(vovworld)- ເປັນຄັ້ງທຳອິດໃນປະຫວັດສາດ, ບັນຫາທະເລຕາເວັນອອກໄດ້ຮັບຄວາມເຫັນດີນຳເອົາເຂົ້າຖະແຫລງການຮ່ວມຂອງກອງປະຊຸມບໍ່ເປັນທາງການຜູ້ບັນຊາການປ້ອງກັນປະເທດ ອາຊຽນ 13 (ACDFIM 13) ທີ່ຫາກໍ່ສິ້ນສຸດຢູ່ ນະຄອນຫລວງ ວຽງຈັນ ປະເທດລາວ. ໃນຖະແຫລງການຮ່ວມນີ້, ຜູ້ຕາງຫນ້າກຳລັງປ້ອງກັນຊາດບັນດາປະເທດ ອາຊຽນ ໄດ້ເນັ້ນຫນັກເຖິງຄວາມຈຳເປັນກ່ຽວກັບສະພາບແວດລ້ອມແຫ່ງສັນຕິພາບຢູ່ທະເລຕາເວັນອອກ ເພື່ອຊຸກຍູ້ສັນຕິພາບ, ສະຖຽນລະພາບ, ການເຕີບໂຕດ້ານເສດຖະກິດ ແລະ ວັດທະນາຖາວອນຢູ່ພາກພື້ນ. ສະນັ້ນ ບັນດາຝ່າຍຄວນປະຕິບັດຖະແຫລງກ່ຽວກັບການປະພຶດຂອງບັນດາຝ່າຍຢູ່ທະເລຕາເວັນອອກ (DOC) ຢ່າງຄົບຖ້ວນ ແລະ ມີປະສິດທິຜົນ ແລະ ສ້າງປະມວນຂໍ້ກຳນົດການປະພຶດຢູ່ ທະເລຕາເວັນອອກ (COC) ໂດຍໄວ.
ຄະນະຜູ້ແທນການທະຫານຫວຽດນາມເຂົ້າຮ່ວມກອງປະຊຸມ
ACDFIM 13
ພາບ:TTXVN
|
ດ້ວຍຫົວຂໍ້: “ເພີ່ມທະວີການຮ່ວມມືປ້ອງກັນຊາດເພື່ອປະຊາຄົມ ອາຊຽນ ທີ່ຂະຫຍັນຂັນເຄື່ອນ”ທີ່ ACDFIM 13, ຜູ້ບັນຊາການປ້ອງກັນຊາດ 10 ປະເທດ ອາຊຽນ ໄດ້ແລກປ່ຽນຢ່າງກົງໄປກົງມາ, ຕີລາຄາຢ່າງພາວະວິໄສຕໍ່ສະພາບຄວາມໝັ້ນຄົງຂອງພາກພື້ນ, ໃນນັ້ນ ພິເສດ ໄດ້ເຕື້ອງເຖິງບັນຫາພົ້ນເດັ່ນປະຈຸບັນຄື: ໄພທຳມະຊາດ, ການປ່ຽນແປງຂອງດິນຟ້າອາກາດ, ອາດຊະຍາກຳຂ້າມຊາດ, ການຄ້າມະນຸດ ແລະ ຢາເສບຕິດ, ຄວາມປອດໄພເຄືອຄ່າຍອິນເຕີແນັດ, ຄວາມປອດໄພການເດີນທະເລ, ກໍ່ການຮ້າຍ.. ພິເສດ ບັນຫາຄວາມໝັ້ນຄົງ, ຄວາມປອດໄພການເດີນທະເລ ຢູ່ ທະເລຕາເວັນອອກ ແມ່ນເນື້ອໃນສຳຄັນໂດຍບັນດາຜູ້ບັນຊາການປອ້ງກັນຊາດໄດ້ສຸມໃສ່ປຶກສາຫາລື. ພົນຕີ ສຸວອນ ເລືອງບຸນມີ, ຫົວຫນ້າກົມໃຫຍ່ເສນາທິການ ກອງທັບ ປະຊາຊົນປະຕິວັດລາວ, ປະທານ ACDFIM 13 ຢືນຢັນວ່າ: ກອງປະຊຸມຄັ້ງນີ້ ແມ່ນເຫດການສຳຄັນໃນສະພາບປະຈຸບັນ ຂະນະທີ່ບັນຫາສັນຕິພາບ, ສະຖຽນລະພາບຢູ່ທະເລຕາເວັນອອກພວມຖືກຜົນສະທ້ອນ.
