ໂດຍຫ່າງຈາກນະຄອນຫຼວງ ບາງກອກ ພຽງແຕ່ປະມານ 3 ຊົ່ວໂມງເມື່ອຂີ່່ລົດໂອໂຕໄປ, ຫົວຫີນ ແມ່ນນະຄອນໜ້ອຍ, ດ້ວຍເນື້ອທີ່ກວ້າງປະມານ  900 km². ນອກຈາກແຄມທະເລທີ່ໄດ້ຮັບການຂະໜາມນາມວ່າ ແມ່່ນໜຶ່ງໃນບັນດາຫາດຊາຍແຄມທະເລທີ່ສວຍງາມທີ່ສຸດຂອງໄທ ດ້ວຍຫາດຊາຍຂາວທີ່ມີຄວາມຍາວກວ່າ  5 km ແລະ ນໍ້າທະເລຂຽວໃສແລ້ວ, ຫົວຫີນ ຍັງມີຫຼາຍສະຖານທ່ີ່ທ່ອງທ່ຽວທີ່ດູດດື່ມ ແລະ ເຂັ້ມຂຸ້ນໄປດ້ວຍຈຸດທີ່ເປັນເອກະລັກສະເພາະກ່ຽວກັບວັດທະນະທໍາ, ປະຫວັດສາດ ແລະ ຊາວໄທອີກດ້ວຍ.

ສວນອຸທິຍານປະຫວັດສາດຣາຊະພັກ

        ການໄປຄົ້ນຫາເທດສະບານເມືອງຫົວຫີນຂອງຄະນະນັກຂ່າວ VOV ໄດ້ເລີ່ມແຕ່ສວນອຸທິຍານປະຫວັດສາດຣາຊະພັກ  ເຊິ່ງເປັນບ່ອນຕັ້ງຮູບປັ້ນພະມະຫາກະສັດ 7 ອົງໃນປະຫວັດສາດ ໄທ. ສວນອຸທິຍານດັ່ງກ່າວ ມີເນື້ອທີ່ກວ້າງປະມານ 36 ha, ໂດຍກອງທັບ ໄທ ກໍ່ສ້າງສໍາເລັດເມື່ອເດືອນກັນຍາ 2015. ຮູບປັ້ນທັງໝົດນີ້ລ້ວນແຕ່ໄດ້ເຮັດດ້ວຍທອງສໍາເລັດ, ໂດຍໄດ້ເຈຍລະໄນຢ່າງພິຖິພິຖັນຖືກຕ້ອງຕາມອັດຕາສ່ວນຂອງຄົນ ດ້ວຍຄວາມສູງສະເລ່ຍແມ່ນ 13,9 ແມັດ.

        “ເມື່ອມາຫົວຫີນ, ພວກຂ້າພະເຈົ້າໄດ້ແນະນໍາໃຫ້ແຂກທ່ອງທ່ຽວໄປຢ້ຽມຢາມສວນອຸທິຍານ ຣາຊະພັກ ເຊິ່ງເປັນບ່ອນຕັ້ງຮູບປັ້ນບັນດາພະມະຫາກະສັດຂອງໄທ. ສະຖານທີ່ນີ້ຄັກຫຼາຍ. ເມື່ອອ່ານປະຫວັດການອຸທິດສ່ວນຂອງເພິ່ນຢູ່ທີ່ນີ້ ຈຶ່ງເຂ້ົາໃຈວ່າ ເປັນຫຍັງປະເທດ ໄທ ຈຶ່ງມີການພັດທະນາຄືໃນປັດຈຸບັນ”.

