ໂດຍໄດ້ຮັບການສ້າງຕັ້ງຂຶ້ນໃນວັນທີ 21 ກໍລະກົດປີ 1975, ມາຮອດປັດຈຸບັນ, ສູນກາງສະມາຄົມມິດຕະພາບ ຫວຽດນາມ - ກຳປູເຈຍ ມີທັງໝົດ 55 ສະມາຄົມໃນທົ່ວປະເທດ, ໃນນັ້ນ ມີ 43 ສະມາຄົມຂັ້ນແຂວງ, ນະຄອນ ສັງກັດສູນກາງ ແລະ 8 ສະມາຄົມມິດຕະພາບຂອງກອງທັບ, ແນວໂຮມນັກຊ່ຽວຊານ, ທະຫານອາສາສະໝັກ, 1 ສະໂມສອນວິສາຫະກິດ ແລະ 2 ຮາກຖານບຳລຸງສ້າງ ແລະ ສະມາຄົມ ຈົ່ວທາບ, ດ້ວຍສະມາຊິກກວ່າ 4 ໝື່ນຄົນ. ໃນສະພາບການທີ່ໂລກລະບາດໂຄວິດ - 19 ແຜ່ລະບາດຢ່າງແຮງ ຢູ່ ກຳປູເຈຍ ໃນໄລຍະຜ່ານມາ, ພ້ອມກັບພັກ, ລັດຖະບານ, ສະຫະສະມາຄົມມິດຕະພາບ ຫວຽດນາມ - ກຳປູເຈຍ ກໍໄດ້ຮຽກຮ້ອງ, ປຸກລະດົມການຊ່ວຍເຫຼືອທັງເງິນສົດ ແລະ ວັດຖຸອຸປະກອນການແພດເປັນຫຼາຍຄັ້ງ ເພື່ອຊ່ວຍເຫຼືອປະເທດເພື່ອນບ້ານຍູ້ໂລກລະບາດໃຫ້ຖອຍໄປ. ທ່ານ ຫວູເວືອງຫວຽດ, ຮອງປະທານຜູ້ປະຈຳການສູນກາງສະມາຄົມ ມິດຕະພາບ ຫວຽດນາມ - ກຳປູເຈຍ ໃຫ້ຮູ້ວ່າ:

“ທ້າຍປີ 2020, ພວກຂ້າພະເຈົ້າລະດົມເງິນຊ່ວຍເຫຼືອໄດ້ຈຳນວນ 50 ລ້ານດົ່ງ ພ້ອມດ້ວຍຜ້າອັດປາກ 12.500 ອັນ ແລະ ນ້ຳຢາຂ້າເຊື້ອ 500 ຕຸກ. ຮອດຕົ້ນປີ 2021, ພວກຂ້າພະເຈົ້າໄດ້ປຸກລະດົມຢູ່ພາກເໜືອ ໄດ້ຜ້າອັດປາກກວ່າ 267.000 ອັນ, ຊຸດປ້ອງກັນພະຍາດ 100 ຊຸດ, ສ່ວນຢູ່ພາກໃຕ້ລະດົມໄດ້ຜ້າອັດປາກກວ່າ 137.000 ອັນ, ນ້ຳຢາຂ້າເຊື້ອ 220 ຕຸກ, ນອກຈາກນັ້ນ ຍັງໄດ້ຮັບການຊ່ວຍເຫຼືອຈາກແຂວງອື່ນໆອີກດ້ວຍ. ໃນການລະດົມຄັ້ງທີ 3 ທີ່ໄດ້ເລີ່ມແຕ່ທ້າຍເດືອນເມສາຜ່ານມາ, ທາງສູນກາງສະມາຄົມກໍໄດ້ສົ່ງຈົດໝາຍໄປຍັງສະມາຄົມສະມາຊີກ, ບັນດາຜູ້ໃຈບຸນໃຈກຸສົນ, ຮຽກຮ້ອງການຊ່ວຍເຫຼືອດ້ວຍເງິນສົດ ແລະ ລະດົມມາໄດ້ 500 ລ້ານດົ່ງ ແລ້ວມອບໃຫ້ສະຖານທູດເພື່ອສົ່ງໄປໃຫ້ປະຊາຊົນ ກຳປູເຈຍ.”

ສູນກາງສະມາຄົມມິດຕະພາບ ຫວຽດນາມ - ກຳປູເຈຍ ຊ່ວຍເຫຼືອລັດຖະບານ ແລະ ປະຊາຊົນ ກຳປູເຈຍ 500 ລ້ານດົ່ງ ເພື່ອປ້ອງກັນ, ຕ້ານໂລກລະບາດ

