(vovworld)- ຫວ່າງແລ້ວນີ້, ສປປ ລາວໄດ້ຮັບລາງວັນສາກົນ“ສະຖານທີ່ທ່ອງທ່ຽວດີທີ່ສຸດຢູ່ໃນໂລກປີ 2013” ໂດຍສະພາສະຫະພາບເອີລົບ ກ່ຽວກັບການທ່ອງທ່ຽວ ແລະ ການຄ້າ ມອບໃຫ້ ຍ້ອນມີບັນດາຜົນງານກະໂດດຂັ້ນກ່ຽວກັບການພັດທະນາການທ່ອງທ່ຽວແບບຍືນຍົງ, ໃກ້ຊິດກັບທຳມະຊາດ, ຖືກຜົນກະທົບຈາກຊີວະພາບຕຳ່ ແລະ ອະນຸລັກຮັກສາຊີວະນາໆພັນທຳມະຊາດ.
ເມື່ອເວົ້າເຖິງປະເທດລາວ ແມ່ນເວົ້າເຖິງຄວາມອຸດົມສົມບູນກ່ຽວກັບຄວາມສາມາດບົ່ມຊ້ອນດ້ານການທ່ອງທ່ຽວທີ່ມີຮູບຮ່າງ ແລະ ບໍ່ມີຮູບຮ່າງ. ປະເທດລ້ານຊ້າງດ້ວຍງານບຸນວັດທະນະທຳທີ່ເປັນເອກະລັກສະເພາະຫລາຍຢ່າງ ແລະ ລະບົບວັດວາອາຮາມ ປະມານ1400 ແຫ່ງ ຖືກຕັ້ງກະແຈກກະຈາຍຢູ່ທົ່ວແຖບຖິ່ນຂອງປະເທດຊາດ ຈາກພາກເຫນືອຕະຫລອດຮອດພາກໃຕ້. ຕາມທ່ານ ວິໄລທອງ ສີຊານົນ, ຫົວຫນ້າສະຖາບັນສື່ມວນຊົນ ແລະ ວັດທະນະທຳລາວ ແລ້ວ, ນີ້ແມ່ນທ່າໄດ້ປຽບອັນໃຫຍ່ຫລວງຂອງຂະແຫນງທ່ອງທ່ຽວລາວ.
ສຽງທ່ານ ວິໄລທອງ ສີຊານົນ
ຕາມທ່ານ ບໍ່ແສງຄຳ ວົງດາລາ, ລັດຖະມົນຕີກະຊວງຖະແຫລງຂ່າວ ແລະ ວັດທະນະທຳລາວ ແລ້ວ, ໃນຊຸມປີມໍ່ໆມານີ້, ລັດຖະບານລາວໄດ້ສຸມໃສ່ລົງທຶນພັດທະນາ ແລະ ສົ່ງເສີມການທ່ອງທ່ຽວວັດທະນະທຳ, ຊີວະພາບ ແລະ ປະຫວັດສາດ. ປະຈຸບັນ ລາວມີສະຖານທີ່ທ່ອງທ່ຽວເກືອບ 1500 ແຫ່ງ, ໃນນັ້ນ ມີ ສະຖານທີ່ທ່ອງທ່ຽວຊີວະພາບເກືອບ 850 ແຫ່ງ, ສະຖານທີ່ທ່ອງທ່ຽວວັດທະນະທຳ 435 ແຫ່ງ ແລະ ສະຖານທີ່ທ່ອງທ່ຽວປະຫວັດສາດ 200 ແຫ່ງ. ໃນໄລຍະຜ່ານມາ, ເຖິງວ່າຖືກຜົນສະທ້ອນຈາກວິກິດການເສດຖະກິດທົ່ວໂລກກໍຕາມ, ແຕ່ຈຳນວນແຂກທ່ອງທ່ຽວມາຢ້ຽມຢາມລາວເພີ່ມຂຶ້ນຢ່າງລຽນຕິດ, ສະເລ່ຍແຕ່ລະປີເພີ່ມຂຶ້ນ 20,36%. ຖ້າຫາກເມື່ອປີ 2010, ຈຳນວນແຂກທ່ອງທ່ຽວມາຢ້ຽມຢາມລາວບັນລຸ 2,5 ລ້ານເທື່ອຄົນ, ປີ 2012 ບັນລຸໄດ້ 3,3 ລ້ານເທື່ອຄົນ, ໃນນັ້ນ ນັກທ່ອງທ່ຽວມາຈາກຫວຽດນາມກວມອັດຕາຫລາຍພໍສົມຄວນ. ເອື້ອຍ ອະມີນາ ອິນທະວົງ ນັກທຸລະກິດລາວເຊື້ອຊາດຫວຽດນາມ, ຜູ້ອຳນວຍການບໍລິສັດທ່ອງທ່ຽວກິລາ Phoenix Voyages Laos ຢູ່ນະຄອນຫລວງ ວຽງຈັນໃຫ້ຮູ້ວ່າ:
“ນັກທ່ອງທ່ຽວຫວຽດນາມໄປຢ້ຽມຢາມລາວ ສະເລ່ຍໃນແຕ່ເດືອນ ມີ 4,5 ຄະນະ. ສະເພະເດືອນ 10, 11 ແລະ 12 ແມ່ນຈຸດເວລາທີ່ນັກທ່ອງທ່ຽວມາຢ້ຽມຢາມລາວຫລາຍສຸດ. ເມື່ອມາຢ້ຽມຢາມລາວ ນັກທ່ອງທ່ຽວສ່ວນຫລາຍນິຍົມທີ່ສຸດແມ່ນບັນຍາກາດສະຫງົບງຽບຢູ່ທີ່ນີ້ແລະຄວາມປະທັບໃຈຕໍ່ທັດສະນີຍະພາບຫລາຍແຫ່ງຄື: ລະບົບຖ້ຳ ວຽງໄຊ ຢູ່ແຂວງ ຫົວພັນ, ທາດຫລວງ ຢູ່ວຽງຈັນ, ເຂດທ່ອງທ່ຽວຊີວະພາບ ວັງວຽງ ແລະ ພິເສດ ກຸງເກົ່າຫລວງພະບາງ ແມ່ນມໍລະດົກໂລກ, ຢູ່ທີ່ນີ້ໄດ້ຮັບຖືວ່າແມ່ນຫນຶ່ງໃນບັນດານະຄອນທີ່ສະຫງົບງຽບ ແລະ ສ້າງຄວາມດູດດື່ມກວ່າໝູ່ຢູ່ອາຊີຕາເວັນອອກສຽງໃຕ້.”
 |
ທ່ອງທ່ຽວແມ່ນຂະແຫນງເສດຖະກິດພັດທະນາຢ່າງວ່ອງໄວທີ່ສຸດ ແລະ ສວມບົດບາດສຳຄັນໃນພື້ນຖານເສດຖະກິດລາວ. ປີ 2012, ລາຍຮັບຈາກຂົງເຂດທ່ອງທ່ຽວລາວບັນລຸກວ່າ 513 ລ້ານ USD. ຍາມໃດລັດຖະບານລາວກໍບຸລິມະສິດແກ່ການພັດທະນາຂະແຫນງອຸດສາຫະກຳປອດຄວັນນີ້ ດ້ວຍການຍົກລະດັບພື້ນຖານໂຄງລ່າງ ແລະ ຍົກສູງຄຸນນະພາບຖັນແຖວພະນັກງານທ່ອງທ່ຽວກໍຄືໂຄສະນາຜ່ານບັນດາພາຫະນະສື່ມວນຊົນ. ທ່ານ ວິໄລທອງ ສີຊານົນ ຫົວຫນ້າ ສະຖາບັນສື່ມວນຊົນ ແລະ ວັດທະນະທຳລາວ ຖືວ່າ:
ສຽງທ່ານ ວິໄລທອງ ສີຊານົນ
ລາຍການທ່ອງທ່ຽວຜ່ານບັນດາປະເທດ ອາຊຽນ ແນ່ນອນວ່າຈະດຶງດູດນັກທ່ອງທ່ຽວເປັນຈຳນວນຫລວງຫລາຍ ແລະ ໃນລາຍການທ່ອງທ່ຽວນັ້ນ ປະເທດລາວທີ່ສວຍງາມ, ປຊຊ ລາວເຊິ່ງແມ່ນຜູ້ສະຫນິດສະຫນົມແລະ ຮັກແພງແຂກຄົນນັ້ນ ຈະສ້າງຄວາມປະທັບໃຈຫລາຍຢ່າງທີ່ຍາກຈະລືມໄດ້ກ່ຽວກັບ ວັດທະນະທຳອຸດົມສົມບູນ, ທິວທັດທຳມະຊາດທີ່ສວຍງາມແລະໃຫຍ່ໂຕມະໂຫຖານແຕ່ຍັງຄົງຮັກສາຈຸດດັ້ງເດີ່ມໄວ້ໄດ້ພ້ອມກັບເຂດປູຊະນີຍະສະຖານທີ່ດູດດື່ມຫລາຍແຫ່ງອີກ.