(vovworld) - ອາທິດຜ່ານມາ, ພາກພາສາລາວ, ວິທະຍຸກະຈາຍສຽງ ຫວຽດນາມ ໄດ້ຮັບ ຈົດໝາຍ, ອີແມວ, ໂທລະສັບ 7 ສະບັບຈາກທ່ານຜູ້ຟັງລາວ. ໃນລາຍການ “ໂອ້ລົມກັບເພື່ອນລາວ” ມື້ນີ້, ພວກເຮົາຂໍຄັດສະເໜີເນື້ອໃນຈົດໝາຍ ແລະ ຕອບຄຳຖາມເຊິ່ງທ່ານຜູ້ຟັງ, ຜູ້ອ່ານຝາກມາລາຍການ.
ໃນອີແມວຝາກມາລາຍການ, ເພື່ອນໝອນແກ້ວ, ແຂວງ ຈຳປາສັກ ໄດ້ຂຽນວ່າ: “ອາທິດຜ່ານມາ, ຂ້າພະເຈົ້າມີຄວາມປິຕິຊົມຊື່ນຫຼາຍຍ້ອນໄດ້ຮັບບັດອວຍພອນປີໃໝ່ຈາກພາກພາສາລາວ, ວິທະຍຸກະຈາຍສຽງ ຫວຽດນາມ. ເນື່ອງໃນໂອກາດນີ້, ຂ້າພະເຈົ້າກໍຂໍຝາກຄຳອວຍພອນເຖິງພະນັກງານ, ບັນນາທິການເຮັດວຽກຢູ່ວິທະຍຸກະຈາຍສຽງເວົ້າລວມ ແລະ ບັນນາທິການຂອງພາກພາສາລາວເວົ້າສະເພາະ ໃນປີໃໝ່ 2016 ນີ້, ຈົ່ງມີສຸຂະພາບເຂັ້ມແຂງ, ປະຕິບັດສຳເລັດໜ້າທີ່ວຽກງານຂອງຕົນ ແລະ ຈັດລາຍການໃຫ້ມີຄວາມດູດດື່ມກ່ວາອີກເພື່ອຮັບໃຊ້ຜູ້ຟັງ, ຜູ້ອ່ານ. ຂໍຂອບໃຈພວກເພື່ອນຫຼາຍໆທີ່ໄດ້ຝາກບັດອວຍພອນໃຫ້ຂ້າພະເຈົ້າ, ເຖິງວ່າຂອງຂວັນຈະນ້ອຍໆກໍຕາມແຕ່ພັດມັນມີຄວາມໝາຍອັນໃຫຍ່ຫຼວງສຳລັບຂ້າພະເຈົ້າ. ຂ້າພະເຈົ້າຈະແມ່ນຜູ້ຟັງຈົ່ງຮັກພັກດີຂອງພາກພາສາລາວຕະຫຼອດໄປ.”
ສ່ວນເພື່ອນ ລັດດາພອນ, ນະຄອນຫຼວງ ວຽງຈັນ ໄດ້ໂທລະສັບຫາລາຍການ ແລະ ແບ່ງປັນວ່າລາວມັກພາບສາລະຄະດີກ່ຽວກັບ “ຕຸກກະຕານ້ຳ ຫວຽດນາມ” ຫຼາຍ, ເພື່ອນໃຫ້ຮູ້ວ່າ: “ກ່ອນນີ້, ພໍ່ຂອງຂ້າພະເຈົ້າໄດ້ເຮັດວຽກຢູ່ ຫວຽດນາມ, ຍາມພັກແລ້ງຂ້າພະເຈົ້າກໍ່ໄດ້ໄປຢາມພໍ່. ແຕ່ລະປີ, ເມື່ອໄປຢາມພໍ່ ສອງພໍ່ລູກຂ້າພະເຈົ້າເຄີຍໄປເບິ່ງລະຄອນຕຸກກະຕານ້ຳ. ຄາວຍັງນ້ອຍ, ຂ້າພະເຈົ້າບໍ່ຮູ້ພາສາຫວຽດນາມ ຈັກໂຕ, ແຕ່ຍັງມັກເບິ່ງລະຄອນຕຸກກະຕານ້ຳຫຼາຍ, ຍ້ອນຜ່ານກິລິຍາທ່າທາງຂອງຕຸກກະຕານັ້ນຂ້າພະເຈົ້າກໍສາມາດເຂົ້າໃຈເນື້ອໃນບົດລະຄອນໄດ້. ປະຈຸບັນ, ຂ້າພະເຈົ້າໄດ້ເຕີບໃຫຍ່ຫຼາຍແລ້ວ ແລະ ດົນໆບໍ່ມີໂອກາດເບິ່ງລະຄອນຕຸກກະຕານ້ຳ ຫວຽດນາມ ດັ່ງນັ້ນເມື່ອເຫັນພາບສາລະຄະດີໃນແວບໄຊຂອງພວກເພື່ອນ ຂ້າພະເຈົ້າມີຄວາມສະເທືອນໃຈຫຼາຍ ແລະ ຮູ້ສຶກຄືດັ່ງໄດ້ກັບຄືນຄາວເຍົາໄວຂອງຕົນ. ຂອບໃຈພວກເພື່ອນຫຼາຍໆ.”
