດ.