(vovworld)- ໃນຊຸມປີມໍ່ໆມານີ້, ການພົວພັນດ້ານການເມືອງ, ການຕ່າງປະເທດ ແລະ ເສດຖະກິດ ລະຫວ່າງຫວຽດນາມ ອິນໂດເນເຊຍ ນັບມື້ນັບໄດ້ຮັບການປັບປຸງ ແລະ ພັດທະນາ, ບໍ່ພຽງແຕ່ໃນສອງຝ່າຍ, ຫລາຍຝ່າຍເທົ່ານັ້ນ ຫາກໃນຂອບເຂດ ອາຊຽນ ອີກດ້ວຍ. ພິເສດ ພາຍຫລັງການຢ້ຽມຢາມທາງລັດຖະກິດເຖິງອິນໂດເນເຊຍຂອງທ່ານປະທານປະເທດ ເຈືອງເຕີນຊາງ ເມື່ອເດືອນ 6/2013 ຜ່ານມາ, ການພົວພັນລະຫວ່າງສອງປະເທດໄດ້ຮັບການຍົກຂຶ້ນສູ່ລະດັບການພົວພັນຄູ່ຮ່ວມມືຍຸດທະສາດ. ໃນລາຍການຊາຍຄາ ອາຊຽນພາກນີ້ ພວກເຮົາຂໍທົບທວນຄືນການພົວພັນລະຫວ່າງສອງປະເທດໃນຂົງເຂດເສດຖະກິດ.
ທ່ານປະທານປະເທດຫວຽດນາມ ເຈືອງເຕີນຊາງພ້ອມດ້ວຍພັນລະຍາ
ພົບປະກັບປະທານາທິບໍດີອິນໂດເນເຊຍ Susilo Bambang ແລະ ພັນລະຍາ
ພາບ:internet
|
ປະຈຸບັນ, ອິນໂດເນເຊຍ ແມ່ນຄູ່ຮ່ວມມືການຄ້າໃຫຍ່ທີ 4 ຂອງຫວຽດນາມ ໃນພາກພື້ນ ອາຊີຕາເວັນອອກສຽງໃຕ້.ວົງເງິນການຄ້າສອງຝ່າຍລະຫວ່າງສອງປະເທດເພີ່ມຂຶ້ນໃນແຕ່ລະປີ,ຈາກ 2,5 ຕື້ USD ໃນປີ 2008 ຂຶ້ນເຖິງ 4,6 ຕື້ USD ໃນປີ 2011 ແລະ ບັນລຸລະດັບ 4,86 ຕື້ USD ໃນປີ 2012. ທ່ານ Herry Hotma ທີ່ປຶກສາດ້ານເສດຖະກິດ, ສະຖານທູດ ອິນໂດເນເຊຍ ປະຈຳຫວຽດນາມ ໃຫ້ຮູ້ວ່າ:
“ໃນປີ 2013, ພວກເຮົາສາມາດເຫັນໄດ້ລະດັບເຕີບໂຕດ້ານການຄ້າສອງຝ່າຍ ແລະ ພວກເຮົາມີຄວາມປະເອີບໃຈຕໍ່ຄວາມສາມາດບົ່ມຊ້ອນເພີ່ມທະວີການແລກປ່ຽນການຄ້າໃນປີນີ້ຈະສູງກວ່າປີກ່ອນ. ພວກຂ້າພະເຈົ້າກໍປາດຖະຫນາວ່າ ຈຸດໝາຍແລກປ່ຽນການຄ້າສອງຝ່າຍຈະບັນລຸລະດັບ 5 ຕື້ USD ໄວກວ່າແຜນການທີ່ໄດ້ວາງອອກໃນປີ 2015. ເນື່ອງໃນໂອກາດການຢ້ຽມຢາມອິນໂດເນເຊຍ ຂອງທ່ານປະທານປະເທດຫວຽດນາມ ເຈືອງເຕີນຊາງ ຫວ່າງແລ້ວນີ້, ການນຳສອງປະເທດ ໄດ້ເຫັນດີເປັນເອກະສັນກັນວ່າ ວົງເງິນການຄ້າສອງຝ່າຍຈະເພີ່ມຂຶ້ນສອງເທ່ົາ, ບັນລຸ 10 ຕື້ USD ໃນປີ 2018. ສິ່ງດັ່ງກ່າວສະແດງໃຫ້ເຫັນວ່າ: ການນຳສອງປະເທດມີຄວາມປະເອີບໃຈຕໍ່ລະດັບແລກປ່ຽນການຄ້າລະຫວ່າງສອງປະເທດນັບມື້ນັບເພີ່ມຂຶ້ນ.”
