(vovworld)- ນັກທ່ອງທ່ຽວເມື່ອໄປຢ້ຽມຢາມ ປະເທດມາເລເຊຍ, ນອກຈາກໄດ້ໄປຊື້ເຄື່ອງຂອງຢູ່ສູນການຄ້າໃຫຍ່ຫລາຍແຫ່ງຢູ່ນະຄອນຫລວງ ກົວລາລຳເປີ ແລະ ເຂົ້າຮ່ວມການລະຫລິ້ນບັນເທິງ ຢູ່ Genting “ນະຄອນຕັ້ງຢູ່ເນີນພູ” ຫລື ໄປອາບນ້ຳທະເລ ຊົມທິວທັດທຳມະຊາດທີ່ສວຍງາມ ຢູ່ ເກາະ Langkawi ແລ້ວ, ຍັງໄດ້ໄປທ່ອງທ່ຽວສະຖານທີ່ແຫ່ງຫນຶ່ງທີ່ຈັບອົກຈັບໃຈອີກ ນັ້ນແມ່ນ ຄຸ້ມເມືອງເກົ່າ Malacca ທີ່ສະຫງົບສຸກ ແລະ ສວຍງາມ ຊື່ງໄດ້ຮັບຖືວ່າ ແມ່ນ “Venice ຂອງ ອາຊີ”.
ໃຈກາງ ນະຄອນ Malacca
(vnexpress.net)
|
ເວລາ 2 ໂມງແລງ, ຈາກນະຄອນຫລວງ ກົວລາລຳເປີ ພາຍຫລັງນັ່ງລົດເມມາເປັນເວລາ 3 ຊົ່ວໂມງ ຜ່ານໄລຍະທາງກວ່າ 150 ກິໂລແມັດ ທ່ານຈະໄປຮອດຄຸ້ມເມືອງເກົ່າ Malacca ທີ່ສວຍງາມ. ເມື່ອເຫັນຄຸ້ມເມືອງທີ່ເກົ່າແກ່ກວ່າໝູ່ຢູ່ປະເທດ ມາເລເຊຍແລ້ວ , ຄວາມອິດເມື່ອຍໃນການເດີນທາງຂອງກຸ່ມເພື່ອນຫນຸ່ມ ທັງ, ຮວ່າ ແລະ ຈາງ ມາຈາກຮ່າໂນ້ຍ ກໍຫາຍໄປໝົດ.
“ຂ້າພະເຈົ້າເຫັນວ່າ ນີ້ແມ່ນສະຖານທີ່ທ່ອງທ່ຽວຈັບອົກຈັບໃຈທີ່ສຸດ, ແມ່ນນະຄອນມໍລະດົກແຫ່ງຫນຶ່ງຂອງ ມາເລເຊຍ.”
“ຂ້າພະຈົ້າໄດ້ຮູ້ວ່າ ຢູ່ Malacca ມີຫລາຍພື້ນຖານວັດທະນະທຳທີ່ແຕກຕ່າງກັນ ແລະ ແຕ່ລະພື້ນຖານວັດທະນະທຳນັ້ນລ້ວນແຕ່ມີສະຖາປັດຕະຍະກຳທີ່ເປັນເອກະລັກສະເພາະ.”
Malacca ເປັນຫນ້າຮູ້ຈັກເຖິງຄືດັ່ງສະຖານທີ່ເລີ່ມຕົ້ນປະຫວັດສາດຂອງ ມາເລເຊຍ . ປີ 1936, ລາຊະກຸມມານ Parameswara ຖືກເນລະເທດຈາກ Sumatra ໄດ້ສ້າງຕັ້ງນະຄອນນີ້ ແລະ ພັດທະນາກາຍເປັນທ່າກຳປັ່ນເພື່ອຕ້ອນຮັບບັນດາກຳປັ່ນ, ພໍ່ຄ້າຊາວຂາຍທີ່ມາຈາກ ຈີນ, ອິນເດຍ, ອາຣັບ ແລະ ເອີລົບ. ການແລກປ່ຽນດ້ານການຄ້າຂາຍສິນຄ້າກັບສາກົນກໍຄືວິວັດການຢືດຄອງຂອງບັນດາປະເທດມະຫາອຳນາດຝ່າຍຕາເວັນຕົກຄື: ປອກຕຸຍການ, ໂຮນລັງ ແລະ ອັງກິດ ໄດ້ເຮັດໃຫ້ Malacca ເຕົ້າໂຮມຫລາຍຊົນເຜົ່າ ແລະ ສາດສະຫນາແຕກຕ່າງກັນ ຊື່ງສະແດງອອກໃນດຳລົງຊີວິດ, ສະຖາປັດຕະຍະກຳ ແລະ ສາດສະຫນາ.
