(vovworld) - ໂຄງການແລວເສດຖະກິດຕາເວັນອອກ - ຕາເວັນຕົກ (EWEC) ຖືກສ້າງຂຶ້ນທີ່ກອງປະຊຸມຄັ້ງທີ 8 ລັດຖະມົນຕີບັນດາປະເທດອາຊຽນ ແລະ ບັນດາຄູ່ຮ່ວມມື, ເຊິ່ງຈັດຂຶ້ນຢູ່ມານີລາ ໃນເດືອນ 10/1998. EWEC ຍາວ 1450 ກມ ແລະ ຂ້າມຜ່ານ 19 ແຂວງຂອງ 4 ປະເທດ: ມຽນມາ, ໄທ, ລາວ ແລະ ຫວຽດນາມ. ຈຸດປະສົງຂອງການສ້າງຕັ້ງ EWEC ແມ່ນເພື່ອແນໃສ່ເພີ່ມທະວີການຮ່ວມມືພັດທະນາເສດຖະກິດ, ການຄ້າ ແລະ ການລົງທຶນລະຫວ່າງບັນດາປະເທດສະມາຊິກ, ພິເສດແມ່ນໃນຂົງເຂດທ່ອງທ່ຽວ.
ລາຍການທ່ອງທ່ຽວມໍລະດົກພາກກາງ
ແລວເສດຖະກິດຕາເວັນອອກ - ຕາເວັນຕົກ ມີຄວາມສາມາດບົ່ມຊ້ອນ ແລະ ທ່າສະດວກເພື່ອພັດທະນາການທ່ອງທ່ຽວ. ນີ້ແມ່ນເຂດທີ່ມີຫຼາຍສີສັນ, ດ້ວຍພື້ນຖານວັດທະນະທຳຫຼາຍຮູບຫຼາຍແບບ, ອຸດົມສົມບຸນ, ມີທັດສະນີຍະພາບ, ປູຊະນີຍະສະຖານປະຫວັດສາດທີ່ລືຊື່ຫຼາຍແຫ່ງ. ປະຈຸບັນ, ເລື່ອງຮ່ວມສຳພັນໃນການທ່ອງທ່ຽວລະຫວ່າງແຂວງຕ່າງໆທີ່ຂຶ້ນກັບ 3 ປະເທດ: ຫວຽດນາມ - ລາວ - ໄທ ເຊິ່ງຂຶ້ນກັບແລວເສດຖະກິດນີ້ ໄດ້ຮັບການສ້າງຂຶ້ນ ແລະ ນັບມື້ນັບພັດທະນາ. ການຮ່ວມມືລະຫວ່າງບັນດາແຂວງກວາງຈີ້ (ຫວຽດນາມ) - ສະຫວັນນະເຂດ (ລາວ) - ມຸກດາຫານ (ໄທ) ກັບບັນດາແຂວງຢູ່ອ້ອມຂ້າງ, ໄດ້ສ້າງເປັນຕະຫຼາດທ່ອງທ່ຽວທີ່ເຕັມໄປດ້ວຍຄວາມສາມາດບົ່ມຊ້ອນ. ເລື່ອງຂຸດຄົ້ນການທ່ອງທ່ຽວຜ່ານ ແລວເສດຖະກິດຕາເວັນອອກ - ຕາເວັນຕົກ ຢ່າງມີປະສິດທິຜົນ ບໍ່ພຽງແຕ່ຕອບສະໜອງຄວາມຕ້ອງການຂອງນັກທ່ອງທ່ຽວເທົ່ານັ້ນ, ຫາກຍັງປະກອບສ່ວນສ້າງເງື່ອນໄຂໃຫ້ແກ່ການພັດທະນາບັນດາຮູບແບບບໍລິການທ່ອງທ່ຽວ, ນຳມາເຊິ່ງກາລະໂອກາດດຳເນີນທຸລະກິດໃຫ້ແກ່ປະຊາຊົນ, ສ້າງຜົນປະໂຫຍດໃຫ້ແກ່ຂະແໜງທ່ອງທ່ຽວຕ່າງໆໃນແລວເສດຖະກິດຕາເວັນອອກ - ຕາເວັນຕົກ, ປະກອບສ່ວນເຂົ້າໃນການພັດທະນາເສດຖະກິດ - ສັງຄົມຂອງແຕ່ລະທ້ອງຖີ່ນຢ່າງມີປະສິດທິຜົນອີກດ້ວຍ. ທ່ານ ຫງວຽນຫື້ວທັ໋ງ, ຫົວໜ້າພະແນກວັດທະນະທຳ ກິລາ ແລະ ທ່ອງທ່ຽວ ແຂວງກວາງຈີ້, ໃຫ້ຮູ້ວ່າ:
“ຢູ່ພາກກາງຫວຽດນາມ ມີສະຖານທີ່ທ່ອງທ່ຽວ 3 ແຫ່ງທີ່ສ້າງຄວາມດຶງດູດຊາວໄທ ເມື່ອມາຢ້ຽມຢາມຫວຽດນາມ ທີ່ສຸດ, ນັ້ນແມ່ນ: ຟອງຍາ, ຕົວເມືອງດ່ານັ້ງ ແລະ ທາງອຸໂມງວິ້ງມົກ ທີ່ບໍ່ເຄີຍມີຢູ່ແຫ່ງໃດ“.
ຖຳ້ຟອງຍາແຂວງກວາງບິ່ງ
ກວາງຈີ້ ແມ່ນແຫ່ງເຊື່ອມຕໍ່ບັນດາສະຖານທີ່ທ່ອງທ່ຽວຢູ່ພາກກາງຫວຽດນາມ. ນັກທ່ອງທ່ຽວ ໄທ ແລະ ລາວ ມາຢ້ຽມຢາມພາກກາງຫວຽດນາມ ຜ່ານດ່ານຊາຍແດນລາວບາວ ແຂວງກວາງຈີ້ ລ້ວນແຕ່ຢາກໄປທ່ອງທ່ຽວທາງອຸໂມງວິ້ງມົກ ກໍ່ຄືບັນດາຫາດອາບນຳ້ທະເລເຊັ່ນ: ເກືອຕຸ່ງ, ເກືອຫວຽດ. ແຜນພັດທະນາການທ່ອງທ່ຽວແຂວງກວາງຈີ້ ຮອດປີ 2015 ແມ່ນຕ້ອງເພີ່ມຈຳນວນນັກທ່ອງທ່ຽວໃຫ້ໄດ້ 2 ລ້ານກວ່າເທື່ອຄົນ.
ຈາກກວາງຈີ້, ນັກທ່ອງທ່ຽວໄທ ແລະ ລາວເຄີຍຄົ້ນຫາສະຖານທີ່ທ່ອງທ່ຽວຈຳນວນໜຶ່ງຢູ່ແຂວງກວາງບິ່ງ, ໃນນັ້ນມີຖຳ້ຟອງຍາແກບ່າງ, ເຊິ່ງແມ່ນມໍລະດົກທຳມະຊາດໂລກ, ທີ່ມີມາກ່ອນນີ້ 400 ລ້ານກວ່າປີ, ໃນນັ້ນມີຖຳ້ໃຫຍ່ນ້ອຍ 300 ກວ່າແຫ່ງ ທີ່ມີຄຸນຄ່າອັນດັບໜຶ່ງຂອງໂລກເຊັ່ນ, ຖຳ້ເຊີນດ່ອງ, ຖ້ຳຟອງຍາ, ຖ້ຳທຽນເດື່ອງ, ຖ້ຳ ແອ໋ນ….
ທາງອຸໂມງວິ້ງມົກ ແລະ ກໍ່ນອນໃນແລວເສດຖະກິດນີ້, ນະຄອນທ່ອງທ່ຽວດ່ານັ້ງ, ແຂວງເທື່ອທຽນເຫວ໋ ແມ່ນສະຖານທີ່ທ່ອງທ່ຽວທີ່ຂາດບໍ່ໄດ້ສຳລັບນັກທ່ອງທ່ຽວໄທ ແລະ ລາວ. ໃນຊຸມປີມໍ່ໆມານີ້, ຈຳນວນນັກທ່ອງທ່ຽວມາຢ້ຽມຢາມ ເຫວ໋ ໄດ້ເພີ່ມຂຶ້ນຫຼາຍ. ຫວ່າງແລ້ວນີ້ບັນດາແຂວງພາກກາງຫວຽດນາມ ແລະ ພາກເໜືອຂອງໄທ ໄດ້ມີການພົວພັນໃນຂົງເຂດທ່ອງທ່ຽວ ຜ່ານຮູບການພົບປະແລກປ່ຽນ, ໂຄສະນາ, ສົ່ງເສີມການທ່ອງທ່ຽວ. ບັນດາແຂວງພາກເໜືອຂອງໄທກໍ່ໄດ້ມາຊອກຮູ້ຄວາມສາມາດບົ່ມຊ້ອນດ້ານການທ່ອງ ທ່ຽວ, ວັດທະນະທຳ, ປະຫວັດສາດ ຢູ່ເຫວ໋ ແລະ ບັນດາທ້ອງຖີ່ນພາກກາງຫວຽດນາມ.
