ພາຍຫຼັງວາລະໄຂ, ຜູ້ຕາງໜ້າຂອງບັນດາປະເທດ GMS (ລວມມີ: ຈີນ, ກຳປູເຈຍ, ລາວ, ມຽນມາ, ໄທ ແລະ ຫວຽດນາມ) ໄດ້ເຂົ້າຮ່ວມວາລະປຶກສາຫາລືກ່ຽວກັບການເລີ່ມທຸລະກິດ (Startup), ເຊື່ອມຕໍ່ GMS. ໃນວາລະປຶກສາຫາລື, ບັນດາຜູ້ແທນໄດ້ຍົກອອກບັນດາຮູບແບບເຊິ່ງປະເທດຕົນພວມປະຕິບັດຕາມ ແລະ ບັນລຸປະສິດທິຜົນ, ຈາກນັ້ນ, ແບ່ງປັນບົດຮຽນກ່ຽວກັບ Startup, ເຊື່ອມຕໍ່ວິສາຫະກິດ Startup.

        ເພື່ອເປັນການເປີດສາກວາລະປຶກສາຫາລື, ຜູ້ແທນມາຈາກ ຈີນ ເນັ້ນໜັກເຖິງເລື່ອງບັນດາວິສາຫະກິດ ຄວນມີການເຊື່ອມຕໍ່ນຳກັນ, ຍ້ອນວ່າ ຖ້າຫາກວ່າວິສາຫະກິດໄດ້ທຳມາຫາກິນຢ່າງມີປະສິດທິຜົນນັ້ນ, ມີບາງຄົນໄດ້ຮັບຜົນປະໂຫຍດເທົ່ານັ້ນ, ແຕ່ຖ້າຫາກວ່າບັນດາວິສາຫະກິດນ້ອຍໄດ້ເຊື່ອມຕໍ່, ຮ່ວມສຳພັນນຳກັນ ແລະ ດຳເນີນທຸລະກິດຢ່າງມີປະສິດທິຜົນນັ້ນ ຈະນຳມາເຊິ່ງແຫຼ່ງລາຍຮັບຫຼາຍກ່ວາ. ໂດຍມີຄວາມເຫັນດີເຫັນພ້ອມກັບຄຳເຫັນຂອງຜູ້ແທນມາຈາກ ຈີນ ນັ້ນ, ທ່ານນາງ ສຸພາພອນ ສວນນະວົງ, ສັງກັດບໍລິສັດ ໂຕະລາວ (Toh – Lao), ໄດ້ເນັ້ນໜັກກ່ຽວກັບທິດທາງແຫ່ງການພັດທະນາຮູບແບບດຳເນີນທຸລະກິດໃຫຍ່ ແລະ ເຊື່ອມຕໍ່ບັນດາວິສາຫະກິດເລີ່ມທຸລະກິດເພື່ອສ້າງປະສິດທິຜົນ. ທ່ານນາງໃຫ້ຮູ້ວ່າ, ລາວ ໄດ້ປະຕິບັດຫຼາຍມາດຕະການເພື່ອແນໃສ່ຫັນການເຄື່ອນໄຫວໃຫ້ບັນລຸມາດຖານ, ສ້າງກາລະໂອກາດຮ່ວມມື, ສ້າງແຫຼ່ງບັນດານໃຈໃຫ້ບັນດາວິສາຫະກິດ, ພິເສດແມ່ນວິສາຫະກິດ Startup. ເຖິງວ່າວິສາຫະກິດ Startup ຂອງລາວບໍ່ທັນໄດ້ກາຍເປັນບັນດາຈຸດເດັ່ນໃນພາກພື້ນກໍ່ຕາມ, ແຕ່ດ້ວຍຄວາມມານະພະຍາຍາມເພີ່ມທະວີການຮ່ວມມືສາກົນ ແລະ ປັບປຸງຮູບແບບການດຳເນີນທຸລະກິດ, ບັນດາວິສາຫະກິດ ລາວ ໄດ້ເຄື່ອນໄຫວມີປະສິດທິຜົນ ແລະ ບັນລຸໄດ້ຜົນສຳເລັດພໍສົມຄວນ, ດ້ວຍຄວາມສາມາດບົ່ມຊ້ອນຫຼາຍຢ່າງສືບຕໍ່ໄດ້ຮັບການເປີດກ້ວາງ, ພັດທະນາໃນອະນາຄົດ:

        “ໃນຊຸມປີຜ່ານມາ, ພວກຂ້າພະເຈົ້າໄດ້ສ້າງແຫຼ່ງບັນດານໃຈ ແລະ ບຳລຸງສ້າງວິສາຫະກິດ Startup ກ່ວາ 1000 ແຫ່ງ. ມີບາງວິສາຫະກິດ ຢູ່ລາວ ໄດ້ທຳມາຫາກິນມີປະສິດທິຜົນແບບພົ້ນເດັ່ນ, ເຖິງວ່າເມື່ອທຽບໃສ່ບັນດາວິສາຫະກິດຕ່າງປະເທດອື່ນໆ, ບັນດາໝາກຜົນນັ້ນບໍ່ແມ່ນຫຼາຍ ແຕ່ກໍ່ແມ່ນການລະດົມກຳລັງໃຈ, ການສົ່ງເສີມອັນໃຫຍ່ຫຼວງໃຫ້ແກ່ພວກຂ້າພະເຈົ້າໃນໄລຍະນີ້.”

        ໂດຍຍົກອອກບັນດາມາດຕະການຊຸກຍູ້ການເຕີບໂຕດ້ານເສດຖະກິດໃນພາກພື້ນ GMS, ຜູ້ແທນມາຈາກ ໄທ ຖືວ່າ: ບັນດາປະເທດໃນພາກພື້ນຄວນປັບປຸງບັນດາລະບົບມູນຄ່າ, ການເຊື່ອມຕໍ່ອຸດສາຫະກຳບົນພື້ນຖານຊຸກຍູ້ບັນດາແລວເສດຖະກິດ, ເຂດຊາຍແດນ, ຫັນລະບຽບການບໍລິຫານຂ້າມຊາດເປັນງ່າຍດາຍ. ບັນດາປະເທດຄວນນຳໃຊ້ສະພາບແວດລ້ອມ ດີຈີຕອນ ຄືດັ່ງພື້ນຖານ, ວັດຖຸອຸປະກອນດຳເນີນທຸລະກິດ. ໄດ້ຮອດເວລາ ທີ່ບັນດາປະເທດຕ້ອງຮ່ວມມືເພື່ອພ້ອມກັນຊຸກຍູ້ມູນຄ່າໃຫຍ່ຫຼວງກ່ວາລະຫວ່າງບັນດາພື້ນຖານເສດຖະກິດ.

ທ່ານນາງ ສຸພາພອນ ສວນນະວົງ, ສັງກັດບໍລິສັດ ໂຕະລາວ (Toh – Lao)

        ສ່ວນຜູ້ແທນມາຈາກ ມຽນມາ ໃຫ້ຮູ້ວ່າ: ສະຫະສະມາຄົມການຄ້າ ມຽນມາ ມີສະມາຊິກ 2.000 ຄົນເຊິ່ງແມ່ນບັນດາວິສາຫະກິດໜຸ່ມ, ອາຍຸຕ່ຳກ່ວາ 45 ປີ, ເຂົາເຈົ້າເກືອບທັງໝົດແມ່ນບັນດາວິສາຫະກິດ Startup, ວິສາຫະກິດຂະໜາດກາງ ແລະ ນ້ອຍ, ບາງບໍລິສັດຂອງລັດໃນພາກພື້ນ. ສະຫະສະມາຄົມການຄ້າ ມຽນມາ ໄດ້ສ້າງລະບົບຊີວະພາບເລີ່ມທຸລະກິດ, ເຄືອຂ່າຍສະໜອງດ້ານການເງິນ ແລະ ບັນດາກອງທຶນເພື່ອສາມາດລົງທຶນເຂົ້າບັນດາວິສາຫະກິດທີ່ເຂົ້າຮ່ວມການເລີ່ມທຸລະກິດ. ທ່ານ Htun Htun Layung, ປະທານບໍລິຫານ Blue Ocean ໃຫ້ຮູ້ວ່າ:

        “ມຽນມາ ມີພົນລະເມືອງ 45 ລ້ານຄົນ, ມີຊາຍແດນກັບທຸກໆປະເທດ GMS, ພວກຂ້າພະເຈົ້າພວມຮ່ວມມືກັນຢ່າງແໜ້ນແຟ້ນເພື່ອສາມາດປ່ຽນແປງພື້ນຖານເສດຖະກິດ ມຽນມາ, ເຮັດແນວໃດໃຫ້ບັນດາວິສາຫະກິດໜຸ່ມສາມາດເສີມຂະຫຍາຍຄວາມສາມາດຂອງຕົນໄດ້. ວຽກງານພວກເຮົາຕ້ອງເຮັດ, ນັ້ນແມ່ນພວກເຮົາຕ້ອງຮ່ວມມືນຳກັນ, ພັດທະນານຳກັນ. ຢູ່ ມຽນມາ, ວິສາຫະກິດເກືອບທັງໝົດລ້ວນແຕ່ມີການຮ່ວມມືຂອງປະເທດອື່ນ. ເນື່ອງໃນໂອກາດນີ້, ພວກຂ້າພະເຈົ້າຫວັງວ່າ ອາດຈະໄດ້ຮ່ວມມືກັບບັນດາວິສາຫະກິດ ກຳປູເຈຍ, ລາວ ແລະ ຫວຽດນາມ, ບັນດາວິສາຫະກິດດີຈີຕອນ, ບັນດາວິສາຫະກິດກວມລວມ ແລະ ພວກຂ້າພະເຈົ້າຫວັງວ່າ ໃນຊຸມປີຈະມາເຖິງ ພວກເຮົາຈະເຊື່ອມຕໍ່ນຳກັນເພື່ອພ້ອມກັນພັດທະນາ”

