ສຳນັກງານຂອງ ສະຖານີໂທລະພາບ ກຳປູເຈຍ TVK

ປີ 1975, ສະຖານີວິທະຍຸ ແລະ ໂທລະພາບ ກຳປູເຈຍ ຖືກລັດຖະບານຂະແມແດງທຳລາຍ. ຮອດປີ 1983, ລັດຖະບານ ກຳປູເຈຍ ໄດ້ຕັດສິນໃຈສ້າງຕັ້ງສະຖານີໂທລະພາບ ກຳປູເຈຍ ຄືນໃໝ່. ແຕ່ຊຸມວັນທຳອິດຂອງການສ້າງຕັ້ງ, ສະຖານີໂທລະພາບ ກຳປູເຈຍ TVK, ເຊິ່ງເມື່ອກ່ອນແມ່ນ ສະຖານີໂທລະພາບ ລາຊະອານາຈັກກຳປູເຈຍ TVRK ໄດ້ຮັບການຊ່ວຍເຫຼືອບໍ່ແມ່ນໜ້ອຍ ນັບທັງດ້ານຊັບພະຍາກອນມະນຸດ ແລະ ວັດຖຸເຄື່ອງອຸປະກອນຈາກຝ່າຍ ລັດຖະບານ ຫວຽດນາມ. ກ່ຽວກັບດ້ານຊັບພະຍາກອນມະນຸດ, ຫວຽດນາມ ໄດ້ບຳລຸງສ້າງພະນັກງານໃຫ້ແກ່ ສະຖານີໂທລະພາບ ກຳປູເຈຍ. ຫວນຄືນສະໄໝນັ້ນ, ທ່ານ Ouy Bounmy, ຜູ້ກໍ່ຕັ້ງສະຖານີໂທລະພາບ ກຳປູເຈຍ TVK ໃຫ້ຮູ້ວ່າ:

“ປີ 1983, ການນຳສະຖານີວິທະຍຸແຫ່ງຊາດ ກຳປູເຈຍ ໄດ້ສົ່ງພະນັກງານ 23 ຄົນ ໄປຮຽນຢູ່ນະຄອນ ເກີ່ນເທີ, ຫວຽດນາມ. ໄລຍະຝຶກອົບຮົມ 45 ວັນຢູ່ ຫວຽດນາມ ຮູ້ສຶກວ່າແມ່ນໄລຍະເວລາສັ້ນທີ່ສຸດສຳລັບຜູ້ທີ່ຍັງບໍ່ທັນມີຄວາມຮູ້ດ້ານວິຊາການທາງໂທລະພາບຄືພວກຂ້າພະເຈົ້າ. ສິ້ນສຸດຊຸດຝຶກອົບຮົມຢູ່ ຫວຽດນາມ, ຄະນະພວກຂ້າພະເຈົ້າໄດ້ກັບມາປະເທດ. ຕອນນັ້ນ, ຝ່າຍ ຫວຽດນາມ ກໍໄດ້ສົ່ງຄະນະນັກຊ່ຽວຊານຈາກ ເກີ່ນເທີ  ໄປກຳປູເຈຍ ຊ່ວຍເຫຼືອພວກຂ້າພະເຈົ້າຕື່ມອີກ, ຊ່ວຍພວກຂ້າພະເຈົ້າໃນການຖ່າຍທຳ, ຜະລິດລາຍການ”.

ທ່ານ Ouy Bounmy, ຜູ້ກໍ່ຕັ້ງສະຖານີໂທລະພາບ ກຳປູເຈຍ TVK

ກ່ຽວກັບດ້ານວັດຖຸເຄື່ອງອຸປະກອນ, ພື້ນຖານໂຄງລ່າງເກົ່າສ່ວນຫຼາຍແມ່ນຖືກພວກ ປອນປົດ ມ້າງທຳລາຍແລ້ວ, ສະນັ້ນ ເມື່ອສ້າງຕັ້ງຄືນໃໝ່, ສະຖານີໂທລະພາບຂາດແຄນຫຼາຍຢ່າງນັບທັງດ້ານພື້ນຖານວັດຖຸຕະຫຼອດຮອດເຄື່ອງອຸປະກອນ. ເວລານັ້ນ, ກຳປູເຈຍ ຖືກຂວ້ຳບາດ, ສະນັ້ນ ການຊື້ເຄື່ອງອຸປະກອນໃໝ່ ຍິ່ງປະສົບກັບຄວາມຫຍຸ້ງຍາກ. ໃນສະພາບການນັ້ນ, ລັດຖະບານ ຫວຽດນາມ  ສືບຕໍ່ໃຫ້ການຊ່ວຍເຫຼືອຢ່າງທັນການໃຫ້ແກ່ປະເທດເພື່ອນບ້ານ, ຊ່ວຍ ກຳປູເຈຍ ສັ່ງຊື້ເຄື່ອງອຸປະກອນຈາກປະເທດອື່ນ. ທ່ານ Ouy Bounmy ແບ່ງປັນຕື່ມອີກວ່າ:

“ພວກຂ້າພະເຈົ້າມີເຄື່ອງຖ່າຍວິດີໂອຂາວ-ດຳ 16mm ແຕ່ອັນດຽວ ແລະ ຕ້ອງລ້າງຟິມ, ອັດຮູບແບບເຮັດດ້ວຍມື. ຕໍ່ໜ້າສະພາບການນັ້ນ, ຝ່າຍ ຫວຽດນາມ ໄດ້ໜູນຊ່ວຍເຄື່ອງອຸປະກອນຈຳນວນໜຶ່ງ ແລະ ຊ່ວຍສັ່ງຊື້ອຸປະກອນຈາກປະເທດອື່ນໃຫ້ສະຖານີໂທລະພາບ ກຳປູເຈຍ, ເພາະເວລານັ້ນ ກຳປູເຈຍ ກຳລັງຖືກຂວ້ຳບາດຢູ່. ພາຍຫຼັງໄລຍະເວລາມານະພະຍາຍຍາມຢ່າງບໍ່ຢຸດຢັ້ງ, ວັນທີ 28 ຕຸລາ 1983 ພວກຂ້າພະເຈົ້າກໍສາມາດອອກອາກາດທົດລອງ ແລະ ຮອດວັນທີ 3 ທັນວາ 1983, ສະຖານີໂທລະພາບ ກຳປະເຈຍ ກໍອອກອາກາດລາຍການທຳອິດຢ່າງເປັນທາງການ ແລະ ຮັກສາການອອກອາກາດ 3 ຕອນຕໍ່ອາທິດ.”

ການພົບປະແລກປ່ຽນລະຫວ່າງ VTV ແລະ TVK

ພາຍຫຼັງທີ່ສະຖານີໂທລະພາບ ກຳປູເຈຍ ເລີ່ມອອກອາກາດລາຍການທຳອິດ, ບັນດານັກຊ່ຽວຊານຂອງ ຫວຽດນາມ ກໍຍັງຢູ່ຕໍ່ເພື່ອແນະນຳກ່ຽວກັບດ້ານວິຊາການໃຫ້ແກ່ພະນັກງານຂອງສະຖານີໂທລະພາບ, ທັງເຂົ້າຮ່ວມການຜະລິດລາຍການໂດຍກົງ, ຍ້ອນວ່າ ໃນຕອນນັ້ນ, ພະນັກງານຂອງສະຖານີຍິງມີໜ້ອຍ. ທ່ານ Ouy Bounmy ເລົ່າຄືນສູ່ຟັງວ່າ:

“ເມື່ອຫາກໍ່ສ້າງຕັ້ງຂຶ້ນ, ພວກຂ້າພະເຈົ້າຍັງປະສົບກັບຄວາມຫຍຸ້ງຍາກຫຼາຍຢ່າງກ່ຽວກັບດ້ານຊັບພະຍາກອນມະນຸດ. ທັງທິມງານມີແຕ່ 3 ຄົນ. ເພາະສະນັ້ນ, ພວກຂ້າພະເຈົ້າຕ້ອງການການຊ່ວຍເຫຼືອຈາກນັກຊ່ຽວຊານ ຫວຽດນາມ ທີ່ສຸດ. ເຂົາເຈົ້າບໍ່ພຽງແຕ່ແນະນຳໃຫ້ພວກຂ້າພະເຈົ້າກ່ຽວກັບທິດສະດີເທົ່ານັ້ນ ຫາກຍັງຊ່ວຍພວກຂ້າພະເຈົ້າໄດ້ລົງມືຖ່າຍທຳ, ຜະລິດລາຍການຕົວຈິງອີກດ້ວຍ. ຕອນກາງເວັນ, ເຂົາເຈົ້າຊ່ວຍຜະລິດລາຍການ, ຮອດຕອນຄ່ຳສືບຕໍ່ແບ່ງປັນປະສົບການໃຫ້ແກ່ພວກຂ້າພະເຈົ້າ. ພາຍຫຼັງ 1 ປີ, ພວກຂ້າພະເຈົ້າຈຶ່ງສາມາດເປັນເຈົ້າການໃນການຜະລິດລາຍການໄດ້ ແລະ ເພີ່ມເວລາອອກອາກາດຂຶ້ນເປັນ 2 – 3 ຊົ່ວໂມງຕໍ່ວັນ, ເວລານັ້ນ ນັກຊ່ຽວຊານ ຫວຽດນາມ ຈຶ່ງກັບເມືອປະເທດ”.