ສຽງທ່ານ ສຸວອນ
ກໍ່ມີທັດສະນະເຊັ່ນດຽວກັນ, ພົນຕີ Romeo Tanango, ຫົວຫນ້າຄະນະຜູ້ແທນ ຟິລີບປີນເຂົ້າຮ່ວມກອງປະຊຸມ ຖືວ່າ: ເລື່ອງບັນດາປະເທດ ອາຊຽນ ມີທັດສະນະລວມກ່ຽວກັບບັນຫາທະເລຕາເວັນອອກ ແມ່ນມີຄວາມຈຳເປັນທີ່ສຸດ ແລະ ການເພີ່ມທະວີບັນດາການເຄື່ອນໄຫວສ້າງຄວາມໄວ້ເນື້ອເຊື່ອໃຈຂອງບັນດາກຳລັງການທະຫານທີ່ເຄື່ອນໄຫວບົນທະເລ, ເຂດນ່ານຟ້າຢູ່ທະເລຕະເວັນອອກ, ບົນພື້ນຖານຂອງມາດຖານສາກົນ ແລະ ບັນດາຄຳໝັ້ນສັນຍາພາກພື້ນ, ພິເສດ ແມ່ນ UNCLOC 1982 ແລະ DOC ແມ່ນມີຄວາມຈຳເປັນທີ່ສຸດ.
ຜູ້ບັນຊາການປ້ອງກັນປະເທດບັນດາປະເທດ ອາຊຽນ
ພາບ:vov
|
ຜູ້ຕາງຫນ້າກຳລັງປ້ອງກັນຊາດບັນດາປະເທດ ອາຊຽນ ກໍເນັ້ນຫນັກເຖິງເລື່ອງຕ້ອງມີສະພາບແວດລ້ອມສັນຕິພາບ ຢູ່ ທະເລຕາເວັນອອກ ຈຶ່ງສ້າງເງື່ອນໄຂເພື່ອເສດຖະກິດເຕີບໂຕ ແລະ ວັດທະນາຖາວອນຢູ່ ພາກພື້ນ. ຄວາມຈິງໄດ້ວາງອອກຄວາມຮຽກຮ້ອງຕ້ອງການ ນັ້ນແມ່ນບັນດາຝ່າຍຕ້ອງເຄົາລົບກົດໝາຍສາກົນ. ພົນຈັດຕະວາ ຫວູຕຽນຈ້ອງ, ຫົວຫນ້າສະຖາບັນຄົ້ນຄ້ວາການທະຫານ - ກະຊວງປ້ອງກັນປະເທດ ຫວຽດນາມ ຢືນຢັນວ່າ:
“ຍາມໃດ ຫວຽດນາມ ກໍຢັ້ງຢືນເປັນສະມາຊິກຕັ້ງຫນ້າຂອງ ອາຊຽນ. ຫວຽດນາມ ເນັ້ນຫນັກເປັນພິເສດເຖິງບັນດາບັນຫາຄວາມໝັ້ນຄົງຄວາມປອດໄພໃນການເຮືອຢູ່ທະເລຕາເວັນອອກ ແລະ ຕ້ອງເຄົາລົບກົດໝາຍ, ປະຕິບັດຢ່າງເຂັ້ມງວດ ແລະ ບໍ່ໄດ້ເຮັດໃຫ້ສະພາບເດີມຢູ່ທະເລຕາເວັນອອກປະຈຸບັນ ປ່ຽນແປງ ເພື່ອຫລີກລ້ຽງການນາບຂູ່ເຖິງຄວາມໝັ້ນຄົງ, ຄວາມປອດໄພ ແລະ ການພັດທະນາຢູ່ພາກພື້ນ.”
