(vovworld)- ດ້ວຍບັນດາລາຍການສິລະປະທີ່ເປັນເອກະລັກສະເພາະ ແລະ ມີຄວາມໝາຍ, ເຂັ້ມຂົ້ນໄປດ້ວຍສີສັນວັດທະນະທຳພື້ນເມືອງຂອງກຳປູເຈຍ, ລາຍການສະແດງສິລະປະກຳປູເຈຍດຳເນີນໄປຢູ່ນະຄອນຫລວງຮ່າໂນ້ຍຫວ່າງແລ້ວນີ້ ໄດ້ສ້າງຄວາມປະທັບໃຈທີ່ສຸດໃຫ້ແກ່ຜູ້ຊົມຮ່າໂນ້ຍ. ໂດຍແມ່ນການເຄື່ອນໄຫວເປີດສາກໃຫ້ແກ່ສັບປະດາວັດທະນະທຳກຳປູເຈຍ ຢູ່ ຫວຽດນາມ ຄັ້ງທີ 4, ລາຍການສິລະປະແມ່ນໂອກາດເພື່ອໂຄສະນາວັດທະນະທຳກຳປູເຈຍ ຢູ່ ຫວຽດນາມ, ຜ່ານນັ້ນ ປະກອບສ່ວນເພີ່ມທະວີຄວາມເຂົ້າອົກເຂົ້າໃຈລະຫວ່າງປະຊາຊົນສອງປະເທດ.
ລາຍການສິລະປະກຳປູເຈຍໄດ້ນຳເອົາສີສັນວັດທະນະທຳທີ່ເປັນຫລາຍຮູບຫລາຍແບບຂອງປະເທດແຫ່ງວັດວາອາຮາມມາໃຫ້ຜູ້ຊົມ. ຜູ້ຊົມນະຄອນຫລວງຮ່າໂນ້ຍບໍ່ພຽງແຕ່ໄດ້ຮັບຊົມບັນດາວາດຟ້ອນ Apsara, ຊື່ງແມ່ນວາດຟ້ອນທີ່ເຄີຍສະແດງໃນພະລາຊະວັງຂອງກຳປູເຈຍເທົ່ານັ້ນ ຫາກຍັງໄດ້ຮັບຊົມບັນດາວາດຟ້ອນສະແດງໃຫ້ເຫັນການດຳລົງຊີວິດປະຈຳວັນຂອງຊາວຊົນເຜົ່າສ່ວນຫນ້ອຍຢູ່ກຳປູເຈຍອີກດ້ວຍຄື: ການດຳນາ, ການເກັບກ່ຽວກໍຄືບບົດເພງເວົ້າເຖິງຄວາມຮັກຂອງບ່າວສາວກຳປູເຈຍໃນຍາມເກັບກ່ຽວ.
ລາຍການສິລະປະທີ່ເປັນເອກະລັກສະເພາະ ແລະ ເຂັ້ມຂົ້ນໄປດ້ວຍສີສັນວັດທະນະທຳ
ພື້ນເມືອງຂອງກຳປູເຈຍ
ພາບ:internet |
ບັນດາບົດເພງ, ວາດຟ້ອນ ໂດຍນັກສິລະປິນກຳປູເຈຍສະແດງໄດ້ສ້າງຄວາມປະທັບໃຈຢ່າງເລິກເຊິ່ງໃຫ້ແກ່ຜູ້ຊົມຊາວນະຄອນຫລວງ ຮ່າໂນ້ຍ. ນາງ Nguyen Thi Minh ຜູ້ຊົມຢູ່ນະຄອນຫລວງຮ່າໂນ້ຍໃຫ້ຮູ້ວ່າ: ຂ້າພະເຈົ້ານິຍົມລາຍການສິລະປະນີ້ຫຼາຍ, ພິເສດແມ່ນບັນດາຊຸດອາພອນພື້ນເມືອງຂອງນັກສິລະປິນ ກຳປູເຈຍ ມັນມີສີສັນຫລາກຫລາຍ, ລີລາການສະແດງກໍອອນຊອນ.
“ຂ້າພະເຈົ້າຮູ້ສຶກປະທັບໃຈເມື່ອໄດ້ຮັບຊົມວາດຟ້ອນໂຕຕັກແຕນຂອງບັນດານັກສິລະປິນກຳປູເຈຍ, ມັນມີຊີວິດຊີວາ ແລະ ກະຕືລືລົ້ນ, ຊຸດອາພອນສີຂຽວທີ່ນັກສິລະປິນນຸ່ງປຽບເໝືອນໂຕຕັກແຕນແທ້ໆ, ອັນໄດ້ສ້າງຄວາມດູດດື່ມທີ່ສຸດ.”
