ບັນດາຜູ້ແທນເຂົ້າຮ່ວມການໂອ້ລົມສົນທະນາ
ພາບ:vov
|
(vovworld)- ມີແຮດ 1.200 ໂຕຖືກຂ້າເອົາເຂົາເພື່ອສະຫນອງໃຫ້ບັນດາປະເທດໃນອາຊຽນ. ນັ້ນແມ່ນ ຕົວເລກໂດຍຜູ້ຕາງຫນ້າອົງການປ້ອງກັນຕ້ານຢາເສບຕິດ ແລະ ອາດຊະຍາກຳ ຂອງ ສປຊ (UNODC) ປະກາດທີ່ການໂອ້ລົມສົນທະນາ ດ້ວຍຫົວຂໍ້ວ່າ: “ລາວ - ຫວຽດນາມ ເພີ່ມທະວີຮັບມືກັບໄພຄ້າຂາຍຊັບພະຍາກອນທຳມະຊາດຂ້າມຊາຍແດນ” ທີ່ຫາກໍໄດ້ຈັດຕັ້ງຂຶ້ນໃນຕົ້ນເດືອນ 4 ຜ່ານມາຢູ່ ນະຄອນຫລວງ ວຽງຈັນ. ທີ່ການໂອ້ລົມສົນທະນາ, ສອງຝ່າຍໄດ້ຍົກໃຫ້ເຫັນສິ່ງທ້າທາຍ ແລະ ມາດຕະການແກ້ໄຂຕ່າງໆໃນການປ້ອງກັນຕ້ານໄພຄ້າຂາຍຊັບພະຍາກອນທຳມະຊາດຂ້າມຊາຍແດນລະຫວ່າງສອງປະເທດ.
ມີແຮດ 1.200 ໂຕຖືກຂ້າເອົາເຂົາເພື່ອສະຫນອງໃຫ້ບັນດາປະເທດໃນອາຊຽນ
ພາບ:internet
|
ຜູ້ຕາງຫນ້າຂອງອົງການປ້ອງກັນຕ້ານຢາເສບຕິດ ແລະ ອາດຊະຍາກຳ ຂອງ ສປຊ ໃຫ້ຮູ້ວ່າ: ອາຊຽນ ປະຈຸບັນ ແມ່ນຫນຶ່ງໃນບັນດາສະຖານທີ່ຮ້ອນເຮັ່ງກ່ຽວກັບສະພາບການຄ້າຂາຍຊັບພະຍາກອນທຳມະຊາດຢ່າງຜິດກົດໝາຍ, ຕົ້ນຕໍແມ່ນສັດປ່າ ແລະ ໄມ້. ອົງການປ້ອງກັນຕ້ານຢາເສບຕິດ ແລະ ອາດຊະຍາກຳ ຂອງ ສປຊ (UNODC) ໃຫ້ຮູ້ວ່າ: ຈຳນວນແຮດ ອາຟຼິກາ ຖືກຂ້າ ແລະ ເອົາເຂົາ ເພື່ອສະຫນອງໃຫ້ພາກພື້ນ ອາຊີຕາເວັນອອກສ່ຽງໃຕ້ ເພີ່ມຈາກ 13 ໂຕໃນປີ 2007 ຂຶ້ນປະມານ 1.200 ໂຕໃນປີ 2015. ສາຍເຫດດັ່ງກ່າວຍ້ອນຄວາມເຂົ້າໃຈຜິດກ່ຽວກັບຄຸນປະໂຫຍດການແພດຂອງເຂົາແຮດ. ມີຫລາຍຄົນເຊື່ອວ່າເຂົາແຮດສາມາດປິ່ນປົວໂລກມະເຮັງ ແລະ ພະຍາດອື່ນໄດ້. ແຕ່ມາຮອດປະຈຸບັນ ບໍ່ທັນມີການພິສູດດ້ານວິທະຍາສາດໃດສະແດງໃຫ້ເຫັນວ່າເຂົາແຮດ ມີຜົນປະໂຫຍດໃດຕໍ່ສຸຂະພາບ. ທ່ານ Giovani Broussard, ຜູ້ຊ່ຽວຊານ ອົງການປ້ອງກັນຕ້ານຢາເສບຕິດ ແລະ ອາດຊະຍາກຳ ຂອງ ສປຊ (UNODC) ໃຫ້ຮູ້ວ່າ:
“ພາກພື້ນ ອາຊຽນ, ຍອດມູນຄ່າບັນດາກໍລະນີຄ້າຂາຍຊັບພະຍາກອນທຳມະຊາດຢ່າງຜິດກົດໝາຍແມ່ນໃຫຍ່ຫລວງທີ່ສຸດ ອາດຈະສູງກວ່າ GDP ຂອງປະເທດຈຳນວນຫນຶ່ງໃນພາກພື້ນ. ແຕ່ລະປີລາຍຮັບຂອງບັນດາອົງການອາດຊະຍາກຳຂ້າມຊາດອາດຈະຂຶ້ນເຖິງເກືອບ 100 ຕື້ USD. ພວກຂ້າພະເຈົ້າຄາດຄະເນວ່າ 1/ 4 ຈຳນວນເງິນທີ່ເກັບມາໄດ້ຈາກການຄ້າຂາຍເຖື່ອນຊັບພະຍາກອນທຳມະຊາດ ພິເສດ ແມ່ນກ່ຽວຂ້ອງເຖິງການຂາຍໄມ້ ເຖື່ອນ, ສັດປ່າ, ບັນດາປະເພດຕ້ອງໄດ້ຮັບການຮັກສາກໍຄືການຂົນສົ່ງບັນດາປະເພດສິນຄ້າອື່ນ. ພວກຂ້າພະເຈົ້າເອົາໃຈໃສ່ເປັນພິເສດເຖິງການຂາຍໄມ້ເຖື່ອນ ແລະ ສັດປ່າ. ນັ້ນແມ່ນສາຍເຫດທີ່ພວກເຮົາຈຶ່ງມີຫນ້າຢູ່ທີ່ນີ້ເພື່ອປຶກສາຫາລືກັບບັນດາເຈົ້າຫນ້າທີ່ລັດຖະບານລາວ ແລະ ຫວຽດນາມ, ເຮັດແນວໃດພວກເຮົາສາມາດສະກັດກັ້ນໄພຄ້າຂາຍຢ່າງຜິດກົດໝາຍຜ່ານຊາຍແດນທາງບົກລະຫວ່າງສອງປະເທດ.”