ກອງປະຊຸມ ACDFIM 13 ໄດ້ຮັບການຕີລາຄາວ່າ ແມ່ນກອງປະຊຸມສຳເລັດຜົນ ດ້ວຍຖະແຫລງການຮ່ວມໄດ້ເຕື້ອງເຖິງຫລາຍບັນຫາກ່ຽວກັບຄວາມໝັ້ນຄົງຂອງພາກພື້ນ, ໃນນັ້ນ ຕ້ອງປະຕິບັດ DOC ຢ່າງຄົບຖ້ວນ ແລະ ມີປະສິດທິຜົນ, ສ້າງ COC ໂດຍໄວ ເພື່ອຮັກສາສັນຕິພາບ ຢູ່ ທະເລຕາເວັນອອກ. ຕາມພົນຈັດຕະວາ ຫວູຕຽນຈ້ອງ, ຫົວຫນ້າສະຖາບັນຄົ້ນຄ້ວາການທະຫານ ສັງກັດກະຊວງປ້ອງກັນປະເທດຫວຽດນາມແລ້ວ, ຖະແຫລງການຮ່ວມ ACDFIM 13 ໄດ້ເນັ້ນຫນັກວ່າ :ບັນດາຝ່າຍຕ້ອງໃຫ້ຄຳໝັ້ນສັນຍາປະຕິບັດ DOC ຢ່າງເຂັ້ມງວດ ແລະ ມຸ້ງໄປເຖິງ COC ນັ້ນແມ່ນຈຸດໃຫມ່ຂອງກອງປະຊຸມ.
“ນີ້ແມ່ນຄັ້ງທຳອິດວົງການນັກການທະຫານຂອງ ອາຊຽນ ໄດ້ນຳເອົາບັນຫາທະເລຕາເວັນອອກ ດ້ວຍຫລັກໝັ້ນລວມເຂົ້າໃນຖະແຫລງການຮ່ວມນັ້ນແມ່ນ: ເນັ້ນຫນັກວ່າ ບັນດາຝ່າຍຕ້ອງໃຫ້ຄຳໝັ້ນສັນຍາປະຕິບັດ DOC ຢ່າງເຂັ້ມງວດ ແລະ ມຸ່ງໄປເຖິງ COC. ຂ້າພະເຈົ້າຖືວ່າ ນີ້ແມ່ນທັດສະນະ, ຫລັກໝັ້ນທຳອິດໄດ້ຮັບຄວາມເປັນເອກະພາບຈາກວົງການການທະຫານຂອງ ອາຊຽນ.”
ໃນສະພາບການມີປະເທດຈຳນວນຫນຶ່ງ ຍັງລະເມີດກົດໝາຍສາກົນ, ມີການກະທຳກໍ່ຄວາມເຄັ່ງຕຶງຢ່າງລຽນຕິດຢູ່ທະເລຕາເວັນອອກ, ເລື່ອງກອງປະຊຸມຜູ້ບັນຊາການກຳລັງປ້ອງກັນຊາດບັນດາປະເທດ ອາຊຽນ ຄັ້ງທີ 13 ບໍ່ເປັນທາງການ ໄດ້ເຫັນດີ ນຳບັນຫາທະເລຕາເວັນອອກເຂົ້າໃນຖະແຫລງການຮ່ວມນັ້ນ ອາດຈະຖືວ່າ ແມ່ນ ການຫັນປ່ຽນໃຫຍ່ ມີຄວາມໝາຍສຳຄັນໃນສະພາບການປະຈຸບັນ. ຫວັງວ່າ ການກະທຳນີ້ຂອງວົງການເຈົ້າຫນ້າທີ່ການທະຫານ ອາຊຽນ ຈະປະກອບສ່ວນພໍສົມຄວນ ໃນການຮັກສາສັນຕິພາບ, ຄວາມໝັ້ນຄົງ ແລະ ສະຖຽນລະພາບຢູ່ ພາກພື້ນເວົ້າສະເພາະ ແລະ ໃນໂລກເວົ້າລວມ.