ອ້າຍ Rin Keo ຊາວກຳປູເຈຍຜູ້ຫນຶ່ງທີ່ພວມດຳລົງຊີວິດ ແລະ ເຮັດວຽກຢູ່ ຮ່າໂນ້ຍ ເວົ້າວ່າ: ຂ້າພະເຈົ້າມີຄວາມປິຕິຊົມຊື່ນທີ່ສຸດເມື່ອສິລະປະກຳປູເຈຍໄດ້ນຳມາສະແດງຢູ່ນະຄອນຫລວງຮ່າໂນ້ຍ,
“ຂ້າພະເຈົ້າເຫັນວ່າ ຜູ້ຊົມນະຄອນຫລວງຮ່າໂນ້ຍ ເຖິງວ່າບໍ່ເຂົ້າໃຈພາສາກຳປູເຈຍກໍຕາມ ແຕ່ເຂົາເຈົ້າພັດເມົາມົວຕິດຕາມລາຍການ ແລະ ຕົບມືຢ່າງລ່ຽນຕິດເພື່ອຊົມເຊີຍບັນດານັກສິລະປິນກຳປູເຈຍ. ຂ້າພະເຈົ້າຫວັງວ່າຈະມີຫລາຍລາຍການສິລະປະຄືແນວນີ້ເພື່ອໃຫ້ປະຊາຊົນ ຫວຽດນາມ ເຂົ້າໃຈກ່ຽວກັບວັດທະນະທຳກຳປູເຈຍ, ຜ່ານນັ້ນເພີ່ມທະວີຄວາມເຂົ້າອົກເຂົ້າໃຈລະຫວ່າງປະຊາຊົນສອງປະເທດກວ່າ.”
ຊຸດອາພອນສີຂຽວທີ່ນັກສິລະປິນນຸ່ງປຽບເໝືອນໂຕຕັກແຕນແທ້ໆ
ພາບ: TTXVN
|
ໂດຍຮູ້ສຶກຕື້ນຕັນໃຈຕໍ່ການຕ້ອນຮັບຢ່າງອົບອຸ່ນຂອງຜູ້ຊົມນະຄອນຫລວງຮ່າໂນ້ຍ, Sem Chhovy ນັກສິລະປິນໃນຄະນະສິລະປະກອນແຫ່ງຊາດກຳປູເຈຍໃຫ້ຮູ້ວ່າ:
“ພວກຂ້າພະເຈົ້າດີໃຈຫລາຍເມື່ອເຫັນວ່າ ຊາວຫວຽດນາມ ແລະ ຊາວກຳປູເຈຍຢູ່ ນະຄອນຫຼວງຮ່າໂນ້ຍໄດ້ມາຊົມ ແລະ ລະດົມກຳລັງໃຈພວກຂ້າພະເຈົ້າເປັນຈຳນວນຫລວງຫລາຍ. ລາຍການສະແດງສິລະປະຄັ້ງນີ້ເປັນການເຄື່ອນໄຫວຂ່ຳນັບຊົມເຊີຍປີມິດຕະພາບ ຫວຽດນາມ ກຳປູເຈຍ 2012. ພວກຂ້າພະເຈົ້າຂໍສະແດງຄວາມຂອບອົກຂອບໃຈຜູ້ຊົມຫວຽດນາມທຸກຄົນທີ່ໄດ້ສະໜັບສະໜູນໃຫ້ແກ່ລາຍການ.”
ພາຍຫລັງສະແດງຢູ່ຮ່າໂນ້ຍ, ຄະນະສິລະປະກອນແຫ່ງຊາດກຳປູເຈນ ຈະສືບຕໍ່ໄປສະແດງຢູ່ແຂວງ ຈາວີງ ພາກໃຕ້ຫວຽດນາມ. ລາຍການສະແດງສິລະປະກຳປູເຈຍຢູ່ ຫວຽດນາມ ຄັ້ງນີ້ ແມ່ນເຫດການວັດທະນະທຳທີ່ມີຄວາມໝາຍເພື່ອຂ່ຳນັບຊົມເຊີຍປີມິດຕະພາບ ຫວຽດນາມ ກຳປູເຈຍ 2012 ແລະ ສະເຫລີມສະຫລອງ 45 ປີແຫ່ງວັນສ້າງຕັ້ງສາຍພົວພັນທາງການທູດ. ການເຄື່ອນໄຫວແລກປ່ຽນ ສິລະປະຄື ວັດທະນະທຳຄືດັ່ງກ່າວໄດ້ເປັນການປະກອບສ່ວນຮັກສາ, ພັດທະນາ ແລະ ເພີ່ມພູນຄູນສ້າງສາຍພົວພັນບ້ານໃກ້ເຮືອນຄຽງທີ່ເປັນມູນເຊື້ອລະຫວ່າງ ຫວຽດນາມ ແລະ ກຳປູເຈຍ./.