(vovworld)- ປີ 2012 ແມ່ນປີແຫ່ງຂີດໝາຍຫລາຍເຫດການສຳຄັນໃນການພົວພັນລະຫວ່າງ ອາຊຽນ ແລະ ອິນເດຍ. ຖະແຫລງການວິໄສທັດ “ອາຊຽນ - ອິນເດຍ ປີ 2020” ຫາກໍ່ໄດ້ຮັບການຮັບຮອງເອົາຈາກການນຳສອງຝ່າຍ, ເຊິ່ງເປັນການຢືນຢັນຍົກສູງການພົວພັນລະຫວ່າງ ອາຊຽນ ແລະ ອິນເດຍ ຂຶ້ນເປັນຄູ່ຮ່ວມມືຍຸດທະສາດ ເປັນຂີດໝາຍແຫ່ງບາດກ້າວໃຫມ່ທີ່ສຳຄັນໃນການພົວພັນລະຫວ່າງສະຫະສະມາຄົມ ກັບຫນຶ່ງໃນບັນດາຄູ່ຮ່ວມມືເສດຖະກິດໃຫຍ່ຊັ້ນນຳຂອງພາກພື້ນ. ດ້ວຍຈຸດປະສົງເພີ່ມທະວີການຮ່ວມມືລະຫວ່າງ ອິນເດຍ ແລະ ບັນດາປະເທດ ອາຊີຕາເວັນອອກສຽງໃຕ້ ກໍຄືສະເຫລີມສະຫລອງ 20 ປີ ແຫ່ງວັນສ້າງຕັ້ງສາຍພົວພັນທາງການທູດ ອິນເດຍ - ອາຊຽນ, ກຳປັ່ນກອງທັບເຮືອ ອິນເດຍ ທີ່ມີຊື່ວ່າ: Sudarshini ໄດ້ເດີນທາງເຖິງບັນດາປະເທດສະມາຊິກ ອາຊຽນ ເພື່ອຫັນຈຸດໝາຍດັ່ງກ່າວໃຫ້ປະກົດຜົນເປັນຈິງ.
ກຳປັ່ນກອງທັບເຮືອ Sudarshini ຂອງອິນເດຍເຂົ້າທຽບທ່າ ຕຽນຊາ
ພາບ:qdnd.vn
|
ດ້ວຍຈຸດປະສົງເພີ່ມທະວີການຮ່ວມມືລະຫວ່າງ ອິນເດຍ ແລະ ບັນດາປະເທດ ອາຊີຕາເວັນອອກສຽງໃຕ້ (ອາຊຽນ), ກຳປັ່ນກອງທັບເຮືອ Sudarshini ເລີ່ມຕົ້ນການເດີນທາງຈາກ ທ່າກຳປັ່ນ Chennai ປະເທດອິນເດຍ ໃນວັນທີ 29/9/2012 ແລະ ຜ່ານ 9 ປະເທດ ຊຶ່ງລວມມີ: ອິນໂດເນເຊຍ, ມ້ຽນມາ, ບຣູໄນ, ມາເລເຊຍ, ຟິລິບປີນ, ສິງກະໂປ, ຫວຽດນາມ, ກຳປູເຈຍ ແລະ ໄທ. ກຳປັ່ນລຳດັ່ງກ່າວ ມາຢ້ຽມຢາມ 13 ທ່າກຳປັ່ນຂອງ 9 ປະເທດ ດ້ວຍຈຸດປະສົງຊຸກຍູ້ນ້ຳໃຈມິດຕະພາບກັບບັນດາປະເທດດັ່ງກ່າວ. ຜ່ານທ່າກຳປັ່ນແຕ່ລະແຫ່ງ, ກຳປັ່ນດັ່ງກ່າວໄດ້ຮັບລູກເຮືອຂອງປະເທດປະຈຳຖິ່ນ 2 ຄົນເພື່ອແລກປ່ຽນດ້ວຍຈຸດປະສົງເພີ່ມທະວີການພົວພັນສອງຝ່າຍ. ດ້ວຍຈຳນວນນາຍທະຫານເຮືອແລະ ຕຳຫລວດປ້ອງກັນທະເລ 35 ຄົນ, ໃນນັ້ນລວມມີ ກັບຕັນເຮືອ ແລະ ລູກເຮືອ 31 ຄົນ, ກຳປັ່ນ Sudarshini ຄາດວ່າຈະເດີນທະເລດ້ວຍໄລຍະທາງຍາວ 12,217 ໄມທະເລ ກ່ອນຈະກັບຄືນທ່າກຳປັ່ນ Kochi, ອິນເດຍ ໃນວັນທີ 29/3/2013. ທ່ານ Ranjit Rea ເອກອັກຄະລັດຖະທູດ ອິນເດຍ ປະຈຳ ຫວຽດນາມໃຫ້ຮູ້ວ່າ:
“ການຢ້ຽມຢາມ ບັນດາປະເທດສະມາຊິກ ອາຊຽນ ຂອງກຳປັ່ນກອງທັບເຮືອ ອິນເດຍ ແມ່ນການເດີນທະເລຕາມແລວທາງຂອງນັກຄ້າຂາຍອິນເດຍໃນສະໄຫມກອ່ນທີເຄີຍໄປຜ່ານບັນດາປະເທດ ອາຊຽນ ແຕ່ສັດຕະວັດທີ 10- 11, ສ້າງບັນດາການເຄື່ອນໄຫວດ້ານການຄ້າ, ການພົວພັນແລກປ່ຽນວັດທະນະທຳກັບບັນດາປະເທດ ອາຊຽນ. ການຢ້ຽມຢາມຄັ້ງນີ້ໄດ້ສະແດງໃຫ້ເຫັນການຮ່ວມສຳພັນລະຫວ່າງ ອິນເດຍ ແລະ ອາຊຽນ ໃນຂົງເຂດການຄ້າ, ການພົວພັນແລກປ່ຽນວັດທະນະທຳ, ສາສະຫນາ, ເປັນການພິສູດໃຫ້ເຫັນການພົວພັນລະຫວ່າງ ອິນເດຍ ແລະ ອາຊຽນ ກ້າວເຂົ້າສູ່ລວງເລິກ, ເປັນການຊຸກຍູ້ຄວາມໃກ້ຊິດລະຫວ່າງ ຊາວ ອິນເດຍ ກັບປະຊາຊົນບັນດາປະເທດສະມາຊິກ ອາຊຽນ.”
ນອກຈາກກອງປະຊຸມສຳມະນາດ້ານການຄ້າ ເພື່ອມຸ່ງໄປເຖິງຈຸດໝາຍຍົກສູງວົງເງິນການຄ້າລະຫວ່າງ ອິນເດຍ ແລະ ອາຊຽນ, ກຳປັ່ນກອງທັບເຮືອ ອິນເດຍ ກໍໄດ້ຈັດຕັ້ງການເຄື່ອນໄຫວພົບປະແລກປ່ຽນສະແດງດົນຕີ, ແຂ່ງຂັນກິລາອີກດ້ວຍ.
ທ່ານ ຮູ່ນດ໋າມ, ປະທານຄະນະກຳມະການສູນກາງແນວໂຮມປະເທດຊາດ ຫວຽດນາມ ຕ້ອນຮັບທ່ານເອກອັກຄະລັດຖະທູດ ອິນເດຍ Ranjit Rea
ພາບ:daidoanket.vn
|
ປະຈຸບັນ ກຳປັ່ນດັ່ງກ່າວໄດ້ຜ່ານ Padang, Bali Manado ຂອງອິນໂດເນເຊຍ, ບຣູໄນ ແລະ Cebu, Manila ຂອງຟິລິບປີນ ແລະ ເດີນທາງຮອດ ດາຫນັງ ໃນຕອນເຊົ້າວັນທີ 1/1/2013. ຢູ່ ຫວຽດນາມ, ນາຍທະຫານ, ລູກເຮືອ ອິນເດຍ ຈະພົບປະແລກປ່ຽນສະແດງສິລະປະ, ວັດທະນະທຳ ແລະ ແຂ່ງຂັນກິລາ ກັບ ກອງບັນຊາການທະຫານເຮືອເຂດ 3, ເຂົ້າຢ້ຽມຢາມຄຸ້ມຖະຫນົນເກົ່າ ໂຮ້ຍອານ, ກຸງເກົ່າເຫ້ວ, ທັດສະນີຍະພາບ ດາຫນັງ. ວັນທີ 4/1/2013, ກຳປັ່ນກອງທັບເຮືອ Sudarshini ຈະເດີນທາງອອກຈາກ ຫວຽດນາມ ສືບຕໍ່ເດີນທະເລຢ້ຽມຢາມບັນດາປະເທດສະມາຊິກອື່ນຂອງ ອາຊຽນ.
