(vovworld) - ຊອກຫາຍຸດທະສາດເພື່ອຊຸກຍູ້ການພົວພັນແລກປ່ຽນວັດທະນະທຳ ລະຫວ່າງ ອາຊຽນ ແລະ ສເກົາຫລີ” ແມ່ນຫນຶ່ງໃນບັນດາຫົວຂໍ້ຕົ້ນຕໍ ຂອງເວທີປາໄສ ສເກົາຫລີ - ອາຊຽນ ຄັ້ງທີ 7 ຊື່ງດຳເນີນໄປຢູ່ ຮ່າໂນ້ຍ ໃນທ້າຍເດືອນ 8 ຜ່ານມາ. ນີ້ແມ່ນຄວາມມານະພະຍາຍາມເພື່ອຕິດພັນ ແລະ ເຮັດໃຫ້ປະຊາຊົນຫຍັບມໍ່ເຂົ້າກັນກວ່າໃນອະນາຄົດ.
ເວທີປາໄສການຮ່ວມມື ອາຊຽນ ແລະ ສເກົາຫລີ ຄັ້ງທີ 7 ພາຍໃຕ້ຫົວຂໍ້ວ່າ “ໂລກສວຍງາມກວ່າໃນຄວາມຫລາກຫລາຍຮູບແບບ”, ບັນດານັກຮຽນຮູ້, ນັກການທູດ, ເຈົ້າຫນ້າທີ່ຂັ້ນສູງຂອງ ສເກົາຫລີ ແລະ ອາຊຽນ ຖືວ່າ: ນີ້ແມ່ນເຫດການສຳຄັນໃນວິວັດທະນາການພັດທະນາການພົວພັນລະຫວ່າງສອງຝ່າຍ, ພ້ອມກັນນັ້ນກໍເປັນການສົ່ງສານກ່ຽວກັບຄວາມເຊື່ອໝັ້ນ, ຄວາມເຂົ້າອົກເຂົ້າໃຈເຊິ່ງກັນ ແລະ ກັນ ລະຫວ່າງ ສເກົາຫລີ ແລະ ອາຊຽນ. ດຣ ຫງວຽນຮູຍຮ່ວາງ, ຮອງຫົວຫນ້າສະຖາບັນຄົ້ນຄ້ວາອາຊີຕາເວັນອອກສຽງໃຕ້ ໃຫ້ຮູ້ວ່າ:
“ທີ່ເວທີປາໄສຄັ້ງນີ້, ຂ້າພະເຈົ້າໄດ້ຮັບຟັງຄຳເຫັນຈາກຜູ້ແທນຫລາຍທ່ານເພື່ອຊຸກຍູ້ການພົວພັນສອງຝ່າຍ ອາຊຽນ - ສເກົາຫລີ. ຂ້າພະເຈົ້າຖືວ່າ ຄວາມເຂົ້າອົກເຂົ້າໃຈເຊິ່ງກັນ ແລະ ກັນລະຫວ່າງປະຊາຊົນ ອາຊຽນ ແລະ ສເກົາຫລີ ແມ່ນພື້ນຖານໃຫ້ແກ່ການພົວພັນຮ່ວມມືໃນທຸກຂົງເຂດ. ສະນັ້ນ ພວກຂ້າພະເຈົ້າຈະມານະພະຍາຍາມໂຄສະນາວັດທະນະທຳ, ປະເທດຊາດ ແລະ ຊາວ ຫວຽດນາມ ເວົ້າສະເພາະ ແລະ ອາຊຽນ ເວົ້າລວມອອກສູ່ປະຊາຊົນ ສເກົາຫລີ ແລະ ກົງກັນຂ້າມ ຈະສ້າງເງື່ອນໄຂເພື່ອໃຫ້ ສເກົາຫລີ ສາມາດຊຸກຍູ້ການພົວພັນສອງຝ່າຍ.”
ປະເທດ ສ ເກົາຫລີ
ພາບປະກອບ: internet
|
ເພື່ອສ້າງພື້ນຖານໃຫ້ແກ່ການພົວພັນອາຊຽນ - ສເກົາຫລີ ສາມາດພັດທະນາແບບຍືນຍົງ ແລະ ແຂງແຮງກວ່າໃນອະນາຄົດ, ທ່ານ Kim Wongsang ປະທານອົງການ Korea Foundation ໄດ້ສະເຫນີວ່າ: ສອງຝ່າຍຄວນຊຸກຍູ້ການພົວພັນແລກປ່ຽນທາງດ້ານວັດທະນະທຳ, ສິລະປະ, ກິລາ, ການສຶກສາບຳລຸງສ້າງໃຫ້ຫລາຍກວ່າອີກ, ສະຫນອງທຶນການສຶກສາໃຫ້ແກ່ນັກຮຽນສອງຝ່າຍ, ຈັດຕັ້ງງານຕະຫລາດນັດໂຄສະນາການທ່ອງທ່ຽວ ແລະ ສ້າງກອງທຶນວັດທະນະທຳຮ່ວມ ອາຊຽນ - ສເກົາຫລີ. ໂດຍມີທັດສະນະເຊັ່ນດຽວກັນກັບປະທານ ອົງການ Korea Foundation, ດຣ Moh Lee ຢູ່ມະຫາວິທະຍາໄລແຫ່ງຊາດ ເຊີອູນ ໄດ້ສະເຫນີວ່າ:
“ພວກເຮົາຄວນເປີດກວ້າງການພົວພັນແລກປ່ຽນດ້ານວັດທະນະທຳລະຫວ່າງ ອາຊຽນ ແລະ ສເກົາຫລີ, ຈັດຕັ້ງການເຄື່ອນໄຫວວາງສະແດງ, ໂຄສະນາວັດທະນະທຳລະຫວ່າງສອງຝ່າຍໃຫ້ຫລາຍກວ່າ. ພວກເຮົາຄວນສ້າງອົງການປະສານງານ, ຄຸ້ມຄອງບໍລິຫານບັນດາການເຄື່ອນໄຫວນັ້ນ. ນອກນັ້ນ ອາຊຽນ ແລະ ສເກົາຫລີ ຄວນຊຸກຍູ້ການເຂົ້າຮ່ວມຂອງບັນດາວິສາຫະກິດໃນການພົວພັນແລກປ່ຽນສິລະປະວັດທະນະທຳ.”