ວິວັດການຄົ້ນຫາ Malacca ຂອງກຸ່ມເພື່ອນຫນຸ່ມ ແມ່ນເລີ່ມຈາກ ແມ່ນ້ຳລຳຫນຶ່ງທີ່ມີຊື່ເຊັ່ນດຽວກັນກັບນະຄອນ ທີ່ໄຫລຜ່ານນະຄອນ Malacca ແລະແບ່ງນະຄອນເປັນ 2 ເຂດຄື: ເຂດຕາເວັນອອກ ແລະ ເຂດຕາເວັນຕົກຢ່າງຈະແຈ້ງ. ຢູ່ລຽບຕາມແຄມແມ່ນ້ຳ ມີບັນດາທ່າເຮືອ. ເພື່ອປະຢັດເວລາ, ກຸ່ມເພື່ອນຫນຸ່ມສາມຄົນດັ່ງກ່າວ ໄດ້ຕັດສິນຊື້ປີ້ຂີ່ເຮືອໄປຄົ້ນຫາ “Venice ຂອງ ອາຊີ”. ຜູ້ໃດກໍຮູ້ສຶກຈິດໃຈສະຫວາດສະເຫວີຍເມື່ອທັງຂີ່ເຮືອທັງໄດ້ຮັບຟັງສຽງດົນຕີ Malay ທີ່ມ່ວນອ່ອນຊອຍ ແລະ ໄດ້ເຫັນປະຈັກຕາບັນດາແຖວເຮືອນບູຮານຢູ່ລຽບຕາມສອງຟາກຝັ່ງແມ່ນ້ຳ, ຟາກຫນຶ່ງໄດ້ຮັບການກໍ່ສ້າງຕາມສະຖາປັດຕະຍະກຳຝ່າຍຕາເວັນອອກ ແລະອີກຟາກຫນຶ່ງແມ່ນກໍ່ສ້າງຕາມສະຖາປັດຕະຍະກຳ ຝ່າຍຕາເວັນຕົກ ພິເສດ ບັນດາຮູບແຕ້ມທີ່ມີສີສັນຫລາກຫລາຍຖືກແຕ້ມເທິງຝາຜະນັງ ໄດ້ເຮັດໃຫ້ ນາງຈາງ ມີຄວາມຮູ້ສຶກວ່າ ເຈົ້າຂອງເຮືອນແຕ່ລະຫລັງ ພວມເລົ່າເລື່ອງລາວໃດຫນຶ່ງດ້ວຍພາບແຕ້ມທີ່ມີຊີວິດຊີວາທີ່ສຸດ. ອາດຈະເປັນຄວາມຝັນກ່ຽວກັບທົ່ງຫຍ້າທີ່ຂຽວສົດ, ບຸນຟ້ອນສິງໂຕ ຫລືແມ່ນຄວາມຊົງຈຳໃນເມື່ອກ່ອນ.
“ຢູ່ລຽບຕາມສອງຟາກຝັ່ງແມ່ນ້ຳ, ຂ້າພະເຈົ້າໄດ້ຊົມບັນດາສະຖາປັດຕະຍະກຳທີ່ເປັນເອກະລັກສະເພາະຢູ່ Malacca ກໍຄືສິລະປະແຕ້ມພາບ “graffiti” ຢູ່ ທ້ອງຖະຫນົນ. ບັນດາພາບແຕ້ມກ່ຽວກັບຮີດຄອງປະເພນີກໍຄືຊີວິດປະຈຳວັນຂອງ ປະຊາຊົນຢູ່ທີ່ນີ້. ຂ້າພະເຈົ້າຄິດວ່າ ເຂົາເຈົ້າໄດ້ແຕ້ມບັນດາຮູບພາບນີ້ເພື່ອຈຸດປະສົງສະແດງໃຫ້ເຫັນວັດທະນະທຳ, ຊີວິດປະຈຳວັນ ໂດຍຜ່ານບັນດາການທ່ອງທ່ຽວຕາມແຄມແມ່ນ້ຳ, ນັກທ່ອງທ່ຽວສາມາດເຂົ້າໃຈໄດ້ຈຸດວັດທະນະທຳຂອງມາເລເຊຍ.”