ການຄ້າຂາຍໄມ້ຢ່າງຜິດກົດໝາຍຜ່ານຊາຍແດນພວມແມ່ນບັນຫາຮ້ອນເຮັ່ງ
ພາບ:internet
|
ບັນດາບົດປະກອບຄຳເຫັນທີ່ການໂອ້ລົມສົນທະນາຄັ້ງນີ້ລ້ວນແຕ່ສະແດງໃຫ້ເຫັນສະພາບຄ້າຂາຍຊັບພະຍາກອນຢ່າງຜິດກົດໝາຍຜ່ານຊາຍແດນທາງບົກນັບມື້ນັບຜັນແປໄປຢ່າງສັບສົນ ດ້ວຍຫລາຍກົນອຸບາຍທີ່ເລິກແລບ, ກໍ່ຜົນຮ້າຍຢ້ອນຫລັງຢ່າງຮ້າຍແຮງເຖິງລະບົບຊີວະພາບ, ການພັດທະນາເສດຖະກິດ ແລະ ນາບຂູ່ເຖິງຄວາມສະຫງົບປອດໄພແຫ່ງຊາດ, ຄວາມໝັ້ນຄົງຂອງພາກພື້ນ ແລະ ໂລກ. ໃນໄລຍະຜ່ານມາ, ກຳລັງພະນັກງານມີພາລະບົດບາດຂອງບັນດາປະເທດອາຊຽນ ໄດ້ຄົ້ນພົບ ແລະ ຈັບຂັງບັນດາກໍລະຂົນສົ່ງ, ຄ້າຂາຍສັດປ່າ, ພືດ ແລະ ໄມ້ຫາຍາກລະຫວ່າງຊາດຢ່າງຜິດກົດໝາຍ. ສະນັ້ນ ບັນດາຜູ້ແທນຖືວ່າ ບັນດາປະເທດ ພິເສດແມ່ນບັນດາປະເທດມີຊາຍແດນຮ່ວມຄື ລາວ ແລະ ຫວຽດນາມ ຄວນສົມທົບກັນຢ່າງແຫນ້ນແຟ້ນ ເພື່ອຫລຸດຜ່ອນບັນດາລະບຽບການທີ່ຊ້ຳຊ້ອນກັນເພື່ອຍົກສູງປະສິດທິຜົນການສະກັດກັ້ນໄພຄ້າຂາຍຊັບພະຍາກອນທຳມະຊາດຢ່າງຜິດກົດໝາຍ. ພັນຕີ ອິນປົງ ຈັນທະວົງສາ, ຮອງຫົວຫນ້າກົມປ້ອງກັນ ແລະ ຕ້ານຢາເສບຕິດ, ກະຊວງປ້ອງກັນຄວາມສະຫງົບລາວໃຫ້ຮູ້ວ່າ:
ສຽງທ່ານອິນປົງ
ຕາມບັນດາຜູ້ແທນເຂົ້າຮ່ວມການໂອ້ລົມສົນທະນາແລ້ວ, ທັງລາວ ແລະ ຫວຽດນາມ ໄດ້ປະຕິຮູບບັນດາຂໍ້ກຳນົດ, ກອບກົດໝາຍ, ເພີ່ມທະວີການລົງນາມໃນບົດບັນທຶກຊ່ວຍຈຳເພື່ອຮ່ວມມືໃນຂົງເຂດນີ້. ເຖິງຢ່າງໃດກໍຕາມ ຄວາມຈິງໃຫ້ເຫັນວ່າ ຍັງມີບັນດາການເຄື່ອນໄຫວຄ້າຂາຍຢ່າງຜິດກົດໝາຍຜ່ານຊາຍແດນລະຫວ່າງສອງປະເທດ. ສະນັ້ນ ຄວນມານະພະຍາຍາມກວ່າອີກ ເພື່ອຜັນຂະຫຍາຍບັນດາການກະທຳລະອຽດ.
ສິ້ນສຸດກອງປະຊຸມເຈລະຈາເມື່ອດຳເນີນໃນເວລາ 2 ວັນ ລະຫວ່າງຫວຽດນາມ ແລະລາວ, ສອງຝ່າຍເຫັນດີ ປັບປຸງການພົວພັນຮ່ວມມືສອງຝ່າຍ, ແລກປ່ຽນຂໍ້ມູນຂ່າວ, ຮ່ວມມືປະຕິບັດກົດໝາຍຂ້າມຊາຍແດນ ເພີ່ມທະວີລະບົບຕິດຕາມກວດກາຊາຍແດນຢ່າງມີປະສິດທິຜົນ ເພື່ອສະກັດກັ້ນໄພຄ້າຂາຍສັດປ່າພືດ ແລະ ໄມ້ຜ່ານຊາຍແດນສອງປະເທດຢ່າງຜິດກົດໝາຍ.