ຄັດສະເໜີ ແລະ ຕອບບາງຄຳຖາມທີ່ໜ້າສົນໃຈ
Dieu hong -
ອາທິດຜ່ານມາ, ພາກພາສາ ລາວ ວິທະຍຸກະຈາຍສຽງ ຫວຽດນາມ ໄດ້ຮັບ ອີແມວ, ໂທລະສັບ, ຈົດໝາຍ 6 ສະບັບຈາກທ່ານຜູ້ຟັງລາວ. ໃນນັ້ນ, ມີບາງຈົດໝາຍໄດ້ຍ້ອງຍໍບົດຕ່າງໆຂອງລາຍການ, ນອກນັ້ນ, ທ່ານຜູ້ຟັງກໍ່ຕັ້ງບາງຄຳຖາມຈຳນວນໜຶ່ງ, ກ່ຽວກັບນະໂຍບາຍຕ່າງໆຂອງ ຫວຽດນາມ. ໃນລາຍການ “ໂອ້ລົມກັບເພື່ອນລາວ” ພາກນີ້, ພວກເຮົາຂໍຄັດສະເໜີ ແລະ ຕອບບາງຄຳຖາມທີ່ໜ້າສົນໃຈ. ເຊີນທ່ານຕິດຕາມຮັບຟັງ.
ທ່ານ ມາໄລວັນ, ແຂວງ ບໍລິຄຳໄຊ ໄດ້ສົ່ງຈົດໝາຍມາຍັງລາຍການ ໂດຍໃຫ້ຮູ້ວ່າ: ເມື່ອໄດ້ຮັບຟັງບົດ “ຊາຍຫນຸ່ມຄົນຫນຶ່ງໄປເຖິງ 10 ປະເທດສະມາຊິກອາຊຽນ ເພື່ອໂຄສະນາ ຫວຽດນາມ”, ຊາຍໜຸ່ມຊາວ ຫວຽດນາມ ຄົນນັ້ນ, ອາຍຸຍັງໜຸ່ມຢູ່, ພຽງ 26 ປີ ເທົ່ານັ້ນ. ໃນການເດີນທາງມາເປັນເວລາ 30 ວັນຜ່ານ 10 ປະເທດ ອາຊຽນ, ປະຕິບັດການສຳພາດປະຊາຊົນປະເທດປະຈຳຖິ່ນເກືອບ 100 ຄັ້ງ ເພື່ອຮັບຟັງເຂົາເຈົ້າຕີລາຄາແນວໃດ, ມີຄວາມຄິດແນວໃດ ແລະ ເຂົ້າໃຈຄືແນວໃດກ່ຽວກັບຫວຽດນາມ. ຂ້າພະເຈົ້າ ມັກບົດນີ້ຫຼາຍ ແລະ ຕີລາຄາສູງຈິດໃຈຂອງເພື່ອນໜຸ່ມ ຫວຽດນາມ ທີ່ສຸດ. ນອກຈາກນັ້ນແລ້ວ, ຜ່ານບົດ “ນັກສຶກສາ ອາສາສະໝັກ ຟູ໋ອຽນ ມຸ່ງໄປສູ່ເຂດຊົນນະບົດ”, ຂ້າພະເຈົ້າກໍ່ເຫັນໄດ້ລັກສະນະປະຈັນບານຂອງລຸ້ນໜຸ່ມ. ຜ່ານການເຄື່ອນໄຫວອາສາສະໝັກຕ່າງໆຂອງນັກສຶກສາ ຟູ໋ອຽນ ກໍ່ເຮັດໃຫ້ໂສມໜ້າເຂດຊົນນະບົດ ໄດ້ຮັບການປົວແປງພໍສົມຄວນ.