ຄຸ້ມເມືອງເກົ່າ Malacca ໃນມື້ທ້າຍສັບປະດາ
(vnexpress.net)
|
ສິ້ນສຸດການໄປທ່ອງທ່ຽວດ້ວຍການຂີ່ເຮືອແລ້ວ, ສະຖານທີ່ທ່ອງທ່ຽວຕໍ່ໄປຂອງກຸ່ມເພື່ອນຫນຸ່ມສາມຄົນດັ່ງກ່າວ ນັ້ນແມ່ນ ບັນດາຄຸ້ມຖະຫນົນເກົ່າຢູ່ໃຈກາງທາງທິດຕາເວັນອອກຂອງນະຄອນ ຊື່ງໄດ້ຮັບການກໍ່ສ້າງຕາມສະຖາປັດຕະຍະກຳ ເອີລົບ. ຢູ່ທີ່ນີ້ ມີສະຫນາມຫລວງ ໂຮນລັງ ດ້ວຍບັນດາເສັ້ນທາງປູດິນຈີ່ສີແດງ ແລະ ມີຮົ່ມໄມ້ຂຽວອຸ່ມທຸ່ມ. ມີສຽງດົນຕີມ່ວນອ່ອນຊອນຂອງນັກສິລະປິນສະແດງຕາມທ້ອງຖະຫນົນ. ມີໂບດ Malacca ທ່າສີແດງຕັ້ງຢູ່ກົງກັນຂ້າມກັບຮູບແບບກັງຫັນລົມຢູ່ໃຈກາງສວນສາທາລະນະ, ອ້ອມຂ້າງແມ່ນບັນດາສວນດອກໄມ້ເບັ່ງບານນາໆສີ. ຕໍ່ຫນ້າຄວາມງາມທີ່ຈັບອົກຈັບໃຈດັ່ງກ່າວ, ກຸ່ມ ເພື່ອນຫນຸ່ມ ທັງ, ຮວ່າ, ຈາງ ໄດ້ຍາດເວລາເພື່ອຖ່າຍຮູບທີ່ເປັນລະນຶກ. ອ້າຍ Wiliem ແມ່ນ ນັກທ່ອງທ່ຽວມາຈາກ ໂຮນລັງ ຖືກດຶງດູດໃຈດ້ວຍບັນດາຄຸນຄ່າ, ມໍລະດົກ ຊຶ່ງຊາວໂຮນລັງ ລຸ້ນກ່ອນນີ້ໄດ້ ປະໄວ້ ຢູ່ Malacca ພາຍຫລັງ 150 ປີຄອບຄອງຢູ່ທີ່ນີ້.
“ ຂ້າພະເຈົ້າມີຄວາມປະທັບໃຈທີ່ສຸດຕໍ່ບັນດາກິດຈະກຳຊື່ງໄດ້ຮັບການກໍ່ສ້າງຕາມສະຖາປັດຕະຍະກຳ ໂຮນລັງ ຢູ່ Malacca. ບໍ່ພຽງແຕ່ເທົ່ານັ້ນ ຫາກການພົວພັນຂອງຫລາຍພື້ນຖານວັດທະນະທຳ ອາຊີ ແລະ ເອີລົບ ຢູ່ ນະຄອນ ນີ້ໄດ້ສ້າງຄວາມດຶງດູດນັກທ່ອງທ່ຽວເປັນຈຳນວນຫລວງຫລາຍ, ໂດຍສະເພາະແມ່ນຜູ້ນິຍົມການຄົ້ນຫາຄືຂ້າພະເຈົ້າ.”
ອອກຈາກເຂດໃຈກາງນະຄອນ, ກຸ່ມເພື່ອນຫນຸ່ມສືບຕໍ່ໄປຕາມເສັ້ນທາງນ້ອຍຂຶ້ນໂນນພູ St. Pauls. ຈາກໂນນພູດ້ວຍທົ່ງຫຍ້າຂຽວສົດງົດງາມ ແລະ ສວນດອກໄມ້ເບັ່ງບານສີສັນຫລາກຫລາຍ, ທັງ, ຮ່ວາ ແລະ ຈາງ ກໍໄດ້ຮັບຟັງສຽງນົກຮ້ອງ ແລະ ດົມກີ່ນນ້ຳເຜິ້ງໃນຂະນະນັ່ງຊົມເຮືອກຳປັ່ນໄປມາຢູ່ທ່າກຳປັ່ນທະເລ.
ພາຍຫລັງໄປທັດສະນະສຶກສາໃນຕອນເຊົ້າ, ເວລາ 6 ໂມງແລງ ກຸ່ມເພື່ອນຫນຸ່ມກໍຮູ້ສຶກຫິວ ແລະ ເຂົາເຈົ້າຕັດສິນໃຈໄປສູ່ທິດຕາເວັນຕົກຂອງນະຄອນ, ເຊິ່ງແມ່ນເຂດທີ່ຊາວຈີນດຳລົງຊີວິດເປັນຈຳນວນຫລວງຫລາຍດ້ວຍບັນດາຮ້ານອາຫານ ຢ່າງຄັບຄາຫນາແຫນ້ນ. ກຸ່ມເພື່ອນຫນຸ່ມ ຜູ້ໃດກໍຮູ້ສຶກສະຫວາດສະເຫວີຍທີ່ສຸດເມື່ອໄດ້ນັ່ງຮັບປະທານອາຫານເຍື່ອງຕ່າງໆທີ່ແຊບນົວໂດຍຊາວຈີນປຸງແຕ່ງ, ໄດ້ຍິນສຽງທັກທາຍເຊີນແຂກຄົນທີ່ນີ້ມນວນອ່ອນຫວານຂອງນາງສາວຈີນ, ໄດ້ດື່ມເບຍ, ໂອ້ລົມກັນກ່ຽວກັບບັນດາສິ່ງທີ່ຈັບອົກຈັບໃຈໃນລາຍການທ່ອງທ່ຽມມື້ຕໍ່ໄປໃນຍາມຄ່ຳຄຶນຢູ່ Malacca.