        ໂດຍຫ່າງຈາກສວນອຸທິຍານ ຣາຊະພັກ ໄປປະມານ 30 ກິໂລແມັດ, ມີສະຖານທີ່ທ່ອງທ່ຽວໜຶ່ງອີກ ກໍ່ມີຄວາມດູດດື່ມແຂກທ່ອງທ່ຽວ ເມື່ອມາຫົວຫີນ ນັ້ນແມ່ນ ວິຫານ ຫ້ວຍມົງຄົນ. ນີ້ແມ່ນວິຫານບູຊານັກບວດ ຫຼວງພໍ່ທວດ ເຊິ່ງເປັນນັກບວດທີ່ມີຊື່ສຽງຂອງ ໄທ. ນີ້ແມ່ນວິຫານຜູ້ທີ່ມີຊື່ສຽງ ແລະ ສັກກະລະບູຊາສໍາລັບປະຊາຊົນໄທ.  ເມື່ອມາຢ້ຽມຢາມສະຖານທີ່ແຫ່ງນີ້ ບໍ່ວ່າເວລາໃດທ່ານກໍສາມາດພົບເຫັນຫຼາຍຄົນມາອະທິຖານຂໍໃຫ້ມີສຸຂະພາບເຂັ້ມແຂງ ແລະ ມີຄວາມຜາສຸກ. ນອກຈາກນັ້ນ, ຕາມຮີດຄອງປະເພນີແລ້ວ, ປະຊາຊົນຍັງຖືເຈ້ຍຄໍາມາຕິດໃສ່ຮູບປັ້ນນ້ອຍຮູບຕ່າງໆເພື່ອເອົາໂຊກເອົາໄຊ.

        “ຂ້າພະເຈົ້າໄດ້ຕິດເຈັ້ຍຄໍາໃສ່ຮູບປັ້ນເພື່ອພາວະນາຂໍໃຫ້ມີໂຊກມີລາບ. ເພາະວ່າ, ຕາມຂ້າພະເຈົ້າໄດ້ຮູ້ມາ ນີ້ແມ່ນຮູບປັ້ນຂອງນັກບວດອົງໜຶ່ງທີ່ມີຊື່ສຽງຢູ່ພາກໃຕ້ ຂອງໄທ ເຊິ່ງເປັນຄົນທີ່ມີຄວາມສາມາດປະຕິບັດບັນດາອະພິນິຫານທີ່ມະຫັດສະຈັນ ຄື ສາມາດປ່ຽນນໍ້າທະເລເປັນນໍ້າຈືດເພື່ອກູູ້ຄົນໄດ້, ສາມາດສະກັດກັ້ນການເກີດອຸປະຕິເຫດໃນເຫດໄຟໄໝ້... ດັ່ງນັ້ນ ຂ້າພະເຈົ້າຈຶ່ງມາທີ່ນີ້, ກ່ອນອື່ນໝົດແມ່ນເພື່ອບູຊາ, ຫຼັງຈາກນັ້ນແມ່ນເພື່ອພາວະນາຂໍໃຫ້ຕົນເອງພ້ອມດ້ວຍຄອບຄົວ ຈຶ່ງມີແຕ່່ຄວາມສະຫງົບສຸກ.”

        ສະຖານທີ່ checkin ຕໍ່ໄປ ເຊິ່ງພວກຂ້າພະເຈົ້າໄດ້ຮັບການແນະນໍາວ່າບໍ່ຄວນພາດ ນັ້ນແມ່ນສະຖານີລົດໄຟ ດ້ວຍຈຸດເນັ້ນຕົ້ນຕໍແມ່ນ ຫ້ອງລໍຖ້າພະລາດຊະວົງ. ນີ້ແມ່ນອາຄານໄດ້ເຮັດດ້ວຍໄມ້ທາສີແດງ ແລະ ສີເຫຼືອງແຈ້ງ, ເຊິ່ງໄດ້ອອກແບບຕາມສະຖາປັດຕະຍາກໍາເກົ່າແກ່ ເໝືອນດັ່ງການອອກແບບໃນສະໄໝ Victoria ຂອງຊຸມປີ 1920. ຢູ່ທີ່ນີ້, ແຂກທ່ອງທ່ຽວຈະໄດ້ພົບເຫັນບັນດາດອກໄຟແບບເກົ່າ ພ້ອມດ້ວຍບັນດາຮູບໂຕນົກແກະຄວັດສະຫຼັກທີ່ໄດ້ປະດັບປະດາຢູ່ຕໍ່ໜ້າລາງລົດໄຟ.  ທິວທັດທໍາມະຊາດ ບວກກັບ ວັດຖຸເຄື່ອງຂອງຕ່າງໆຢູ່ທີ່ນີ້ ປະສົມກັບສະຖານີລົດໄຟ ຫົວຫີນ ທີ່ເປັນເອກະລັກ ໄດ້ເຮັດໃຫ້ທິວທັດຢູ່ທີ່ນີ້ງາມ ເໝືອນດັ່ງພາບແຕ້ມ, ເຊິ່ງເປັນສະຖານທີ່ຖ່າຍຮູບທີ່ຈັບອົບຈັບໃຈສໍາລັບແຂກທ່ອງທ່ຽວ ເມື່ອມາຢ້ຽມຢາມຫົວຫີນ. ທ່ານຍ່າງຕໍ່ປະມານ 5 – 10 ນາທີ, ກໍຈະຮອດຕະຫຼາດກາງຄືນ ຫົວຫີນ, ເຊິ່ງເປັນສະຖານທີ່ເໝາະສົມກັບແຂກທ່ອງທ່ຽວທຸກເພດທຸກໄວ.