        ໂດຍມີຄວາມເຫັນດີເຫັນພ້ອມກັບຜູ້ແທນມາຈາກ ມຽນມາ, ທ່ານ Kok Pheng, ຜູ້ກໍ່ຕັ້ງ ແລະ ເປັນປະທານຮ່ວມ Avanee Clorri & Logistic ໄດ້ແບ່ງປັນກ່ຽວກັບເຕັກໂນໂລຊີການຫັນບັນດາເອກະສານດຳເນີນທຸລະກິດເປັນດີຈີຕອນ ແລະ ຫວັງວ່າຈະມີການເຊື່ອມຕໍ່ ກ່ຽວກັບການສຳລະ ເພື່ອປະຕິບັດ Logistic ສະຫຼາດ:

        “ເມື່ອເວົ້າເຖິງຜູ້ບໍລິໂພກອຸປະໂພກ ຢູ່ ກຳປູເຈຍ, ພວກຂ້າພະເຈົ້າແມ່ນໜຶ່ງໃນບັນດາປະເທດນຳໃຊ້ການເຊື່ອມຕໍ່ເຄື່ອນທີ່ຫຼາຍ. ປະຈຸບັນ, ຜູ້ໜຶ່ງໃຊ້ຫຼາຍກ່ວາ 1 sim card. ຜູ້ຊົມໃຊ້ຢູ່ ກຳປູເຈຍ, ພິເສດແມ່ນລຸ້ນໜຸ່ມພວມຫັນມາຊົມໃຊ້ດີຈີຕອນສຳຜັດກັບເຕັກໂນໂລຊີຂໍ້ມູນຂ່າວສານເປັນງ່າຍດາຍ ດັ່ງນັ້ນ ພວກຂ້າພະເຈົ້າພວມໄດ້ນຳໃຊ້ການຊຳລະດ້ວຍໂທລະສັບມືຖື ແລະ ກໍ່ນຳໃຊ້ການໂອນເງິນຈາກເຂດຊົນນະບົດ ໄປເຂດຕົວເມືອງ, ນີ້ແມ່ນວິທີເພື່ອໃຫ້ທຸກໆຄົນສາມາດສຳຜັດກັບແຫຼ່ງການເງິນຢ່າງງ່າຍດາຍ. ສິ່ງດັ່ງກ່າວ ມີຄວາມໝາຍວ່າ ຄອບຄົວໜຶ່ງມີຜູ້ເຮັດວຽກຢູ່ນະຄອນ ສາມາດໂອນເງິນໄປເຂດຊົນນະບົດຢ່າງງ່າຍດາຍ ແລະ ກົງກັນຂ້າມ.”

        ເມື່ອສິ້ນສຸດການປຶກສາຫາລື, ບັນດາຜູ້ແທນໄດ້ຍົກອອກຂໍ້ສະຫລຸບວ່າ ຄວນຈັດເວທີປາໄສຄ້າຍຄືກັນກັບເວທີປາໄສຄັ້ງນີ້ໃຫ້ຫຼາຍກ່ວາອີກ, ເພື່ອໃຫ້ບັນດາວິສາຫະກິດ, ພິເສດແມ່ນວິສາຫະກິດເລີ່ມທຸລະກິດ ໄດ້ແບ່ງປັນ, ຮ່ຳຮຽນເອົາບົດຮຽນ ແລະ ມີກາລະໂອກາດໄດ້ຊອກຮູ້, ເປີດກ້ວາງຕະຫຼາດເພື່ອໃຫ້ GMS ນັບມື້ນັບໄດ້ຮັບການເສີມຂະຫຍາຍເປັນພາກພື້ນເຊື່ອມຕໍ່ທີ່ມີຄວາມໝັ້ນຄົງ.