ໃນວຽກງານການທູດປະຊາຊົນ ລະຫວ່າງ ຫວຽດນາມ - ກຳປູເຈຍ, ການໂຄສະນາເຜີຍແຜ່, ເພີ່ມພູນຄູນສ້າງໄມຕີຈິດມິດຕະພາບໃນໝູ່ປະຊາຊົນທຸກຊັ້ນວັນນະ, ພິເສດແມ່ນໃນຄົນລຸ້ນໜຸ່ມ, ນັກຮຽນ, ນັກສຶກສາສອງປະເທດໄດ້ຮັບການກຳນົດວ່າ ແມ່ນໜ້າທີ່ສຳຄັນແຖວໜ້າ. ນັບແຕ່ປີ 2012 ມານີ້, ຂະບວນການ “ຫຼໍ່ລ້ຽງໄມຕີຈິດມິດຕະພາບ” - ອຸປະກະລະນັກສຶກສາກຳປູເຈຍ ທີ່ພວມຮ່ຳຮຽນຢູ່ ຫວຽດນາມ, ໂດຍສູນກາງສະມາຄົມມິດຕະພາບ ຫວຽດນາມ - ກຳປູເຈຍ ໄດ້ປຸກລະດົມ ກໍ່ໄດ້ຮັບການຕອບສະໜອງຢ່າງຕັ້ງໜ້າ. ມາຮອດປັດຈຸບັນ, ຂະບວນການດັ່ງກ່າວ ໄດ້ອຸປະກະລະນັກສຶກສາ ກຳປູເຈຍ ທັງໝົດ ເກືອບ 450 ຄົນ ແລ້ວ. ໂດຍເປັນອະດີດນັກຊ່ຽວຊານ ທີ່ມີການຜູກພັນເປັນເວລາຍາວນານ ແລະ ມີອາລົມຈິດພິເສດຕໍ່ປະເທດແຫ່ງວັດວາອາຮາມນີ້, ທ່ານ ຟ້າມຕວ໊ຽນ ແມ່ນບຸກຄົນທຳອິດທີ່ເຂົ້າຮ່ວມຂະບວນການທີ່ເຕັມໄປດ້ວຍຄວາມໝາຍນີ້. ມາຮອດປັດຈຸບັນ, ທ່ານໄດ້ເປັນຜູ້ອຸປະກະລະໃຫ້ແກ່ນັກສຶກສາກຳປູເຈຍ ທັງໝົດ 9 ຄົນ ແລ້ວ. ທ່ານແບ່ງປັນສູ່ຟັງວ່າ:

“ໄມຕີຈິດມິດຕະພາບລະຫວ່າງ ຫວຽດນາມ - ກຳປູເຈຍ ແມ່ນຕ້ອງກໍ່ສ້າງໃຫ້ພັດທະນາຍິ່ງໆຂຶ້ນ. ດ້ວຍທ່າໄດ້ປຽບທີ່ເຄີຍເປັນນັກຊ່ຽວຊານໄປຊ່ວຍເຫຼືອ ກຳປູເຈຍ ສ້າງສາປະເທດຄືນໃໝ່, ໂດຍມີຄວາມເຂົ້າໃຈກ່ຽວກັບປະເທດຊາດ, ວັດທະນທຳ ແລະ ຊາວກຳປູເຈຍ, ສະນັ້ນ, ຂ້າພະເຈົ້າສະໝັກໃຈເຂົ້າຮ່ວມຂະບວນການນີ້ນັບແຕ່ຫົວທີ. ການຮັບອຸປະກະລະນັກສຶກສາເປັນລູກເປັນຫຼານ, ເບິ່ງແຍງດູແລນັບທັງທາງດ້ານວັດຖຸ ແລະ ຈິດໃຈ ແມ່ນເພື່ອເຮັດແນວໃດໃຫ້ພວກຫຼານຮຽນໃຫ້ເກັ່ງ ແລະ ບັນລຸໝາກຜົນທີ່ດີເມື່ອກັບຄືນເມືອປະເທດ ແລະ ຮັກສາໄດ້ໄມຕີຈິດມິດຕະພາບ, ມີຄວາມເຂົ້າໃຈກ່ຽວກັບປະຊາຊົນ ຫວຽດນາມ”.

ລາຍການສະແດງສິລະປະຂອງນັກສຶກສາກຳປູເຈຍ ໃນງານ ຫຼໍ່ລ້ຽງໄມຕີຈິດມິດຕະພາບ

ໜຶ່ງໃນບັນດານັກສຶກສາທີ່ໄດ້ຮັບການອຸປະກະລະນັ້ນ, ຫຼາຍຄົນໄດ້ຈົບການສຶກສາ, ກັບຄືນເມືອ ກຳປູເຈຍ ເຮັດວຽກ, ແຕ່ສ່ວນຫຼາຍແມ່ນຍັງຕິດຕໍ່ພົວພັນ, ຢື້ຢາມຖາມຂ່າວບັນດາຄອບຄົວທີ່ໄດ້ໃຫ້ການຊ່ວຍເຫຼືອເຂົາເຈົ້າເປັນປະຈຳ, ຊ້ຳບໍ່ໜຳ ຍັງເຊີນພໍ່ແມ່ອຸປະກະລະໄປ ກຳປູເຈຍ ເພື່ອເຂົ້າຮ່ວມງານດອງຂອງຕົນ. Rattana, ໜຶ່ງໃນບັນດານັກສຶກສາກຳປູເຈຍ ທີ່ພວມຮຽນຢູ່ ຮ່າໂນ້ຍ, ແບ່ງປັນວ່າ:

“ພໍ່ແມ່ອຸປະກະລະໄດ້ຊ່ວຍເຫຼືອພວກນ້ອງຫຼາຍສິ່ງຫຼາຍຢ່າງ. ແຕ່ລະເທື່ອພົບປະກັນ, ເພີ່ນລ້ວນແຕ່ຖາມວ່າ ການກິນດື່ມຂອງພວກນ້ອງເປັນແນວໃດ, ການຮຽນເປັນຈັ່ງໃດ, ຂາດເຂີນຫຍັງບໍ ແລ້ວດົນໆກໍຈັດໃຫ້ພວກນ້ອງໄປຫຼີ້ນໄປທ່ຽວ ແລະ ເລົ່າເລື່ອງແຕ່ສະໄໝແຕ່ກີ້ ເມື່ອພ້ອມກັບປະຊາຊົນ ກຳປູເຈຍ ຕໍ່ສູ້ຕ້ານພວກ Pol Pot ແລະ ສ້າງສາປະເທດກຳປູເຈຍ ຄືນໃໝ່ ຄືແນວໃດ. ໃນໂອກາດວັນບຸນ ຕົວຢ່າງຄື ບຸນປີໃໝ່ປະຈຳຊາດຂອງ ຫວຽດນາມ ຫຼື ບຸນປີໃໝ່ຂອງ ກຳປູເຈຍ, ພໍ່ແມ່ມາຢາມພວກນ້ອງ ແລະ ໃຫ້ອັ່ງເປົ່າອີກດ້ວຍ, ຍາມໃດເພິ່ນກໍສ້າງບັນຍາກາດທີ່ໃກ້ຊິດສະໜິດສະໜົມນຳພວກຂ້າພະເຈົ້າ”.

ກວດພະຍາດຟຣີ ໃຫ້ແກ່ປະຊາຊົນ ກຳປູເຈຍ

ໄປຄຽງຄູ່ກັບຂະບວນການ “ຫຼໍ່ລ້ຽງໄມຕີຈິດມິດຕະພາບ”, ສະມາຄົມມິດຕະພາບ ຫວຽດນາມ - ກຳປູເຈຍ ຍັງຈັດຕັ້ງການເຄື່ອນໄຫວຕ່າງໆເພື່ອການກຸສົນ ເພື່ອແນໃສ່ຊ່ວຍເຫຼືອປະຊາຊົນ ກຳປູເຈຍ ຜູ້ທີ່ປະສົບກັບຄວາມຫຍຸ້ງຍາກ ດ້ວຍຫຼາຍຮູບຫຼາຍແບບ, ເປັນຕົ້ນແມ່ນ ການບໍລິຈາກຊ່ວຍເຫຼືອປະຊາຊົນ ກຳປູເຈຍ ທີ່ຖືກຜົນກະທົບຈາກໄພທຳມະຊາດ, ໄຟໄໝ້, ຈັດຕັ້ງການຢ້ຽມຢາມຖາມຂ່າວ, ມອບຂອງຂວັນໃຫ້ແກ່ປະຊາຊົນຢູ່ເຂດຊາຍແດນ ຫຼື ກວດພະຍາດ, ແຈກຢາຍຢຸກຢາຟຼີໃຫ້ແກ່ປະຊາຊົນ ກຳປູເຈຍ ເປັນປະຈຳ… ເພື່ອປະກອບສ່ວນເຂົ້າໃນການຊຸກຍູ້ການຮ່ວມມືດ້ານເສດຖະກິດ ລະຫວ່າງ ສອງປະເທດ, ທາງສະມາຄົມກໍໄດ້ສ້າງຕັ້ງສະໂມສອນວິສາຫະກິດ ເພື່ອໜູນຊ່ວຍ ແລະ ໃຫ້ຄຳປຶກສາສຳລັບບັນດາວິສາຫະກິດ ຫວຽດນາມ ທີ່ຊອກຫາໂອກາດໄປດໍາເນີນທຸລະກິດ, ຮ່ວມມືກັບບັນດາວິສາຫະກິດຂອງ ກຳປູເຈຍ. ປັດຈຸບັນ, ມີວິສາຫະກິດ ຫວຽດນາມ ຫຼາຍກວ່າ 100 ແຫ່ງນັບແຕ່ເໜືອຮອດໃຕ້ ໄດ້ເຂົ້າຮ່ວມສະໂມສອນ ວິສາຫະກິດ ຫວຽດນາມ - ກຳປູເຈຍ, ໃນນັ້ນ ມີຫຼາຍເຄື່ອງໝາຍການຄ້າ ໄດ້ເສີມຂະຫຍາຍການດຳເນີນທຸລະກິດຢ່າງມີປະສິດທິຜົນຢູ່ປະເທດແຫ່ງວັດວາອາຮາມນີ້ ເປັນຕົ້ນແມ່ນ ບໍລິສັດໃຫຍ່ ຢາງພາລາ ຫວຽດນາມ, ກຸ່ມບໍລິສັດ Viettel, ບໍລິສັດໃຫຍ່ການບິນ, ທະນາຄານ BIDV…