ເພື່ອສ້າງເງື່ອນໄຂໃຫ້ແກ່ປະຊາຊົນ ສເກົາຫລີ ແລະ ອາຊຽນ ພົບປະແລກປ່ຽນວັດທະນະທຳຢ່າງສະດວກກວ່າ, ສາສະດາຈານ, ດຣ Lee Joon Sik ຮອງຜູ້ອຳນວຍການມະຫາວິທະຍາໄລແຫ່ງຊາດ ເຊີອູນ ມີຄຳເຫັນວ່າ:
“ປະຈຸບັນ ສເກົາຫລີ ໄດ້ມີສັນຍາຍົກເວັ້ນ visa ໂດຍກຳນົດເວລາສຳລັບ ອາເມລິກາ, ຍີ່ປຸ່ນ… ໃນຂະນະນັ້ນ ບັນດາປະເທດອາຊຽນ ກໍມີສັນຍາຍົກເວັ້ນ visa ພາຍໃນກຸ່ມແລ້ວ, ພວກເຮົາຄວນປຶກສາຫາລືກ່ຽວກັບສັນຍາຍົກເວັ້ນ visa ລະຫວ່າງສອງຝ່າຍ. ພວກຂ້າພະເຈົ້າປາດຖະຫນາວ່າ ອາດຈະເຊັນສັນຍາກັບອາຊຽນໃນປີ 2015.”
ຕາມຄຳເຫັນຂອງທ່ານ Rodolfo Severino ຫົວຫນ້າສູນຄົ້ນຄ້ວາ ອາຊຽນ, ຂຶ້ນກັບມະຫາວິທະຍາໄລແຫ່ງຊາດ ສິງກະໂປແລ້ວ, ແນວຄວາມຄິດກ່ຽວກັບການຍົກເວັ້ນ visa ຄວນນຳເອົາມາປຶກສາຫາລືສອງຝ່າຍ, ລະຫວ່າງ ສເກົາຫລີ ກັບແຕ່ລະປະເທດ ອາຊຽນ. ຄຳເຫັນນີ້ຈະແມ່ນພື້ນຖານສຳຄັນເພື່ອໃຫ້ ສເກົາຫລີ ແລະ ບັນດາປະເທດສະມາຊິກ ອາຊຽນ ສືບຕໍ່ວາງອອກການກຳນົດທິດ ແລະ ບັນດາບາດກ້າວລະອຽດກວ່າໃນອະນາຄົດ.
ນອກຈາກຫົວຂໍ້ ເພີ່ມທະວີການພົວພັນແລກປ່ຽນດ້ານວັດທະນະທຳລະຫວ່າງ ອາຊຽນ ແລະ ສເກົາຫລີ, ທີ່ເວທີປາໄສຄັ້ງນີ້, ບັນດາຜູ້ແທນກໍປຶກສາຫາລືບັນດາຫົວຂໍ້ອື່ນຄື: ການຮ່ວມມືພັດທະນາ ສເກົາຫລີ - ອາຊຽນ, ການເຕີບໂຕເສດຖະກິດ ແລະ ພັດທະນາແບບຍືນຍົງ, ບັນຫາອົບພະຍົບ, ແຮງງານ, ຄວາມໝັ້ນຄົງໃນພາກພື້ນ, ປອດອາວຸດນິວເຄຼຍ.
ທີ່ເວທີປາໄສຄັ້ງນີ້, ສອງຝ່າຍໄດ້ວາງອອກຈຸດໝາຍລວມ, ມຸ່ງໄປເຖິງການສ້າງຄວາມເຊ່ືອໝັ້ນ ແລະ ຄວາມເຂົ້າອົກເຂົ້າໃຈເຊິ່ງກັນ ແລະ ກັນ ລະຫວ່າງປະຊາຊົນ ສເກົາຫລີ ແລະ ອາຊຽນ, ປະກອບສ່ວນຊຸກຍູ້ການພົວພັນສອງຝ່າຍໃຫ້ຍືນຍົງ, ຍາວນານ ແລະ ການພັດທະນາລະຫວ່າງ ອາຊຽນ ແລະ ສເກົາຫລີ ໃນອະນາຄົດໃຫ້ດີຍິ່ງກວ່າອີກ.
Trung Cuong