ບັນດາບໍລິສັດທ່ອງທ່ຽວດ່ານັ້ງ ກໍ່ຈັດຕັ້ງລາຍການທ່ອງທ່ຽວທາງບົກເພື່ອຮັບແຂກທ່ອງທ່ຽວຈາກໄທ ມາ. ບັນດາບໍລິສັດທ່ອງທ່ຽວກໍ່ມີການປ່ຽນແປງເປັນປະຈຳ ແລະ ເຮັດການບໍລິການໃໝ່ອີກ ເພື່ອດຶງດູດນັກທ່ອງທ່ຽວ. ທ່ານ ເລເຕິ໋ນແທງຕຸ່ງ, ຮອງຜູ້ອຳນວຍການໃຫຍ່ Vitours ດ່ານັ້ງ ໃຫ້ຮູ້ວ່າ:
“Vitours ເປັນເຈົ້າການຮ່ວມສຳພັນກັບບັນດາບໍລິສັດການບິນເພື່ອຊື້ປີ້ຍົນລາຄາຖືກ ແລະ ເປັນເຈົ້າການເຮັດວຽກກັບບັນດາບໍລິສັດສະໜອງການບໍລິການ, ສ້າງເປັນຜະລິດຕະພັນລວມ. ໂດຍລະອຽດແມ່ນ, “ລາຍການທ່ອງທ່ຽວມໍລະດົກ“, ແມ່ນຢ້ຽມຢາມບັນດາມໍລະດົກຢູ່ພາກກາງ, ສ່ວນ “ແດນສະຫວັນພາກກາງ“ ແມ່ນ ທ່ອງທ່ຽວຊີວະພາບ, ພັກຜ່ອນຢ່ອນອາລົມ, ຖືກຈັດຕັ້ງສັບປະດາ/2 ເທື່ອ. ແທນທີ່ຫຼຸດລາຄາແມ່ນຈະເພີ່ມຄຸນນະພາບຂຶ້ນ, ຫຼືກໍ່ມີລາຍການທ່ອງທ່ຽວຈຳນວນໜຶ່ງຫຼຸດລາຄາແຕ່ 10-20%“.
ຕົວເມືອງເກົ່າໂຮ້ຍອານ - ດ່ານັ້ງ
ໃນຂະນະນັ້ນ, ການນຳແຂວງກວາງຈີ້ກໍ່ວາງຄາດໝາຍດຶງດູດນັກທ່ອງທ່ຽວໃຫ້ໄດ້ 2 ລ້ານຄົນໃນປີ 2015 ແລະ ແລວເສດຖະກິດຕາເວັນອອກ - ຕາເວັນຕົກ ໄດ້ປະກອບສ່ວນບໍ່ໜ້ອຍເຂົ້າໃນການປະຕິບັດຄາດໝາຍນີ້. ທ່ານ ຫງວຽນຫື້ວທັ໋ງ, ຫົວໜ້າພະແນກວັດທະນະທຳ ກິລາ ແລະ ທ່ອງທ່ຽວແຂວງກວາງຈີ້, ໃຫ້ຮູ້ວ່າ:
“ພວກເຮົາໄດ້ຈັດການຮ່ວມສຳພັນພັດທະນາການທ່ອງທ່ຽວລະຫວ່າງ 3 ແຂວງ ຂອງ 3 ປະເທດມາແຕ່ດົນແລ້ວ. ໃນມື້ໜຶ່ງນັກທ່ອງທ່ຽວສາມາດຮັບປະທານອາຫານຢູ່ທັງ 3 ປະເທດ, ຕອນເຊົ້າຮັບປະທານອາຫານຢູ່ໄທ, ຕອນທ່ຽງຢູ່ລາວ ແລະ ຕອນຄຳ່ແມ່ນຢູ່ຫວຽດນາມ. ຊາວໄທ ຢູ່ເຂດອີສານຖ້າຢາກໄປທະເລ, ເມື່ອຜ່ານດ່ານລາວບາວມາຫວຽດນາມ ຈະໃກ້ກວ່າຫຼາຍ ເມື່ອທ່ຽບໃສ່ໄປທະເລຢູ່ພາກໃຕ້ໄທ. ມາຫວຽດນາມ ເຂົາເຈົ້າຍັງມີໂອກາດໄດ້ຢ້ຽມຢາມຟອງຍາ, ດ່ານັ້ງ, ເຫວ໋ ອີກ“.
ແລວເສດຖະກິດຕາເວັນອອກ - ຕາເວັນຕົກໄດ້ປະກອບສ່ວນຊຸກຍູ້ການພັດທະນາເສດຖະກິດ, ການພົວພັນແລກປ່ຽນດ້ານວັດທະນະທຳ - ສັງຄົມລະຫວ່າງບັນດາປະເທດອາຊີຕາເວັນອອກສ່ຽງໃຕ້ເວົ້າລວມ ແລະ ບັນດາທ້ອງຖີ່ນເວົ້າສະເພາະ. ໃນອະນາຄົດ, ມຽນມາ ຈະເຂົ້າຮ່ວມສຳພັນກັບບັນດາປະເທດທີ່ຂຶ້ນກັບ ແລວເສດຖະກິດຕາເວັນອອກ - ຕາເວັນຕົກ, ອັນຈະຫັນຄາດໝາຍ “4 ປະເທດຮ່ວມລາຍການທ່ອງທ່ຽວໜຶ່ງດຽວ“ໃຫ້ປະກົດຜົນເປັນຈິງ.