ໃນຂົງເຂດການລົງທຶນ, ປະຈຸບັນ ອິນໂດເນເຊຍ ຢືນອັນດັບທີ 27 ໃນຈຳນວນ 101 ປະເທດ ແລະ ເຂດແຄ້ວນລົງທຶນ ຢູ່ຫວຽດນາມ ດ້ວຍ 35 ໂຄງການຍັງມີຜົນສັກສິດ, ລວມຍອດຈຳນວນທຶນຈົດທະບຽນກວ່າ 285 ລ້ານ USD. ອິນໂດເນເຊຍ ໄດ້ລົງທຶນເຂົ້າ 11 ໃນຈຳນວນ 21 ຂົງເຂດ, ໃນນັ້ນ ຂົງເຂດອຸດສາຫະກຳປຸງແຕ່ງ, ປະດິດສ້າງ ຢືນອັນດັບຫນຶ່ງດ້ວຍ 16 ໂຄງການ ແລະ ດ້ວຍທຶນຈົດທະບຽນ 112,17 ລ້ານ USD, ກວມ 39,34% ຍອດຈຳນວນເງິນລົງທຶນ.
ບັນດາປະເພດສິນຄ້າຕົ້ນຕໍຂອງ ອິນໂດເນເຊຍ ເຂົ້າຫວຽດນາມ ລວມມີ: ເຫລັກກ້າ, ກົນຈັກ ແລະ ອຸປະກອນການຜະລິດ, ເຄມີ, ເຄື່ອງອາໄຫລ່ລົດໂອໂຕ, ຄອມພິວເຕີ, ຝຸ່ນເຄມີ ແລະ ການຢາ..ໃນຂະນະນັ້ນ ອິນໂດເນເຊຍ ນຳເຂົ້າຈາກ ຫວຽດນາມ ບັນດາປະເພດສິນຄ້າຄື: ນ້ຳມັນດີບ, ເຂົ້າສານ, ຊາ, ກາເຟ.. ພິເສດ ຫວຽດນາມ ແລະ ອິນໂດເນເຊຍ ຍັງມີຄວາມສາມາດບົ່ມຊ້ອນຫລາຍຢ່າງທີ່ສາມາດເພີ່ມເຕີມເຊິ່ງກັນ ແລະ ກັນໃນຂົງເຂດຮັບປະກັນດ້ານພະລັງງານ ແລະ ຄ້ຳປະກັນດ້ານສະບຽງອາຫານ. ໃນນັ້ນ ຫວຽດນາມ ມີຄວາມຕ້ອງການນຳເຂົ້າຖ່ານຫີນຢ່າງຍາວນານ ແລະ ເປັນປົກກະຕິຈາກ ອິນໂດເນເຊຍ ເພື່ອຮັບໃຊ້ໃຫ້ແກ່ບັນດາໂຮງງານໄຟຟ້າໃຊ້ພະລັງຄວາມຮ້ອນ. ສ່ວນຫວຽດນາມ ຮັບປະກັນແຫລ່ງສະຫນອງຄວາມຕ້ອງການນຳເຂົ້າ ເຂົ້າສານຂອງອິນໂດເນເຊຍ.
ເວທີປາໄສວິສາຫະກິດຫວຽດນາມ-ອິນໂດເນເຊຍ
ພາບ:TTXVN
|
ເພື່ອຊຸກຍູ້ການພົວພັນດ້ານເສດຖະກິດລະຫວ່າງສອງປະເທດ, ນັບແຕ່ຕົ້ນປີ 2013, ສອງປະເທດ ໄດ້ຈັດຕັ້ງເວທີປາໄສເປັນຫລາຍຄັ້ງ ແລະ ການເຄື່ອນໄຫວຕ່າງໆ ໃນນັ້ນ ພົ້ນເດັ່ນແມ່ນເວທີປາໄສການຄ້າ, ທ່ອງທ່ຽວ ແລະ ລົງທຶນ ລະຫວ່າງ ອິນໂດເນເຊຍ ແລະ ຫວຽດນາມ ຊື່ງຖືກຈັດຂຶ້ນໃນເດືອນ 6/2013 ຢູ່ ນະຄອນ ໂຮ່ຈິມີນ. ເວທີປາໄສນີ້ ໄດ້ສ້າງກາລະໂອກາດໂດຍກົງໃຫ້ແກ່ບັນດາວິສາຫະກິດສອງປະເທດ ສ້າງສາຍພົວພັນຄູ່ຮ່ວມມືໃນຫລາຍຂົງເຂດ ພ້ອມທັງຊອກຫາກາລະໂອກາດໃຫມ່. ທ່ານ Herry Hotma ທີ່ປຶກສາດ້ານເສດຖະກິດ, ສະຖານທູດ ອິນໂດເນເຊຍ ປະຈຳຫວຽດນາມ ເນັ້ນຫນັກວ່າ:
“ພວກຂ້າພະເຈົ້າມານະພະຍາຍາມແນະນຳບັນດາກາລະໂອກາດດຳເນີນທຸລະກິດຢູ່ຫວຽດນາມ ໃຫ້ແກ່ບັນດາວິສາຫະກິດອິນໂດເນເຊຍ ແລະ ກົງກັນຂ້າມ. ນອກນັ້ນ ພວກຂ້າພະເຈົ້າກໍສ້າງເງື່ອນໄຂໃຫ້ແກ່ບັນດາສັນຍາການຄ້າລະຫວ່າງວິສາຫະກິດສອງຝ່າຍ. ພວກຂ້າພະເຈົ້າຈະຈັດສົ່ງບັນດາວິສາຫະກິດ ອິນໂດເນເຊຍ ມາຫວຽດນາມ ເຂົ້າຮ່ວມງານວາງສະແດງການຄ້າ ຢູ່ ຮ່າໂນ້ຍ ແລະ ນະຄອນໂຮ່ຈິມີນ ຫລື ບັນດາແຂວງອື່ນໆ. ນອກນັ້ນ ພວກຂ້າພະເຈົ້າກໍເຊີນບັນດາວິສາຫະກິດຫວຽດນາມ ມາເຂົ້າຮ່ວມງານວາງສະແດງການຄ້າຢູ່ ອິນໂດເນເຊຍອີກ”
ໃນການຢ້ຽມຢາມທາງລັດຖະກິດເຖິງອິນໂດເນເຊຍຂອງທ່ານປະທານປະເທດເຈຶອງເຕີນຊາງໃນເດືອນ 6 ຜ່ານມາ, ມີສັນຍາການຄ້າ ແລະ ຂໍ້ຕົກລົງຮ່ວມມືໃນທຸກຂົງເຂດສຳຄັນກວ່າ 30 ສະບັບ ໄດ້ຮັບການລົງນາມ, ພິເສດແມ່ນການຮ່ວມມືເສດຖະກິດ, ການຄ້າ, ການລົງທຶນ, ອັນໄດ້ສ້າງພື້ນຖານດ້ານກົດໝາຍທີ່ໝັ້ນຄົງໃຫ້ແກ່ການຮ່ວມມືລະຫວ່າງ ຫວຽດນາມ ອິນໂດເນເຊຍ. ດ້ວຍການຜັນຂະຫຍາຍບັນດາເອກະສານຮ່ວມມື, ຫວຽດນາມ ແລະ ອິນໂດເນເຊຍ ສາມາດບັນລຸໄດ້ ວົງເງິນການຄ້າສອງຝ່າຍ 5 ຕື້ USD ກ່ອນປີ 2015 ຄືຄາດໝາຍທີ່ໄດ້ວາງອອກ.