ຫວນຄືນໄລຍະເວລາສອງທົດສະວັດຜ່ານມາສະແດງໃຫ້ເຫັນວ່າ, ການພົວພັນລະຫວ່າງ ອາຊຽນ ແລະ ອິນເດຍ ໄດ້ຮັບການເປີດກວ້າງ ແລະ ພັດທະນາໃນທຸກຂົງເຂດຢ່າງບໍ່ຢຸດຢັ້ງ, ເປັນຕົ້ນແມ່ນເສດຖະກິດ, ການຄ້າ. ມາຮອດປະຈຸບັນ, ອາຊຽນ ແລະ ອິນເດຍ ໄດ້ລົງນາມໃນສັນຍາແມ່ບາງສະບັບກ່ຽວກັບການຮ່ວມມືເສດຖະກິດຮອບດ້ານ, ສ້າງພື້ນຖານສ້າງຕັ້ງເຂດການຄ້າເສລີ ແລະ ການລົງທຶນ ລະຫວ່າງ ອາຊຽນ ແລະ ອິນເດຍ. ສອງຝ່າຍໄດ້ລົງນາມໃນສັນຍາການຄ້າ ອາຊຽນ - ອິນເດຍ (AITIG), ສັນຍາແກ້ໄຂການພິພາດ ອາຊຽນ - ອິນເດຍ. ປະຈຸບັນ ອິນເດຍ ແມ່ນຄູ່ ຄ້າໃຫຍ່ທີ 6 ຂອງ ອາຊຽນ. ທ່ານເອກອັກຄະລັດຖະທູດ ອິນເດຍ ປະຈຳ ຫວຽດນາມ Ranjit Rea ໄດ້ເນັ້ນຫນັກວ່າ:
“ການພົວພັນລະຫວ່າງ ອິນເດຍ ແລະ ອາຊຽນ ພັດທະນາຢ່າງຈົບງາມໃນປີຜ່ານມາ, ໃນນັ້ນເປັນຫນ້າສົນໃຈ ແມ່ນການຕົກລົງຍົກການພົວພັນລະຫວ່າງ ອິນເດຍ ແລະ ອາຊຽນ ຂຶ້ນສູ່ລະດັບຄູ່ຮ່ວມມືຍຸດທະສາດ. ທີ່ກອງປະຊຸມຂັ້ນສູງ ສະເຫລີມສະຫລອງ 20 ປີ ຊຶ່ງຫາກໍດຳເນີນໄປຢູ່ ອິນເດຍ, ອາຊຽນ ແລະ ອິນເດຍ ໄດ້ສຳເລັດການເຈລະຈາສັນຍາການຄ້າເສລີ (FTA) ກ່ຽວກັບບໍລິການ ແລະ ການລົງທຶນ. ພາຍຫລັງສັນຍາການຄ້າເສລີກ່ຽວກັບສິນຄ້າຊຶ່ງໄດ້ຮັບການລົງນາມເມື່ອປີ 2009, ສັນຍາການຄ້າເສລີກ່ຽວກັບບໍລິການ ແລະ ການລົງທຶນຄາດວ່າໄດ້ຮັບການລົງນາມໃນເດືອນ 8/2013 ຈະຊ່ວຍຍົກວົງເງິນການຄ້າປະຈຳປີລະຫວ່າງ ອິນເດຍ ແລະ ອາຊຽນ ຈາກ 75 ຕື້ USD ໃນປະຈຸບັນ ໃຫ້ຂຶ້ນເຖິງ 200 ຕຶ້ USD ໃນປີ 2020.”
ບັນດາຜົນງານແຫ່ງການຮ່ວມມືຢ່າງຈົບງາມລະຫວ່າງ ອາຊຽນ ແລະ ອິນເດຍ ໃນໄລຍະຜ່ານມາ ພວມແມ່ນປະຖົມປັດໄຈເພື່ອໃຫ້ສອງຝ່າຍຜັນຂະຫຍາຍບັນດາຄຳໝັ້ນສັນຍາ, ຂໍ້ຕົກລົງ ແລະ ໂຄງການຮ່ວມມື, ພິເສດແມ່ນແຜນການດຳເນີນງານໃນໄລຍະຈະມາເຖິງ. ພ້ອມກັນນັ້ນ ການຢ້ຽມຢາມຂອງກຳປັ່ນ Sudashini ແລະ ບັນດາການເຄື່ອນໄຫວອື່ນໆ ຈະຊ່ວຍເພີ່ມທະວີການພົວພັນຄູ່ຮ່ວມມືຍຸດທະສາດ ລະຫວ່າງ ອິນເດຍ ແລະ ອາຊຽນ.