ທ່ານ Khim Vuthy ຜູ້ອຳນວຍການໃຫຍ່ສະຖານີໂທລະພາບ ກຳປູເຈຍ

ບໍ່ພຽງແຕ່ຮຽງບ່າຮຽງໄຫຼ່, ຊ່ວຍເຫຼືອສະຖານີໂທລະພາບຂອງປະເທດເພື່ອນບ້ານແຕ່ຊຸມວັນສ້າງຕັ້ງທຳອິດເທົ່ານັ້ນ, ໄລຍະເວລາຕໍ່ມາ ສອງປະເທດຍັງສືບຕໍ່ຈັດການເຄື່ອນໄຫວເພີ່ມທະວີການພົບປະແລກປ່ຽນປະສົບການ, ໜູນຊ່ວຍເຊິ່ງກັນແລະກັນ. ເມື່ອແບ່ງປັນກ່ຽວກັບການຮ່ວມມືລະຫວ່າງສະຖານີໂທລະພາບ ຫວຽດນາມ (VTV) ແລະ ສະຖານີໂທລະພາບ ກຳປູເຈຍ (TVK), ທ່ານ Khim Vuthy ຜູ້ອຳນວຍການໃຫຍ່ສະຖານີໂທລະພາບ ກຳປູເຈຍ ໃຫ້ຮູ້ວ່າ:

“ກ່ອນທີ່ຈະມາດຳລົງຕຳແໜ່ງເປັນຜູ້ອຳນວຍການ TVK, ຂ້າພະເຈົ້າກໍໄດ້ເຂົ້າຮ່ວມບັນດາຊຸດຝືກອົບຮົມ, ຮຽນຮູ້ປະສົບການຂອງ VTV ແລະ ເຄີຍໄປປະຕິບັດງານຢູ່ ຫວຽດນາມ ກ່ຽວກັບການຮ່ວມມືກັບ VTV ເພື່ອແບ່ງປັນຂໍ້ມູນຂ່າວສານ, ລາຍການສຶກສາ, ບັນເທີງໃຫ້ແກ່ພະນັກງານ. ປັດຈຸບັນ, ພວກຂ້າພະເຈົ້າພວມນຳໃຊ້ເຄື່ອງອຸປະກອນເຊິ່ງ VTV ຊ່ວຍເຫຼືອ, ນີ້ທັງແມ່ນການອຸປະຖຳທີ່ສຳຄັນທັງແມ່ນອະນຸສອນທີ່ເລິກເຊິ່ງສຳລັບພວກຂ້າພະເຈົ້າ. ຈາກການມີແຕ່ຊ່ອງໂທລະພາບດຽວໃນເບື້ອງຕົ້ນ, ປັດຈຸບັນ, TVK ມີ 2 ຊ່ອງໂທລະພາບ ແລະ 1 ຄື້ນອອກອາກາດລາຍການກະຈາຍສຽງ.”

ດ້ວຍບັນດາຜົນງານທີ່ບັນລຸໄດ້, ໃນອະນາຄົດ, ຄວາມຜູກພັນລະຫວ່າງສອງປະເທດເວົ້າລວມ, ການໜູນຊ່ວຍ, ຮ່ວມມືໃນຂົງເຂດກະຈາຍສຽງ, ໂທລະພາບເວົ້າສະເພາະ ຈະໝັ້ນຄົງທະນົງແກ່ນ ແລະ ນັບມື້ນັບເສີມຂະຫຍາຍປະສິດທິຜົນ. ປີ 2023 ແມ່ນປີພິເສດດ້ວຍເຫດການສຳຄັນຫຼາຍຢ່າງຂອງກຳປູເຈຍຄື: ການເລືອກຕັ້ງສະມາຊິກສະພາແຫ່ງຊາດ, ເປັນເຈົ້າພາບຈັດຕັ້ງ ຊີເກມ. ໃນຂະນະນັ້ນ, ຫວຽດນາມ ໄດ້ມີປະສົບການໃນການໃຫ້ຂ່າວກ່ຽວກັບ ຊີເກມ ຜ່ານ 2 ຄັ້ງແລ້ວ. ດັ່ງນັ້ນ, ໃນການເຮັດວຽກມໍ່ໆມານີ້ລະຫວ່າງ VTV ແລະ TVK, ສອງຝ່າຍກໍໄດ້ເຫັນດີເພີ່ມທະວີການຮ່ວມມື ແລະ ໜູນຊ່ວຍ TVK ຫຼາຍກວ່າອີກ ໃນການບຳລຸງສ້າງຊັບພະຍາກອນມະນຸດ ກໍຄື ເຄື່ອງມືອຸປະກອນ ຊ່ວຍໃຫ້ TVK ເວົ້າສະເພາະ ແລະ ກຳປູເຈຍ ເວົ້າລວມ ປະຕິບັດສຳເລັດໜ້າທີ່ສື່ມວນຊົນໃນການເປັນເຈົ້າພາບຈັດງານມະຫາກຳກິລາ ຊີເກມ 32 ໃຫ້ເປັນຢ່າງດີທີ່ສຸດ./.