ຫ້ອງລໍຖ້າພະລາດຊະວົງ

        ຕະຫຼາດຫົວຫີນ ໄດ້ເປີດໃນຕອນຄໍ່າ ແຕ່ 6 ໂມງແລງຮອດ 23 ໂມງຕອນກາງຄືນ, ເຊິ່ງຄ້າຍຄືກັບຕະຫຼາດກາງຄືນຢູ່ຮ່າໂນ້ຍ. ຢູ່ຕະຫຼາດແຫ່ງນີ້ ເຂົາເຈົ້າໄດ້ວາງຂາຍເຄື່ອງທີ່ລະນຶກ, ເຄື່ອງຫັດຖະກໍາ, ອາຫານການກິນຫຼາຍຢ່າງ. ຈຸດພິເສດຂອງຕະຫຼາດແຫ່ງນີ້ ແມ່່ນມີຮ້ານອາຫານທະເລຫຼາຍຮ້ານຕັ້ງຢູ່ລຽບຕາມທາງເຂົ້າຕະຫຼາດ ແລະໄດ້ວາງຂາຍອາຫານຫຼາຍເຍື່ອງທີ່ແຊບຊ້ອຍ. ນອກຈາກນັ້ນ, ຢູ່ຕະຫຼາດແຫ່ງນີ້, ທ່ານກໍສາມາດຮັບຊິມບັນດາເຍື່ອງອາຫານທີ່ເປັນເອກະລັກຂອງໄທ ຄື ຕົ້ມຍໍາ, ຕໍາໝາກຫຸ່ງ, ເຂົ້າໜຽວໝາກມ່ວງ, ນໍ້າຫວານຂອງໄທ, ຜັດໄທ ແລະ ອື່ນໆອີກດ້ວຍ.

ຮ້ານອາຫານທະເລ ຕັ້ງຢູ່ລຽບຕາມທາງເຂົ້າຕະຫຼາດ

        “ຂ້າພະເຈົ້າໄດ້ລອງຊີມອາຫານບາງເຍື່ອງຢູ່ທີ່ນີ້ແລ້ວ. ອາຫານທະເລຢູ່ນີ້ສົດ, ແຊບ ແລະ ລາຄາຖືກຫຼາຍ. ທັງໝົດສະມາຊິກໃນຄອບຄົວຂ້າພະເຈົ້າກິນໝົດປະມານ 1000 ບາດເທົ່ານັ້ນ”.

        ຖ້າຫາກທ່ານມີແຜນຈະໄປຢ້ຽມຢາມປະເທດ ໄທ ນັ້ນ, ຂ້າພະເຈົ້າຄິດວ່າ ລາຍການທ່ອງທ່ຽວດັ່ງກ່າວ ກໍແມ່ນທາງເລືອກໜຶ່ງສໍາລັບທ່ານ. ແຕ່ນະຄອນຫຼວງ ບາງກອອກ, ທ່ານສາມາດຊື້ປີ້ລົດເມ ດ້ວຍລາຄາປະມານ 200 ກວ່າບາດສະກຸນເງິນໄທ ແລ້ວຂີີ່ລົດປະມານ 3 ຊົ່ວໂມງ ກໍສາມາດສູບອາກາດປອດໂປ່ງ ແລະ ຮັບຊົມທິດທັດທໍາມະຊາດທີ່ສວຍງາມ, ສະຫງົບງຽບຂອງໝູ່ບ້ານຊາວປະມົງນີ້ແລ້ວ.