ອາທິດຜ່ານມາ, ເພື່ອນ ສົມໄຊ, ນະຄອນຫຼວງ ວຽງຈັນ ໄດ້ໂທລະສັບຫາລາຍການໂດຍແບ່ງປັນວ່າ: “ໃນອາທິດ, ມີການເຄື່ອນໄຫວຫຼາຍຢ່າງລະຫວ່າງ ລາວ ແລະ ຫວຽດນາມ ໄດ້ຮັບການຈັດຕັ້ງຂຶ້ນ. ໃນນັ້ນພົ້ນເດັ່ນທີ່ສຸດແມ່ນ ກອງປະຊຸມຄັ້ງທີ 38 ຄະນະກຳມະການລະຫວ່າງລັດຖະບານ ລາວ - ຫວຽດນາມ, ຫວຽດນາມ - ລາວ, ຢູ່ ນະຄອນຫຼວງວຽງຈັນ. ບັນດາແຫຼ່ງຂ່າວກ່ຽວກັບກອງປະຊຸມນີ້ໄດ້ອັບແດດໃນສື່ເອເລັກໂຕນິກທັງຂອງ ລາວ ແລະ ຫວຽດນາມ ເປັນຈຳນວນຫຼວງຫຼາຍ. ນອກຈາກນັ້ນຍັງມີການເຄື່ອນໄຫວພົວພັນແລກປ່ຽນລະຫວ່າງສະຖານທູດລາວ ແລະ ສະຖານທູດ ຫວຽດນາມ ປະຈຳ ມາເລເຊຍ. ຜົນງານຂອງກອງປະຊຸມກໍຄືການເຄື່ອນໄຫວຂອງສະຖານທູດ 2 ປະເທດ ປະຈຳ ມາເລເຊຍ ໄດ້ສະແດງໃຫ້ເຫັນການພົວພັນລະຫວ່າງ 2 ປະເທດນັບມື້ນັບສະໜິດແໜ້ນ, ໂດຍແມ່ນຊາວລາວຄົນໜຶ່ງຂ້າພະເຈົ້າມີຄວາມປິຕິຊົມຊື່ນຫຼາຍຕໍ່ສິ່ງດັ່ງກ່າວ”
 |
ເພື່ອນ ກາບແກ້ວ, ແຂວງ ຫຼວງນ້ຳທາ ໄດ້ຝາກອີແມວເຖິງລາຍການດ້ວຍເນື້ອໃນວ່າ: “ອາທິດຜ່ານມາ, ຂ້າພະເຈົ້າໄດ້ອ່ານບົດກ່ຽວກັບ “ຮູບແບບຜະລິດເຫັດເຟືອງ ຢູ່ແຂວງຊອກຈັງ”, ຂ້າພະເຈົ້າມັກບົດຂຽນນີ້ ແລະ ຢາກໄປໄປຫວຽດນາມໃນທັນທີເພື່ອເຫັນຈັກຕາ ແລະ ຮ່ຳຮຽນເອົາບົດຮຽນຈາກຊາວກະສິກອນຢູ່ທີ່ນີ້. ຂ້າພະເຈົ້າຢາກຖາມຂ່າວຄາວໃດໜຶ່ງກ່ຽວກັບອາກາດ, ການຜະລິດກະສິກຳຢູ່ແຂວງນີ້ແດ່?.”