ໃນ ອີແມວ ຝາກເຖິງລາຍການ, ເພື່ອນ ວາງລາວລີ, ແຂວງ ວຽນຈັນ ໃຫ້ຮູ້ວ່າ: ຂ້າພະເຈົ້າໄດ້ຮັບຟັງບົດກ່ຽວກັບ ພະລາດຊະວັງ ທັງລອງ - ມໍລະດົກວັດທະນະທຳໂລກ. ພິເສດກ່ວາໝູ່ແມ່ນການພັນລະນາຢ່າງລະອຽດຂອງສາດສະດາຈານປະຫວັດສາດທ່ານໜຶ່ງກ່ຽວກັບພະລາຊະວັງນີ້ວ່າ: ບັນດາປູຊະນີຍະສະຖານທີ່ໄດ້ຄົ້ນພົບຢູ່ທີ່ນີ້ຄືດັ່ງປື້ມຫົວຫນຶ່ງທີ່ໄດ້ຮັບການເປີດອອກ. ຢູ່ໃຕ້ພື້ນດິນເລິກປະມານ 4 ແມັດ ແມ່ນຊັ້ນສະແດງໃຫ້ເຫັນພື້ນຖານວັດທະນະທຳວັດຖຸບູຮານຂອງກຳແພງ ດ້າຍລາ, ໄລຍະທຳອິດຂອງ ທັງລອງ. ໃຕ້ພື້ນດິນ 3 ແມັດ ແມ່ນຊັ້ນວັດທະນະທຳສະໄຫມລາຊະວົງ ລີ (ສັດຕະວັດທີ 11-12), ສ່ວນຢູ່ໃຕ້ພື້ນດິນ 2 ແມັດ ແມ່ນຊັ້ນວັດທະນະທຳສະໄຫມລາຊະວົງ ເຈີນ (ແຕ່ສັດຕະວັດທີ 13). ບົດຂຽນດັ່ງກ່າວເຮັດໃຫ້ຂ້າພະເຈົ້າມີຄວາມປະທັບໃຈຫຼາຍ, ຂ້າພະເຈົ້າມັກບົດນີ້ທີ່ສຸດ. ຜ່ານບົດຂຽນດັ່ງກ່າວຂ້າພະເຈົ້າກໍ່ສາມາດນຶກເຫັນສ່ວນໃດໜຶ່ງຂອງ ພະລາດຊະວັງ ທັງລອງ.
ພະລາຊະວັງທັງລອງ
ສ່ວນທ່ານ ຄຳຫຼ້າ, ແຂວງ ໄຊຍະບູລີ ໄດ້ຝາກອີແມວ ມາຍັງລາຍການດ້ວຍເນື້ອໃນວ່າ: ໄລຍະມໍ່ໆມານີ້, ເມື່ອຮັບຟັງຂ່າວ ແລະ ບົດຕ່າງໆຂອງພາກພາສາລາວ, ຂ້າພະເຈົ້າເຫັນວ່າມີຂ່າວຕ່າງໆກ່ຽວກັບແຜນຮ່າງ “ພັດທະນາການແພດທະເລ, ໝູ່ເກາະ ຫວຽດນາມ ຮອດປີ 2020”, ຂ້າພະເຈົ້າຢາກຮູ້ໜ້ອຍໜຶ່ງກ່ຽວກັບແຜນຮ່າງດັ່ງກ່າວໄດ້ບໍ່?
ທ່ານ ຄຳຫຼ້າທີ່ ເຄົາລົບ, ວັນທີ 7/2/2013, ທ່ານນາຍົກລັດຖະມົນຕີ ຫວຽດນາມ ໄດ້ຕົກລົງອະນຸມັດຜ່ານແຜນຮ່າງ “ພັດທະນາການແພດທະເລ, ໝູ່ເກາະ ຫວຽດນາມ ຮອດປີ 2020” ດ້ວຍເນື້ອໃນຕົ້ນຕໍ່ດັ່ງຕໍ່ໄປນີ້:
ກ່ຽວກັບຈຸດໝາຍຂອງແຜນຮ່າງ: ແມ່ນປັບປຸງເຄືອຂ່າຍສາທາລະນະສຸກມີຄວາມສາມາດຢ່າງພຽງພໍ ແລະ ເໝາະສົມກັບລັກສະນະພິເສດ, ສະເພາະໃນການເຄື່ອນໄຫວປົກປ້ອງ, ເບິ່ງແຍງດູແລສຸຂະພາບຂອງປະຊາຊົນເຂດທະເລ, ໝູ່ເກາະ. ພັດທະນາແຫຼ່ງຊັບພະຍາກອນມະນຸດການແພດຄົບຖ້ວນດ້ານຈຳນວນ ແລະ ຄຸນນະພາບ, ຕອບສະໜອງຄວາມຮຽກຮ້ອງຕ້ອງການປົກປ້ອງ, ເບິ່ງແຍງສຸຂະພາບຂອງປະຊາຊົນເຂດທະເລ, ໝູ່ເກາະ. ເພີ່ມທະວີກຳລັງຄວາມສາມາດປະຖົມພະຍາບານ ແລະ ພະຍາບານສຸກເສີນ, ຂົນສົ່ງ, ກວດ ແລະ ປິນປົ່ວພະຍາດ, ປ້ອງກັນ, ຕ້ານໂລກພະຍາດ ແລະ ບັນດາພະຍາດສະເພາະສຳລັບເຂດທະເລ, ໝູ່ເກາະ. ປະກອບຄຳຮູ້ໃຫ້ແກ່ປະຊາຊົນເຂດທະເລ, ໝູ່ເກາະເພື່ອສາມາດປົກປ້ອງສຸຂະພາບເອງ, ..... ແລະ ນຳຄົນເຈັບເຖິງບັນດາຮາກຖານພະຍາບານສຸກເສີນຢູ່ເຂດທະເລ, ໝູ່ເກາະ. ປະຕິບັດບັນດາຂໍ້ກຳນົດສາກົນກ່ຽວກັບຮັບປະກັນການແພດໃຫ້ການເຄື່ອນໄຫວບົນທະເລຢ່າງຄົບຖ້ວນ.
ບັນດາຄາດໝາຍຕົ້ນຕໍ່ຮອດປີ 2020 ຄື: ປະກາດໃຊ້ມາດຕະຖານກ່ຽວກັບການແພດເຂດທະເລ, ໝູ່ເກາະ. ບຳລຸງສ້າງທ່ານໝໍກ່ຽວກັບການແພດທະເລເພື່ອມີຄວາມສາມາດພະຍາບານສຸກເສີນ, ກວດ ແລະ ປິນປົ່ວບັນດາພະຍາດສະເພາະເຂດທະເລ... 100% ຈຳນວນສູນການແພດສຳຮອງຂອງບັນດາແຂວງ, ນະຄອນແຄມທະເລ ແລະ ແຕ່ລະຂະແໜງເສດຖະກິດທະເລ, ຄົມມະນາຄົມຂົນສົ່ງ, ປ້ອງກັນຕ້ານພະຍາດອາຊີບ, ປ້ອງກັນ, ຕ້ານພະຍາດໃຫ້ປະຊາຊົນ, ກຳລັງແຮງງານເຂດທະເລ, ໝູ່ເກາະ. 100% ຈຳນວນຄົນງານຢູ່ບັນດາກຳປັ່ນ, ເຮືອນຮ້ານມີຄວາມຮູ້ຢ່າງພຽງພໍເພື່ອປົກປ້ອງສຸຂະພາບເອງ. 100% ຈຳນວນກຳປັ່ນຂົນສົ່ງສິນຄ້າບົນທະເລ ປະຕິບັດບັນດາຂໍ້ກຳນົດສາກົນກ່ຽວກັບການຮັບປະກັນການແພດທະເລ.
ຖ້າຫາກຜູ້ໃດມີຄວາມສົນໃຈ ແລະ ຢາກປະກອບຄຳເຫັນໃຫ້ລາຍການທ່ານສາມາດຝາກຈົດໝາຍມາຍັງລາຍການໂດຍຈ່າໜ້າຊອງວ່າ: ວິທະຍຸກະຈາຍສຽງຫວຽດນາມ-ພາກພາສາລາວ-ເຮືອນເລກທີ 45 ຖະໜົມບາຈ້ຽວ-ຮ່າໂນ້ຍ ຫຼືໂທລະສັບມາໂດຍກົງຕາມເບີໂທ: 0084.43.825.6631, ອີແມວ: Laovov@yahoo.com ຫຼື laovov5@gmail.com. ພວກເຮົາຍິນດີຕ້ອນຮັບ ແລະ ພ້ອມແລ້ວທີ່ຈະຕອບຄຳຖາມຂອງທ່ານທຸກປະການ. ຂໍຂອບໃຈທ່ານທີ່ໄດ້ຕິດຕາມຮັບຟັງ ແລະ ຊົມລາຍການຂອງພວກເຮົາ.
Dieu hong