ເພື່ອນ ກາບແກ້ວ ທີ່ຮັກແພງ, ຊອກຈັງ ແມ່ນແຂວງໜຶ່ງຢູ່ແຄມທະເລ ຂຶ້ນກັບເຂດທົ່ງພຽງແມ່ນ້ຳຂອງ, ຫ່າງຈາກນະຄອນ ໂຮ່ຈີມິນ ປະມານ 231 ກມ. ແຂວງ ຊອກຈັງ ນອນໃນເຂດຮ້ອນ ມີຜົນສະທ້ອນຂອງ ລົມມໍລະສຸມ, ໂດຍໄດ້ແບ່ງເປັນ 2 ລະດູນັ້ນແມ່ນລະດູແຫ້ງ ແລະ ລະດູຝົນ, ໃນນັ້ນລະດູຝົນເລີ່ມແຕ່ເດືອນ 5 ຫາເດືອນ 10 ແລະ ລະດູແຫ້ງແຕ່ເດືອນ 11 ຫາເດືອນ 4 ຂອງປີຕໍ່ໄປ. ອຸນຫະພຸມສະເລ່ຍແຕ່ລະປີຂອງແຂວງ ຊອກຈັງ ແມ່ນປະມານ 26,8 ອົງສາ C, ບໍ່ເຄີຍຖືກນ້ຳຖ້ວມ, ປະລິມານຝົນຕົກສະເລ່ຍແຕ່ລະປີແມ່ນ 1.864 ມມ, ຝົນຕົກຫຼາຍທີ່ສຸດແມ່ນໃນເດືອນ 8, 9, 10, ເອື້ອອຳນວຍຄວາມສະດວກໃຫ້ແກ່ການປູກເຂົ້າ. ດິນຢູ່ແຂວງຊອກຈັງ ອຸດົມສົມບູນ, ເໝາະສົມໃຫ້ແກ່ການພັດທະນາການປູກເຂົ້ານາທາມ, ຕົ້ນໄມ້ກະສິກຳໄລຍະສັ້ນຄື: ຕົ້ນອອຍ, ຕົ້ນຖົ່ວເຫຼືອງ, ສາລີ, ນອກຈາກນັ້ນຍັງມີຕົ້ນກິນໝາກບາງຊະນິດຄື: ໝາກມ່ວງ, ຕົ້ນຖົ່ວລຽນ… ປະຈຸບັນ, ມີຫຼາຍທ້ອງຖິ່ນຢູ່ແຂວງ ຊອກຈັງໄດ້ເຂົ້າຮ່ວມການປູກເຫັດຫຼາຍຊະນິດ ແລະ ລ້ວນແຕ່ນຳມາເຊິ່ງປະສິດທິຜົນໃຫ້ແກ່ຊາວກະສິກອນລາຍ. ທີ່ກ່າວມາຊ້າງເທິງແມ່ນຂໍ້ມູນບາງຢ່າງກ່ຽວກັບອາກາດ ແລະ ການຜະລິດກະສິກຳຢູ່ແຂວງ ຊອກຈັງ, ຫວັງວ່າບັນດາແຫຼ່ງຂ່າວນີ້ຈະຊ່ວຍໃຫ້ເພື່ອນ ກາບແກ້ວ ໃນວຽກງານຂອງຕົນ.
ດັ່ງທີ່ກ່າວມາຂ້າງເທິງແມ່ນເນື້ອໃນຄຳເຫັນ ແລະ ຄຳຖາມຂອງຜູ້ຟັງບາງທ່ານທີ່ຝາກມາລາຍການໃນອາທິດຜ່ານມາ. ຖ້າຫາກ ຜູ້ຟັງ, ຜູ້ອ່ານທ່ານໃດມີຄວາມສົນໃຈຕໍ່ບັນຫາໃດໜຶ່ງ, ກໍ່ສາມາດຝາກຈົດໝາຍມາຍັງລາຍການພວກເຮົາໄດ້ເລີຍໂດຍຈ່າໜ້າຊອງວ່າ: ພາກພາສາລາວ, ວິທະຍຸກະຈາຍສຽງຫວຽດນາມ, ເຮືອນເລກທີ 45 ຖະໜົນ ບ່າຈ້ຽວ, ຮ່າໂນ້ຍ. ຫຼືໂທລະສັບໂດຍກົງກໍ່ໄດ້ຕາມເບີໂທ 0084.43.8256631 ຫຼື ອີແມວ laovov@yahoo.com, laovov5@gmail.com.